Mmọ ‘Ẹka Iso Ẹtiene Eyenerọn̄’

“Mmọ emi ẹdi mbon emi ẹkade iso ẹtiene Eyenerọn̄ ẹka ke ọtọ eke enye akaka.” —EDI. 14:4.

1. Nditiene Jesus ekedi akpan n̄kpọ adan̄a didie ọnọ ata mme mbet Jesus?

KE N̄KPỌ nte isua iba ye ubak ẹma ẹkebe tọn̄ọ Jesus ọkọtọn̄ọ utom ukwọrọikọ esie, enye ama aka “esop mbio obio ke Capernaum” ekekpep mme owo n̄kpọ. Se enye ekekpepde usen oro ama akpa mme owo idem tutu “ediwak mbet esie ẹfiak edem ẹbịne mme n̄kpọ emi mmọ ẹkekpọn̄de inyụn̄ isan̄ake aba ye enye.” Ke ini Jesus okobụpde apostle esie 12 m̀mê mmọ n̄ko ẹyom nditiene nnyọn̄, Simon Peter ama ọbọrọ enye ete: “Ọbọn̄, nnyịn idinyọn̄ ibịne anie? Afo enyene ikọ nsinsi uwem; ndien nnyịn imenịm ke akpanikọ, imonyụn̄ idi idifiọk ite ke afo edi Edisana Owo Abasi.” (John 6:48, 59, 60, 66-69) Ata mme mbet Jesus ikafiakke edem, mmọ ẹma ẹka iso ẹtiene enye. Idem ke ẹma ẹkebọ edisana spirit, mmọ ẹkesụk ẹtetiene ndausụn̄ Jesus.—Utom 16:7-10.

2. (a) Anie edi “ofụn emi anamde akpanikọ onyụn̄ enyenede ọniọn̄” m̀mê “akama-ukpọhọde emi anamde akpanikọ”? (b) Nso eti uwụtn̄kpọ ke ofụn emi enịm ke ‘nditiene Eyenerọn̄’?

² Nso ke ẹkpetịn̄ ẹban̄a mme Christian oro ẹyetde aran mfịn? Ke ini Jesus eketịn̄de aban̄a “idiọn̄ọ edidu [esie] ye eke utịt editịm n̄kpọ emi,” enye okokot otu mme anditiene enye oro ẹyetde aran mi ke isọn̄, “ofụn emi anamde akpanikọ onyụn̄ enyenede ọniọn̄” m̀mê “akama-ukpọhọde emi anamde akpanikọ.” (Matt. 24:3, 45; Luke 12:42) Ofụn emi enịm eti uwụtn̄kpọ ke ‘nditiene Eyenerọn̄ n̄ka ọtọ eke enye akaka.’ (Kot Ediyarade 14:4, 5.) Mme andibuana ke otu emi ifiọkke iban ke n̄kan̄ eke spirit, oro edi, ke mmọ isabakede idem ye mme ukpepn̄kpọ ye edinam “Akwa Babylon,” emi edide ukara ererimbot eke nsunsu ido ukpono. (Edi. 17:5) Owo “ikwe” abian̄a abian̄a ukpepn̄kpọ m̀mê nsu “ke inua” mmọ, mmọ inyụn̄ “inyeneke ndo” ererimbot Satan emi. (John 15:19) Mme Christian oro ẹyetde aran, oro ẹsụk ẹdude ke isọn̄ “ẹyetiene” Eyenerọn̄ ẹka heaven.—John 13:36.

3. Ntak emi nnyịn ikpọbuọtde idem ke ofụn emi anamde akpanikọ onyụn̄ enyenede ọniọn̄?

³ Jesus emek ofụn emi anamde akpanikọ onyụn̄ enyenede ọniọn̄ ete “ese aban̄a mbonufọk imọ,” oro edi, Christian kiet kiet oro ẹyetde aran, onyụn̄ ọnọ “mmọ udia ke edikem ini.” Enye n̄ko emek ofụn emi ete ẹse ẹban̄a “kpukpru inyene esie.” (Matt. 24:45-47) “Inyene” emi esịne “akwa otuowo” oro ẹkade-ka iso ndikọri ke ibat, ye mme “erọn̄ en̄wen.” (Edi. 7:9; John 10:16) Ndi ikpanaha Christian kiet kiet oro ẹyetde aran ye mme “erọn̄ en̄wen” ẹbuọt idem ke ofụn emi Jesus Christ ke idemesie emekde ete ese aban̄a mmọ? Ediwak ntak ẹdu emi akpanamde nnyịn ibuọt idem ke ofụn emi. Edi yak ineme akpan ntak Iba. Akpa, Jehovah enyene mbuọtidem ke ofụn emi, ọyọhọ iba, Jesus n̄ko enyene mbuọtidem ke enye. Ẹyak idụn̄ọde se inamde idọhọ ke Jehovah Abasi ye Jesus Christ ẹnyene ọyọhọ mbuọtidem ke ofụn emi anamde akpanikọ onyụn̄ enyenede ọniọn̄.

Jehovah Enyene Mbuọtidem ke Ofụn Emi

4. Ntak emi ikemede ndinyene mbuọtidem ke udia eke spirit oro ofụn emi anamde akpanikọ onyụn̄ enyenede ọniọn̄ ọnọde?

⁴ Kam kere se isin̄wamde ofụn emi anamde akpanikọ onyụn̄ enyenede ọniọn̄ ọnọ nnyịn nti udia eke spirit ke edikem ini. Jehovah ọdọhọ ete: “Nyeteme fi, nnyụn̄ n̄wụt fi usụn̄ eke afo  edisan̄ade: nyeteme fi, nyetịn̄ fi enyịn mi ke idem.” (Ps. 32:8) Ih, Jehovah ada ofụn emi usụn̄. Ke ntre, imekeme ndinen̄ede mbuọt idem ke udia eke spirit ye ndausụn̄ emi ofụn emi ọnọde.

5. Nso iwụt ke spirit Abasi ọnọ ofụn emi odudu?

⁵ Jehovah ọnọ ofụn emi edisana spirit esie. Okposụkedi emi nnyịn mîkemeke ndikụt edisana spirit, imokụt se mbon oro ẹnyenede spirit emi ẹdade enye ẹnam. Kere ban̄a nte ofụn emi anamde akpanikọ onyụn̄ enyenede ọniọn̄ anamde ediwak miliọn owo ẹfiọk Jehovah Abasi, Eyen esie, ye Obio Ubọn̄ Esie. Mme Ntiense Jehovah ke ẹsịn ifịk ẹkwọrọ ẹban̄a Obio Ubọn̄ emi ke se iwakde ibe idụt 230 ye ke mme isuo. Ndi emi iwụtke ke spirit Abasi ọnọ ofụn emi odudu? (Kot Utom 1:8.) Ofụn emi esinam ikpọ ubiere man etịm onyụn̄ ọnọ ikọt Jehovah emi ẹdude ke ofụri ererimbot udia eke spirit ke edikem ini. Ke ini ofụn emi ebierede se ẹkpenamde, enye esida ima, ifụre ifụre ido, ye nti edu eken emi ẹdide ubak mbun̄wụm spirit, esịn udọn̄ ọnọ ikọt Abasi ete ẹnam se ẹbierede.—Gal. 5:22,23.

6, 7. Nso iwụt ke Jehovah enen̄ede enyene mbuọtidem ke idem ofụn emi anamde akpanikọ?

⁶ Ke ini ikerede iban̄a se Jehovah ọn̄wọn̄ọde ọnọ mme Christian oro ẹyetde aran, oro ekeme ndinam nnyịn ifiọk adan̄a mbuọtidem oro Enye enyenede ke ofụn emi. Apostle Paul ọkọdọhọ ete: “Koro ẹyefri ukotowo, ndien mme akpan̄kpa ẹyeset nte se mîkemeke ndibiara, ndien ẹyekpụhọde nnyịn. Koro ana se ikemede ndibiara esịne se mîkemeke ndibiara, ndien ana se ikemede ndikpa esịne se mîkemeke ndikpa.” (1 Cor. 15:52, 53) Abasi ọyọnọ mme anditiene Christ oro ẹyetde aran—emi ẹnamde akpanikọ ẹsịm n̄kpa—idem oro ọsọn̄de urua akan eke mme edibotn̄kpọ eke spirit eken, oro edi, idem eke mîkemeke ndikpa. Mmọ ẹyedu uwem ke nsinsi, owo ndomokiet idinyụn̄ ikemeke ndiwot mmọ tutu amama. Ke adianade do, ẹyenọ mmọ idem oro mîkemeke ndibiara, idem oro ebietde eke Abasi, emi enyenede odudu ndika iso ndu uwem ke idemesie. Ediyarade 4:4 ọdọhọ ke mme Christian emi ẹnamde ẹset mi ẹyetie ke ebekpo ẹnyụn̄ ẹyara anyanya o-gold ke ibuot. Ẹnịm ata itie ubọn̄ ẹnọ mme Christian oro ẹyetde aran. Edi ediwak ntak efen ẹdu emi anamde inịm ke Jehovah enyene mbuọtidem ke ofụn emi.

⁷ Ediyarade 19:7, 8 ọdọhọ ete: “Ndọ Eyenerọn̄ emedi edisịm ndien n̄wan esie etịm idem. Ih, ẹmenyịme ẹte enye esịne nsemnsem, edisana, eti linen, koro eti linen adade aban̄a ndinen utom ndisana owo.” Jehovah emek  mme Christian oro ẹyetde aran ndidi n̄wanndọ eyen Esie. Abasi ọnọ mme Christian emi ẹyetde aran ata utịbe utịbe enọ—oro edi, ikpọkidem emi mîkemeke ndibiara m̀mê ndikpa, itie ubọn̄, ye ifet ‘edidi n̄wanndọ Eyenerọn̄.’ Kpukpru emi ẹwụt udomo mbuọtidem oro Jehovah enyenede ke idem mme Christian oro ẹyetde aran, emi ‘ẹtienede Eyenerọn̄ ẹka ọtọ eke enye akaka.’

Jesus Ọbuọt Idem ye Ofụn Emi

8. Didie ke Jesus owụt ke imọ imenyene mbuọtidem ke idem mbet imọ oro ẹyetde aran?

⁸ Nso uyarade idu nte ke Jesus enen̄ede enyene mbuọtidem ke idem mbet esie oro ẹyetde aran? Enye ama ọn̄wọn̄ọ ọnọ mme anam akpanikọ apostle esie 11 ke akpatre okoneyo oro enye okodude uwem ke isọn̄ ete: “Mbufo ẹdi mmọ emi ẹsọn̄ọde ẹda ye ami ke idomo mi; mmonyụn̄ nnam ediomi ye mbufo, kpa nte Ete mi akanamde ediomi ye ami, kaban̄a obio ubọn̄, man mbufo ẹkpedia ẹnyụn̄ ẹn̄wọn̄ n̄kpọ ke okpokoro mi ke obio ubọn̄ mi, ẹnyụn̄ ẹtie ke mme ebekpo ẹkpe ikpe ẹnọ esien Israel duopeba.” (Luke 22:28-30) Mme Christian oro ẹyetde aran, oro edi, owo 144,000, ẹtiene ẹbuana ke ediomi oro Jesus okodiomide ye mme apostle esie 11. (Luke 12:32; Edi. 5:9, 10; 14:1) Ndi Jesus akpakanam utọ ediomi emi ye mmọ edieke enye mîkpọkọbuọtke idem ye mmọ?

9. Bat mme n̄kpọ oro ẹsịnede ke otu “kpukpru inyene [Christ]” ise.

⁹ Ke adianade do, Jesus Christ emek ofụn emi anamde akpanikọ onyụn̄ enyenede ọniọn̄ “ete ese aban̄a kpukpru inyene esie” ke isọn̄. (Matt. 24:47) Inyene emi ẹsịne, mme ufọkutom oro ẹdude ke ibuot itieutom Mme Ntiense Jehovah, ye mme n̄kọk itieutom ke nsio nsio idụt, mme Ufọkmbono Obio Ubọn̄, ye mme Ufọk Mbono ke ofụri ererimbot. Utom ukwọrọikọ ye edinam mbet esịne do n̄ko. Ndi akpayak akpan inyene fo esịn ke ubọk owo emi afo mûbuọtke idem ye enye?

10. Nso iwụt ke Jesus Christ odu ye mbet esie oro ẹyetde aran?

¹⁰ Jesus ama owụt mme mbet esie idem ke ama ekeset ke n̄kpa esisịt ini mbemiso ọdọkde aka heaven onyụn̄ ọn̄wọn̄ọ ọnọ mmọ ete: “Sese! Ami ndodu ye mbufo kpukpru usen tutu esịm utịt editịm n̄kpọ emi.” (Matt. 28:20) Ndi un̄wọn̄ọ esie emi osu? Ke 1993, ibat esop Mme Ntiense Jehovah ke ofụri ererimbot ẹkedi n̄kpọ nte 70,000, edi ke 2008 emi osụk ebede, ibat esop Mme Ntiense Jehovah ama ebe 100,000 ke ofụri ererimbot, oro ọwọrọ ke ẹsiak se iwakde  ibe esop 40,000 ke ufan̄ isua 15 emi ẹbede. Mbufa mbet ifan̄ idụk idi esop Jehovah ke ufan̄ isua emi? N̄kpọ nte mbufa mbet miliọn inan̄ ye ubak—emi ọwọrọ ke se ikande owo 800 ẹkena baptism kpukpru usen ke ẹbaharede ukem ukem. Utọ akwa n̄kọri emi owụt ke Christ ke ọnọ mme mbet esie oro ẹyetde aran ndausụn̄ ke mme mbono esop mmọ, onyụn̄ ọnọ mmọ ibetedem ke utom unam mbet emi.

Ofụn Emi Anam Akpanikọ Onyụn̄ Enyene Ọniọn̄

11, 12. Didie ke ofụn emi anam akpanikọ onyụn̄ enyene ọniọn̄?

¹¹ Sia Jehovah Abasi ye Jesus Christ ẹnyenede utọ akwa mbuọtidem oro ke idem ofụn emi anamde akpanikọ onyụn̄ enyenede ọniọn̄, ndi nnyịn n̄ko ikpọbuọtke idem ye ofụn emi, akpan akpan sia edide ofụn emi anam utom oro ẹdọn̄de enye edifọn edifọn? Ke uwụtn̄kpọ, ẹmịn̄ Enyọn̄-Ukpeme ke ofụri isua 130 idahaemi. Ke ẹnyụn̄ ẹnịm mme mbono esop, ikpọ ye n̄kpri mbono Mme Ntiense Jehovah, ndien emi aka iso ndisọn̄ọ mbuọtidem nnyịn.

¹² Ofụn emi anam akpanikọ onyụn̄ enyene ọniọn̄ koro enye isitan̄ke idem inam se Jehovah mînọhọ ndausụn̄, isinyụn̄ itreke ndinam n̄kpọ ke ini Jehovah ọnọde enye ndausụn̄. Ke uwụtn̄kpọ, mme adaiso nsunsu ido ukpono ikwe se idiọkde ke ibụk ibụk edu unana uten̄e Abasi oro mme owo ẹdude mfịn ke ererimbot, edi ofụn emi ẹsidụri nnyịn utọn̄ aban̄a afia ererimbot Satan emi. Jehovah Abasi ye Jesus Christ ẹdiọn̄ ofụn emi, ntak edi oro enye ekemede ndinọ nnyịn ntọt oro enyenede ufọn ke ini. Ke akpanikọ, odot inen̄ede ibuọt idem ke ofụn emi. Edi didie ke ikeme ndiwụt ke imenen̄ede ibuọt idem ke ofụn emi?

‘San̄a ye’ Mme Christian Oro Ẹyetde Aran nte Mmọ Ẹtienede Eyenerọn̄

13. Didie ke ikeme ndiwụt ke imọbuọt idem ke ofụn emi anamde akpanikọ onyụn̄ enyenede ọniọn̄, nte ntịn̄nnịm ikọ Zechariah owụtde?

¹³ N̄wed Zechariah etịn̄ aban̄a “owo duop” oro ẹkade ẹbịne “eyen Judah kiet” ẹkedọhọ enye ẹte: “Ẹyak nnyịn ika ye mbufo.” (Kot Zechariah 8:23.) Sia itie N̄wed Abasi emi ọdọhọ “Ẹyak nnyịn ika ye mbufo,” oro ọwọrọ ke “eyen Judah kiet” emi idịghe ata owo kiet, utu ke oro, enye ada aban̄a ediwak owo. Ke eyo nnyịn, eyen Judah emi ada aban̄a nsụhọ mme Christian oro ẹyetde aran ke spirit, kpa ubak “Israel Abasi.” (Gal. 6:16) “Owo duop eke ẹtode ke kpukpru usem mme idụt” ẹda ẹban̄a akwa otuowo eke mme erọn̄ en̄wen. Ukem nte mme Christian oro ẹyetde aran ẹtienede Jesus ẹka ọtọ eke enye akaka, akwa otuowo ẹsan̄a kiet ye ofụn emi anamde akpanikọ onyụn̄ enyenede ọniọn̄. Ikpanaha akwa otuowo ẹdedei ẹkop bụt ndinam mme owo ẹdiọn̄ọ ke idi nsan̄a “mme andibuana ke ikot eke heaven.” (Heb. 3:1) Bụt inamke Jesus ndikot mme Christian oro ẹyetde aran “nditọete.”—Heb. 2:11.

14. Didie ke ẹkeme ndin̄wam nditọete Christ?

¹⁴ Jesus Christ ada un̄wam ekededi oro inọde nditọete esie emi nte inam inọ imọ. (Kot Matthew 25:40.) Didie ndien ke mbon oro ẹnyenede idotenyịn ndidu uwem mi ke isọn̄ ẹkeme ndin̄wam nditọete Christ oro ẹyetde aran? Ata akpan usụn̄ kiet edi nditiene mmọ n̄kwọrọ etop Obio Ubọn̄. (Matt. 24:14; John 14:12) Ke ediwak  isua emi ẹbede, ibat mme Christian oro ẹyetde aran akaka iso osụhọde, ke ini ibat mme erọn̄ en̄wen akade-ka iso ọdọk. Ke ini mme Christian oro ẹdoride enyịn ndidu uwem ke isọn̄ ẹtienede ẹkwọrọ ikọ, ndien edieke ifet ayakde, ẹnam utom uyọhọ ini, mmọ ẹnen̄ede ẹn̄wam mme Christian oro ẹyetde aran ke utom unam mbet oro ẹkedọn̄de mmọ. (Matt. 28:19, 20) Usụn̄ en̄wen oro mmọ ẹn̄wamde ofụn emi edi ndisitiene ntịp okụk man ẹda ẹnam utom emi.

15. Didie ke afo akpanam n̄kpọ aban̄a ekemini udia eke spirit ye ndausụn̄ oro ofụn emi anamde akpanikọ ọnọde?

¹⁵ Didie ke afo ada udia eke spirit oro ofụn emi anamde akpanikọ ọnọde ke edikem ini, utọ nte mme n̄wed Bible, n̄kpri ye ikpọ mbono, ye mme mbono esop Christian? Ndi emesitiene abuana ke mme ndutịm emi onyụn̄ ada se ekpepde esịn ke edinam? Didie ke afo esinam n̄kpọ aban̄a mme ubiere oro ofụn emi anamde akpanikọ anamde? Edieke nnyịn inyịmede nditiene ndausụn̄ oro ofụn emi ọnọde, oro owụt ke imọbuọt idem ke usụn̄ oro Jehovah ọnọde ndausụn̄.—Jas. 3:17.

16. Ntak emi kpukpru Christian ẹkpekopde uyo ẹnọ nditọete Christ?

¹⁶ Jesus ọkọdọhọ ete: “Mme erọn̄ mi ẹkop uyo mi, ami mmonyụn̄ mfiọk mmọ, ndien mmọ ẹtiene mi.” (John 10:27) Mme Christian oro ẹyetde aran ẹkop uyo Jesus, ẹnyụn̄ ẹtiene enye. Nso kaban̄a mbon oro ‘ẹsan̄ade ye’ mmọ? Ana mmọ ẹkop uyo Jesus. Mmọ n̄ko ẹnyene ndikop uyo nditọete Christ. Koro ẹma ẹyak mmọ ẹsịn ke ubọk nditọete Christ emi ẹte ẹse ẹban̄a mmọ ke n̄kan̄ eke spirit. Edi didie ke ikpokop uyo inọ nditọete Christ?

17. Nso ke ndikop uyo nnọ ofụn emi anamde akpanikọ ọwọrọ?

¹⁷ Otu Ukara ada ke ibuot ofụn emi anamde akpanikọ onyụn̄ enyenede ọniọn̄, ndien enye ọnọ ndausụn̄ ke utom edikwọrọ eti mbụk ke ofụri ererimbot. Mbiowo oro ẹnyenede mbufiọk, emi ẹdade edisana spirit ẹyet aran, ẹnam Otu Ukara. Mmọ ke ẹtịn̄ ẹban̄a nte “mmọ eke ẹdade usụn̄” ke otu nnyịn. (Heb. 13:7) Mbiowo emi ẹyetde aran “ẹnyene ekese ndinam ke utom Ọbọn̄”—ndise mban̄a mme asuanetop oro ẹbede miliọn itiaba, emi ẹdude ke se ibede esop tọsịn 100 ke ofụri ererimbot. (1 Cor. 15:58) Ndikop uyo nnọ ofụn emi ọwọrọ ndinen̄ede mbere ye Otu Ukara esie.

Ẹdiọn̄ Mbon Oro Ẹkopde Uyo Ofụn Emi

18, 19. (a) Didie ke ẹdiọn̄ mbon oro ẹkopde uyo ofụn emi anamde akpanikọ onyụn̄ enyenede ọniọn̄? (b) Nso ikpedi ubiere nnyịn?

¹⁸ Tọn̄ọ ẹkemek ofụn emi anamde akpanikọ onyụn̄ enyenede ọniọn̄, enye anam “ediwak owo ẹkabade ẹdi edinen.” (Dan. 12:3) Emi esịne mbon oro ẹnyenede idotenyịn ndibọhọ nsobo akani editịm n̄kpọ emi. Ndinyene utọ eti itie ebuana emi ye Abasi edi ata edidiọn̄.

¹⁹ Nso iditịbe inọ mbon oro ẹkopde uyo ofụn emi, ke ini ‘edisana obio, Obufa Jerusalem, [emi esịnede owo 144,000] otode Abasi osụhọde ke heaven edi ẹnyụn̄ ẹtịm enye idem nte n̄wanndọ emi ẹbanade ẹben̄e ebe esie’? Bible ọdọhọ ete: “Abasi ke idemesie oyonyụn̄ odu ye mmọ. Ndien enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. Mme akpa n̄kpọ ẹma ẹbe ẹfep.” (Edi. 21:2-4) Nnyịn ikpakam ibiere ndinen̄ede n̄kop uyo Christ ye eke mme anam-akpanikọ nditọete esie oro ẹyetde aran!

Nso ke Afo Ekekpep?

• Nso iwụt ke Jehovah enyene mbuọtidem ke idem ofụn emi anamde akpanikọ onyụn̄ enyenede ọniọn̄?

• Nso iwụt ke Jesus Christ n̄ko enen̄ede enyene mbuọtidem ke idem ofụn emi?

• Ntak emi ikpọbuọtde idem ke akama ukpọhọde emi anamde akpanikọ?

• Didie ke ikeme ndiwụt ke imọbuọt idem ke ofụn emi?

[Mme Mbụme Ukpepn̄kpọ]

[Ndise ke page 25]

Ndi ọmọfiọk mmọ emi Jehovah emekde ndidi n̄wanndọ Eyen esie ke ini iso?

[Mme ndise ke page 26]

Jesus Christ ayak “inyene” esie esịn ke ubọk ofụn emi anamde akpanikọ onyụn̄ enyenede ọniọn̄

[Ndise ke page 27]

Ke ini itienede ikwọrọ ikọ, nnyịn isịn un̄wam inọ mme Christian oro ẹyetde aran