B ‘pʋgda Pe-bilã’ wakat fãa
B ‘pʋgda Pe-bilã’ wakat fãa
‘Bãmb yaa neb nins sẽn pʋgd Pe-bilã a sẽn kẽnd zĩig ninga fãa.’—WIL. 14:4.
1. Neb wʋsg sẽn wa n bas a Zezi tũubã, a karen-biis hakɩkã maana bõe?
A ZEZI sẽn sɩng a koɛɛgã mooneg sẽn na maan yʋʋm a yiib la pʋɩ-sʋk poore, a kẽe Kapɛrnaum karen-doogã pʋgẽ n zãms neba. A “karen-biisã wʋsg leba poorẽ n ka le tũ” yẽnda, b sẽn da tagsd t’a goamã reegr yaa toogã yĩnga. A Zezi sẽn sok a tʋm-tʋmdb 12 wã n na n bãng b me sã n dat n basa a tũubã, a Sɩmo Pɩɛɛr leoka woto: “Zusoaba, tõnd na n basa yãmb n kẽng ãnda nengẽ? Yãmb tara vɩɩm sẽn ka sɛt goama. La tõnd tẽeme la d miime tɩ yãmb yaa Kirist sẽn yaa Wẽnnaam Sõng Soabã.” (Zã 6:48, 59, 60, 66-69) Neb nins sẽn da yaa a Zezi karen-biis hakɩkã pa bas a tũub ye. B sẽn wa n paam vʋʋsem sõng zaeebã, b kell n sak n tũu a Zezi.—Tʋʋ. 16:7-10.
2. a) Ãnda la “tʋm-tʋmd sẽn tũud sɩd la sẽn tar yamã”? b) Wãn to la tʋm-tʋmdã wilg t’a sɩd ‘pʋgda Pe-bilã’?
2 La yaa wãn to yẽ ne rũndã-rũndã kiris-neb nins sẽn paam vʋʋsem sõngã zaeebã? Bãngr-gomd ning sẽn gomd ‘bãnd ning sẽn na n wilg [a Zezi] waoongã la dũniyã sɛɛb wakat’ yellã pʋgẽ, a Zezi boola kiris-neb nins sẽn paam vʋʋsem sõngã zaeebã fãa gill sẽn be tẽngã zugã tɩ “tʋm-tʋmd sẽn tũud sɩd la sẽn tar yam.” (Mat. 24:3, 45; Luk 12:42) Tʋm-tʋmdã sullã neb sɩd wilgame tɩ b ‘pʋgda Pe-bilã a sẽn kẽnd zĩig ning fãa.’ (Karm-y Wilgri 14:4, 5.) Biiblã yeelame tɩ tʋm-tʋmdã sull neb yaa neb sẽn pa mi pagba, sẽn dat n yeel tɩ b pa kẽesd b mens “Babilon kãsengã” sẽn yaa dũni gill ziri tũudmã yɛlẽ ye. (Wil. 17:5) B pa zãmsd nebã ziri Wẽnnaam zugu, la b yaa neb sẽn “ka tar yell” a Sʋɩtãan dũniyã pʋgẽ ye. (Zã 15:19) Ka la bilfu, sẽn paam-b vʋʋsem sõngã zaeeb n ket tẽngã zugã na n tɩ bʋʋga Pe-bilã saasẽ.—Zã 13:36.
3. Bõe yĩng tɩ d segd n kɩs sɩd ne tʋm-tʋmdã?
3 A Zezi yãka tʋm-tʋmd sẽn tũud sɩd la sẽn tar yamã n kõ-a noor t’a ges a zakã yelle, sẽn dat n yeel tɩ tʋm-tʋmdã sull neb fãa, n dɩlg-b wa sẽn zemse. A leb n bobla tʋm-tʋmdã a paoongã fãa. (Mat. 24:45-47) Kʋʋn-kãsengã neb sõor sẽn tar paasgã naaga a paoongã pʋgẽ. (Wil. 7:9; Zã 10:16) Sẽn paam-b vʋʋsem sõngã zaeebã la piis a taabã ned kam fãa segd n kɩsa tʋm-tʋmdã sɩda. Bʋʋm wʋsg yĩng n kɩt tɩ d segd n maan woto. A yiib la woto: 1) A Zeova tara bas-yard ne tʋm-tʋmdã. 2) A Zezi me tara bas-yard ne tʋm-tʋmdã. Bɩ d bao n bãng bũmb nins sẽn sɩd wilgd t’a Zeova ne a Zezi tara bas-yard zãng-zãng ne tʋm-tʋmd sẽn tũud sɩd la sẽn tar yamã.
A Zeova tara bas-yard ne tʋm-tʋmdã
4. Bõe yĩng tɩ d segd n tall bas-yard ne bũmb nins fãa tʋm-tʋmd sẽn tũud sɩd la sẽn tar yamã sẽn kõtã?
4 D ges bũmb ning sẽn kɩt tɩ tʋm-tʋmd sẽn tũud sɩd la sẽn tar yamã tõogd n taasd nebã sagls sẽn yit Wẽnnaam nengẽ wakat sẽn zemsã. A Zeova yeela woto: “Mam na n zãmsa foom n wilg foom sor ninga fo sẽn tog n tũ. Mam nif geta foom, la mam yaa fo sagenda.” (Yɩɩl 32:8) Yaa a Zeova n sɩd wilgd tʋm-tʋmdã sore. Rẽ n so tɩ d segd n bas yard zãng-zãng ne saglsã, vẽnegrã la sor-wilgr ning tʋm-tʋmdã sẽn kõt tõndã.
5. Bõe n wilgd tɩ yaa Wẽnnaam vʋʋsem sõngã n kõt tʋm-tʋmdã pãnga?
5 A Zeova kõo tʋm-tʋmdã a vʋʋsem sõngã. Ned pa tõe n yã a Zeova vʋʋsem sõngã ne nif ye. La bũmb nins a sẽn kɩtd tɩ nebã tõogd n maandẽ wã yaa vẽenega. Tags-y n ges-y tʋm-tʋmd sẽn tũud sɩd la sẽn tar yamã sẽn tõog n maan bũmb ningã. A moona dũniyã gill zug n wilg nebã Wẽnnaam a Zeova sẽn yaa a soaba, a Bi-riblã sẽn yaa a soaba, la Rĩungã sẽn yaa bũmb ninga. A Zeova Kaset rãmbã moonda Rĩungã koɛɛg sẽn yɩɩd tẽns 230 pʋsẽ. Woto yaa kaset sẽn wilgd vẽeneg tɩ yaa Wẽnnaam vʋʋsem sõngã n kõt tʋm-tʋmdã pãnga. (Karm-y Tʋʋm 1:8.) Sẽn na yɩl n tõog n taas a Zeova Kaset rãmbã fãa sẽn be dũniyã gill zugã sagls sẽn yit a Zeova nengẽ wakat sẽn zemse, tʋm-tʋmdã sull neb segd n dɩka sard toor-toore. Yaa nonglmã, sik-m-mengã, la vʋʋsem sõngã biis a taabã n sõngd tʋm-tʋmdã sull neb tɩ b tõogd n dɩkd sard kãens fãa la b pidsd-ba.—Gal. 5:22, 23.
6, 7. Hal sẽn ta zĩ-bʋg la a Zeova kɩs sɩd ne tʋm-tʋmdã?
6 Sẽn na yɩl n bãng t’a Zeova sɩd kɩsa tʋm-tʋmdã sull neb sɩd zãng-zãnga, d ges a sẽn kãab-b bũmb ningã. Tʋm-tʋmd a Poll yeela woto: “Baorg na peebe, la kũum na vʋʋg n paam yĩng sẽn ka põogd ye, la tõnd na n paama tedgre. Tɩ bõe, yaa tɩlae tɩ yĩn-kãng sẽn põogdã tek ne yĩng sẽn ka põogd ye, la yĩn-kiidg kãng na tek ne yĩng sẽn ka kiid ye.” (1 Kor. 15:52, 53) A Zezi karen-biig sẽn paam vʋʋsem sõngã zaeeb n tũud Wẽnnaam ne a sũur fãa sã n wa ki, a vʋʋgda ne yĩng sõmblem sẽn yɩɩd malɛgsã sẽn vɩ wakat sẽn pa satã yĩnsi. Wẽnnaam kɩtdame t’a vɩ n pa kiidẽ, t’a yĩngã me pa tõe n põog bɩ n sãam ye. La sẽn paase, wõnda Wẽnnaam na n kɩtame t’a tõogd n get a meng yell a toore. Wilgr 4:4 pʋgẽ, b bilga sẽn paam-b vʋʋsem sõngã zaeebã sẽn vʋʋg n zao naam gɛya, tɩ b ned kam fãa fõg sãnem maanfo. Kiris-neb nins sẽn paam vʋʋsem sõngã zaeebã na n wa rɩɩ naam ne ziiri. La pa rẽ bal n wilgd tɩ Wẽnnaam tara bas-yard ne-b ye.
7 Wilgri 19:7, 8 wã yeta woto: “Pe-bila pʋg-peegr daar taame, la b pʋg-paala seglame n sɛ. La b kõo yẽ fu-peels sẽn yaa sõma t’a yeelge. Tɩ bõe, fu-peelsã yaa Wẽnnaam nebã tʋʋm sõma.” A Zeova yãka kiris-neb nins sẽn paam vʋʋsem sõngã zaeebã sull tɩ b na n wa yɩ a bi-riblã pʋg-paala. B sẽn na n paam yĩng sẽn pa kiid la sẽn pa sãamdã, n na n paam naam la b paam n kẽ kãadem ne pe-bilã sɩd yaa kũun Wẽnnaam sẽn kõ-b tɩ sɩd yaa kãsenga. Woto fãa wilgda vẽeneg tɩ Wẽnnaam kɩsa sɩd zãng-zãng ne sẽn paam-b vʋʋsem sõngã zaeebã sẽn ‘pʋgd Pe-bilã a sẽn kẽnd zĩig ning fãa’ wã.
A Zezi tara bas-yard ne tʋm-tʋmdã
8. Bõe la a Zezi maanẽ tɩ wilgdẽ t’a kɩsa kiris-neb nins sẽn paam vʋʋsem sõngã zaeebã sɩda?
8 Bõe n wilgd t’a Zezi tara bas-yard zãng-zãng ne kiris-neb nins sẽn paam vʋʋsem sõngã zaeebã? Yʋng ning sẽn deng a kũumã, a goma ne a tʋm-tʋmdb 11 wã sẽn da ket n tũud-a wã, n yeel-b woto: “Yãmb yaa neb sẽn pa ne maam m makra pʋgẽ n ka bas ye. Yaa woto yĩng la mam kõt yãmb soolem wa m Ba sẽn kõ maam soolmã, tɩ yãmb tõe n zĩnd mam taablẽ m soolem pʋgẽ n dɩ la y yũ, la y zaoond gɛyã n kao Israɛll buud piig la a yiibã bʋʋdo.” (Luk 22:28-30) A Zezi maana kaoolã ne a tʋm-tʋmd 11 wã. La kiris-neb nins sẽn da na n wa paam vʋʋsem sõngã zaeeb n zĩnd kaool kãng pʋgẽ wã sõor ra na n wa taa 144 000. (Luk 12:32; Wil. 5:9, 10; 14:1) Rẽ yĩnga a Zezi sã n da pa kɩs-b sɩda, a ra na sak n maan kaool ne-b tɩ b na n wa naag-a n dɩ naam sɩda?
9. A Zezi paoongã a sẽn bobl tʋm-tʋmdã yaa bõe ne bõe?
9 Sẽn paase, a Zezi yãka tʋm-tʋmd sẽn tũud sɩd la sẽn tar yamã n kõ-a noor t’a ges a paoongã fãa yelle, rat n yeel tɩ bũmb nins fãa b sẽn sigl tẽngã zug Rĩungã yĩngã. (Mat. 24:47) Bõn-kãens sʋka, d tõe n sõdga a Zeova Kaset rãmbã biru kãsengã ne biru rãmb a taabã la teed nins fãa sẽn be b pʋsẽ wã, n paas Rĩungã roto, tigis-kãsemsã zĩis sẽn be dũniyã gill zugã, Rĩungã koɛɛg mooneg la karen-biisã maanego. Rẽ yĩnga a Zezi sã n da pa kɩs-b sɩda, a ra na sak n bobl-b woto fãa sɩda?
10. Bõe n wilgd t’a Zezi Kirist bee ne neb nins sẽn paam vʋʋsem sõngã zaeebã?
10 A Zezi vʋʋgrã poore, nand t’a leb saasẽ, a vẽnega a meng ne a karen-biis nins sẽn da ket n tũud-a wã, n kãab-b woto: “Gese, mam bee ne yãmb wakat fãa hal tɩ ta [dũniyã] sɛɛbo.” (Mat. 28:20) A sɩd pidsa a kãabgã bɩ? Yʋʋm 15 wã sẽn loogã pʋgẽ, a Zeova Kaset rãmbã tigimsã sẽn be dũniyã gill zugã sõorã sẽn da yaa 70 000 wã fɩɩgame n yɩɩd 100 000 masã. La karen-biisã yẽ? Neb milyõ a naas la pʋɩ-sʋk n deeg lisg yʋʋm 15 wã pʋgẽ. Sẽn dat n yeel tɩ daar fãa, neb 800 n deeg lisgu. Fɩɩg-kãngã yaa kaset sẽn wilgd vẽeneg t’a Zezi bee ne kiris-neb nins sẽn paam vʋʋsem sõngã zaeebã b tigissã sasa, la a sõngd-b tɩ b maand karen-biisã.
Tʋm-tʋmdã tũuda sɩd la a tar yam
11, 12. Wãn to la tʋm-tʋmdã wilgd t’a tũuda sɩd la a tar yam?
11 A Zeova ne a Zezi Kirist sã n tara bas-yard ne tʋm-tʋmd sẽn tũud sɩd la sẽn tar yamã, tõnd me segd n talla bas-yard ne-a. Tʋm-tʋmdã sɩd pelga a pʋg n tʋmd tʋʋm nins fãa b sẽn bobl-a wã tɩ wilgdẽ t’a yaa sɩd soaba. Wala makre, yʋʋm 130 la woto a sẽn sɩng n yiisd Gũusg Gasgã. Tigissã la tigis-kãsemsã a sẽn sigindã ket n kengda d tẽeb wakat fãa.
12 Tʋm-tʋmdã leb n tara yam, bala a maanda bũmba fãa ne sik-m-menga. A pa yãkd yam n maan bũmb t’a pa kos a Zeova sor-wilgr ye. Sẽn paase, yaa a Zeova sẽn dat t’a maan bũmb ningã la a maanda. Wala makre, a pa maand wa ziri tũudmã taoor dãmb ye. Tũudum taoor dãmb kãens basda nebã tɩ b maand yɛl sẽn kɩɩsd Wẽnnaam noyã, wall b wilgd vẽeneg tɩ ne bãmba, tʋʋm-wẽns nins dũniyã neb sẽn maandã pa wẽng ye. La tʋm-tʋmdã yẽ kõta sagls sẽn sõngd nebã tɩ b tõe n gil rẽ fãa n da lʋɩ a Sʋɩtãan bẽdsã pʋgẽ ye. Yaa Wẽnnaam a Zeova la a Zezi Kirist sẽn ningd tʋm-tʋmdã barkã yĩng la a sẽn tõogd n kõt sagls wakat sẽn zemsã. Rẽ n so tɩ d segd n tall bas-yard ne-a. La wãn to la d tõe n wilg tɩ d tara bas-yard ne tʋm-tʋmd sẽn tũud sɩd la sẽn tar yamã?
D naag sẽn paam-b vʋʋsem sõngã zaeebã n pʋg Pe-bilã
13. Sã n yaa ne a Zakari bãngr-gomdã, wãn to la d tõe n wilg tɩ d tara bas-yard ne tʋm-tʋmd sẽn tũud sɩd la sẽn tar yamã?
13 A Zakari sebrã gomda “bu-zẽms piig” neb sẽn kolg ‘zʋɩf’ n yeele: “Bas-y tɩ d tũ yãmb n kẽnge.” (Karm-y Zakari 8:23.) B sẽn yeel ‘zʋɩfã’ tɩ ‘yãmbã,’ wilgdame tɩ pa nin-yend ye. Rũndã-rũndã, ‘zʋɩfã’ makda “Israɛll sẽn yaa Wẽnnaam dẽndã” kellã, rat n yet tɩ kiris-neb nins sẽn paam vʋʋsem sõngã zaeebã n ket tẽngã zugã. (Gal. 6:16) “Bu-zẽms piig sẽn yaa buud toor-toor” nebã makda kʋʋn-kãsengã. Wala kiris-neb nins sẽn paam vʋʋsem sõngã zaeebã sẽn pʋgd a Zezi a sẽn kẽnd zĩig ning fãa wã, kʋʋn-kãsengã me pʋgda tʋm-tʋmd sẽn tũud sɩd la sẽn tar yamã. Kʋʋn-kãsengã neb pa segd n zoe yãnd ne kɩt tɩ nebã bãng tɩ sẽn paam-b ‘saasẽ boolgã’ yaa bãmb tũud-n-taas ye. (Heb. 3:1) A Zezi me boond-b lame t’a “ba-biisi,” n pa zoet yãnd ye.—Heb. 2:11.
14. Wãn to la d tõe n sõng Kiristã ba-biisã?
14 A Zezi Kirist yeelame tɩ ned sã n sõngd a ba-biisã, yaa yẽ la a soab sõngda. (Karm-y Matɩe 25:40.) Bõe la neb nins sẽn saagd n na n vɩɩmd tẽngã zugã tõe n maan n sõng Kiristã ba-biisã? Sẽn yɩɩd fãa yaa b sẽn na n moond Rĩungã koɛɛgã. (Mat. 24:14; Zã 14:12) Sẽn na maan yʋʋma, neb nins sẽn paam vʋʋsem sõngã zaeeb n ket tẽngã zugã sõor talla boogre, tɩ piis a taabã sõor tar paasgo. Neb nins sẽn dat n wa vɩɩmd tẽngã zugã sã n moond koɛɛgã, sẽn yɩɩd fãa, b sã n tõe n yɩt so-pakdba, b sõngda sẽn paam-b vʋʋsem sõngã zaeebã karen-biisã maaneg pʋgẽ. (Mat. 28:19, 20) D segdame me n tẽegd wakat fãa n kõt ligd n teend koɛɛgã moonego.
15. Kiris-ned fãa manesem segd n yɩɩ wãn ne sagls nins tʋm-tʋmdã sull sẽn kõtã, la sard nins a sẽn dɩkdã?
15 Tõnd sẽn yaa kiris-nebã, wãn to la d ned kam fãa get sagls nins sẽn yit Biiblã pʋgẽ tʋm-tʋmdã sẽn kõt tõnd tigissẽ wã la sɛbã pʋsẽ wã? Rẽ yĩnga d wilgd-b-la d mi-beoogo, n kẽnd tigissã, n karemd sɛbã la d tũud b saglsã bɩ? Tʋm-tʋmdã sull sã n dɩk sardo, rẽ yĩnga d sakd n tũudame bɩ? D sã n sakd n tũud sor-wilgr ning tʋm-tʋmdã sẽn kõtã, d wilgdame tɩ d kɩsa sɩd tɩ yaa a Zeova n wilgd tʋm-tʋmdã sore.—Zak 3:17.
16. Bõe yĩng tɩ kiris-ned fãa segd n kelg Kiristã ba-biisã?
16 A Zezi yeela woto: “Mam piisã wʋmda mam koɛɛga. Mam mii bãmba, la bãmb tũuda maam.” (Zã 10:27) Kiris-neb nins sẽn paam vʋʋsem sõngã zaeebã sɩd maanda woto. La yaa wãn to yẽ ne b tũud-n-taasã? Bãmb me segd n kelga a Zezi koɛɛgã. Sẽn paase, b segd n kelga Kiristã ba-biisã me. Yaa bãmb la Wẽnnaam yãk tɩ b ges a nin-buiidã yelle. Wãn-wãn la d wilgd tɩ d kelgda Kiristã ba-biisã?
17. Wãn-wãn la d wilgd tɩ d kelgda tʋm-tʋmdã?
17 Rũndã-rũndã, yaa Siglgã taoor lʋɩtb Sull n gomd tʋm-tʋmd sẽn tũud sɩd la sẽn tar yamã yʋʋr yĩnga. Siglgã taoor lʋɩtb Sull n sigind koɛɛgã mooneg dũniyã gill zugu, la b lʋɩt taoore. B yaa kãsem dãmb sẽn paam vʋʋsem sõngã zaeebo, la b tar minim Wẽnnaam tʋʋmdã pʋgẽ. D tõe n sɩd yeelame tɩ yaa bãmb la tõnd “taoor dãmba.” (Heb. 13:7) B tʋmda “Zusoabã tʋʋmdã wʋsgo,” bala, b geta dũniyã gill koe-moondbã sẽn yɩɩd milyõ a yopoe wã, la tigimsã sẽn yɩɩd tus-koabgã yelle. (1 Kor. 15:58) D sã n sakd n tũud Siglgã taoor lʋɩtb Sull sor-wilgri, yaa tʋm-tʋmdã la d kelgda.
Neb nins sẽn kelgd tʋm-tʋmdã paamda barka
18, 19. a) Bark bʋs la neb nins sẽn kelgd tʋm-tʋmd sẽn tũud sɩd la sẽn tar yamã na n paame? b) Bõe la tõnd ned kam fãa segd n modg n maane?
18 Wẽnnaam sẽn yãk tʋm-tʋmd sẽn tũud sɩd la sẽn tar yamã tɛka, b sõngdame ‘tɩ neb wʋsg lebgd nin-tɩrse.’ (Dan. 12:3) Neb nins sẽn saagd n na n põs dũni-wẽn-kãngã sãoongã sasa wã naaga nin-kãens sʋka. B sẽn paam n tat Wẽnnaam yamã sɩd yaa bark tɛkẽ!
19 ‘Zerizalɛm paalgã [rat n yeel tɩ neb 144 000] sã n wa yi saasẽ Wẽnnaam nengẽ n sigi, n wẽnd wa pʋg-paal sẽn segl n na n seg a sɩda,’ neb nins sẽn kelg tʋm-tʋmdã na n paama bõe? Biiblã yeela woto: “[Wẽnnaam] menga na n paa ne bãmba. [A] na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye, tɩ bõe, dẽenem bũmb fãa loogame.” (Wil. 21:2-4) Woto yĩnga, bɩ d sakd n kelgd Kiristã ne a ba-biisã sẽn paam vʋʋsem sõngã zaeebã.
Bõe la yãmb bãng-yã?
• Bõe n wilgd t’a Zeova tara bas-yard ne tʋm-tʋmd sẽn tũud sɩd la sẽn tar yamã?
• Bõe n wilgd t’a Zezi Kirist tara bas-yard ne tʋm-tʋmdã?
• Bõe yĩng tɩ d segd n tall bas-yard ne tʋm-tʋmdã?
• Wãn to la d wilgd tɩ d tara bas-yard ne tʋm-tʋmdã?
[Zãmsgã sogsgã]
[Foto, seb-neng 19]
Ãnda la a Zeova yãk t’a na n yɩ a Bi-riblã pʋg-paalã?
[Foto rãmba, seb-neng 20]
A Zezi Kirist rɩka a paoongã n bobl tʋm-tʋmd sẽn tũud sɩd la sẽn tar yamã
[Foto, seb-neng 21]
D sã n moond koɛɛgã, d sõngda sẽn paam-b vʋʋsem sõngã zaeebã