Bo “Kefula Kulanda Mwana-Dimeme”
Bo “Kefula Kulanda Mwana-Dimeme”
‘Bo [kefula, NW] kulanda Mwana-dimeme na bisika yonso ya yandi kekwenda.’—KUS. 14:4.
1. Inki balongoki ya kyeleka ya Yezu kuyindulaka na yina metala kulanda yandi?
NA NIMA ya kiteso ya bamvula zole ti ndambu ya kisalu na yandi, Yezu “vandaka kulonga na nzo ya bisambu ya Bayuda na bwala Kapernaumi.” Sambu bo monaka nde malongi na yandi kuvandaka ngolo mingi, “balonguki na yandi mingi katukaka; bo kwendaka diaka ve ti yandi nzila mosi.” Ntangu Yezu kuyulaka bantumwa na yandi 12 kana bo mpi kezola kwenda, Simoni Piere kuvutulaka nde: “Mfumu, na nani beto ta kwenda? Mambu ya nge ke tubaka yo ke pesaka moyo ya mvula na mvula. Ntangu yai, beto me ndima nge, beto me zaba nde nge kele muntu ya santu me katukaka na Nzambi.” (Yoa. 6:48, 59, 60, 66-69) Balongoki ya kyeleka ya Yezu kuyambulaka ve na kulanda yandi. Na nima ya kupakulama na mpeve santu, bo landaka na kulemfuka na lutwadisu ya Yezu.—Bis. 16:7-10.
2. (a) Nani kele “mpika ya kwikama mpi ya mayele,” to “nsadi ya kwikama”? (b) Inki mutindu mpika mezabanaka mbote nde yandi ‘kelanda Mwana-Dimeme’?
2 Inki beto lenda tuba sambu na Bakristu ya kupakulama ya ntangu na beto? Na mbikudulu na yandi ya metala ‘kidimbu ya tamonika yina tasonga nde yandi kekwisa kuvutuka mpi nsuka ya ntoto mekuma penepene,’ Yezu kutubilaka kimvuka ya balongoki na yandi ya kupakulama na mpeve, bayina kele na ntoto, bonso “mpika ya kwikama mpi ya mayele,” (NW) to “nsadi ya kwikama.” (Mat. 24:3, 45; Luka 12:42, NW) Kimvuka yai ya mpika mezabanaka mbote nde bo yonso na kimvuka ‘kelanda Mwana-Dimeme na bisika yonso ya yandi kekwenda.’ (Tanga Kusonga 14:4, 5.) Bapakulami kebikalaka bamwense na kimpeve na mutindu bo kekudibebisaka ve ti balukwikilu mpi bikalulu ya ‘Babilone ya Nene,’ disongidila kintinu ya nsi-ntoto ya mvimba ya mabundu ya luvunu. (Kus. 17:5) “Bo me wa bo ntete ve” kelonga malongi ya luvunu, mpi bo kebikalaka kukonda “kifu” na nsi-ntoto ya Satana. (Yoa. 15:19) Na bilumbu kekwisa, bapakulami yina mebikalaka na ntoto ‘talanda’ Mwana-Dimeme na zulu.—Yoa. 13:36.
3. Sambu na nki yo kele mfunu nde beto tudila kimvuka ya mpika ntima?
3 Yezu metulaka mpika ya kwikama mpi ya mayele “na zulu ya bantu ya kisalu ya nzo na yandi,” disongidila konso muntu yina kele na kimvuka ya mpika, sambu na “kupesa bo madya na ntangu ya mbote.” Yandi metulaka mpi mpika “na zulu ya bima na yandi yonso.” (Mat. 24:45-47, NW) Na kati ya “bima” yai, beto lenda tanga ‘kibuka ya nene’ ya “mameme ya nkaka” yina kelanda kaka na kuyela. (Kus. 7:9; Yoa. 10:16) Keti yo mefwana ve nde konso muntu na kati ya bapakulami mpi ya “mameme ya nkaka” kutula ntima na mpika yina ya bo metulaka na zulu na bo? Kimvuka ya mpika mefwana nde beto tudila yandi ntima sambu na bikuma mingi. Bikuma ya nene kele zole: (1) Yehowa ketudilaka kimvuka ya mpika ntima. (2) Yezu mpi ketudilaka mpika ntima. Bika beto tadila nzikisa ya kemonisa nde Yehowa Nzambi ti Yezu Kristu ketudilaka mpenza mpika ya kwikama mpi ya mayele ntima.
Yehowa Ketudilaka Mpika Ntima
4. Sambu na nki beto lenda tudila mpika ya kwikama mpi ya mayele ntima sambu na madya ya kimpeve yina yandi kepesaka?
4 Beto tadila nki kesadisaka mpika ya kwikama mpi ya mayele na kupesa madya ya mbote ya kimpeve na ntangu ya mbote. Yehowa kutubaka nde: “Mono ta songa nge nzila ya nge fweti landa, mono ta longa nge mambu yonso.” Yandi yikaka nde: “Mono ta talaka nge.” (Nk. 32:8) Ya kyeleka, Yehowa ketwadisaka mpika. Yo yina, beto lenda tudila mpenza mpika ntima sambu na luswasukusu, nzayilu, mpi lutwadisu ya Masonuku yina yandi kepesaka beto.
5. Inki kemonisa nde mpeve ya Nzambi kepesaka kimvuka ya mpika ngolo?
5 Yehowa kesakumunaka mpi kimvuka ya mpika na kupesaka bo mpeve santu na yandi. Ata mpeve ya Yehowa kemonanaka ve, beto lenda mona mambu yina yo kesalaka na bantu yina kebakaka yo. Yindula mambu yina mpika ya kwikama mpi ya mayele mekukaka kulungisa na kutaka kimbangi na ntoto ya mvimba na yina metala Yehowa Nzambi, Mwana na yandi, mpi Kimfumu. Bansambidi ya Yehowa ke na kusamuna nsangu ya Kimfumu na kikesa yonso na bansi kuluta 230 ti bisanga. Keti yo kele ve nzikisa ya kemonisa pwelele nde mpeve ya Nzambi kepesaka mpika ngolo? (Tanga Bisalu 1:8.) Sambu na kupesa bantu ya Yehowa ya ntoto ya mvimba madya ya kimpeve na ntangu ya mbote, kimvuka ya mpika fwete baka badesizio ya mfunu. Ntangu yandi kebakaka badesizio yina mpi kesalaka nde yo lungana, mpika kemonisaka zola, mawete, mpi bikalulu yankaka ya mbuma ya mpeve.—Gal. 5:22, 23.
6, 7. Na nki kiteso Yehowa ketudilaka mpika ya kwikama ntima?
6 Sambu na kubakisa na nki kiteso Yehowa ketudilaka mpika ya kwikama ntima, beto yindulula mambu yina yandi silaka na bamambre ya mpika yango. Ntumwa Polo kusonikaka nde: “Ntangu mpungi ta bula, bantu yina me fwaka bo ta telama sambu na kuvanda na moyo ya kukonda nsuka, beto yonso mpi ta baluka mutindu ya nkaka. Sambu muntu yina ke na nitu ya kupola yandi fweti baka nitu yina lenda pola ve; muntu yina ke fwaka fweti baka nitu yina lenda fwa ve.” (1 Kor. 15:52, 53) Balongoki ya kupakulama ya Kristu, yina kesadilaka Nzambi na kwikama yonso mpi kefwaka na nitu yina kepolaka, kefutumukaka ti kima mosi yina meluta luzingu ya mvula na mvula yina bigangwa ya kimpeve kevandaka na yo. Bo kebakaka luzingu yina lenda fwa ve mpi lenda suka ve. Dyaka, bo kebakaka nitu yina lenda pola ve, yina lenda beba ve, mpi yina lenda zinga kukonda lusadisu ya bima yankaka. Kusonga 4:4 ketubila bantu yai ya tafutumuka nde bo mevanda na bakiti ya kimfumu ti bampu ya wolo na zulu ya ba ntu na bo. Lukumu ya kuyala kevingila Bakristu bapakulami. Kansi, yo kele ti banzikisa yankaka ya kemonisa nde Nzambi ketudilaka bapakulami ntima.
7 Kusonga 19:7, 8 ketuba nde: “‘Kilumbu ya fete ya makwela ya Mwana-dimeme me lunga, nkento na yandi mpi me yilama. Bo pesaka yandi nswa ya kulwata bilele ya lino ya ngelingeli ti ya mpembe.’ (Bilele yina ya lino ke songa mambu ya mbote ya bantu ya Nzambi ke salaka.)” Yehowa meponaka Bakristu ya kupakulama na kuvanda nkento ya Mwana na yandi na bilumbu kekwisa. Nitu yina lenda pola ve, luzingu ya kukonda kufwa, kimfumu, mpi “makwela ya Mwana-dimeme,” kele makabu ya nene kibeni. Yo kele nzikisa mosi ya nene ya kemonisa nde Nzambi ketudilaka bapakulami ntima, bayina ‘kefula na kulanda Mwana-dimeme na bisika yonso ya yandi kekwenda.’
Yezu Ketudilaka Mpika Ntima
8. Inki mutindu Yezu kemonisa nde yandi ketudila balongoki na yandi ya kupakulama na mpeve ntima?
8 Inki nzikisa kemonisa nde Yezu ketudilaka mpenza balongoki na yandi ya kupakulama na mpeve ntima? Na mpimpa ya nsuka ya luzingu na yandi na ntoto, Yezu kusilaka na bantumwa na yandi 11 ya kwikama nde: “Na bampasi yonso ya mono vandaka kumona, beno vandaka kutina mono ve. Mono ke pesa beno kiyeka ya kuyala na Kimfumu ya Tata na mono mutindu yandi pesaka mono mpi yo; mpidina beno ta dia, beno ta nwa na mesa na mono na Kimfumu na mono, beno ta vanda na bakiti ya kimfumu sambu na kuyala makanda kumi na zole ya bantu ya Israele.” (Luka 22:28-30) Kuwakana yina Yezu kusalaka ti bantumwa 11 ketadila mpi Bakristu ya kupakulama yonso 144000. (Luka 12:32; Kus. 5:9, 10; 14:1) Keti Yezu zolaka kusala kuwakana sambu na kuyala ti bo na Kimfumu kana yandi vandaka kutudila bo ve ntima?
9. Tanga mwa bima yina kele na kati ‘ya bima yonso’ ya Kristu.
9 Dyaka, Yezu Kristu metulaka mpika ya kwikama mpi ya mayele “na zulu ya bima na yandi yonso,” disongidila bima yonso ya kele na ntoto ya ketadila Kimfumu. (Mat. 24:47, NW) Na kati ya bima yango, beto ketanga babiro ya Bambangi ya Yehowa na ntu-mbanza, babiro ya bafiliale na bansi mingi, Banzo ya Balukutakanu ya Nene, Banzo ya Kimfumu na nsi-ntoto ya mvimba. Beto lenda tanga mpi kisalu ya kusamuna Kimfumu mpi kukumisa bantu balongoki. Keti muntu mosi lenda pesa muntu yankaka mukumba ya kutala mpi ya kusadila bima na yandi ya mfunu kana yandi ketudilaka ve muntu yango ntima?
10. Inki kemonisa nde Yezu Kristu kele ti balongoki na yandi ya kupakulama?
10 Ntangu fyoti na ntwala ya kutombuka na zulu, Yezu yina kufutumukaka kumonanaka na balongoki na yandi ya kwikama mpi kusilaka bo nde: “Mono ta vandaka ti beno bilumbu yonso tii na nsuka ya ntoto.” (Mat. 28:20) Keti lusilu yai kulunganaka? Na bamvula 15 ya mekatuka kuluta, mabundu 70 000 ya Bambangi ya Yehowa na nsi-ntoto ya mvimba meluta ntangu yai ntalu ya 100 000, disongidila kuyela ya kuluta 40 na kati ya nkama. Inki beto lenda tuba sambu na balongoki ya mpa yina meyikama? Kiteso ya balongoki bamilio 4,5 kubakaka mbotika na bamvula 15 ya mekatuka kuluta, disongidila nde na mwayene bantu 800 vandaka kubaka mbotika konso kilumbu. Kuyela yai ya kuyituka kibeni kele nzikisa ya kemonisa pwelele nde Kristu ke na kutwadisa balongoki na yandi ya kupakulama na balukutakanu na bo ya dibundu mpi ke na kusadisa bo na kisalu na bo ya kukumisa bantu balongoki.
Mpika Kele ya Kwikama mpi Mayele
11, 12. Inki mutindu mpika memonisaka nde yandi kele ya kwikama mpi ya mayele?
11 Sambu Yehowa Nzambi ti Yezu Kristu ketudilaka mpenza mpika ya kwikama mpi ya mayele ntima, keti beto fwete sala ve mutindu mosi? Nkutu, mpika memonisaka kwikama na kusalaka kisalu yina bo pesaka yandi. Mu mbandu, bamvula 130 melunga banda Nzozulu ya Nkengi meyantikaka kubasika. Balukutakanu ya dibundu, ya nene, mpi ya distrike ya Bambangi ya Yehowa kelanda na kutunga kimpeve na beto.
12 Mpika ya kwikama kele mpi mayele na mutindu yandi kesalaka ve mambu na lulendo yonso. Yandi kesalaka ve mambu na ntwala nde Yehowa kupesa lutwadisu, mpi yandi kebikalaka ve na nima ntangu lutwadisu ya Nzambi na dyambu mosi buna kele pwelele. Mu mbandu, bantwadisi ya mabundu ya luvunu kendimaka bwimi ti bikalulu ya mbi ya bantu ya nsi-ntoto mpi kemonaka yo mbi ve, kansi mpika kekebisaka beto na mitambu ya ngidika ya mbi ya Satana. Mpika kele ti makuki ya kupesa balukebisu ya mayele mpi na ntangu ya mbote sambu Yehowa Nzambi ti Yezu Kristu kesakumunaka yandi. Yo yina, yo mefwana nde beto tudila mpika ntima ya mvimba. Kansi, nki mutindu beto lenda monisa nde beto ketudilaka mpika ya kwikama mpi ya mayele ntima?
“Kwenda Ti” Bapakulami Ntangu Bo Kelanda Mwana-Dimeme
13. Na kutadila mbikudulu ya Zakaria, nki mutindu beto lenda monisa nde beto ketudilaka mpika ya kwikama mpi ya mayele ntima?
13 Mukanda ya Zakaria ketubila bantu “kumi” yina kekwenda penepene ya “Muyuda mosi” mpi ketuba nde: “Beto ke zola kwenda ti beno.” (Tanga Zakaria 8:23.) Sambu verse yai kesadila ngogo “beno” sambu na kutubila “Muyuda mosi,” Muyuda yai ketendula kibuka ya bantu. Na ntangu na beto, yandi kemonisa Bakristu ya kupakulama na mpeve yina mebikalaka, disongidila kitini ya “Israele ya Nzambi.” (Gal. 6:16) Bantu “kumi ya bandinga yonso ya nsi-ntoto” kemonisa kibuka ya nene ya mameme yankaka. Kaka mutindu Bakristu ya kupakulama kelanda Yezu kisika yonso yina yandi kekwenda, kibuka ya nene ‘kekwenda ti’ mpika ya kwikama mpi ya mayele. Bantu yina kele na kibuka ya nene fwete wa ve nsoni ata fyoti sambu na kudimonisa nde bo kele banduku ya “bantu yina ya Nzambi solaka” sambu na kukwenda kuzinga na zulu. (Baeb. 3:1) Yezu kewaka nsoni ve na kubinga bapakulami nde “bampangi.”—Baeb. 2:11.
14. Inki mutindu beto lenda sadisa bampangi ya Kristu na kwikama yonso?
14 Yezu Kristu ketadilaka lusadisu ya kwikama yina beto kepesaka bampangi na yandi bonso nde beto kepesa yo na yandi. (Tanga Matayo 25:40.) Ebuna, nki mutindu bantu yina kele ti kivuvu ya kuzinga na ntoto lenda sadisa bampangi ya Kristu yina mepakulamaka na mpeve? Ntetentete na kusadisaka bo na kisalu ya kusamuna Kimfumu. (Mat. 24:14; Yoa. 14:12) Na ntangu ntalu ya bapakulami yina kele na ntoto kelanda na kukita banda bamvula mingi, ntalu ya mameme yankaka kemata. Ntangu bayina kele ti kivuvu ya kuzinga na ntoto kesalaka kisalu ya kuta kimbangi, na kusalaka kana mpila kele bonso bapasudi-nzila ya ntangu yonso, bo kesadisaka bapakulami na kulungisa mukumba ya kukumisa bantu balongoki. (Mat. 28:19, 20) Beto fwete vila ve mabaku ya kupesa maboko na kisalu yai ya kesalama na ntoto ya mvimba na kupesaka makabu ya mbongo na mitindu mingi.
15. Inki mutindu konso Mukristu fwete tadila madya ya kimpeve yina mpika kepesaka na ntangu ya mbote mpi badesizio yina mpika kebakaka na yina metala organizasio?
15 Sambu beto kele Bakristu, inki mutindu konso muntu na kati na beto ketadilaka madya ya kimpeve yina mpika ya kwikama kepesaka na ntangu ya mbote na nzila ya mikanda ya ketendulaka Biblia mpi ya balukutakanu ya Bukristu? Keti beto kedyaka yo na ntonda yonso mpi kesadilaka kukonda kusukinina mambu ya beto kelonguka? Inki beto kesalaka ntangu mpika kebakaka badesizio na mambu ya metala organizasio? Ntangu beto kelemfukaka na luzolo yonso na lutwadisu yina mpika kepesaka, beto kemonisaka lukwikilu na beto na ngidika ya Yehowa.—Yak. 3:17.
16. Sambu na nki Bakristu yonso fwete widikila bampangi ya Kristu?
16 Yezu kutubaka nde: “Mameme na mono ke waka ndinga na mono; mono zaba bo, bo ke landaka mono.” (Yoa. 10:27) Dyambu yai kele ya kyeleka sambu na Bakristu ya kupakulama. Inki beto lenda tuba sambu na bayina ‘kekwenda ti’ bo? Bo fwete widikila Yezu. Bo fwete widikila mpi bampangi na yandi. Nkutu, mukumba ya ntetentete ya kulungisa bampusa ya kimpeve ya bantu ya Nzambi mepesamaka na bo. Kuwa ndinga ya bampangi ya Kristu ketendula nki?
17. Kuwidikila kimvuka ya mpika ketendula inki?
17 Bubu yai, Nto-Kimvuka yina ketwadisaka mpi ketambwisaka kisalu ya kusamuna Kimfumu na ntoto ya mvimba kele mumonisi ya mpika ya kwikama mpi ya mayele. Bamambre ya Nto-Kimvuka kele bankuluntu ya kupakulama na mpeve mpi ya kele ti eksperiansi mingi. Beto lenda tuba nde bo kele bantu “ya ntete” yina ketwadisaka beto. (Baeb. 13:7) Na ntangu bo kelungisaka bampusa ya bansamuni ya Kimfumu kuluta 7 000 000 na nsi-ntoto ya mvimba na mabundu kuluta 100 000, bankengi yai ya kupakulama ‘kekudipesaka ntangu yonso na kisalu ya Mfumu.’ (1 Kor. 15:58) Kuwidikila kimvuka ya mpika ketendula kusala na bumosi mpenza ti Nto-Kimvuka na yandi.
Bayina Kewilaka Mpika Kebakaka Balusakumunu
18, 19. (a) Inki mutindu bayina kewidikila mpika ya kwikama mpi ya mayele tabaka mambote? (b) Inki fwete vanda lukanu na beto?
18 Banda kutulama na yandi, mpika ya kwikama mpi ya mayele me “longaka bantu mingi na kusala mambu ya mbote.” (Dan. 12:3) Na kati ya bantu yai, beto lenda tanga bantu yina kele ti kivuvu ya kuguluka na lufwa ya ngidika ya bima yai ya mbi. Kuvanda bantu ya lunungu na meso ya Nzambi kele lusakumunu mpenza!
19 Na bilumbu kekwisa, ntangu ‘bwala ya santu, Yeruzalemi ya mpa [yina kele ti bantu 144 000] takatuka na zulu kuna ya Nzambi ke vandaka, mpi takwisa kukulumuka mpi me yilama bonso nkento yina me lwata kitoko sambu na kwenda kukutana ti bakala yina ke kwela yandi,’ nki mambote bayina kuwaka ndinga ya mpika tabaka? Biblia ketuba nde: “Yandi mosi Nzambi ta vandaka ti bo . . . Yandi ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.” (Kus. 21:2-4) Yo yina, bika beto widikila Kristu mpi bampangi na yandi ya kupakulama na mpeve, bayina mefwana nde beto tudila bo ntima.
Inki Mambu Nge Melonguka?
• Inki nzikisa kemonisa nde Yehowa ketudilaka mpika ya kwikama mpi ya mayele ntima?
• Inki kemonisa nde Yezu Kristu ketudilaka mpenza kimvuka ya mpika ntima?
• Sambu na nki yo mefwana nde beto tudila nsadi ya kwikama ntima?
• Inki mutindu beto kemonisaka nde beto ketudilaka mpika ntima?
[Bangyufula ya disolo ya kulonguka]
[Kifwanisu ya kele na lutiti 19]
Keti nge mezaba nani Yehowa meponaka sambu na kuvanda nkento ya Mwana na yandi na bilumbu kekwisa?
[Kifwanisu ya kele na lutiti 20]
Yezu Kristu mepesaka “bima” na yandi na mpika ya kwikama mpi ya mayele
[Kifwanisu ya kele na lutiti 21]
Ntangu beto kesalaka kisalu ya kuta kimbangi, beto kesadisaka bapakulami na mpeve