Biibili inuit inuunerannik allannguisitsisarpoq

Arnap diamantinik anngiortumik annissisartup sulisitsisuminillu tillittartup unneqqarissunngornissamut suna kajumississutigaa? Arnaq marloriarluni imminoriaraluartoq inuunerup siunertaanik qanoq ililluni paasinnippa? Imigassamik ikiaroornartunillu atornerluisartoq pinngitsuuisinnaannginnerminit ajoqutaasumit qanoq ililluni qaangiisinnaasimava? Maluginiariaruk qanoq oqaluttuarnersut.

KINA

AQQA: MARGARET DEBRUYN

UKIUI: 45

NUNAA: BOTSWANA

SIORNATIGUT INUUNERA: ANNGIORTUMIK ANNISSISARTOQ TILLITTARTORLU

INUUNINNI PEREERSUT: Ataataga Tysklandiminngaanneersuuvoq, kisianni Sydvestafrikami (maannakkut Namibiamik taaguutilimmi) innuttanngorpoq. Anaanaga Botswanaminngaanneersuuvoq naggueqatigiinnit Bangologakkunnit. Uanga Gobabisimi Namibiamiittumi inunngorpunga.

1970-ikkunni Sydafrikami naalakkersuisut Namibiami assut pissaaneqarput illoqarfinnilu illoqarfeeqqanilu apartheidimut (ammip qalipaataa pillugu immikkoortitsinermut) inatsisit maleruartinneqartarlutik. Angajoqqaakka naggueqatigiinngillat avissaarnissaminnullu akuersiinnartinneqarlutik. Taamaattumik anaanaga Ghansimut Botswanamiittumut uterpoq uanga qatanngutikkalu ilagaluta.

1979-imi Lobatsemi Botswanamiittumi angajoqqaarsiartaarpunga, taakkunaniippungalu atuarunnaarnissama tungaanut. Kingusinnerusukkut biilileriffimmi allaffimmiutut suliffittaarpunga. Peroriartorninni isumaqarpunga Guuti inunnik isumassuinngitsoq kisianni imminut ilaquttallu pilersorniarlugit sapinngisannguamik nammineq iliuuseqartoqartariaqartoq — iliuuseriniagaq eqqortuugaluarpat kukkugaluarpalluunniit.

Suliffinni tatigineqarlunga akisussaaffittalimmik atorfeqarpunga, tatigineqarnerali atornerluppara kingoraartissanik sulisitsisora tilliffigisarakku. Unnuakkut qimuttuitsut illoqarfikkut aqqusaaraangata kammalaatikkalu ikiffigisarpavut tillissinnaasavullu tamaasa tillittarlugit. Aamma diamantinik, kuultinik kanngussaasanillu anngiortumik annisseqataasalerpunga. Ikiaroornartunik atornerluisalerpunga sakkortuumillu persuttaasalerlunga, angutaaterpassuaqartarlungalu.

Naggataatigut 1993-imi tillittillunga naammattoorneqarpunga soraarsitaanermik kinguneqartumik. “Kammalaatima” alarpaannga tigusaanissartik annilaangassutigigamikku. Alarmannga aliasuppunga aalajangerlungalu kinaluunniit tatigeqqinniarnagu.

 BIIBILI INUUNINNIK QANOQ ALLANNGUISSUTIGIGIGA: 1994-imi Tim Virginialu, Jehovap Nalunaajaasuisa ilaat ajoqersuiartortitaasut, naapippakka. Suliffittaanni nalunaajaaffigisarpaannga ulloqeqqasiortillungalu Biibili pillugu ilinniartittarlunga. Kingusinnerusukkut paasilerakku tatigisinnaallugit Biibilimik uanni atuaqqissaartalerpugut.

Paasilertorpara Guuti nuannaartissagukku inuunera allanngortittariaqarlugu. Assersuutigalugu Korinthimiunut allakkat siulliit 6:9, 10 tunngavigalugu ilikkarpara “kinguaassiuutitigut inuunerluttut . . . tillittut piumatuulluunniit, imerajuttut mitaatilliisulluunniit piiaasulluunniit Guutip naalagaaffia [kingornussarsiarissanngikkaat]”. Ileqqupalaat taamaatippakka. Tillissaarpunga, peroriartoqatikkalu pinerluttartut kammalaatigiunnaarlugit. Jehovamillu nakussatsinneqarlunga angutaatikka qimappakka.

QANOQ ILUAQUTIGIGIGA: Ilungersungaarlunga isumaloriataartarnera aqussinnaanngorpara arlaannillu ajortumik pisoqaraangat meeqqakka nilliaffigissaarlugit. (Efesosimiut 4:31) Oqaloqatigiissutigisassat eqqissillunga oqaloqatigiissutiginiartarpakka. Tamanna kinguneqarluartarpoq ilaqutariittullu qaninnerulersilluta.

Ikinngutigisimasama, allaallu sanilima, tatigisassaalersimasunga paasivaat. Sulisartunngorpunga unneqqarissoq tatiginartorlu, aningaasanut nioqqutissanullu tunngasunik paarsitinneqarsinnaasoq. Taamaattumik imminut pilersorsinnaavunga piffissarujussuaq atorlugu inoqatinnik Biibilimik ilinniartitsiitigalunga. Uummatikkut iluunngarlunga isumaqatigaakka Ussatit 10:22-mi ima allassimasut: “[Jehovap] pilluaqqusinera pisuunngortitsisarpoq.”

KINA

AQQA: GLORIA ELIZARRARÁS DE CHOPERENA

UKIUI: 37

NUNAA: MEXICO

SIORNATIGUT INUUNERA: IMMINORIARALUARTOQ

INUUNINNI PEREERSUT: Mexicomi Naucalpanip ilaani pigissaarfiusumi peroriartorpunga. Inuusuttuaraallungali pikitsitsiumatuujuvunga festernerlu nuannaralugu. 12-inik ukioqarlunga pujortartalerpunga, 14-inik ukioqarlunga imertalerpunga 16-inillu ukioqarlunga ikiaroornartutortalerlunga. Ukiualuit tamatuma kingorna angerlarsimaffitsinnit nuuppunga. Ikinngutima amerlanersaat ilaqutariinnit ingerlanerliortuneersuupput, timikkut oqaatsikkulluunniit naalliutsitaasarsimasut. Inuuneq tujorminangaarmat marloriarlunga imminoriaraluarpunga.

19-inik ukioqarlunga assilisittartunngorpunga, aamma politikerit inuillu aliikkutassaqartitsinerup silarsuaaniittut ilagisartagarilerpakka. Kingusinnerusukkut aappaqalerpunga qitornaqalerlungalu, ilaqutariinnili uanga naalagaavunga. Aamma pujortartarnera imertarneralu unitsinngilakka, sulilu festerajuttorujussuuvunga. Oqaatsikkut sorraatsorujussuuvunga paquminartunillu quiasaaruteqartarneq nuannaralugu. Aamma kamajasuararsuuvunga.

Inuit ilagisartagarilikkama ilarpassui uattut inooriaaseqarput. Taakku isumaqarput uanga amigaateqanngitsunga. Misigivungali inuunera suli siunertaqarnani imaqanngitsoq.

BIIBILI INUUNINNIK QANOQ ALLANNGUISSUTIGIGIGA: 1998-imi Jehovap Nalunaajaasuisa  Biibilimik atuaqqissaaqatigisalerpaannga. Biibilimit ilikkarpara inuuneq siunertaqartoq. Paasilerpara Jehovap siunertarigaa nunarsuup paratiiserpalaartunngorteqqinnissaa toqungasullu makitinnissaat — siunissamilu uanga pissutsini taamaattuni inuusinnaasunga.

Aamma ilinniarpara Guutimik asanninnera qanoq ersersissinnaanerlugu, tassa taassumunnga naalannikkut. (1 Johannesi 5:3) Aallaqqaammut unamminiarnarpoq, siornatigummi kimilluunniit siunnersorneqarusunneq ajorpunga. Paasiartulerparali inuunera nammineq aquttuaannarsinnaanagu. (Jeremia 10:23) Siunnersoqqullunga Jehovamut qinuvunga. Qinnuigaara ikioqqullunga inuuninnik taassuma najoqqutassiaanut naleqqussaaniaaninni qitornamalu uanga inooriaaserisimasannit allaanerusumik ilinniartinnissaannut.

Pisariaqartunik allannguinissara uannut sapernartorujussuuvoq, siunnersuulli Efesosimiut 4:22-24-mi allassimasoq malerualerpara: “Inutoqaq manna tikillugu inuuserisassinniittoq . . . [iperassavarsi], . . . atillugulu inuk nutaaq Guuti assilillugu pinngortitaq iluarsuseqarlusi upperluarlusilu sallusuissutip piinik.” Uanga inuttut pissuseq nutaaq atiniarlugu ileqqupalaat, ilaatigut pujortartarneq, taamaatittariaqarpakka oqaatsillu nutaat, paquminartunik ilaqanngitsut, ilikkartariaqarlugit. Jehovap Nalunaajaasuisa ilaattut kuisissinnaajumallunga pisariaqartunik allannguinissannut ukiut pingasungajaat atorpakka.

Aamma nuliaanera anaanaaneralu pimoorutilerpakka. Petrusip allagai siulliit 3:1, 2-mi siunnersuut una malerualerpara: “Ilissi nuliaasusi uissinnut naalatsigitissaasi, uiusut ilaat oqaatsimut naalasseriikkaluartut oqaluffigineqanngikkaluarlutik nuliamilli inuusaasiatigut ilanngussinnaaqqullugit Guutimik mianerinnillusi inuunersi minguitsoq takulerunikku.”

QANOQ ILUAQUTIGIGIGA: Jehovamut qujamasoqaanga maanna ilikkarakku inuuneq siunertaqartoq. Misigivunga inuttut pitsaanerujussuanngorlunga qitornakkalu perorsarluarsinnaalerlugit. Ilaannikkut siornatigut iliuuserisimasakka pillugit uummatima assuarisarpaanga, Jehovalli uummatiga ilisimavaa. (1 Johannesi 3:19, 20) Qularnanngivissumik Biibilimi najoqqutassianik atuinera illersuutigaara qamuunalu eqqississutigalugu.

KINA

AQQA: JAILSON CORREA DE OLIVEIRA

UKIUI: 33

NUNAA: BRASILIA

SIORNATIGUT INUUNERA: IMIGASSAMIK IKIAROORNARTUNILLU ATORNERLUISOQ

INUUNINNI PEREERSUT: Brasiliami illoqarfimmi Bagémi inunngorpunga. Tamaani pingaarnertut naasorissaaneq nersutaateqarnerlu inuussutissarsiutigineqarput. Illoqarfiup ilaani piitsoqarfiusumi inupalaat nakuuserfigisaanni peroriartorpunga, tamaanilu inuusuttut akornanni imigassamik ikiaroornartunillu atornerluineq nalinginnaavoq.

Atuarfimmi atuarunnaarama imigassartortalerpunga marihuanatortalerlungalu nipilersoriaaserlu heavy metal tusarnaartalerlugu. Guutimut uppertuunngilanga, isumaqarama nunarsuarmi erloqinartut pissutsillu paatsiveqanngitsut Guuteqannginneranut uppernarsaataasut.

Guitarertarpunga taalliortarlungalu Biibilip atuagartaasa ilaat Saqqummersitat isumassarsiffigigajuttarlugu.  Naatsorsuutigigaluarpara nipilersoqatigisartakkakkalu iluatsitsissasugut, taamaanngilarli, ikiaroornartunillu sakkortuunik pinngitsuuisinnaajunnaaraluttuinnarpunga. Ikiaroornartumik ingasaassillunga toqussagaluaruma soqutiginngilara. Nipilersortartut nuannaartorisakka amerlasuut tamanna toqussutigaat.

Aanannit peroriartorfinnit aningaasanik atorlunga ikiaroornartut akilertarpakka. Aperigaangat aningaasat sumut atortarnerikka salluliorfigisarpara. Anersaarsiorneq misileraaffigisalerpara, tamannalu ajornerulersitsivoq. Angakkuarniutinut tiguartissimaqaanga, isumaqarpungalu tusarnernerusumik nipilersuusiornissannut iluaqutigisinnaallugit.

BIIBILI INUUNINNIK QANOQ ALLANNGUISSUTIGIGIGA: Biibili atuaqqissaartalerakku najuuttaleramalu Jehovap Nalunaajaasuisa ataatsimiinnerinut isummertariaasera allanngoriartulerpoq. Inoorusulerpunga nuannaarusulerlungalu. Taamatut misigilerama aalajangerpunga nutsakka takisuut kipiniarlugit. Tallisissimavakka naammagittaannera pikitsitserusunneralu takutinniarlugit. Paasilerpara Guutimit iluarisaassaguma pujortartarneq, imigassartortarneq ikiaroornartunillu atuineq unitsittariaqarlugit. Nipilersoriaatsinik allanik nuannarisassarsiortariaqarpunga.

Jehovap Nalunaajaasuisa ataatsimiinnerat najuuffigeqqaarakku allassimaffik Biibilimeersoq iikkamiittoq malugaara. Ussatit 3:5, 6-imeersuuvoq, imaapporlu: “[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.” Allassimaffiup tamatuma eqqarsaatigeqqissaarneratigut qulariunnaarpara inuuninnik allannguiniarninni, uanga taamaaliorsinnaatikkukku, Jehovap ikiorumaaraanga.

Paasilerparali inooriaatsima sungiusimalluakkama allanngortinnissaa atornerluinermalu, ilaatigut ikiaroornartunik, taamaatinnissaa assamma kipinissaatulli sapernartigissasoq. (Matthæusi 18:8, 9) Allanngortitsiartuaarusaarsinnaanngilanga, uannut ajornarluinnarpoq. Taamaattumik ileqqupiluit ullormiit ullormut unitsippakka; allatut oqaatigalugu: Ataatsikkut tamaviisa unitsippakka. Sumiiffiit inuillu, inooriaaserisimasama ajoqutaasup inooriaaserileqqinnisaanut, ussernartorsiortitsisinnaasut tamaasa qanillinaveersaarpakka.

Ulluinnarni ajugaasarnima tulluusimaarutigisarnissaat nikallungasarnermalu eqqarsaatigivallaarnaveersaarnissaat ilikkarpara. Jehovap isaani timikkut, ileqqussatigut anersaakkullu minguinnissaq ataqqinaatitut isigaara. Jehovamut ikioqquvunga inooriaaserisimasara kingumut qiviarnagu siumut isigisinnaaqqullunga — qinnutigalu tusarpaa. Ilaannikkut ileqqupilorisimasannut utertoortarpunga. Taamaattoq ilinniartitsisunnut piumasarisarpara Biibilimik atuaqqissaartassasugut, naak ilaannikkut aqagutaartaraluarlunga.

Biibili tunngavigalugu Guuti pillugu ilumoortup ilinniarnera — inuttut ataasiakkaatut isumassoraatigut, upperisarsiorneq eqqunngitsoq nungutissagaa maannakkullu nunarsuaq tamakkerlugu oqaluussineq tapersersoraa — uannut isumaqalersitsivoq. (Matthæusi 7:21-23; 24:14; 1 Petrusi 5:6, 7) Paasissutissat taakku katitertakkatut imminnut naammaguttutut ipput. Naggataatigut inuunera Guutimut tunniulluinnarniarlugu aalajangerpunga. Guutip uanga pillunga iliuuserisimasaanik qujamasuutiginninnera takutikkusuppara.

QANOQ ILUAQUTIGIGIGA: Maanna inuunera siunertaqalerpoq isumaqalerlunilu. (Oqaluussisartup oqaasii 12:13) Ilaquttakka tigooraavigiinnarnagit tunniussaqarsinnaanngorpunga. Ilikkakkakka nuannersut Biibilimeersut aanannut oqaluttuarisarpakka, maannalu Jehovamut tunniulluinnarsimasuuvoq. Ilaquttama ilaat arlallit nipilersoqatigisarsimasaralu ataaseq aamma taamaaliorput.

Maanna aappaqarpunga, piffissattalu annerpaartaa nuliaralu allanik Biibilimik ilinniartitsinermut atortarparput. ‘Jehovap uummatikkut iluunngarlunga tatiginissaa’ ilinniarsimagakku pilluaqqusaangaartutut misigivunga. (wp09 02/01-E)

[Qupp. 13-mi issuagaq]

“Inoorusulerpunga nuannaarusulerlungalu”