Badi ‘balonda Muana wa Mukoko’

“Aba mbantu badi balonda Muana wa Mukoko kuonso kudiye uya.”​—BUAK. 14:4.

1. Bayidi balelela ba Yezu bavua bumvua tshinyi bua kumulonda?

YEZU mumane kuenza bidimu bibidi ne tshitupa mu mudimu wende, umue musangu ‘wakayisha bantu mu Kapênuma.’ ‘Bayidi bende ba bungi bakapingana ku malu a diambedi bualu bua dîyi edi, kabakenda nende kabidi’ bualu bakamona malu avuaye ubalongesha mikale mabi. Ke Yezu kuebeja bapostolo bende 12 bua kumanya ni bavua pabu basue kuya. Simona Petelo wakamuambila ne: ‘Mukalenge, netuye kudi nganyi? Wewe udi ne mêyi a muoyo wa tshiendelele. Tuakuitabuja, tudi bamanye ne: Wewe udi Wa Tshijila wa Nzambi.’ (Yone 6:48, 59, 60, 66-69) Bayidi balelela ba Yezu kabakalekela kumulonda to. Pakabelabu manyi a nyuma muimpe, bakatungunuka ne kutumikila Yezu.​—Bien. 16:7-10.

2. (a) ‘Mupika wa lulamatu ne wa budimu’ peshi ‘mulami wa bintu udi ulamata mfumuende’ nnganyi? (b) Mmunyi mudi kasumbu ka mupika kafile tshilejilu tshimpe mu ‘dilonda Muana wa Mukoko’?

² Kadi netuambe tshinyi bua bena Kristo bela manyi ba lelu? Yezu pavuaye wakula bua ‘tshimanyinu tshia paluaye tshiakabidi ne tshia ku nshikidilu kua tshikondo etshi,’ wakabikila kasumbu ka bena diende bela manyi ne: ‘mupika wa lulamatu ne wa budimu’ anyi ‘mulami wa bintu udi ulamata mfumuende.’ (Mat. 24:3, 45, NW; Luka 12:42) Bena mu kasumbu ka mupika aba mbafile tshilejilu tshimpe bualu ‘mbalonde Muana wa Mukoko kuonso kudiye uya.’ (Bala Buakabuluibua 14:4, 5.) Kabena banyanga ngenyi yabu ne malongesha ne bilele bia mu ‘Babulona Munene’ anyi bitendelelu bia dishima bionso bidi pa buloba to. (Buak. 17:5) Mukana muabu ‘kamuena musanganyibua mashimi,’ ne “kabena ne tshilema” tshia mu bulongolodi bua Satana to. (Yone 15:19) Mu matuku adi kumpala eku, bela manyi badi pa buloba ‘nebalonde’ Muana wa Mukoko mu diulu.​—Yone 13:36.

3. Tudi ne bua kueyemena kasumbu ka mupika bua tshinyi?

³ Yezu mmuteke mupika wa lulamatu ne wa budimu ‘pa mutu pa bantu bende,’ mbuena kuamba ne: muntu ne muntu wa mu kasumbu ka mupika ‘bua kubapa biakudia palua dituku diabi.’ Mmuteke kabidi mupika eu ‘pa mutu pa bintu biende bionso.’ (Mat. 24:45-47) Munkatshi mua ‘bintu biende bionso’ ebi mudi kabidi “musumba munene” wa ‘mikoko mikuabu’ udi wenda uvulangana. (Buak. 7:9, MMM; Yone 10:16) Muntu yonso wa ku bela manyi ne wa mu ‘mikoko mikuabu’ udi ne bua kueyemena mupika udibu bateke eu. Kudi malu a bungi adi atusaka bua kueyemena kasumbu ka mupika. Malu abidi manene adi ne: (1) Yehowa udi weyemena kasumbu ka mupika. (2) Yezu pende udi weyemena kasumbu ka mupika. Tukonkononayi tshidi tshileja ne: Yehowa Nzambi ne Yezu Kristo badi beyemena mupika wa lulamatu ne wa budimu.

Yehowa mmueyemene mupika

4. Tudi ne bua kueyemena malongesha adi mupika utupesha bua tshinyi?

⁴ Tumonayi tshidi tshiambuluisha mupika wa lulamatu ne wa budimu bua kuikala utupesha biakudia anyi malongesha mimpe pa dîba. Yehowa udi wamba ne: ‘Nenkuyishe lungenyi, nenkuleje njila uudi ne bua kuendela, nenkupe meji patshidi dîsu dianyi kuudi.’ (Mus. 32:8) Tudi tumona ne: Yehowa ke udi wambuluisha mupika eu. Nunku tudi mua kueyemena mibelu ya mu Bible idi mupika eu utupesha ne kuyitumikila.

5. Ntshinyi tshidi tshileja ne: kasumbu ka mupika kadi ne nyuma wa Nzambi?

 ⁵ Yehowa udi kabidi upesha kasumbu ka mupika nyuma wende. Nyuma wa Yehowa katu umueneka to, kadi tudi tumumona ku malu adi bantu badi nende benza. Tangila mudi mupika ukumbaja mudimu wa kuyisha Bukalenge bua Nzambi ne kulongesha bantu malu a Yehowa ne a Yezu pa buloba bujima. Batendeledi ba Yehowa mbadifile mu diyisha Bukalenge bua Nzambi mu matunga mapite pa 230. Bualu ebu kabuenaku butuleja ne: nyuma wa Nzambi ke udi wambuluisha mupika eu anyi? (Bala Bienzedi 1:8.) Kasumbu ka mupika kadi ne bua kuangata mapangadika manene bua kulongolola malongesha ne kuafila pa dîba diakanyine. Padi kasumbu ka mupika kangata mapangadika aa ne kaakumbaja, kadi kaleja mudiku ne mamuma a nyuma, bu mudi: dinanga ne lutulu.​—Gal. 5:22, 23.

6, 7. Yehowa udi wenza tshinyi bua kuleja mudiye weyemena mupika wa lulamatu?

⁶ Bua kumvua mudi Yehowa weyemena mupika wa lulamatu bikole, tumone tshivuaye mulaye bena mu kasumbu ka mupika aka. Mupostolo Paulo wakafunda ne: ‘Nebele mpungi, ne bantu bafue nebabike ne mibidi idi kayiyi mibole, ne tuetu netuandamuke. Bualu bua mubidi eu mubole udi ne bualu bua kuluata udi kauyi mubole, ne mubidi eu udi ufua udi ne bualu bua kuluata udi kauyi ufua tshiendelele.’ (1 Kol. 15:52, 53) Bayidi ba Yezu bela manyi bavua balamate Nzambi bakadi bafue ne mubidi wa bantu udi ubola eu, kabakubabisha amu ne mubidi wa nyuma nkayawu bua kupeta muoyo wa kashidi tshianana to. Kadi nebabapeshe kabidi mubidi udi kauyi ufua tshiendelele, mbuena kuamba ne: kabakufua nansha, ne kabena mua kubashipa to. Nebapete kabidi mubidi udi kawuyi mua kubola anyi kunyanguka to; bimueneka ne: mubidi eu kawena dijinga ne bintu bikuabu bua kutungunuka ne kuikala ne muoyo. Buakabuluibua 4:4 udi uleja bantu aba basombe pa nkuasa ya butumbi, bikale ne bifulu bia butumbi bia tshiamu tshia or pa mitu pabu. Bena Kristo bela manyi nebikale bakalenge. Kadi kudi malu makuabu adi aleja mudi Yehowa mubeyemene.

⁷ Buakabuluibua 19:7, 8 udi wamba ne: ‘Dibaka dia Muana wa Mukoko diakulua, ne mukaji wende wakudilongolola. Bakapa mukaji bua kudiluatshishaye ne tshilulu tshia lin tshilengele, tshidi tshikenka ne tshitoke; bualu bua tshilulu tshia lin tshilengele tshidi bienzedi biakane bia bansantu.’ Yehowa  mmusungule bela manyi bua kuluabu mukaji wa Muanende. Badi ne diakalenga dinene dia kubuela mu ‘dibaka ne Muana wa Mukoko,’ dia kuikala bakalenge, kuikala ne mubidi udi kauyi unyanguka ne dia kubenga kufua. Kudi bijadiki bidi bileja mudi Yehowa weyemena bela manyi badi batungunuka ne ‘kulonda Muana wa Mukoko kuonso kudiye uya.’

Yezu udi weyemena mupika

8. Mmunyi mudi Yezu muleje ne: udi weyemena bayidi bende bela manyi?

⁸ Tshidi tshijadika ne: Yezu mmueyemene bela manyi ne muoyo mujima ntshinyi? Yezu butuku buvuaye ne bua kufua, wakalaya bayidi bende 11 bualu kampanda. Wakabambila ne: ‘Nuenu mbakunanukila nanyi mu makenga anyi; ndi nnupa bukalenge bu muakumpa Tatu wanyi bukalenge, bua nuenu kudia ne kunua ku mesa anyi mu bukalenge buanyi; nenushikame mu nkuasa ya butumbi nulumbuluishe bisamba dikumi ne bibidi bia Isalele.’ (Luka 22:28-30) Tshipungidi tshivua Yezu mupunge ne bayidi 11 tshidi kabidi tshitangila bela manyi bonso 144 000. (Luka 12:32; Buak. 5:9, 10; 14:1) Bu Yezu kayi mueyemene bayidi bende aba, uvuaku mua kupunga nabu tshipungidi bua kukokeshabu nende anyi?

9. Bimue bia ku ‘bintu bionso bia Kristo’ mbinganyi?

⁹ Yezu Kristo mmuteke kabidi mupika wa lulamatu ne wa budimu ‘pa mutu pa bintu biende bionso’ bidi bitangila malu a Bukalenge bua Nzambi. (Mat. 24:47) Bimue bia ku bintu ebi ke: nzubu idibu balombuela midimu yonso ya Bantemu ne nzubu ya Betele idi mu makuabu matunga, Nzubu ya Mpuilu ne Nzubu ya Bukalenge. Mu bintu ebi mudi kabidi mudimu wa kuyisha ne kulongesha bantu Bible. Muntu udiku mua kuteka mukuabu muntu udiye kayi weyemena bua kulama ne kuenza mudimu ne bintu biende bia mushinga anyi?

10. Tshidi tshileja ne: Yezu Kristo udi ukuatshisha bela manyi ntshinyi?

¹⁰ Mutantshi mukese kumpala kua Yezu kubanda mu diulu, wakamuenekela bayidi bende e kubalaya ne: ‘Monayi, ndi nenu matuku onso too ne ku nshikidilu kua tshikondo etshi.’ (Mat. 28:20) Yezu uvua mukumbaje tshivuaye mulaye anyi? Mu bidimu 15 bishale ebi, bisumbu bia Bantemu bivua bitue ku 70 000, kadi lelu mbipite pa 100 000, mmumue ne: kudi divulangana dia bia pa lukama bipite pa 40. Bayidi bapiabapia bobu mbavule bungi kayi? Mu bidimu 15 bishale,  bayidi bavua batambule bavua basua kufika ku 4 500 000, mmumue ne: bayidi bapite pa 800 bavua batambula dituku dionso. Didiunda edi didi dileja ne: Kristo udi ulombola bayidi bende bela manyi mu bisangilu biabu bia tshisumbu ne mu mudimu wabu wa kuvuija bantu bayidi.

Mupika udi ne lulamatu ne budimu

11, 12. Mmunyi mudi mupika muleje mudiye ne lulamatu ne budimu?

¹¹ Katuenaku petu mua kueyemena mupika wa lulamatu ne wa budimu bu mudi Yehowa ne Yezu bamueyemene ne muoyo umue anyi? Mupika eu mmuleje mudiye ne lulamatu bualu udi wenza mudimu uvuabu bamupeshe. Tshilejilu, mbatuadije kupatula Tshibumba tshia Nsentedi kukadi bidimu bitue ku 130. Mpuilu ne mpungilu ne bisangilu bia Bantemu ba Yehowa bidi anu bienda bikolesha ditabuja dietu.

¹² Mupika wa lulamatu eu udi kabidi ne budimu bualu katu udibandisha, ujinga kudianjidila Yehowa anyi kushala panyima dîba didi Nzambi uleja malu patoke to. Tshilejilu, padi eku balombodi ba bitendelelu bia dishima bitaba muinshimuinshi anyi balengulula patoke malu mabi adi bantu benza, mupika udi utudimuija yeye bua kubenga kuenza malu a bulongolodi bua Satana aa. Mupika mmukumbane kutupesha mibelu ya meji pa dîba, bualu Yehowa Nzambi ne Yezu Kristo badi bamukuatshisha. Nunku mbiakanyine bua tuetu kueyemena mupika eu ne muoyo mujima. Kadi mmunyi mutudi mua kuleja ne: tudi beyemene mupika wa lulamatu ne wa budimu?

‘Nuye’ ne bela manyi bualu badi balonda Muana wa Mukoko

13. Bilondeshile mulayi wa Zekâya, mmunyi mutudi mua kuleja ne: tudi beyemene mupika wa lulamatu ne wa budimu?

¹³ Mukanda wa Zekâya udi wakula bua “bantu dikumi” badi baya kudi ‘Muena Yuda,’ bamuambila ne: ‘Tudi basue kuya nebe.’ (Bala Zekâya 8:23.) “Muena Yuda” udibu baleja bu ‘muntu’ mu mvese eu, ntshisumbu tshia bantu. Mu matuku etu aa, muntu eu ke bela manyi ba mu “Bena Isalele ba Nzambi” batshidi pa buloba. (Gal. 6:16) ‘Bantu dikumi ba mu muakulu ne mu muakulu’ ke musumba munene wa mikoko mikuabu. Bu mudi bela manyi balonda Yezu kuonso kudiye uya, bena musumba munene badi ‘baya’ anyi bashindikija mupika wa lulamatu ne wa budimu. Bena mu musumba munene kabena ne bua kumvua bundu bua kudileja patoke ne: mbalunda ba “babanyanganyi ba dibikila dia mu diulu” aba to. (Eb. 3:1) Yezu kena umvua bundu bua kubikila bela manyi ne: “Bana betu.”​—Eb. 2:11.

14. Tudi mua kukuatshisha bana babu ne Yezu mushindu kayi?

¹⁴ Yezu Kristo udi umona patudi tukuatshisha bana babu amu bu ne: tudi tumukuatshisha yeye. (Bala Matayo 25:40.) Nunku, mmunyi mudi bantu bapeta muoyo pa buloba bakuatshisha bana babu ne Kristo bela manyi? Tshia kumpala, mpadibu babenzeja mudimu wa kuyisha. (Mat. 24:14; Yone 14:12) Nansha mudi bungi bua bela manyi buenda bukepela pa buloba, mikoko mikuabu idi yenda ivula. Padi bantu badi mu tshisumbu tshia  mikoko mikuabu bayisha, ne bakuabu benza midimu bu mudi wa bumpanda-njila, badi bakuatshisha bela manyi mu dikumbaja mudimu wa kuvuija bantu bayidi. (Mat. 28:19, 20) Katupu muoyo bua kufila mapa mu mishindu mishilangane bua kutungunuja mudimu eu.

15. Muena Kristo yonso udi ne bua kuenza tshinyi ne malongesha a mupika ne mapangadika makuabu adiye wangata?

¹⁵ Muntu yonso udi mua kudiebeja ne: mmunyi muntu ngangata malongesha adi bu biakudia adi mupika utupesha pa dîba dikumbane ku diambuluisha dia mikanda ne bisangilu ne mpuilu? Ntuku mbala mikanda eyi, mbuela mu bisangilu ebi ne ntumikila malu andi ndonga bua kuleja ne: ndi ne dianyisha anyi? Ntshinyi tshitutu tuenza patu mupika wangata mapangadika kampanda? Patudi tuitaba mapangadika aa ne disanka, tudi tuleja mutudi bitabuje mushindu udi Yehowa utulombola.​—Yak. 3:17.

16. Bena Kristo bonso badi ne bua kuteleja bana babu ne Yezu bua tshinyi?

¹⁶ Yezu wakamba ne: ‘Mikoko yanyi idi yumvua dîyi dianyi, ndi muyimanye, idi indonda.’ (Yone 10:27) Yezu udi wakula bua Bena Kristo bela manyi. Kadi netuambe tshinyi bua badi ‘baya’ nabu anyi badi babashindikija? Badi ne bua kuteleja Yezu. Badi kabidi ne bua kuteleja bana babu ne Yezu. Bualu bana babu ne Yezu aba ke badibu bapeshe mudimu wa kulombola ne kulama bantu ba Nzambi. Kuteleja bana babu ne Kristo kudi kumvuija tshinyi?

17. Kuteleja kasumbu ka mupika kudi kumvuija tshinyi?

¹⁷ Lelu eu kudi kasumbu ka bantu kadi kaleja mpala wa mupika wa lulamatu ne wa budimu pa buloba. Koku ke kadi kalombola mudimu wa kuyisha pa buloba bujima. Badi babikila kasumbu aka ne: Kasumbu Kaludiki. Kasumbu aka nkenza amu ne bakulu bela manyi bakadi bamanye malu a bungi. Bobu aba ke batudi mua kuamba ne: badi ‘bakokesha’ munkatshi muetu. (Eb. 13:7) Badi benza mudimu mukole, ‘bakumbaja mudimu wa Mukalenge misangu yonso’ bualu badi batabalela bamanyishi ba Bukalenge bakadi bapite pa 7 000 000, mu bisumbu bipite pa 100 000. (1 Kol. 15:58) Kuteleja kasumbu ka mupika kudi kumvuija kuenzejangana mudimu bimpe ne Kasumbu Kaludiki.

Badi bateleja mupika badi ne disanka

18, 19. (a) Bantu badi bateleja mupika wa lulamatu ne wa budimu badi bapeta malu kayi mimpe? (b) Tudi ne bua kuikala ne dipangadika kayi?

¹⁸ Kasumbu ka mupika wa lulamatu ne wa budimu ‘nkalombole bantu ba bungi ku buakane’ katshia anu bakasungula. (Dan. 12:3) Munkatshi mua bantu aba mudi kabidi bantu bikala mua kupanduka ku kabutu ka bulongolodi bubi ebu. Kuikala ne malanda mimpe ne Nzambi mbualu buimpe be!

¹⁹ Tshienzekela bantu badi bateleja dîyi dia mupika ntshinyi mu matuku atshilualua, pikala ‘musoko wa tshijila, Yelushalema mupiamupia [udi ne bantu 144 000], upueka ulopoka mu diulu kudi Nzambi, muikale mulongolola bimpe bu mukaji mulengejila mulume wende’? Bible udi wamba ne: ‘Nzambi muine neikale nabu, neikale Nzambi wabu. Yeye neakupule tshinsonji tshionso ku mêsu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’ (Buak. 21:2-4) Nunku tudienzejayi bikole bua kuteleja Kristo ne bana babu bela manyi badi bikale bantu ba kueyemena.

Tshiudi mulonge ntshinyi?

• Tshidi tshileja ne: Yehowa mmueyemene mupika wa lulamatu ne wa budimu ntshinyi?

• Ntshinyi tshidi tshileja ne: Yezu mmueyemene kasumbu ka mupika ne muoyo mujima?

• Bua tshinyi tudi ne bua kueyemena mulami wa bintu?

• Tshitudi ne bua kuenza ntshinyi bua kuleja ne: tudi beyemene mupika?

[Nkonko ya dilonga]

[Tshimfuanyi mu dibeji 25]

Udi mumanye eu udi Yehowa musungule bua kuikalaye mukaji wa Muanende anyi?

[Bimfuanyi mu dibeji 26]

Yezu Kristo mmupeshe mupika wa lulamatu ne wa budimu “bintu” biende

[Tshimfuanyi mu dibeji 27]

Patudi tuyisha, tudi tukuatshisha bela manyi