Ra Tapwelo Mwirin ewe Lam
“Ra tapwela mürin ewe Lam ekis meinisin ia a feila ie.”—PWÄR. 14:4.
1. Met meefien nöün Jises kewe chon käeö mi enlet ussun ar tapwelo mwirin?
A FEN ruu esopw ier a lo seni an a poputä an we angangen afalafal, Jises a “afalafal lon ewe imwen felikis lon Kapernaum.” Chommong ra turukap me meefi pwe a kon pöchökkül an afalafal. Iwe, “chomong me lein nöün Jesus kewe chon kaiö ra kul seni o resap chüen mochen tapwela mürin.” Iei minne Jises a eisini ekkewe engol me rüüemön chon käeö: ‘Nge ami ousap pwal mochen feilo?’ Piter a ereni, “Äm Samol, iö aipwe feila ren? En ka eäni kapasen manau esemüch. Äm aia lükü o silei pwe en Ewe mi Pin ka feito seni Kot.” (Jon 6:48, 59, 60, 66-69) Nöün Jises kewe chon käeö mi enlet rese ükütiu seni ar tattapwelo mwirin i. Mwirin ar kepit ren ngün mi fel, ra chök sopwelo ar fitipacheiti än Jises kewe emmwen.—Fof. 16:7-10.
2. (a) Iö ewe “chon angang mi allükülük me tipachem,” are “souwaan” mi alükülük”? (b) Ifa ussun ewe chon angang a fokkun tuppwöl lon an ‘tatapwela mürin ewe Lam”?
2 Nge ifa ussun ekkewe chon Kraist mi kepit lon ach ei fansoun? Lon ewe oesini ussun ‘asisilen fansoun an waroto me ewe fansoun sopolan,’ Jises a fos ussun eü mwichen chon Kraist mi kepit woon fönüfan, a kör ngeniir ewe “chon angang mi allükülük o tipachem,” are “souwaan” mi alükülük. (Mt. 24:3, 45; Luk 12:42, PAIPEL ÄN KOT KAPAS TESTAMENT SÖFÖ) Ussun eü mwich, ewe “chon angang mi allükülük o tipachem,” a fokkun tuppwöl lon an ‘tatapwela mürin ewe Lam ekis meinisin ia a feila ie.’ (Älleani Pwarata 14:4, 5.) Chon ena mwich rese elimelingaüer lon pekin ngün ren ewe sokkun lükü me eörenien “Papilon mi lapalap,” ewe mwicheichen lamalam chofona. (Pwar. 17:5) “Resap fokun apasatä” afalafal mi chofona me “esap wor ar mwäl” seni än Setan fönüfan. (Jon 15:19) Lon mwach kkan ekkewe lusun mi kepit woon fönüfan repwe ‘tapwelo mürin’ ewe Lam lon läng.—Jon 13:36.
3. Pwata a lamot ach sipwe lükülük woon ewe chon angang mi alükülük me tipachem?
3 Jises a awisa ngeni ewe chon angang mi alükülük o tipachem an epwe nemeni “nöün kewe chon angang o ngeniir wiser mongö lon fansoun fich.” Iö kana nöün ewe masta chon angang? Iir emön me emön lein ewe chon angang mi alükülük o tipachem. Jises a pwal awisa ngeni ewe chon angang mi alükülük me tipachem pwe epwe nemeni “mettochun meinisin.” (Mt. 24:45-47) A kapachelong lon “mettochun meinisin,” “eu mwich mi fokun chocho” lein pwal ekkewe ‘ekkoch sip.’ (Pwar. 7:9; Jon 10:16) Itä ürürün emön me emön lein ekkewe mi kepit me ekkewe ‘ekkoch sip’ repwe lükülük woon ewe chon angang Jises a seikatä an epwe wisen tümünüür. Mei wor chommong popun mi fich ngeni ewe chon angang mi alükülük o tipachem ach sipwe tuppwöl ngeniir. Ikkeei ruu popun mi aüchea seni meinisin. Äeüin, Jiowa a lükülük woon ewe chon angang, me oruuan, Jises a pwal eäni lükülük woon. Sipwe nengeni ekkewe pisekin ännet pwe Jiowa Kot me Jises ra unusen lükülük woon ewe chon angang mi alükülük me tipachem.
Jiowa a Lükülük Woon ewe Chon Angang
4. Pwata sipwe tongeni lükülük woon ewe möngöön ngün ewe chon angang mi alükülük me tipachem a awora?
4 Ekieki mwo met a atufichi ewe chon angang mi alükülük me tipachem an epwe awora ewe möngöön ngün mi mürinnö lon fansoun mi fich. Jiowa a apasa: “Üpwe aiti ngonuk ewe al kopwe fetal won o emwenuk, üpwe öüröürok o mamasok.” (Kölf. 32:8) Ewer, Jiowa a emmweni ewe chon angang mi alükülük me tipachem. Ina minne, sipwe unusen lükülük pwe ra mirititi me weweiti ewe Paipel me an emmwen mi longolong woon Paipel.
5. Met a pwäratä pwe a nom ren ewe chon angang mi alükülük me tipachem manamanen än Jiowa we ngün mi fel?
5 Jiowa a pwal efeiöchü ewe chon angang mi alükülük me tipachem ren an we ngün mi fel. Inaamwo ika sise küna än Jiowa we ngün mi fel nge ekkewe aramas ra nom fän emmwenian ra chök pwäralo uwaan. Ekieki met ewe chon angang mi alükülük me tipachem a fen apwönüetä lon ewe angangen esilesil ussun Jiowa Kot, Nöün we me an we Mwu. Chon fel ngeni Jiowa ra achocho le afalafalafetälei pworausen ewe Mwu woon lap seni 230 fönü. Mi ffat pwe Jiowa a ngeni nöün we chon angang manamanen än we ngün mi fel. (Älleani Föför 1:8.) Ewe chon angang mi alükülük me tipachem a apwüngalo chommong mettoch mi lamot ren an epwe awora ewe möngöön ngün lon fansoun mi fich ngeni nöün Jiowa kewe aramas woon unusen fönüfan. Lon an apwönüetä met a fen apwüngalo, a föri fän ekkewe napanap tong, mosonoson me pwal ekkoch kinikinin uwaan ewe ngün mi fel.—Kal. 5:22, 23.
6, 7. Ifa ükükün än Jiowa lükülük woon ewe chon angang mi tuppwöl?
6 Ren ach sipwe weweiti ükükün än Jiowa lükülük woon nöün we chon angang mi tuppwöl, sipwe nengeni än Jiowa pwon ngeniir. Paul a makkei: “Lupwen ewe rappwa epwe tik, ekewe mi mälä repwe manausefäl, nge resap chüen mälasefäl, nge kich meinisin sipwe wilila. Pun met mi morola epwe siwil ngeni met esap tongeni morola, nge met mi mämmä epwe siwil ngeni met esap tongeni mämmä.” (1 Kor. 15:52, 53) Lupwen ekkewe chon Kraist mi kepit mi tuppwöl ra mälo lon inisiir mi kiteterelo, repwe manausefäl lon eü inis mi kon öch lap seni ekkewe chon läng mi eäni manau esemuch. Pun, ekkewe repwe manausefäl repwe eäni eü inis esap chüen mämmä me küna ninni, me repwe küna manau esemuch. Pwal eü, manauen ekkewe chonläng me aramas ra longolong woon ekkewe tufichin manau Jiowa a ngeniir, nge ren ekkewe chon kepit, manauer esap chüen longolong woon ekkeei mettoch pwe ra pwisin tufichin amanauer. Pwarata 4:4 a aweweei pwe ekkewe chon manausefäl ra mommot lon ewe leenien motun king me a wor mwarer kolt woon mökürer. Ewe ling mi fich ngeni emön king a wikkiti ekkewe chon Kraist mi kepit. Nge mei pwal wor ekkoch mettoch ra ännetatä än Kot unusen lükülük woon ekkewe mi kepit.
7 Iei alon Pwarata 19:7, 8: “A war fansoun apwüpwülüen ewe Lam, nge pwülüan we, ewe fin apwüpwülü söfö, a püsin amol ngeni ewe rän. Kot a ngeni echö üf mi limöch, a pwechepwech o molupolup pwe epwe üföüf. (Ewe üf mi pwechepwech iei än ekewe chon pin föför mi pwüng.)” Jiowa a fen filatä ekkewe chon Kraist mi kepit an epwe pwülüwan Nöün we. A ifa me amwararen ekkeei liffang! Ikeei ekkewe liffang, eü inis esap chüen kiteterelo me mämmälo, eü wisen king, me “apwüpwülüen ewe Lam”! Iir pisekin pwäratä pwe Kot a unusen lükülük woon ekkewe mi kepit, iir kewe ra ‘tatapwela mürin ewe Lam ekis meinisin ia a feila ie.’
Ewe Chon Angang Jises a Lükülük Woon
8. Ifa ussun Jises a pwäratä pwe a lükülük woon nöün kewe mi kepit?
8 Ifa ewe pisekin pwäratä pwe Jises a unusen lükülük woon nöün kewe chon angang mi kepit? Lon ewe säingoon pwinin än Jises nom woon fönüfan, a pwon ngeni nöün kewe 11 aposel mi tuppwöl. “Ämi oua etiei lon ai kewe riaföü meinisin. Usun Semei a ngeniei ai üpwe nemenem, iei usun üpwe pwal ngenikemi ewe nemenem. Oupwe mongö o ün won ai chepel lon mwüi, oupwe pwal mot won ekewe lenien motun king o nemeni ekewe engol me ruu ainangen Israel.” (Luk 22:28-30) Ewe pwon Jises a föri lon ena atun a chök weneiti meinisin ekkewe 144,000 chon Kraist mi kepit. (Luk 12:32; Pwar. 5:9, 10; 14:1) Ika esor än Jises lükülük wor, epwe fen pwon ngeniir pwe repwe eti i le nemenem lon an we Mwu?
9. Met a kapachelong lon “mettochun [Kraist] meinisin”?
9 Pwal och, Jises a pwal awisa ewe chon angang mi alükülük me tipachem pwe epwe nemeni “mettochun meinisin,” weween pisekin meinisin mi weneiti än Kot we mwu. (Mt. 24:47) A kapachelong lein ekkeei mettoch meinisin, ekkewe pisek lon Ofesilapen Chon Pwäratä Jiowa, ekkewe branch ofes lon sokkopaten fönü me ekkewe leenien mwichelap me Kingdom Hall woon unusen fönüfan. A pwal kapachelong ewe angangen afalafal me föralo chon käeö. En mi tongeni awisa ngeni emön an epwe tümünü me äeä pisekum kewe mi aüchea ika esor om lükülük woon?
10. Met a ännetatä pwe Jises Kraist a eti nöün kewe mi kepit?
10 Ekiselo me mwen än Jises feitä läng, a pwä ngeni nöün kewe chon käeö mi tuppwöl me a pwon ngeniir: “Ngang üpwe etikemi fansoun meinisin tori lesopolan fanüfan.” (Mt. 28:20) Jises a apwönüetä an we pwon? Lon ekkewe 15 ier a lo, mwichefelin chon Pwäratä Jiowa woon unusen fönüfan a lapolo seni 70,000 som ngeni 100,000. A lapolo woon lap seni 40 percent. Nge fitemön ekkewe mineföön chon käeö ra kapachelong? Arapakkan 4.5 million chon käeö ra fen papatais lon ekkewe 15 ier a lo, ussun itä lap seni 800 aramas ra papatais iteiten rän. Lapoloon ekkeei mettoch a mmen fokkun amwarar me eü pisekin ännet pwe Kraist a emmweni nöün kewe chon käeö mi kepit lon ar mwich lon mwichefel me a älisatä ar angangen föralo chon käeö.
Ewe Chon Angang mi Alükülük o Tipachem
11, 12. Ifa ussun ewe chon angang a pwäratä pwe i mi alükülük me tipachem?
11 Pokiten Jiowa Kot me Jises Kraist ra unusen lükülük woon ewe chon angang mi alükülük me tipachem, nge kich sisap pwal eäni lükülük woon? Pun ewe chon angang a fen tuppwöl lon an apwönüetä wisan. Awewe chök, ewe Watchtower a fen peres lon ükükün 130 ier. Än chon Pwäratä Jiowa kewe mwich me mwichelap ra akkapöchökkülakich lon ach lükü.
12 Ewe chon angang mi tuppwöl a pwal tipatchem pwe esap lamalam tekia le mwittir föralo pwisin an kokkot mwen än Jiowa, ese pwal mmang le apwönüetä än Jiowa kokkot ika a fen ffat an we emmwen. Awewe chök, ekkewe nöüwisen lamalam mi chofona ra mut ngeni chon fiti ar lamalam le föri ekkewe föfför mi ingaü, ussun itä esor ngaüan, nge ewe chon angang a öüröürakich ach sipwe tümünükich seni ssären Setan kewe lon ei otot mi pwor. Pokiten Jiowa me Jises ra efeiöchü ewe angang, ewe chon angang a tufichin awora ekkewe kapasen öüröür mi mirit me fichiiti ewe fansoun. Ina minne, mi fich ngeni ewe chon angang ach sipwe lükülük woon. Iwe nge, ifa ussun sipwe pwäratä pwe sia lükülük woon ewe chon angang mi alükülük me tipachem?
‘Eti’ ekkewe Chon Kepit Lon Ar Tapwelo Mwirin ewe Lam
13. Me ren än Sekaraia oesini, ifa ussun sipwe tongeni pwäratä ach lükülük woon ewe chon angang mi alükülük o tipachem?
13 Ewe puken Sekaraia a kapas ussun “engol mwän” a fos ngeni “eman chon Juta,” o erä, “Kose mochen kopwe mwüt ngenikem pwe aipwe etikemi [ämi kana aramas, NW].” (Älleani Sekaraia 8:23.) Ewe wokisin a fos ussun “eman chon Juta” ussun “ami kana aramas,” pun i eü mwichen aramas nge esap emön. Lon ach ei fansoun, a liosuetä ewe lusun chon Kraist mi kepit, kinikinin ewe “Israelin Kot.” (Kal. 6:16) Ekkewe “engol mwän seni ekewe mwü mi sokola ar kapas” a liosuetä ewe mwich mi lapalap, iir seni ekkewe pwal ekkoch siip. Ussun chök ekkewe chon Kraist mi kepit ra tapwelo mwirin Jises ese lifilifil ia epwe feilo ie, ewe mwich mi lapalap epwe pwal ‘eti’ ewe chon angang mi alükülük me tipachem. Chon ewe mwich mi lapalap esap säüesini an epwe sinnelo pwe iir chienen ekkewe “mi pwal kö me ren Kot.” (Ipru 3:1) Jises ese säüesini an epwe eita ngeni ekkewe mi kepit “pwiin” kewe.—Ipru 2:11.
14. Ifa ussun sipwe tuppwöl le älisi pwiin Jises kewe?
14 Me ren Jises, ika sia tuppwöl le älisi pwiin kewe, ussun itä sia fen för ngeni pwisin i. (Älleani Mattu 25:40.) Iwe, epwe ifa ussun iir kewe mi eäni äpilükülükün manau woon fönüfan repwe älisi pwiin Jises kewe mi kepit? Äkkäeüin ra älisiir lon ewe angangen afalafal. (Mt. 24:14; Jon 14:12) Chochoon ekkewe mi kepit a kükkünülo lon ekkeei ier nge chochoon ekkewe ekkoch siip a fen lapolo. Lupwen ekkewe ekkoch siip ra fiti ewe angangen afalafal, pwal ekkoch ra fiti ei angang full time, ra älisatä ekkewe mi kepit le apwönüetä ewe angangen föralo chon käeö. (Mt. 28:19, 20) Sisap mönükalo pwe sia pwal tongeni älisatä ei angang ren ach awora monien älillis lon sokkopaten napanap.
15. Epwe ifa meefien chon Kraist ussun ewe möngöön ngün mi fich me ekkewe kokkot ra pwüngülo me ren ewe chon angang mi alükülük me tipachem?
15 Ifa ussun kich Chon Kraist, met meefiach ussun ewe möngöön ngün ewe chon angang mi tuppwöl a awora lon fansoun mi fich, me ren ekkewe puk mi longolong woon Paipel me ekkewe mwich me mwichelap? Sia etiwa ekkeei möngö fän kilisou me tipemecheres le apwönüetä met sia käeö? Ifa meefiach ren ekkewe kokkot a pwüngülo me ren ewe chon angang mi alükülük me tipachem? Ren ach älleasochisi an we emmwen sia pwäratä pwe sia lükülük woon än Jiowa kokkot le emmwenikich.—Jem. 3:17.
16. Pwata a lamot meinisin chon Kraist ar repwe aüseling ngeni pwiin Kraist kewe?
16 “Nei kewe sip ra aüselinga mweliei, üa pwal sileer, nge iir ra tapweto müri.” (Jon 10:27) Mei pwüng ena ren ekkewe chon Kraist mi kepit. Nge ifa ussun ren ekkewe ra ‘etiir’? Iir repwe pwal aüselinga Jises. Pwal och repwe pwal aüseling ngeni pwiin kewe pun Jises a äkkäeüin awisa ngeniir ar repwe älisi nöün Kot kewe aramas le arap ngeni I. Met a kapachelong lon än emön aüseling ngeni leüwen pwiin Jises kewe?
17. Met a kapachelong lon ach aüseling ngeni ewe chon angang mi alükülük me tipachem?
17 Ewe Mwichen Sou Pwüngüpwüng a tupuni ewe chon angang mi alükülük me tipachem le emmweni me akkota kokkotun ewe angangen afalafal woon unusen fönüfan. Chon ewe Mwichen Sou Pwüngüpwüng, iir ekkewe elter mi kepit me lipwäköch. Pwal iir ekkewe “souemwen” mi nom rech. (Ipru 13:7) Ra tümünü lap seni 7,000,000 chon afalafal woon unusen fönüfan lon lap seni 100,000 mwichefel. Ina popun, ekkeei souemwen mi kepit ra ‘alapalafochei ar achocho lon ewe angangen ach Samol.’ (1 Kor. 15:58) Ach aüseling ngeni ewe chon angang mi alükülük me tipachem a wewe ngeni pwe sia unusen angangfengen me ewe Mwichen Sou Pwüngüpwüng.
Ra Feiöch Iir Kewe mi Aüseling Ngeni ewe Chon Angang
18, 19. (a) Ifa ussun chokkewe mi aüseling ngeni ewe chon angang mi alükülük me tipachem ra feiöch? (b) Met sipwe achocho ngeni?
18 Seni än Jises filiretä, ewe chon angang mi alükülük me tipachem a fen “aiti ngeni chomong aramas usun ar repwe föri mine a pwüng.” (Tan. 12:3) Chommong lein ekkeei aramas ra eäni äpilükülük pwe repwe manauewu seni taloon ei otot mi ngaü. A ifa me watteen feiöchün än emön üöch mwen mesen Kot!
19 Iei än Paipel we oesini: “Telinimw mi Pin, ewe Jerusalem mi fö [ekkewe 144,000], a feitiu me läng seni Kot, a molotä usun eman fin apwüpwülü sofö a tolong lon foutan pwe epwe apwüpwülü ngeni pwülüan.” Lupwen a pwönütä ena oesini, chokkewe mi aüseling leüwen ewe chon angang repwe küna met? Ewe Paipel a erä: “Püsin Kot epwe etiir . . . Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.” (Pwar. 21:2-4) Ina minne, seni unusen letipach sipwe fokkun aüselinga Kraist me pwiin kewe mi kepit mi alükülük.
Met Ka Fen Käeö?
• Ifa ewe pisekin ännet pwe Jiowa a lükülük woon ewe chon angang mi alükülük me tipachem?
• Met a pwäratä pwe Jises Kraist a unusen lükülük woon ewe chon angang?
• Met popun mi fich ngeni ewe chon souwaan mi tuppwöl ach sipwe lükülük woon?
• Ifa ussun sia pwäratä pwe a wor ach lükülük woon ewe chon angang?
[Ekkewe Kapas Eis fan Iten ewe Lesen]
[Sasing lon pekin taropwe 25]
En mi silei iö ewe Jiowa a filatä pwe epwe pwülüwan Nöün we?
[Sasing lon pekin taropwe 26]
Jises Kraist a awisa ngeni ewe chon angang mi alükülük me tipachem “mettochun meinisin”
[Sasing lon pekin taropwe 27]
Lupwen sia fiti ewe angangen afalafal, sia älisi ekkewe mi kepit