‘Amulondaña Mwana kaMukoku’

‘Diwu alondaña Mwana kaMukoku kwayañayi kwejima.’—CHIMWEKESHU 14:4.

1. Indi atumbanji twaYesu alala eliluhu hodi kutalisha hakumulonda Yesu?

 KWAKWIHI nayaaka yiyedi nachikunku yamudimu windi, Yesu ‘watañishileña antu mushikola kuKaperinawu.’ Chiyelukiluwu nawu mazu indi akala, ‘atumbanji twindi amavulu afuntilumu, kwenda nawa cheñi nindi nehi.’ Yesu chayihwiliyi apostolu indi 12 neyi chakwila niwena akeñeli kuya, Shimona Petulu wakwili nindi: “Tukuya kudinyi? Eyi yeyi wukweti mazu awumi wahaya nyaka. Tunetiyi, tuneluki netu eyi yeyi Wajila waNzambi.” (Yowanu 6:48, 59, 60, 66-69) Atumbanji twaYesu alala atwalekeluhu kumulonda. Hanyima yakuyiwayisha naspiritu yajila, atwalekeluhu kwovwahila wunlomboli waYesu.—Yililu 16:7-10.

2. (a) Indi ‘nduñu wamaana nikashinshi’ hela “kalama washinshika” hinyi? (b) Indi nduñu wamwekesha ñahi wunsahu ‘wakumulondela Mwana kaMukoku’?

² Chumanyi chitwatela kuhosha hadi akwaKristu awayishewa amakonu? Yesu wateneni hadi izanvu dawatumbanji twindi awayishewa naspiritu ahanu hamaseki muwuprofwetu ‘wachinjikijilu chakwiluka nachu hamba kenzeyi, nihamba kakuma nyaka yamakonu,’ hamu neyi ‘nduñu wamaana nikashinshi,’ hela “kalama washinshika.” (Matewu 24:3, 45; Luka 12:42) Hamu neyi izaza, izanvu danduñu dikweti wunsahu wawuwahi ‘wakumulonda Mwana kaMukoku kwayañayi kwejima.’ (Tañenu Chimwekeshu 14:4, 5.) Atwalekahu kwikala ajiki kuspiritu kuhitila mukubula kuditamisha aweni nayaaku nintañishilu ‘yaBabiloni Muneni,’ wanta wakaayi kansakililu yakutwamba. (Chimwekeshu 17:5) “Mukanwa kawu” himwekala ntañishilu yakutwambaku, nawa “hiyakweti hataminawu” mukaayi kaSatanaku. (Yowanu 15:19) Kumbidi awayishewa ashalahu hamaseki, ‘amba kumulondela’ Mwana kaMukoku mwiwulu.—Yowanu 13:36.

3. Muloñadi chichalemena kukuhwelela izanvu danduñu?

³ Yesu wamwinka nduñu wamaana nikashinshi mudimu ‘wakuhemba amwitala dindi,’ antu amwizanvu danduñu, kulonda ‘kuyinka yakudya yawu hampinji yatelela.’ Wamwinka cheñi nduñu mudimu wakuhemba “yuma yindi yahetayi yejima.” (Matewu 24:45-47) ‘Yuma yahetayi’ yabombelamu “izaza deneni” dinakutohelaku ‘dawanyikoku acheñi.’ (Chimwekeshu 7:9; Yowanu 10:16) Komana antu amwizanvu dawawayishewa ‘nianyikoku acheñi’ kwila akuhwelela nduñu atondawu kuyihemba nehi? Tukweti nyiloña yayivulu yikutuletesha kukuhwelela izanvu danduñu. Nyiloña yiyedi yabadika kulema diyeniyi: (1) Yehova wakuhwelela izanvu danduñu. (2) Yesu niyena wamukuhwelela nduñu. Tushinshikenu wunsahu wunakumwekesha nawu Yehova Nzambi niYesu Kristu akuhwelela chikupu izanvu danduñu wamaana nikashinshi.

Yehova wamuKuhwelela Nduñu

4. Muloñadi chitwatelela kukuhwelela yakudya yakuspiritu yaloñeshañawu kudi nduñu wamaana nikashinshi?

⁴ Shinshikenu chuma chaletesha nduñu wamaana nikashinshi kutuloñeshela yakudya yakuspiritu yitwakeñaña hampinji yatelela. Yehova wahosha nindi, “Nukukuleja maana, nukukuleja ninjila yeyi yiwukwenda; nukukulombola nadisu dami.” (Masamu 32:8) Eñañi, Yehova wamulombolaña nduñu. Dichi dinu,  twatela kukuhwelela chikupu hamaana amuNsona, kwiluka, niwunlomboli wutwatambwilaña kudi nduñu.

5. Chumanyi chinakumwekesha nawu spiritu yaNzambi yamwinkaña nduñu ñovu?

⁵ Yehova wenkaña cheñi izanvu danduñu spiritu yindi yajila. Hela chakwila spiritu yaYehova hiyamwekanañaku, yuma yakoñaña antu azatishañawu naspiritu yamwekanaña. Toñojokenu hamudimu wunakalakali nduñu wamaana nikashinshi kutalisha hakushimwina wunsahu hadi Yehova Nzambi, niMwanindi, niWanta mukaayi kejima. Akwakudifukula aYehova anakudikita hakushimuna wunsahu waWanta mumatuña akubadika 230 nimazanvu ayitutu. Komana ichi hichinakuhana wunsahu walala wakwila nawu spiritu yaNzambi yinakumwinka nduñu ñovuku? (Tañenu Yililu 1:8.) Hakwila nawu aloñesheli antu jaYehova yakudya yakuspiristu mukaayi kejima, izanvu danduñu datela kufuukulahu yuma yayivulu yalema. Hampinji yinakufuukulawu nikuzatisha yuma yinafuukuluwu, nduñu wamwekeshaña kukeña, kwovwaha niyililu yikwawu yamukabu waspiritu.—Aŋalija 5:22, 23.

6, 7. Indi Yehova wamukuhwelela ñahi nduñu wakashinshi?

⁶ Hakwiluka Yehova chamukuhwelelayi chikupu nduñu wakashinshi, toñojokenu hachuma chakanayi antu amwizanvu danduñu. Kapostolu Pawulu wasonekeli nindi: “Mpuña yakavuma, niafu akayisañula nakubula kutoka, ninetu akatubalumuna. Muloña ichi chatokaña chiña chakavwala kubula kutoka, niniwu wafwaña chiña akavwala kubula kufwa.” (1 Akorinda 15:52, 53) Atumbanji twaKristu awayishewa, amukalakelaña Nzambi nakashinshi nawa afwaña mumujimba wawuntu watokaña, ayisañulaña neyi antu akuspiritu nakwikala nawumi wahaya nyaka. Ayinkaña wumi wakafwaña—wumi wahaya nyaka wabulaña kutoka. Kubombelahu, ayinkaña nyijimba yabulaña kutoka, nawa chamwekana neyi atwalekañahu kuhanda. Chimwekeshu 4:4 yalumbulula awa asañulawu nawu ashakama hamatanda nawa kunyitu yawu kudi yibaaba yawuru. AkwaKristu awayishewa achiñililaña kulema kwawanta. Ilaña kudi wunsahu wawuvulu wamwekeshaña nawu Nzambi wakuhwelela awayishewa.

⁷ Chimwekeshu 19:7, 8 yahosha nawu: ‘Kusumbula kwaMwana kaMukoku kunashiki dehi, niñodindi nadiloñeshi dehi. Hiyakumwiteja mumbandowu kuvwala mahina amawahi atooka atamuka akadi hatama. Muloña mahina amawahi atooka hinyidimu yawakwakujila yaloña.’ Yehova wamutondela Mwanindi akwaKristu awayishewa kwikala ñodindi wakumbidi.  Kubula kutoka, kubula kufwa, niwanta, ‘kusumbula kwaMwana kaMukoku’—hiyamukunkulu yabadika kulema. Iwu hiwunsahu waweni wunakumwekesha nawu Nzambi wayikuhwelela awayishewa, ‘alondaña Mwana kaMukoku kwayañayi kwejima.’

Nduñu Amukuhwelela Kudi Yesu

8. Indi Yesu wamwekeshaña ñahi nindi wayikuhwelela atumbanji twindi awayishewa naspiritu?

⁸ Wunsahwinyi wamwekeshaña nawu Yesu wakuhwelela chikupu atumbanji twindi awayishewa naspiritu? Hawufuku wakukumisha wumi windi hamaseki, Yesu wakanini apostolu indi 11 ashinshika. Wayilejeli nindi: ‘Enu yenu munankakelami mwahita kweseka kwami kwejima; ami nukuyikunjika wanta wenu, neyi chankunjikiluwu ami kudi Tata yami, kulonda mwakadyi nakunwa kumesa yami muwanta wami, mwakashakami hamatanda awanta nakusompesha nyuza yaIsarela ikumi nayiyedi.’ (Luka 22:28-30) Chitiyañenu chatiyañeniyi Yesu nawapostolu indi 11 chabombelamu niakwaKristu awayishewa ejima 144,000. (Luka 12:32; Chimwekeshu 5:9, 10; 14:1) Neyi chakwila hayikuhweleleluku, komana Yesu wadi kutiyañana nawu chitiyañenu chakuyula nawu muWanta windi?

9. Indi “yuma [yaKristu] yahetayi yejima” yabombelamu yumanyi?

⁹ Kubombelahu, Yesu Kristu wamwinka nduñu wamaana nikashinshi mudimu wakuhemba “yuma yindi yahetayi yejima”—Yuma yejima yakundama kuWanta yekala hamaseki. (Matewu 24:47) Yuma yahetayi yabombelamu matala ahachishina chawaYinsahu jaYehova chamukaayi, nyitayi yamumatuña amboka-mboka, niMatala aKupompelamu kupompa kwamaneni, Matala aWanta mukaayi kejima. Yuma yeniyi yabombelamu cheñi mudimu wakushimwina Wanta nikwilisha atumbanji. Komana kuduhu muntu wunateli kwinka muntu wabula kukuhwelelayi mudimu wakutala nikuzatisha mahetindi?

10. Yumanyi yinakumwekesha nawu Yesu Kristu watwamininaña atumbanji twindi awayishewa?

¹⁰ Henohu wudi kwakwihi nakuya mwiwulu, Yesu asañwiluwu wamwekeni kudi atumbanji twindi ashinshika nikuyikana nindi: “Tiyenu, ami nidi nenu mafuku ejima nikwakakumina nyaka.” (Matewu 28:20) Komana Yesu washikija ichi chikaninu? Hayaaka 15 yinahituhu, kuvula kwayipompelu yawaYinsahu jaYehova mukaayi kejima yadiña 70,000, ilaña chayinu mpinji yinabadiki 100,000—kuvulilaku namapesenti akubadika ha 40. Atumbanji añahi  anavuliluku? Kwakwihi nayihita 4.5 yawatumbanji amaha apapatisheweli muyaaka 15 yinahituhu—avareji yakubadika atumbanji 800 apapatishewaña hefuku hefuku. Iku kuvulilaku hiwunsahu wunakumwekesha nawu Kristu watwamininaña atumbanji twindi awayishewa hakupompa kwachipompelu nawa nakuyikwasha mumudimu wawu wakwilisha atumbanji.

Nduñu Wukweti Maana niKashinshi

11, 12. Indi nduñu namwekeshi ñahi nawu wukweti maana nikashinshi?

¹¹ Chineli Yehova Nzambi niYesu Kristu amukuhwelela chikupu nduñu wamaana nikashinshi, anetu nawa twatela kumukuhwelela. Kafwampi, nduñu wamwekesha kashinshi hakukalakala mudimu wamwinkawu. Chakutalilahu, magazini yaKaposhi Kakutalila anayisoneki hadi yaaka 130. Kupompa kwachipompelu, kupompa kwamaneni nikupompa kwankambi kwawaYinsahu jaYehova kwatukoleshaña kuspiritu.

¹² Nduñu wakashinshi wukweti cheñi maana hamuloña wakwila helaña yuma henohu Yehova kanda yahani wunlomboli watiyakanaku, nawa hakañanyaña kwovwahila wunlomboli waNzambi kutalisha hansañu yatiyakanaku. Chakutalilahu, anlomboli ansakililu yakutwamba eteja hela amonaña yililu yalwisu yawantu amukaayi abulaña kwakama Nzambi nawu yayiwahi, ilaña, nduñu watubabeshaña kutalisha hanyihetu yakaayi kaSatana katama. Nduñu watweshaña kuloñesha kubabesha kwakuwahi nawa kwahampinji yatelela muloña Yehova Nzambi niYesu Kristu amukiswilaña. Dichi, twatela kumukuhwelela chikupu nduñu. Tunateli kumwekesha ñahi netu twamukuhwelela nduñu wamaana nikashinshi?

‘Yenuña’ nawaWayishewa chanaKumulondawu Mwana kaMukoku

13. Kwesekeja nawuprofwetu waZekariya, tunateli kumukuhwelela ñahi nduñu wamaana nikashinshi?

¹³ Mukanda wamuBayibolu waZekariya wahosha hadi ‘amayala ikumi’ amuwanini “kaYudeya” nakumwila nawu, “tuyi nenu.” (Tañenu Zekariya 8:23.) Chineli “kaYudeya” amutena nawu “nenu,” dikwila nawu nakwimenaku izanvu dawantu. Makonu, wemenañaku akwaKristu ashalahu awayishewa naspiritu—“aIsarela ambala aNzambi.” (Aŋalija 6:16) ‘Amayala ikumi akunyuza yamadimi ejima’ emenañaku izaza deneni danyikoku yacheñi. Neyi chochamulondañawu Yesu kudi akwaKristu awayishewa kwayañayi kwejima, izaza deneni nidena ‘dayaña nindi’ hela kumutwalaku nduñu wamaana nikashinshi. Amwizaza deneni hiyatela kutiya nsonyi yakudilumbulula nawu hiyalunda ‘nawakwakutambwila kutambika kwamwiwuluku.’ (Aheberu 3:1) Yesu hatiyaña nsonyi yakutena awayishewa nindi ‘ana kwamuku.’—Aheberu 2:11.

14. Tunateli kukwasha ñahi chikupu ana kwaKristu?

¹⁴ Yesu Kristu wahosheli nindi neyi tukwasha ana kwindi chidi neyi tunakumukwasha. (Tañenu Matewu 25:40.) Indi antu akweti chikuhwelelu chakushakama hamaseki anateli kukwasha ana kwaKristu awayishewa naspiritu munjilanyi? Kuhitila mukuyikwasha kuzataku mudimu wakushimwina Wanta.  (Matewu 24:14; Yowanu 14:12) Hela chakwila kuvula kwawantu awayishewa hamaseki kunakehi muyaaka yayivulu yinahituhu, naambala yawanyikoku acheñi yinakuvulilaku. Neyi antu akweti kuchiñeja kwakushakama hamaseki azata mudimu wakushimwina, neyi chinatwesheki nikukalakala neyi apayiniya ampinji yejima, akwashaña awayishewa naspiritu kuzata mudimu wakwilisha atumbanji. (Matewu 28:19, 20) Bayi tudiwula kukooleka kwakukwasha iwu mudimu kuhitila mukuhana yawana yamali munjila jashiyashanaku.

15. Indi mukwaKristu halwindi watela kwiladi nayakudya yakuspiristu yaloñeshañawu kudi nduñu hampinji yatelela nihayuma yamukuloñesha yafuukulañawu kudi nduñu?

¹⁵ Hakwikala akwaKristu, twamonaña ñahi halwetu yakudya yakuspiritu yaloñeshañawu hampinji yatelela kudi izaza danduñu wamaana kuhitila munyikanda yashindamena haBayibolu nikupompa kwawakwaKristu? Komana twatañaña chikupu nyikanda nikuzatisha yuma yitwatañaña? Chumanyi chitwelaña kutalisha hayuma yamukuloñesha yafuukulañawu kudi nduñu? Neyi twovwahila wunlomboli wutwatambwilaña twamwekeshaña netu twakuhwelela yuma yaloñeshañayi Yehova.—Yakoba 3:17.

16. Muloñadi akwaKristu ejima chatela kutiyililawu ana kwaKristu?

¹⁶ Yesu wahosheli nindi: “Anyikoku ami atiyaña izu dami, ami nayiluka, niwena anlondaña.” (Yowanu 10:27) Dichelañawu akwaKristu awayishewa. Indi antu ‘ayaña’ nawakwaKristu awayishewa elañadi? Niwena atela kumutiyilila Yesu. Atela cheñi kutiyilila ana kwindi. Kafwampi, ayikunjika mudimu weneni wakulombola nikwakamena antu jaNzambi. Indi kutiyilila kwiizu dawamana kwaKristu kwalumbulukadi?

17. Indi kutiyilila izanvu danduñu chaya mukwila nawudi?

¹⁷ Makonu, nduñu wamaana nikashinshi amwimenañaku kudi Izaza Dalombolaña, datwamininaña nikutala mudimu wakushimwina Wanta iseki dejima. Amwizaza Dalombolaña hiyaeluda akuluka yitembi, awayishewa naspiritu. Tunateli kuyitena netu ‘anlomboli jetu.’ (Aheberu 13:7) Hakwakamena akwakushimwina aWanta mukaayi kejima akushika kwakwihi na 7,000,000 muyipompelu yakubadika ha 100,000, awa aeluda awayishewa akweti ‘yuma yayivulu yakukalakala mumudimu waMwanta.’ (1 Akorinda 15:58) Kutiyilila izanvu danduñu chaya mukwila nawu tuzatileña hamu chikupu Nezaza Dalombolaña.

Amutiyililaña Nduñu Akooleka

18, 19. (a) Indi antu amutiyililaña nduñu wamaana nikashinshi akooleka ñahi? (b) Chumanyi chitwatela kufuukulahu?

¹⁸ Kufuma hampinji yamutondeluwu, nduñu wamaana nikashinshi ‘wakondolaña amavulu mukuloña.’ (Danyeli 12:3) Awa abombelamu antu akweti chikuhwelelu chakupuluka kujilumuka kwakaayi katama kamakonu. Antu aloña kumesu aNzambi akooleka chikupu.

¹⁹ Kumbidi, chakela ‘ñanda yajila, yowu Yerusalema yayiha [yatuñewa nawa 144,000] hiyikusuluka kudi Nzambi kwiwulu, ayiloñesha dehi neyi nsumbuki anawahishuwu kulonda asumbuki nanfumwindi, chumanyi chikamwekena antu atiyililaña izu danduñu? Bayibolu yahosha nawu: “Nzambi yomweni wakekala nawu. Wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.” (Chimwekeshu 21:2-4) Dichi dinu, tuzatenu nañovu kulonda tumutiyilili Kristu niana kwindi akuhwelelayi awayishewa naspiritu.

Yumanyi Yimunadizi?

• Wunsahwinyi wunakumwekesha nawu Yehova wamukuhwelela nduñu wamaana nikashinshi?

• Yumanyi yinakumwekesha nawu Yesu Kristu wakuhwelela chikupu izanvu danduñu?

• Muloñadi wutwatelela kumukuhwelela chikupu kalama washinshika?

• Twamwekeshaña ñahi netu twamukuhwelela nduñu?

[Malwihu aKuzatisha haKudiza]

[Mwevulu wudi hefu 19]

Komana mweluka watondayi Yehova kwikala nsumbuki waMwanindi kumbidi?

[Nyevulu yidi hefu 20]

Yesu Kristu wamwinka nduñu wamaana nikashinshi mudimu wakuhemba “yuma yindi yahetayi”

[Mwevulu wudi hefu 21]

Neyi tukalakala mudimu wakushimwina, tunakukwasha awayishewa naspiritu