‘Corderoruw arkasipki’
‘Corderoruw arkasipki’
“Corderorurakiw arkapxi kawkirutix jupax sarki ukaru.” (APO. 14:4.)
1. ¿Kunjamsa Jesusan chiqpach arkirinakapax arkaskakiñ munatap uñachtʼayapxäna?
JESUSAX aka Uraqin Diosatak irnaqañ qalltkatayna ukhatxa, niya pä mara chikataniw pasxatayna. Kuntï ‘Capernaum sinagogan yatichkäna’ ukanak “istʼasinxa waljaniw Jesusan arkirinakapat sapxäna: ‘Chʼamaw aka arunakap iyawsañaxa, ¿khitirak juparusti istʼani?’ sasa. Ukkhatpachaw waljani Jesusan arkirinakapax jaytanukus sarxapxäna, janiw jukʼamp jupampix sarnaqkxapxänti”. Ukampisa, Jesusax akham sasaw tunka payan apostolanakapar jisktʼäna: “¿Jumanakax sarxañ munapxaraktati?” sasa. Ukatxa, Simón Pedrox akham sasaw sarakïna: “Tata, ¿khitirus arkapxiristxa? Juman arunakamax wiñay jakañ arunakawa. Nanakax iyawsxapxtwa, ukhamarak yatipxtwa jumax jakkiri Diosan Yuqapa Cristötama” sasa (Juan 6:48, 59, 60, 66-69). Jesusan chiqpach arkirinakapax janiw jaytanukuñ munapkänti. Ukat alaxpachar sarañatak ajllitapkäna uka qhipatsti Jesusarux arkasipkakïnwa (Hech. 16:7-10, NM).
2. 1) ¿Khitinakas ‘Amuyasiri Chiqapa Uywata’ ukat ‘suma phuqiri amuytʼan mayordomo’ satäpxi? 2) Amuyasiri Chiqapa Uywataxa, ¿kunsa luri?
2 ¿Jichha tiemponakan jakir ajllit cristianonakax ukhamarakit arkasipkpacha? Jïsa, Jesusax ukatwa jupan kuttʼaniñapat ukhamaraki aka pacha tukuskani ukürut parlkasaxa chiqa chuyman arkirinakapat akham säna: ‘Jupanakaw Amuyasiri Chiqapa Uywatäpxi, (MT)’ ukat ‘suma phuqhiri amuytʼan mayordomüpxi’ sasa (Mat. 24:3, 45; Luc. 12:42). Uka Amuyasiri Chiqapa Uywataxa, tamjamax ‘Corderoruw arkapxi kawkirutix jupax sarki ukaru’ (Apocalipsis 14:4, 5 liytʼasiñapawa). Jupanakax janiw kʼari yupaychäwinakar mitisipkiti ukat janirakiw kuntï “Jachʼa Babilonia”, mä arunxa, Uraqpachan apnaqir kʼari yupaychäwinakan luräwinakapampix chikachasipkiti (Apo. 17:5). Yupaychañ tuqitxa ‘janirakiw kuna kʼari arunakas jupanakan utjkiti’, ukat Supayan aka ñanqha pachapampix janiw ‘juchachasipkiti’ (Juan 15:19). Ukat jutïrinxa, aka Uraqin jiltʼapki ukanakax alaxpachkamaw Corderorux arkapxani (Juan 13:36).
3. ¿Kunatsa Amuyasiri Chiqapa Uywatar atinisiñasa?
3 Jesusaw Amuyasiri Chiqapa Uywatar “utankkis ukanakaru”, mä arunxa, uka tamatxa sapa mayniru ‘horasapar manqʼanak churañapataki’ uttʼayatayna. Ukampis janiw ‘utankkis ukanakaruk’ uñjañapakïkiti, jan ukasti “taqi kunatix jupan utjki ukanakxaruw” ucharakitayna (Mat. 24:45-47). Ukanakatxa, mayax “walja jaqinaka” ‘yaqha ovejanakjam’ uñtʼatäpkis ukanakawa (Apo. 7:9; Juan 10:16). Ukhamasti, alaxpachar sarir jilat kullakanakasa ukat ‘yaqha ovejanakjam uñtʼatäpki ukanakas Amuyasiri Chiqapa Uyawatar atinisiñasawa. ¿Kunatsa? 1) Jehová Diosaw Amuyasiri Chiqapa Uywatar atinisi ukat 2) Jesusax atinisirakiwa. Kunatsa atinisipxi uk jichhax uñjañäni.
Jehová Diosaw Amuyasiri Chiqapa Uywatar atinisi
4. Amuyasiri Chiqapa Uywatax Bibliat apstʼat yatichäwinak apayankistu ukanakaruxa, ¿kunatsa atinisiñasa?
4 Amuyasiri Chiqapa Uywatax tiempoparupuniw Diosan yatichäwinakapxa churistu, ukampis khitis ukham phuqapxañapatakix yanaptʼi uk amuytʼañäni. Jehová Diosax akham siwa: “Nayranakaxax jumaruw uñchʼukisktam, nayaw yatichaskäma, nayaw amuytʼayaskäma, nayaw sarañamäki uka thak uñachayaskäma” sasa (Sal. 32:8). Ukhamasti, Jehová Diosaw Amuyasiri Chiqapa Uywatarux amuytʼayi. Ukatwa kuntï jupanakax Bibliat apstʼata qillqatanakampi sum yatichkistu ukat amuytʼaykistu ukanakarux taqi chuym atinisiñasaxa.
5. Diosan qullan ajayupaw Amuyasiri Chiqapa Uywatar yanaptʼaski, ¿kunatsa ukham sisna?
5 Ukhamasti, Jehová Diosax qullan ajayupampiw Amuyasiri Chiqapa Uywatarux yanaptʼi. Uka chʼamax jan uñjañjamäkchisa, qhanpachaw uka jilat kullakanakan luräwinakapan uñjasi. Jichhasti, kunsa Jehová Diosata, Yuqapata ukat Apnaqäwipat yatiyañatakix lurapxi uk amuytʼañäni. Jichhürunakanxa, 230 markanakat jila markanakanwa Diosan luqtirinakapax yatiyasipki. Jehová Diosatï qullan ajayupampi uka Amuyasiri Chiqapa Uywatar jan yanaptʼkaspaxa, janiw ukham yatiyaskaspati (Hechos 1:8 liytʼasiñapawa). Uraqpachan Diosan markapar horasapar manqʼa churañapatakix uka Uywatax wali wakiskir amtanakaruw puripxañapa. Uka amtanakar purisin phuqasaxa, munasiña, llampʼu chuymanïña ukat qullan ajayun yaqha luräwip uñachtʼayapxaraki (Gál. 5:22, 23).
6, 7. ¿Kunjsa Jehová Diosax Amuyasiri Chiqapa Uywatar atinisi?
6 Kunjsa Jehová Diosax Amuyasiri Chiqapa Uywatar atinisi uka tuqit amuytʼañäni. Apóstol Pablox akham sasaw qillqatayna: “Trompetan phustʼasitaparusti jiwatanakaw jaktapxani jan mayampi jiwxañataki; jiwasasti yaqha cuerponïxarakiñäniwa. Aka tukusir janchisaxa jan tukusirïki ukampiw isthapisiñapa; jiwir janchisasti jan jiwiri cuerpompiw isthapisiñaparaki [mä arunxa, janiw jiwkañäniti]” sasa (1 Cor. 15:52, 53). Cristor arkir ajllitanakax juchararjamas jiwapkchixa, Diosar taqi chuyma luqtapxatapatxa, ajayjamaw jaktayatäpxi. Ukampis janiw wiñay jakañak katuqapkiti, jan ukasti janiw jiwapkaniti, mä arunxa, ajayjama jan tukuskiri wiñay wiñayatakiw jakapxani. Jupanakax jan mayamp jiwañatakiw jaktapxi, kunattix jan jiwir cuerponïxapxiwa. Ukat amuyataxa, jupanakpachas jakäwinïpkaspa ukhamäpxiwa. Jupanakax quri coronanïpxiwa ukat trononakan quntʼatäpxiwa, sasaw Apocalipsis 4:4 jiskʼa tʼaqan uñachtʼayi, ukhamasti reyinakjamaw apnaqapxani. Ukampis janiw ukakïkiti.
7 Apocalipsis 19:7, 8 qillqatax akham sasaw qhanañchi: “Corderon casarasiñapasti purinxiwa. Esposapasti wakichtʼatarakiwa. Juparuwa suma lino lliphipkir qʼuma isinakampi isthapisim sataxa. Uka suma lino isisti Diosar axsartasa sarnaqapki ukanakan chiqa jakatanakaparuw uñtasi” sasa. Jehová Diosaw alaxpachar sarir jilat kullakanakarux Yuqapan esposapäñapatak ajllitayna. Kunjamatï yatxatawayktanxa, jupanakax jan mayamp jiwañatakiw jaktapxani ukat Corderon esposapjamarakiw alaxpachat apnaqanipxani. Ukhamax uka suma churäwinakaxa, kunjsa Jehová Diosax uka Uywatar atinisi ukwa uñachtʼayistu, jupanakax ‘Corderoruw arkapxi kawkirutix jupax sarki ukaru’.
Jesusax Amuyasiri Chiqapa Uywatarux atinisiwa
8. Jesusax alaxpachar sarir cristianonakarux wal atinisi, ¿kunjamatsa uk yattanxa?
8 Jesusax jan pächasisaw jupanakarux atinisiraki, ¿kunanakas uk uñachtʼayi? Amuytʼañäni, katuntapkäna uka arumaxa, jupat jan jithiqtir tunka mayan apostolanakaparux akham sasaw Jesusax säna: “Jumanakax nayamp chikäsipkapuntawa tʼaqhisiñanakaxanxa” sasa. Ukatxa, “nayax jumanakarux mä reino churapxsma, kunjämatï Awkixax nayar churkitu ukhama, khä reinoxan jumanakax manqʼapxäta, umapxarakïta mesaxana, ukhamarak tronon quntʼasipxäta, Israelan tunka payan triburu taripapxañamataki” sasaw säna (Luc. 22:28-30). Tunka mayan arkirinakapampi uka arustʼäwir mantkäna ukaxa, 144.000 ajllit cristianonakampachatakiwa (Luc. 12:32; Apo. 5:9, 10; 14:1). Ak amuytʼañäni: janitï Jesusax jupanakar atiniskasapäna ukhaxa, ¿jupanakamp chika apnaqañataki mä arustʼäwir mantaspänti?
9. ¿Kunanaksa Amuyasiri Chiqapa Uywatax Cristotak aka Uraqin uñjañapa?
9 Maysa tuqitxa, Jesusaw Amuyasiri Chiqapa Uywatarux ‘kunatix jupan utjki ukanakxaru’ ucharaki, mä arunxa, kunatï aka Uraqin Diosan Apnaqäwipat nayrar sartayañatak utjki ukanakxaruw uchatayna (Mat. 24:47). Ukanakatxa mä qhawqhax akanakäspawa: kawkhantï Uraqpachan Diosan Qhanañchirinakapar uñjasiski uka uta, taqi sucursalanaka, Jachʼa Tantachasiñ Utanaka ukat taqi Tantachasiñ Utanaka, ukatxa Diosan Apnaqäwipat yatiyañasa yatichañasa uka taypin jakhutarakiwa. Jupanakarutï jan atiniskaspa ukhaxa, janiw taqi ukanak jaytkaspänti.
10 ¿Kunatsa Jesusaw Amuyasiri Chiqapa Uywatar yanaptʼaski sasax sisna?
10 Jesusax alaxpachar niya sarañampïxäna ukhaxa, akham sasaw arkirinakapar säna: “Amtasipxapunim, nayax sapürupuniw jumanakampïskta akapachan tukusiñapkama” sasa (Mat. 28:20). ¿Uka arsutapar Jesusax phuqpachati? Chiqansa, aka qhipa tunka phisqani maranakanxa, Jehová Diosan Qhanañchirinakapan tamanapakax wal jilxattawayi, niya 70.000 tamanakatxa 100.000 jila tamanakaruw jilxattawayi. ¿Ukat qhawqha machaq arkirinakas Diosan markapar mantapxi? Uka pachpa tunka phisqan maranakanxa, niya pusi millón chikataniw bautisasipxi, niya 800 machaqanakas sapüru bautisasipkaspa ukhamawa. Uka muspharkañ jilxatäwixa, kunjamsa Cristox Amuyasiri Chiqapa Uywatarux tantachäwinakapansa ukat yatichañ tuqitsa yanaptʼawayi, ukwa qhan uñachtʼayistu.
Amuyasiri Chiqapa Uywata
11, 12. ¿Kunjamsa Amuyasiri Chiqapa Uywatax phuqirïtapa ukat amuytʼasirïtap uñachtʼayi?
11 Niyakixay Jehová Diosampi Jesucristompix Amuyasiri Chiqapa Uywatar atinisipxchixa, ¿janit jiwasax atinisiñasäkarakispa? Chiqpachansa, uka Uywatax kuntï lurañapäkäna ukampix phuqaskiwa. Uka luräwipat mä uñachtʼäwix Yatayañataki sat revistawa, uka revistax 130 maranakaw lurasiski. Ukat yaqha uñachtʼäwisti, taqi tantachäwinakawa, ukanakaw jukʼampi Diosar jakʼachasiñ yanaptʼistu.
12 Uka Uywatax amuytʼasirirakiwa. Wali altʼat chuymaniwa, janiw Jehová Diosarux yatichäwinakapan nayrstʼkiti, ukampis kunapachatï Diosan yatichäwinakapax qhanäki ukhax jankʼakiw yatiyaraki. Amuytʼañataki, kʼari yupaychäwinakan pʼiqtʼirinakapax jaqinakan ñanqha luräwinakapxa walikïkaspas ukham uñjapxi. Ukampis Amuyasiri Chiqapa Uywataxa, kunjamsa Supayan ñanqha pachapan sipitanakapat jarkʼaqassna ukxa wali amuyumpiw tiempopar iwxtʼistu, chiqas Jehová Diosan ukat Jesucriston bendicitaw ukham yanaptʼistu. Ukatwa juparux taqi chuym atinisiñasa. Ukampis ¿kunjamsa atinisitasxa uñachtʼaysna?
Ajllitanakamp chika Corderor arkapxañäni
13. Zacariasan qillqataparjamaxa, ¿kunjamsa Amuyasiri Chiqapa Uywatar atinisitasxa uñachtʼaysna?
13 Zacarías librox “tunka” jaqinakatwa parli jupanakax ‘mä judío jaqiruw’ jakʼachasipxi ukat sapxarakiwa: “jumanakamp sarañ munapxta” sasa (Zacarías 8:23 liytʼasiñapawa). Amuytʼañäni, ‘judío jaqiru’ parlkasaxa, ‘jumanaka’ sasaw sapxi, ukhamax uka jidío jaqix mä tama sañ muni. Jichhürunakanxa, uka ‘jaqix’ Amuyasiri Chiqapa Uywatamp sasiwa jupanakaw ‘Diosan Israelapäpxi’ (Gál. 6:16, MT). Maysa tuqitxa, ‘tunka jan uñtʼat yaqha markankiri’ jaqinakaxa, yaqha uwijanakjam uñtʼatäpki uka walja jaqinakamp sasiwa. Kunjamatix alaxpachar sarir cristianonakax Jesusar arkapkixa, ukhamarakiw sarnaqapxi, mä arunxa, uka Amuyasiri Chiqapa Uywatampiw irnaqtʼasipki. Jupanakax ‘Diosatak jawsatäpki ukanakar’ yanaptʼasax janipuniw phinqʼasipxañapäkiti (Heb. 3:1). Jesusax ajllitanakar “Jilatanaka” sasinxa janipuniw phinqʼaskiti, uk jan armañäniti (Heb. 2:11).
14. ¿Kunjamsa Criston jilatanakaparu taqi chuyma yanaptʼsna?
14 Maynitï mä jilatajar yanapani ukhaxa, nayarus yanapkitaspa ukhamawa, sasaw Jesusax säna (Mateo 25:40 liytʼasiñapawa). Khitinakatï aka Uraqin jakasiñ suyktan ukanakaxa, ¿kunjamaraki Criston jilatanakaparu yanaptʼsna? Diosan Apnaqäwipat yatiyasaw yanaptʼsna (Mat. 24:14; Juan 14:12). Alaxpachar sarir cristianonakax sapa maratjamaw jukʼaniptasipki, ukampis yaqha uwijanakjam uñtʼatäpki ukanakax sapa maratjamaw jukʼamp jilxattasipki. Kunapachatï uka walja jaqinakax Diosan Apnaqäwipat yatiyasipki ukhaxa, ajllitanakaruw jaqinakar Jesusan arkirinakapar tukuyañ yanaptʼasipki. Ukat yaqhipanakasti sapürjam yatiyir sarasaw yanaptʼasipkaraki (Mat. 28:19, 20). Ukatxa kunayman tuqitwa qullqimp yanaptʼaraksna, janiw uk armasiñasäkiti.
15. Amuyasiri Chiqapa Uywatax Diosan yatichäwinakap apayankistu ukat Diosan markapax kuns machaqat amtki ukhaxa, ¿kunjamsa katuqañasa?
15 Amuyasiri Chiqapa Uywatax tiempoparuw Diosan yatichäwinakapxa Bibliat apstʼat qillqatanak tuqi ukat taqi tantachäwinak tuqi apayanistu, ukampis ¿jumax ukanakat kamstasa? ¿Taqi chuymat katuqtʼastan ukat kuntï yatiqktan ukarjamat sarnaqtanxa? Kunapachatï Diosan markapax kuns machaqat amti ukhaxa, ¿iyaw sistanti? Jiwasatï Amuyasiri Chiqapa Uywatan yatichäwirjam taqi chuyma sarnaqañänixa, Jehová Diosaru ukat kunjamtï jupax lurañ munki ukar atinisitaswa uñachtʼaytanxa (Sant. 3:17).
16. ¿Kunatsa taqinis Criston jilatanakaparu istʼapxañasa?
16 Jesusax akham sasaw säna: “Nayan ovejanakaxax arux uñtʼiwa, nayasti uñtʼaraktwa, jupanakasti arkapxarakituwa” sasa (Juan 10:27). Chiqpachansa, ajllit cristianonakax uka arunakar phuqapxiwa. Ukhamasti, ¿kunsa yaqha uwijanakax lurapxañapa? Jesusaruw istʼapxañapa ukat jupan jilatanakaparus istʼapxañaparakiwa, kunattix jupanakaruw Diosax markapar uñjapxañapatakix uttʼayi. Ukhamasti, ¿jupanakan arup istʼañax kun sañs muni?
17. ¿Amuyasiri Chiqapa Uywatar istʼañax kunamp sasisa?
17 Jichha tiemponakanxa, alaxpachar sarir jilat kullakanakatxa, mä qhawqhaniw Uraqpachan Jilïr Irpirinakjam uttʼayatäpxi, jupanakaw kunjamsa Diosan Apnaqäwipat Uraqpachan yatiyasiski uk uñjapxi. Uraqpachan Jilïr Irpirinakax wali yatxattʼat alaxpachar sarir jilatanakawa. Chiqpachansa, jupanakaw ‘irpaskistu’ (Heb. 13:7). Uraqpachanxa, 100.000 tamanakat jila tamanakaw utji, ukat niya 7.000.000 yatiyirinakaw utjaraki, uka jilatanakax “Tatitun luräwipanxa” walja lurañanïpxiwa (1 Cor. 15:58). Ukhamasti Amuyasiri Chiqapa Uywatar istʼañaxa, Uraqpachan Jilïr Irpirinakarus yanaptʼksna ukamp sasiwa.
Amuyasiri Chiqapa Uywatar istʼasax bendicitäñäniwa
18, 19. 1) ¿Khitinakatï Amuyasiri Chiqapa Uywatar istʼapki ukanakax kuna bendicionanaksa katuqapxani? 2) ¿Kun lurañs amtañasa?
18 Uttʼayatäpkäna ukhat aksaruxa, Amuyasiri Chiqapa Uywatax ‘waljaniruw chiqa thakir irpanipxi’ (Dan. 12:3). Uka walja irpanitanakatxa, aka ñanqha pachan tʼunjäwipat qhispiyatäpxaniwa. ¡Diosan nayraqatapan askit uñjatäñax wali aski bendicionapuniwa!
19 “Machaq Jerusalén” ‘qullan markaxa’, mä arunxa, 144.000 alaxpachar saririnakaxa, jutïrin “mä casarasir tawaqur uñtata suma isthaptʼataraki casarasir waynar katuqañatakjama[w]” ‘Diosan nayraqatapat’ saraqanipxani. Uk paskäni ukhaxa, khitinakatï Amuyasiri Chiqapa Uywatar istʼapki ukanakaxa, ¿kuna bendicionanaksa katuqapxani? Bibliax akham sasaw qhanañchi: “Dios kipkarakiw jupanakampïni, jupanakan Diosaparakïniwa. Diosax taqi jachanakapwa nayranakapatxa picharani, janirakiw jiwañas, jachañas utjkxaniti, warariñasa ni usuyasiñasa. Taqi kunanakatï nayrax utjkän ukanakax tukusxiwa” sasa (Apo. 21:2-4). Ukhamasti, Cristoru ukat jilatanakapar istʼasipkakiñäni.
¿Kuns yatiqawayta?
• Jehová Diosax Amuyasiri Chiqapa Uywatar atinisitapxa, ¿kunanakas uñachtʼayistu?
• Jesucristox jan payachasisaw Amuyasiri Chiqapa Uywatar atinisi, ¿kunjamatsa uk yattanxa?
• ¿Kunatsa taqi chuyma suma phuqiri amuytʼan mayordomor atinisiñasa?
• Amuyasiri Chiqapa Uywatar atinisitasxa, ¿kunjamsa uñachtʼaysna?
[Jisktʼanaka]
[25 janan fotopa]
¿Jehová Diosax khitinakarus Yuqapan esposapäñapatak ajllpacha uk yattati?
[26 janan fotonakapa]
Jesucristox “taqi kunatix jupan utjki” ukanakxaruw Amuyasir Chiqap Uywatar uchatayna
[27 janan fotopa]
Kunapachatï Diosan Apnaqäwipat yatiyktan ukhaxa, alaxpachar sarir jilatanakaruw yanaptʼasktanxa