Dios Tin un Nòmber?

Kontestanan komun:

▪ “Su nòmber ta Hesus.”

▪ “Mi no sa.”

Kiko Hesus a bisa?

▪ “Pues, hasi orashon anto asin’akí: ‘Nos Tata ku ta den shelu, bo nòmber sea santifiká.’” (Mateo 6:9) Hesus tabata sa ku Dios tin un nòmber.

▪ “Mi a hasi bo nòmber konosí na nan i lo mi hasié konosí, pa e amor ku kual bo a stima mi por ta den nan i ami den nan.” (Juan 17:26) Hesus a hasi Dios su nòmber konosí.

▪ “Boso lo no mira mi te ora ku e tempu yega ku boso ta bisa: ‘Bendishoná ta esun ku ta bin den e nòmber di [“Yehova,” NW]!’” (Lukas 13:35; Salmo 118:26, Salmonan y Proverbionan) Hesus a usa Dios su nòmber.

DIOS mes ta bisa nos su nòmber. “Ami ta Yehova. Esei ta mi nòmber.” * (Isaias 42:8, NW) E nòmber hebreo ku Dios a duna su mes, esta, YHWH, nos konosé na papiamentu komo Yehova. Kisas lo bo keda sorprendí ku e nòmber hebreo úniko akí ta aparesé míles di bes den manuskritonan original di Beibel. De echo, Beibel ta menshoná e nòmber akí mas ku kualke otro nòmber.

Si bo hasi e pregunta, “Kon yama Dios?” algun hende lo kontestá: “Señor.” Pero eigenlijk esei ta meskos ku si bo hasi e pregunta, “Ken a bira promé minister?” i nan kontestá: “e kandidato.” Niun di e kontestanan akí no ta bisa bo mashá, pasobra nan no ta nòmber.

Dikon Dios a bisa nos su nòmber? Wèl, el a hasi esei pa nos siña konos’é mas mihó. Laga nos wak un ehèmpel. Dependé di e sirkunstansia, nos por yama un hende hòmber Mener, Hefe, Tata òf Opa. E títulonan akí ta bisa algu di e hende. Pero e nòmber di e persona ta pone nos kòrda riba tur loke nos sa di e hende akí. Asina tambe, títulonan manera Señor, Todopoderoso, Tata i Kreador ta pone nos pensa riba diferente kos ku Dios a hasi. Pero ta su nòmber, Yehova, so ta pone nos kòrda riba tur kos ku nos sa di dje. Bo por bisa ku bo konosé Dios si bo no sa su nòmber?

Ta importante pa no solamente konosé su nòmber sino tambe pa usa e nòmber ei. Dikon? Pasobra Beibel ta bisa nos: “Ken ku invoká e nòmber di SEÑOR lo ta salbá.”​—Romanonan 10:13; Joel 2:32.

[Nota]

[Komentario na página 5]

Dependé di e sirkunstansia, nos por yama un hende hòmber Mener, Hefe, Tata òf Opa. Pero e nòmber di e persona ta pone nos kòrda tur loke nos sa di e hende akí