A Bi “Lele Omogodẹ Na Nya”
A Bi “Lele Omogodẹ Na Nya”
“Enana họ enọ i je lele Omogodẹ na nya kpohọ koria koria kpobi.” —EVIA. 14:4.
1. Ẹvẹ uvi ilele Jesu a ro dhesẹ inọ ọye a re lele?
NỌ Jesu o ru iruo odibọgba riẹ te oware wọhọ ikpe ivẹ gbe ubro no, “o je wuhrẹ eva obọ Kapaniọm.” Bi roro inọ eme nọ ọ ta e ga hrọ, “ibuobu ilele riẹ jọ a te si oma họ emu, a gbe je lele ie nya ofa ha.” Nọ Jesu ọ nọ ikọ 12 riẹ sọ a gwọlọ nyavrẹ re, Saimọn Pita o te yo nọ: “Olori, ono ma rẹ nya brẹ? Who wo ẹme uzuazọ ebẹdẹ bẹdẹ; ma rọwo, ma tẹ riẹ nọ, whẹ họ Omamọ na ọrọ Ọghẹnẹ.” (Jọn 6:48, 59, 60, 66-69) Uvi ilele Jesu a se riẹ ba elele he. Nọ a rọ ẹzi ọfuafo wholo ai no, a gbẹ jẹ roma kpotọ kẹ ọkpọvio Jesu.—Iruẹru 16:7-10.
2. (a) Ono họ ‘ọrigbo nọ o wo ẹrọwọ avọ areghẹ na’ hayo “odibo oruọzewọ” na? (b) Ẹvẹ ọrigbo na o ro dhesẹ inọ o bi gine “lele Omogodẹ na”?
2 Eme ma rẹ sae ta kpahe Ileleikristi nọ a rọ ẹzi wholo evaọ oke mai na? Evaọ eruẹaruẹ riẹ kpahe “oka ẹtha [riẹ] gbe urere akpọ na,” Jesu o se ilele riẹ kpobi nọ a rọ ẹzi wholo evaọ otọakpọ na ‘ọrigbo nọ o wo ẹrọwọ avọ areghẹ na,’ hayo “odibo oruọzewọ.” (Mat. 24:3, 45; Luk 12:42) Ọrigbo nana o fi emamọ oriruo h’otọ no bi “lele Omogodẹ na nya kpohọ koria koria kpobi.” (Se Eviavia 14:4, 5.) Enọ i ru utu ọrigbo nana via a rehọ iruemu gbe iwuhrẹ “Babilọn ologbo na” zue oma rai hi. (Evia. 17:5) “A jọ unu rai ruẹ” iwuhrẹ erue he, yọ a “kare epe” evaọ akpọ Setan. (Jọn 15:19) Evaọ obaro, enọ a wholo na nọ i kiọkọ otọakpọ na a ti “lele” Omogodẹ na bẹsenọ a ti ro kuomagbe ei evaọ obọ odhiwu.—Jọn 13:36.
3. Fikieme u je wuzou k’omai re ma fi eva họ utu ọrigbo na?
3 Jesu ọ rehọ ọrigbo nọ o wo ẹrọwọ avọ areghẹ na mu re ọ rẹrote “uwou riẹ,” koyehọ omomọvo erọ utu ọrigbo na, “re nọ oke u te ọ rehọ emu kẹ ae.” Ọ tẹ jẹ rehọ ọrigbo na “mu uzou eware riẹ kpobi.” (Mat. 24:45-47) “Eware” riẹ nọ ọ fodẹ na i kugbe “otu obuobu” ọrọ “igodẹ efa” na. (Evia. 7:9; Jọn 10:16) Kọ u gbe fo re omomọvo utu ọrigbo na gbe “igodẹ efa” na a fievahọ ọrigbo nọ a ro mu re ọ sẹro rai na? Ẹjiroro buobu e riẹ nọ ma je fievahọ utu ọrigbo na. Ugogo ẹjiroro ivẹ jọ họ: (1) Jihova o fievahọ utu ọrigbo na. (2) Jesu omariẹ o fievahọ ọrigbo na. Joma kiẹ imuẹro jọ riwi enọ i dhesẹ inọ Jihova Ọghẹnẹ avọ Jesu Kristi a fi eva rai kpobi họ ọrigbo nọ o wo ẹrọwọ avọ areghẹ na.
Jihova O Fi Eva Họ Ọrigbo Na
4. Fikieme ma jẹ jẹ emuore abọ-ẹzi nọ ọrigbo nọ o wo ẹrọwọ avọ areghẹ na ọ be kẹ omai rehọ?
4 Roro kpahe oware nọ u bi ru ei lọhọ kẹ ọrigbo nọ o wo ẹrọwọ avọ areghẹ na re ọ sae rọ emamọ emuore abọ-ẹzi rọ ko omai. Jihova ọ ta nọ: “Me re ti wuhrẹ owhẹ dhesẹ kẹ owhẹ edhere nọ whọ rẹ te nya.” O te fibae nọ: “Ẹro mẹ me re ti ro su owhẹ.” (Ol. 32:8) Ẹhẹ, Jihova ọ be kẹ ọrigbo na ọkpọvio. Fikiere ma rẹ jẹ iwuhrẹ gbe ọkpọvio Ikereakere nọ ọrigbo na ọ be kẹ omai rehọ.
5. Eme u dhesẹ inọ ẹzi Ọghẹnẹ o bi fi obọ họ kẹ utu ọrigbo na?
5 Jihova ọ be jẹ rọ ẹzi ọfuafo na ro fi obọ họ kẹ utu ọrigbo na. Dede nọ ma rẹ ruẹ ẹzi Jihova ha, ma be ruẹ iruo nọ o bi ru evaọ oma enọ o rọ oma. Dai roro kpahe oware nọ ọrigbo nọ o wo ẹrọwọ avọ areghẹ na a ru no evaọ usiuwoma nọ a be jọ akpọ na soso ta kpahe Jihova Ọghẹnẹ, Ọmọ riẹ, gbe Uvie na. Idibo Jihova a be rọ ọwhọ whowho ovuẹ Uvie na evaọ erẹwho nọ i bu vi 230 gbe ikoliko esese. Kọ oyena o gbẹ k’omai imuẹro inọ ẹzi Ọghẹnẹ ọ be kẹ ọrigbo na ẹgba? (Se Iruẹru Ikọ Na 1:8.) Re a tẹ kẹ idibo Jihova emamọ emuore abọ-ẹzi evaọ ẹruoke, utu ọrigbo na ọ rẹ jẹ iroro nọ i wuzou. Okenọ a tẹ be jẹ iroro itieye na je ru oware nọ a jẹ iroro riẹ na, ọrigbo na o re ru ere avọ uyoyou, omaurokpotọ, je dhesẹ uruemu-ezi efa erọ ubi ẹzi na.—Gal. 5:22, 23.
6, 7. Ẹvẹ Jihova o fievahọ ọrigbo ẹrọwọ na te?
6 Re whọ riẹ epanọ Jihova o fievahọ ọrigbo ẹrọwọ na te, roro kpahe oware nọ ọ ya eyaa riẹ kẹ enọ i ru utu ọrigbo na via. Pọl ukọ na o kere nọ: “Ọgba urere na o re ti do, a vẹ te kpare iwhuowhu ababọ egbo, a vẹ te rẹriẹ omai. Keme oma ugbogbo onana o rẹ te whẹ oma nọ o kare egbo họ, gbe oma onana nọ u re whẹ na o rẹ te whẹ oma nọ u re whẹ hẹ họ hrọ.” (1 Kọr. 15:52, 53) Ilele Jesu nọ a rọ ẹzi wholo, enọ e gọ Ọghẹnẹ ziezi jẹ rehọ ugboma ahwo-akpọ nọ u re gbo na whu no, a te kpare ai ze jẹ kẹ ai oghẹrẹ uzuazọ nọ ikọ-odhiwu a wo ho. A te kẹ ai uzuazọ sebaewhuo—uzuazọ nọ u wo oba ha gbe onọ a rẹ sae raha ha. Ofariẹ, a te kẹ ai uzuazọ nọ o kare egbo. Eviavia 4:4 u dhesẹ ahwo nana nọ a kpare ze na wọhọ nnọ a keria egbara-uvie yọ a rehọ itu-uvie igoru ro tu. Ileleikristi nọ a rọ ẹzi wholo na a rẹ te jọ ivie. Rekọ o jọ ere kuhọ họ.
7 Eviavia 19:7, 8 e ta nọ: “Orọwo omogodẹ na u te no, ọmọtẹ-ibobo riẹ ọ ruẹrẹ oma kpahe ino, ọye a rọ ọghọ kẹ nọ ọ rẹ gọ ẹgọ iwu efuafo elọlọhọ nọ i re lo nwranwranwra—keme ehọ efuafo na họ ẹgọ ẹrẹreokie erezi na.” Jihova ọ salọ Ileleikristi nọ a wholo na re a te jọ ọmọtẹ-ibobo kẹ Ọmọ riẹ. Oma nọ o kare egbo, sebaewhuo, oruaro uvie, “orọwo omogodẹ na”—enana yọ eghale nọ a rẹ ruẹ obọ rai hi. Enana kpobi i dhesẹ inọ Ọghẹnẹ o gine fievahọ enọ a rọ ẹzi wholo na, enọ i bi “lele Omogodẹ na nya kpohọ koria koria kpobi.”
Jesu O Fi Eva Họ Ọrigbo Na
8. Ẹvẹ Jesu o ro dhesẹ nnọ o fievahọ ilele riẹ nọ a rọ ẹzi wholo na?
8 Imuẹro vẹ e riẹ inọ Jesu o fievahọ ilele riẹ nọ a rọ ẹzi wholo na riẹriẹriẹ? Evaọ aso urere riẹ evaọ otọakpọ, Jesu ọ ya eyaa kẹ ikọ 11 riẹ. Ọ ta kẹ ae nọ: “Whai họ enọ ilele omẹ gbẹ jọ eva ẹdawọ mẹ; epanọ ọsẹ mẹ ọ rehọ uvie mu kẹ omẹ, ere me ro mu kẹ owhai re. Re wha re, jẹ da eva emẹjẹ mẹ eva uvie mẹ, jegbe re wha keria egbara uvie re wha bruoziẹ erua kpegbivẹ Izrẹl.” (Luk 22:28-30) Ọvọ nọ Jesu o lele ikọ 11 na re na u ti te Ileleikristi 144,000 nọ a wholo na. (Luk 12:32; Evia. 5:9, 10; 14:1) Kọ o hae jọnọ Jesu o gbe fievahọ ae he, ọ hae re ọvọ Uvie kugbe ai?
9. Eware jọ vẹ họ enọ e rrọ usu “eware [Kristi] kpobi”?
9 Ofariẹ, Jesu Kristi ọ rehọ ọrigbo nọ o wo ẹrọwọ avọ areghẹ na mu “uzou eware riẹ kpobi”—eware kpobi nọ e whomahọ Uvie na evaọ otọakpọ. (Mat. 24:47) Usu eware nana họ oria nọ u w’uzou iruo Isẹri Jihova evaọ akpọ soso, iwou ogha nọ e rrọ erẹwho sa-sa, gbe Egwa Okokohọ avọ Egwa Uvie nọ e rrọ akpọ na soso. U te je kugbe iruo usiuwoma ota Uvie na. Kọ ohwo jọ ọ rẹ rehọ emamọ eware riẹ kẹ ohwo nọ o fievahọ họ kru re ọ jẹ rehọ ai ru iruo?
10. Eme u dhesẹ inọ Jesu Kristi ọ rrọ kugbe ilele riẹ nọ a rọ ẹzi wholo na?
10 Taure o te ti tovrẹ kpobọ odhiwu, Jesu nọ ọ kparoma no na ọ roma via kẹ uvi ilele riẹ ọ tẹ ya eyaa kẹ ai nọ: “Ri, mẹ avọ owhai a gbẹ jọ kẹse kẹse, makọ te urere akpọ na.” (Mat. 28:20) Kọ o bi gine ru epanọ ọ ta na? Evaọ ikpe 15 nọ e vrẹ, unu ikoko Isẹri Jihova nọ e jọ akpọ na soso i bu te oware wọhọ idu udhosa gbe ikpe (70,000), rekọ enẹna i bu vi idu udhusoi (100,000) no. Kọ bro ahwo a kurẹriẹ ze no? Enwenọ ahwo ima ene gbe ubro (4,500,000) e họ-ame no evaọ ikpe ikpegbisoi nọ e vrẹ na—a tẹ ghale ai, enọ e họ-ame kẹdẹ kẹdẹ a bu vi egba eree (800). Ẹvi ologbo nana yọ imuẹro inọ Kristi ọ be kpọ ilele riẹ nọ a rọ ẹzi wholo na eva iwuhrẹ ikoko rai yọ ọ be thae uke evaọ iruo usiuwoma ota rai.
Ọrigbo na O Wo Ẹrọwọ avọ Areghẹ
11, 12. Ẹvẹ ọrigbo na o ro dhesẹ no nnọ o wo ẹrọwọ avọ areghẹ?
11 Nọ orọnọ Jihova Ọghẹnẹ avọ Jesu Kristi a fi eva rai kpobi họ ọrigbo nọ o wo ẹrọwọ avọ areghẹ na, kọ u gbe fo re ma fievahọ iẹe re? Whaọ ọrigbo na o bi ru iruo nọ a kẹ riẹ na ziezi. Wọhọ oriruo, anwọ ikpe udhozeza gbe ikpe (130) a bi ro kere emagazini Uwou-Eroro Na. Iwuhrẹ gbe ikokohọ erọ Isẹri Jihova e gbẹ be bọ ẹrọwọ mai ga.
12 Ọrigbo nọ o wo ẹrọwọ na o wo areghẹ re keme ọ rẹ hẹrẹ ọkpọvio Jihova evaọ oware kpobi, yọ o te wo otoriẹ oreva Ọghẹnẹ no, ọ rẹ j’owọ kpata kpata. Wọhọ oriruo, dede nọ isu egagọ erue a be tehe ezọ di kẹ ekpehre uruemu ahwo inẹnẹ hayo tubẹ ta inọ iruemu itieye na e thọ họ, ọrigbo na ọ be vẹvẹ omai unu kpahe enwoma nọ e rrọ uyerakpọ muomu Setan. Ọrigbo na ọ be sae kẹ emamọ unuovẹvẹ ọrọ ẹruoke keme Jihova Ọghẹnẹ avọ Jesu Kristi a be ghale iẹe. Fikiere ma re fi eva mai kpobi họ ọrigbo na. Rekọ ẹvẹ ma re ro dhesẹ inọ ma fievahọ ọrigbo nọ o wo ẹrọwọ avọ areghẹ na?
“Lele” Enọ A Wholo na nọ A Bi Lele Omogodẹ Na
13. Wọhọ epanọ eruẹaruẹ Zekaraya e ta, ẹvẹ ma rẹ sai ro dhesẹ inọ ma fievahọ ọrigbo nọ o wo ẹrọwọ avọ areghẹ na?
13 Obe Zekaraya o ta kpahe “imakpe” nọ e be te nyabru ‘ohwo Iju’ a vẹ ta kẹe nọ: “Je oma lele owhai.” (Se Zekaraya 8:23.) Fikinọ a dhesẹ ‘ohwo Iju’ na wọhọ “owhai,” u dhesẹ inọ omọvo ọ rrọ họ. Evaọ oke mai na, ‘ohwo Iju’ na o dikihẹ kẹ okiọkotọ ọrọ Ileleikristi nọ a rọ ẹzi wholo na—enọ e rrọ usu ‘Izrẹl Ọghẹnẹ.’ (Gal. 6:16) ‘Imakpe nọ i no kẹvẹrẹ kẹvẹrẹ erẹwho kpobi tha na’ họ otu obuobu erọ igodẹ efa na. Wọhọ epanọ Ileleikristi nọ a rọ ẹzi wholo a bi lele Jesu kpohọ koria koria kpobi na, ere otu obuobu na a bi “lele” ọrigbo nọ o wo ẹrọwọ avọ areghẹ na. Oma o rẹ vuọ otu obuobu na vievie he re a dhesẹ ai wọhọ egbẹnya enọ i wo “use obọ odhiwu na.” (Hib. 3:1) Oma o be vuọ Jesu hu re o se enọ a rọ ẹzi wholo na “inievo” riẹ.—Hib. 2:11.
14. Ẹvẹ ma rẹ sai ro fi obọ họ kẹ inievo Kristi?
14 Jesu Kristi ọ rehọ obọ nọ ma bi fihọ kẹ inievo riẹ na wọhọ ẹsenọ ọye ma bi fi obọ na họ kẹ. (Se Matiu 25:40.) Rekọ oghẹrẹ vẹ enọ i wo ẹruore otọakpọ na a rẹ sai ro fi obọ họ kẹ inievo Kristi nọ a rọ ẹzi wholo? Edhere nọ a be mai ro fi obọ họ kẹ ae họ ẹta usiuwoma Uvie na. (Mat. 24:14; Jọn 14:12) Nọ unu enọ a wholo na a bi dhe ẹkẹkao na yọ unu igodẹ efa na a bi dhe ebuebu. Nọ enọ i wo ẹruore otọakpọ a tẹ be ta usiuwoma, bi tube ru iruo ọkobaro, yọ a be tha enọ a rọ ẹzi wholo na uke evaọ erugba usiuwoma ota na. (Mat. 28:19, 20) Okẹ-unevaze yọ edhere ọfa nọ ma bi ro fi obọ họ.
15. Ẹvẹ mai omomọvo ma re rri emuore abọ-ẹzi ọrọ ẹruoke gbe ọkpọvio nọ u bi no obọ ọrigbo na ze?
15 Ẹvẹ mai omomọvo ma bi rri emuore abọ-ẹzi ọrọ ẹruoke nọ ọrigbo nọ o wo ẹrọwọ na ọ be rọ kẹ omai ẹkwoma ebe gbe iwuhrẹ ukoko na? Kọ ma be rọ evawere re emu abọ-ẹzi na je fi eware nọ ma bi wuhrẹ họ iruo? Ẹvẹ ma be hai rri iroro-ejẹ ọrigbo na kpahe oghẹrẹ nọ u fo nọ ma re ru eware evaọ ukoko? Ma tẹ be rọ unevaze jẹ ọkpọvio nọ a kẹ omai rehọ o rẹ kẹ imuẹro inọ ma fi ẹrọwọ họ ọruẹrẹfihotọ Jihova.—Jem. 3:17.
16. Fikieme Ileleikristi kpobi a je yoẹme kẹ inievo Kristi?
16 Jesu ọ ta nọ: “Igodẹ mẹ i re yo uru mẹ, mẹ riẹ rai, i re lele omẹ.” (Jọn 10:27) Ere Ileleikristi nọ a wholo na a rrọ. Kọ ẹvẹ kpahe enọ i bi “lele” ai? U fo nọ ahwo yena a re yoẹme kẹ Jesu. A rẹ jẹ gaviezọ kẹ inievo Jesu, keme ae họ enọ a rehọ iruo kẹ re a kpọ jẹ rẹrote ahwo Ọghẹnẹ. Eme o gwọlọ re a yoẹme kẹ inievo Kristi?
17. Eme ẹmeoyo kẹ utu ọrigbo na o gwọlọ?
17 Ugboma Esuo na họ ahwo ẹro ọrọ ọrigbo nọ o wo ẹrọwọ avọ areghẹ na, enọ e be kobaro jẹ rẹrote usiuwoma ota Uvie na evaọ otọakpọ na soso. Enọ i ru Ugboma Esuo na via yọ ekpako nọ i wo eriariẹ ziezi, enọ a rọ ẹzi wholo. Ahwo nana họ enọ a rẹ mai dhesẹ inọ a be kobaro evaọ udevie mai. (Hib. 13:7) Inievo nana a rọ “owhreze iruo Ọnowo na” keme a be rẹrote iwhowho Uvie nọ i bu vrẹ ima ihrẹ (7,000,000) evaọ akpọ na soso evaọ ikoko nọ i bu vi idu udhusoi (100,000). (1 Kọr. 15:58) Ma te bi ru lele ọkpọvio kpobi nọ Ugboma Esuo na o be kẹ u dhesẹ inọ ma bi yoẹme kẹ utu ọrigbo na.
Oghale U re te Enọ I Bi Yoẹme kẹ Ọrigbo Na
18, 19. (a) Didi eghale i ti te enọ i yoẹme kẹ ọrigbo nọ o wo ẹrọwọ avọ areghẹ na? (b) Eme u fo inọ o rẹ jọ ọtamuo mai?
18 Anwẹnọ a rọ rehọ ọrigbo nọ o wo ẹrọwọ avọ areghẹ na mu no, o fi obọ họ “ku ahwo rẹriẹ ruọ ẹrẹreokie” no. (Dan. 12:3) Ahwo nọ o fi obọ họ kẹ no a kugbe enọ i wo ẹruore inọ a te zọ evaọ ọraha uyerakpọ omuomu nana. Ẹrẹreokie nọ a fi obọ họ kẹ ahwo wo no na yọ oghale ulogbo!
19 Evaọ obaro, eghale vẹ enọ e gaviezọ kẹ ọrigbo na a ti wo, okenọ ‘okpẹwho ọrẹri na, Jerusalẹm ọkpokpọ na, [onọ ahwo 144,000 a ru via na] nọ a ruẹrẹ kpahe wọhọ ọva nọ ọ be hẹrẹ ọzae riẹ na, o ti no obọ Ọghẹnẹ nọ ọ rọ odhiwu ze’? Ebaibol e ta nọ: “Ọghẹnẹ oma riẹ a gbẹ te jọ, . . . Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.” (Evia. 21:2-4) Fikiere, joma yoẹme kẹ Kristi avọ inievo riẹ nọ a rọ ẹzi wholo na.
Eme Who Wuhrẹ?
• Eme u dhesẹ inọ Jihova o fievahọ ọrigbo nọ o wo ẹrọwọ avọ areghẹ na?
• Eme u dhesẹ inọ Jesu Kristi o fi eva riẹ kpobi họ utu ọrigbo na?
• Fikieme u je fo re ma fievahọ odibo oruọzewọ na?
• Ẹvẹ ma re ro dhesẹ inọ ma fievahọ ọrigbo na?
[Enọ Uwuhrẹ]
[Uwoho nọ o rrọ ẹwẹ-obe avọ 25]
Kọ whọ riẹ ahwo nọ Jihova ọ salọ nọ e be te jọ ọmọtẹ-ibobo Ọmọ riẹ?
[Uwoho nọ o rrọ ẹwẹ-obe avọ 26]
Jesu Kristi o mu “eware” riẹ họ obọ ọrigbo nọ o wo ẹrọwọ avọ areghẹ na no
[Uwoho nọ o rrọ ẹwẹ-obe avọ 27]
Ma tẹ be ta usiuwoma yọ ma be tha enọ a rọ ẹzi wholo na uke