Bible Okpụhọde Mme Owo

Nso ikanam n̄wan emi ekesidịbede ada daimọn aka idụt en̄wen, emi ekesinyụn̄ eyịpde n̄kpọ eteutom esie akabade owoutom emi anamde akpanikọ? Nso ikan̄wam n̄wan emi okodomode ikaba ndiwot idem okụt ke uwem enyene uduak? Owo emi ekesikpade mmịn ekesinyụn̄ adade n̄kpọsọn̄ ibọk ke idiọk usụn̄ akasan̄a didie etre ndiọi edinam emi? Kere ban̄a se mmọ ẹtịn̄de.

ENYỊN̄: MARGARET DEBRUYN

ISUA EMANA: 45

IDỤT: BOTSWANA

UTỌ OWO EMI ENYE EKEDIDE: ANYAM N̄KPỌMBET YE INỌ

NTE N̄KESIDUDE UWEM: Ete mi okoto Germany edi ekem edidi eyenisọn̄ Usụk Usụk Edem Usoputịn Africa (emi ẹkotde Namibia idahaemi). Eka mi okoto ekpụk Mangologa ke Botswana. N̄kamana ke Gobabis ke Namibia.

Ke iduọk isua 1970, ukara idụt South Africa ẹma ẹnen̄ede ẹkara Namibia ẹnyụn̄ ẹnen̄ede ẹnam ẹnịm ibet oro akakpande mbakara ndibuaha ye mbubịt owo ke kpukpru obio ye obio-in̄wan̄. Sia ete mi ekedide mbakara edi eka mi edi obubịt owo, ẹma ẹdọhọ mmọ ẹdian̄ade. Ntre, Mama ama ada mi ye nditọeka mi afiak ọnyọn̄ okodụn̄ ke Ghansi ke Botswana.

Ke 1979, mma n̄ka n̄kodụn̄ ye eteufọk ye ekaufọk mi ke Lobatse ke Botswana man n̄ka ufọkn̄wed sekọndri n̄kụre. Ekem, mma nnyene utom nte ewetn̄wed ke itie udiọn̄ ubomisọn̄. Ekikere emi n̄kadade n̄kpon ekedi ke Abasi isehe iban̄a mme owo, ke owo ekpenyene ndinam se ededi eke enye enyenede ndinam—eti m̀mê idiọk—man ese aban̄a idemesie ye ubon esie.

Sia n̄kakamade akwa itie ke itieutom, mma nsida ifet oro nyịp mme n̄kpọ ubomisọn̄ eteutom mi. Ini ekededi emi tren ekebede okoneyo ke edem nnyịn, ami ye nsan̄a mi ima isidụk inyụn̄ iyịp n̄kpọ ekededi oro ikekemede. Mma nsidịbe n̄ko nda daimọn, gold, ye mbuaha okpoho emi ẹkedide n̄kpọmbet mbe ndụk idụt en̄wen. Mma ntọn̄ọ ndida n̄kpọsọn̄ ibọk, nnam n̄kpọ afai afai, nnyụn̄ nnyene ediwak ndantie.

Ekem, ke 1993, ẹma ẹmụm mi nte nyịpde n̄kpọ ẹnyụn̄ ẹsio mi ke utom. Mme inua-okot nsan̄a mi ẹma ẹfen̄e ẹkpọn̄ mi sia ẹkekerede ke ẹkeme ndimụm mmimọ n̄ko. Oro ama abiak mi etieti, nnyụn̄ mbiere ke ndiberike edem ke baba owo kiet.

 NTE BIBLE OKOKPỤHỌREDE UWEM MI: Ke 1994, mma nsobo ye Tim ye Virginia, Mme Ntiense Jehovah emi ẹkedide isụn̄utom. Mmọ ẹma ẹsinyene nneme ye ami ke obufa itieutom mi, ẹsikpep mi Bible hour kiet ke ini udia uwemeyo. Ekem, ke ini n̄kekerede ke mmekeme ndiberi edem ke mmọ, mma nnyịme mmọ ẹsidi ufọk ẹdikpep mi Bible.

Ikebịghike mma ndifiọk ke edieke anade nnam se inemde Abasi esịt, ke nnyene ndikpụhọde usụn̄ uwem mi. Ke uwụtn̄kpọ, 1 Corinth 6:9, 10 ama anam mi mfiọk ke “mbon use, . . . mme inọ, mbon idiọkitọn̄, mme akpammịn, mme osụn̄i isụn̄i, ye mbon n̄kanubọk ididaha obio ubọn̄ Abasi inyene.” Mma ntre kpukpru ndiọi edu emi. Mma ntre inọ. Mma ntre ndụk ye n̄ka ubiatibet oro n̄kodụkde toto ke uyen. Ekem, Jehovah ama an̄wam mi ntre ndụk ye kpukpru ndantie mi.

UFỌN ORO MBỌDE: Mmenen̄ede nsịn ukeme n̄kpep ndisụhọde esịt nnyụn̄ mfiorike n̄kpo ke ini nditọ mi ẹnamde se idiọkde. (Ephesus 4:31) Nsidomo ndineme se itịbede ifụre ifụre. Ndineme n̄kpọ ntem ada nti utịp edi onyụn̄ anam ubon nnyịn enen̄ede adiana kiet.

N̄kani ufan mi, ye idem mme mbọhọidụn̄ mi, ẹmekụt ke mmimọ imekeme ndiberi edem ke idem mi. Idahaemi ndi owoutom emi anamde akpanikọ, oro ẹnyụn̄ ẹkemede ndiberi edem, nnyụn̄ nse mban̄a mme n̄kpọutom ye okụk uforo uforo. Ntem, mmekeme ndise mban̄a idemmi ke adan̄aemi ndade ekese ini mi n̄n̄wam mbon en̄wen ẹkpep Bible. Nda ofụri esịt nnyịme se ẹtịn̄de ke Mme N̄ke 10:22 ẹte: “Edi ufọn Jehovah ofori owo, enye inyụn̄ idianke afanikọn̄ ke esịt.”

ENYỊN̄: GLORIA ELIZARRARÁS DE CHOPERENA

ISUA EMANA: 37

IDỤT: MEXICO

KE INI EDEM: AMA ODOMO NDIWOT IDEM

NTE N̄KESIDUDE UWEM: Ẹkebọk mi ke Naucalpan emi edide obio uforo ke Stet Mexico. Mma nsọn̄ ibuot etieti nnyụn̄ nsima ndika usọrọ toto ke uyen. N̄kọtọn̄ọ ndin̄wọn̄ sika ke ini n̄kedide isua 12, ndin̄wọn̄ mmịn ke ini n̄kedide isua 14, ye ndida n̄kpọsọn̄ ibọk ke ini n̄kedide isua 16. Mma n̄kpọn̄ ufọk ke isua ifan̄ ẹma ẹkebe. Kpukpru ufan mi ẹketo ubon mfịna, emi ẹsitịmde m̀mê ẹsitọkde mmọ. Uwem ama odorode mi tutu ndomo ikaba ndiwot idem.

Ke ini n̄kedide isua 19, mma ntọn̄ọ ndinam utom nte owo emi ẹsidade ẹsuan etop n̄kpọurua. Emi ama anam mmehe ye ikpọ owo ukara ye mme ọwọrọetop ọkwọikwọ ye mbon edinam senima. Ke akpatre, mma ndọ ebe nnyụn̄ nnyene nditọ, edi ami n̄kesinam kpukpru ubiere ke ubon nnyịn. Mma n̄ka iso ndin̄wọn̄ sika nnyụn̄ n̄n̄wọn̄ mmịn, nnyụn̄ mma ndika edinam. N̄kesitịn̄ ikọ ntaha ntaha, nnyụn̄ nsima nditịn̄ ikọ idiọk mbubru. Mma nsisọp iyatesịt etieti.

Ata ediwak owo oro n̄kemekde ndida ndụk nsan̄a ẹkedu uwem ntre n̄ko. Mmọ ẹkesida ke mmenyene kpukpru se owo oyomde. Edi uwem mi okosụk etie ukpọk ukpọk, inyeneke uduak.

 NTE BIBLE OKOKPỤHỌREDE UWEM MI: Mma ntọn̄ọ ndikpep Bible ye Mme Ntiense Jehovah ke 1998. Bible ama ekpep mi ke uwem enyene uduak. Mma n̄kpep ke Jehovah Abasi ọn̄wọn̄ọ ndinam isọn̄ afiak edi Paradise, nte ke enye ayanam mme akpan̄kpa ẹset, ye nte ke ami mmekeme nditiene mbọ mme edidiọn̄ emi.

Mma n̄kpep n̄ko ke usụn̄ ndiwụt ke mmama Abasi edi ndikop uyo esie. (1 John 5:3) Enye emi ama ọsọn̄ mi ke ntọn̄ọ ntọn̄ọ sia akananam nnyịmeke ndibọ ndausụn̄. Nte ededi, ke akpatre, mma ndifiọk ke n̄kemeke ndika iso nda idemmi usụn̄. (Jeremiah 10:23) Mma mbọn̄ akam nnọ Jehovah nte ada mi usụn̄. Mma mben̄e enye an̄wam mi ndu uwem ekekem ye mme edumbet esie onyụn̄ an̄wam mi n̄kpep nditọ mi ẹkûdu uwem nte ami n̄kodude.

Ama ọsọn̄ mi etieti ndikpụhọde usụn̄ uwem mi, edi mma ntọn̄ọ ndinam item oro ẹwetde ke Ephesus 4:22-24 ẹte: “[Ẹsio] akani owo ẹduọk emi asan̄ade ekekem ye akani ido uwem mbufo ke eyo oko . . . [ẹnyụn̄] ẹmen obufa owo ẹsịne emi ẹkebotde nte ekemde ye uduak Abasi ke ata edinen ido ye akpanikọ.” Ami ndimen obufa owo nsịne ọkọwọrọ ndikpọn̄ mme utọ ndek ndek ido nte edin̄wọn̄ sika, ndien n̄kenyene ndikpep nditre nditịn̄ ndek ndek ikọ. Ama ekpere ndida mi isua ita mbemiso n̄kanamde ukpụhọde oro ekemde ndina baptism nte kiet ke otu Mme Ntiense Jehovah.

Ke adianade do, mma ntọn̄ọ ndinen̄ede nnam utom mi nte n̄wanndọ ye eka. Mma ntọn̄ọ ndinam item oro ẹnọde ke 1 Peter 3:1, 2 ẹte: “Mbufo iban, ẹsụk idem ẹnọ mme ebe mbufo, man, edieke owo mmọ ekededi mîsụkke ibuot inọ ikọ Abasi, ẹkpedụri mmọ ẹda itoho ke ikọ edi oto ke edu uwem iban mmọ, koro ẹkụtde edisana edu uwem mbufo ọkọrọ ye ntotụn̄ọ ukpono.”

UFỌN ORO MBỌDE: Mmọkọm Jehovah etieti sia idahaemi mmọfiọk ke uwem enen̄ede enyene uduak. Ami ndi ata eti owo idahaemi ndien mbọk nditọ mi ke usụn̄ oro enen̄erede ọfọn akan nte ẹkebọkde mi. Ndusụk ini esịt esibiom mi ke ntak se n̄kanamde ke ini edem, edi Jehovah ọfiọk esịt mi. (1 John 3:19, 20) Ke akpanikọ, ndidu uwem nte ekemde ye mme edumbet Bible emekpeme mi ọbiọn̄ọ afanikọn̄ onyụn̄ ọnọ mi ifụre.

ENYỊN̄: JAILSON CORREADE OLIVEIRA

ISUA EMANA: 33

IDỤT: BRAZIL

UTỌ OWO EMI ENYE EKEDIDE: AKPAMMỊN YE ADA N̄KPỌSỌN̄ IBỌK KE IDIỌK USỤN̄

NTE N̄KESIDUDE UWEM: N̄kamana ke Bagé, obio Brazil emi n̄kpọ nte owo 100,000 ẹdụn̄ọde; enye odu ke adan̄a Brazil ye Uruguay. Akpan mbubehe do ekedi utomin̄wan̄ ye ubọk enan̄. Ẹkebọk mi ke obio ubuene emi otu mme abiatibet ẹkesiduọde obom, ndien ukpammịn ye uda n̄kpọsọn̄ ibọk ẹkedi ọsọ n̄kpọ ke otu n̄kparawa owo.

Ke mma n̄kokụre ufọkn̄wed sekọndri, mma ntọn̄ọ ndin̄wọn̄ mmịn ye ikọn̄ekpo, nnyụn̄ nsibre ikwọ ọkpọsọn̄ n̄kukwak. N̄kenịmke ke Abasi odu. N̄kekere ke kpukpru ndutụhọ ye  ndutịme oro ẹdude ke ererimbot ẹwụt ke Abasi idụhe.

N̄kesibre kita nnyụn̄ nsiwet ikwọ, ndien n̄kesiwak ndida ikwọ oro n̄wetde nto se n̄kotde ke n̄wed Ediyarade. N̄kaikwọ mi ikoforoke nte n̄kekerede, ntre mma n̄ka iso ndidọdiọn̄ nda n̄kpọsọn̄ ibọk nte efre-uwa. N̄kọdọn̄ke enyịn m̀mê nyakpa edieke ndade n̄kaha. Edida n̄kpọsọn̄ ibọk n̄kaha ama owot ediwak nta ikwọ oro n̄kadade nte abasi.

N̄kesibuọt eka ete mi oro ekemende mi akama okụk nda ndep n̄kpọsọn̄ ibọk emi. Mma nsisu nsu ke ini enye obụpde mi se ndidade okụk nnam. Se idiọkde ikan edi ke mma ndia n̄kodụk ubụpekpo. Mma mma mfọni etieti, sia n̄kekerede ke emi ayanam mi n̄wet ndinem ikwọ.

NTE BIBLE OKOKPỤHỌREDE UWEM MI: Ke mma n̄kọtọn̄ọ ndikpep Bible nnyụn̄ ndụk mbono esop Mme Ntiense Jehovah, edu ye ekikere mi ẹma ẹtọn̄ọ ndikpụhọde. Mma ntọn̄ọ ndima uwem nnyụn̄ n̄kop inemesịt. Obufa edu emi ama anam mfat anyan idet mi. N̄kayak enye ọkọri nte idiọn̄ọ iyatesịt ye nsọn̄ibuot. Ekem, mma ndifiọk ke edieke nyomde Abasi ama mi, ke akana ntre ukpammịn, n̄kpọsọn̄ ibọk, ye sika. Mma n̄kụt n̄ko ke oyom n̄kpụhọ orụk ikwọ oro n̄kesimade.

Akpa ini oro n̄kodụkde mbono esop Mme Ntiense Jehovah, mma n̄kụt ibuotikọ N̄wed Abasi oro ẹkewetde ẹdian ke ibibene. Ẹkeda enye ẹto Mme N̄ke 3:5, 6, emi ọdọhọde ete: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.” Ndikere mban̄a itie N̄wed Abasi oro ama anam mi nnịm ke edieke nyakde, ke Jehovah ayan̄wam mi n̄kpụhọde uwem mi.

Edi ndikpụhọde idiọk usụn̄ uwem oro ama ekemehe mi nnyụn̄ ntre ukpammịn ye n̄kpọsọn̄ ibọk eketie mi nte ndisịbe ubọk mi nduọk. (Matthew 18:8, 9) N̄kpekekemeke ndinam orụk ukpụhọde oro nsịtnsịt. Mma mfiọk ke oro ikpọfọnke ye ami. Ntre, mma ntre ofụri idiọk edu oro isokiet. Mma n̄kpọn̄ n̄ko kpukpru ebiet ye mme owo oro ẹkpenamde mi mfiak ntọn̄ọ ndiọi edu oro.

Mma n̄kpep ndikop inemesịt ke mme n̄kpọ oro nnamde, ntiehe n̄kere se mmen̄kanamke ọfọn. Mma n̄kere ke edi n̄kpọ ukpono ndisana idem nnyụn̄ nnyene edisana ido uwem, emi edinamde mi nnyene eti idaha ke iso Jehovah. Mma mbọn̄ akam nnọ Jehovah enye onyụn̄ an̄wam mi mbak ndikere mban̄a akani usụn̄ uwem mi, edi ndori enyịn ke ini iso. Ndusụk ini, mma nsifiak n̄ka akani usụn̄ uwem mi. Edi mma n̄ka iso nyịre ndikpep Bible ye ada ukpepn̄kpọ mi, okposụkedi emi idem ekesimemde mi ndusụk ini ke ntak ukpammịn.

Ndikpep akpanikọ emi aban̄ade Abasi ke Bible—nte ke enye ekere aban̄a nnyịn owo kiet kiet, nte ke enye oyosobo ido ukpono nsu, ye nte ke enye ke ọnọ utom ukwọrọikọ emi ẹnamde idahaemi ke ofụri ererimbot ibetedem—ama esịne ifiọk. (Matthew 7:21-23; 24:14; 1 Peter 5:6, 7) Ke akpatre, mma mbiere ndiyak uwem mi nnọ Abasi. N̄koyom ndiwụt esịtekọm mban̄a kpukpru se enye anamde ọnọ mi.

UFỌN ORO MBỌDE: Uwem mi enyene uduak idahaemi. (Ecclesiastes 12:13) Ndien idahaemi, utu ke ndibọbọ ubon mi n̄kpọ, nsikam nnọnọ mmọ. Mma nneme nti n̄kpọ oro n̄kekpepde ke Bible nnọ eka ete mi, ndien enye ama ayak idemesie ọnọ Jehovah. Ediwak mbon en̄wen ke ubon nnyịn ye owo kiet ke akani n̄kaikwọ mi oro ẹmetiene ẹyak idem ẹnọ Jehovah.

Mmọdọ n̄wan idahaemi, ndien ami ye n̄wan mi ida ekese ini nnyịn in̄wam mbon en̄wen ẹkpep Bible. Mmenen̄ede n̄kop inemesịt sia mmekpep ‘ndibuọt idem mi ye Jehovah ke ofụri esịt mi.’

[Se ẹwetde ke ikpọ abisi ke page 29]

“Mma ntọn̄ọ ndima uwem nnyụn̄ n̄kop inemesịt”