Pe Iai se Suafa o le Atua?

Tali masani:

▪ “O lona suafa o le Alii.”

▪ “E leai sona suafa totino.”

O ā fetalaiga a Iesu?

▪ “Ia faapea ona outou tatalo: ‘Lo matou Tamā e o i le lagi, ia faapaiaina lou suafa.’” (Mataio 6:9) Na talitonu Iesu e iai le suafa o le Atua.

▪ “Ua ou faailoa atu lou suafa iā i latou, ma saga faailoa atu, ina ia iā i latou le alofa lea na e alofa mai ai iā te aʻu, ma ou autasi ai ma i latou.” (Ioane 17:26) Sa faalauiloa e Iesu le suafa o le Atua.

▪ “Tou te lē toe vāai mai lava iā te aʻu seʻia outou faapea ane, ‘E manuia o ia o lē ua maliu mai i le suafa o Ieova.’” (Luka 13:35; Salamo 118:26) Sa faaaogā e Iesu le suafa o le Atua.

UA TAʻU mai e le Atua iā i tatou lona suafa. Na tusia lana fetalaiga: “O aʻu o Ieova, o loʻu igoa lea.” * (Isaia 42:8) Atonu e faateʻia oe auā e faitau afe ona aliaʻe mai lenei suafa mataʻina Eperu i tusitusiga anamua o le Tusi Paia. E aupito i tele taimi e aliaʻe ai lenei suafa i le Tusi Paia nai lo se isi lava igoa.

I le fesili e faapea, “O ai le suafa o le Atua?” atonu o le a tali mai nisi, “O le Alii.” O le mea moni, e leai se uiga o lenā tali auā e tutusa lava ma le tali o le fesili lenei, “O ai na malo i le palota?” ona e tali atu lea e faapea, “o le sui tauvā.” E lē manino uma na tali, auā o le “Alii” ma le “sui tauvā” e lē o ni igoa.

Aiseā ua faailoa mai ai e le Atua lona suafa iā i tatou? Sa ia faia faapea ina ia tatou iloa atili ai o ia. O se faataʻitaʻiga o lenei mea, e mafai ona taʻua se tagata o Lau Afioga, o le Pule, Tamā, po o Papa, ae faalagolago i le tulaga. E faaalia mai e nei taʻu se mea i lenā tagata. Ae o le igoa o le tagata, e faamanatu mai ai mea uma e tatou te iloa e faatatau iā te ia. O lea la, o faalupega e pei o le Alii, Lē e ona le malosi uma, Tamā, ma Lē na faia mea uma, ua faauaʻi atu ai manatu i vala eseese o galuega a le Atua. Ae e na o lona suafa totino, o Ieova, e faamanatu mai ai mea uma lava e tatou te iloa e faatatau iā te ia. E faapefea ona e iloa moni le Atua pe a e lē iloa lona suafa?

E tāua lo tatou iloa, ma faaaogāina lenā suafa. Aiseā? Auā o loo faapea mai le Tusi Paia: “E faaolaina i latou uma o ē e valaau i le suafa o Ieova.”—Roma 10:13; Ioelu 2:32.

[Faaopoopoga i lalo]

[Faamatalaga faaopoopo i le itulau 6]

E mafai ona taʻua se tagata o Lau Afioga, o le Pule, Tamā, po o Papa, ae faalagolago i le tulaga. Ae e faamanatu mai e lona suafa mea uma lava e tatou te iloa e faatatau iā te ia