Lawas Dan ‘Tutumboken so Kordero’
Lawas Dan ‘Tutumboken so Kordero’
“Saraya sikara so mantumbok ed Kordero ed anggan iner a laen to.”—APO. 14:4.
1. Antoy panmoria na saray tuan babangatan nen Jesus nipaakar ed panumbok ed sikato?
MANGA duay taon tan kapaldua legan na ministeryo nen Jesus, sikatoy ‘nambangat ed sinagoga diad Capernaum.’ Diad impakabigla na saray babangatan to ed imbaga to, ‘amayamay ed sikara so sinmener, tan agla akila ed sikato.’ Sanen tinepetan nen Jesus iray 12 apostol to no labay da met so ontaynan, oniay ebat nen Simon Pedro: “Katawan, siopa so laen mi? Wala ed sika so saray salita na maando a bilay. Et anisia kami tan amta mi a sika so Santo na Dios.” (Juan 6:48, 59, 60, 66-69) On, agtinmundan anumbok ed si Jesus iray tuan babangatan to. Kayari iran alanaan na masanton espiritu, nantultuloy iran nampaiwanwan ed sikato.—Gawa 16:7-10.
2. (a) Siopa so “matoor tan makabat ya aripen,” odino “managpaga a napanmatalkan”? (b) Akin a nibaga a talagan apaneknekan lan ‘tutumboken’ na aripen so “Kordero”?
2 Komusta balet iray alanaan a Kristiano ed sayan panaon? Diad propesiya nen Jesus nipaakar ed ‘tanda na isabi to tan say anggaan [na sistema] na mundo,’ tinawag ton “matoor tan makabat ya aripen” odino “managpaga a napanmatalkan” so grupo na alanaan na espiritu a papatumbok to diad dalin. (Mat. 24:3, 45; Luc. 12:42) Bilang grupo, talagan apaneknekan lan ‘tutumboken’ na sayan aripen so “Kordero ed anggan iner a laen to.” (Basaen so Apocalipsis 14:4, 5.) Diad espiritual ya aspekto, mansiasiansian birhen iray membro na satan lapud agda dudutakay inkasikara ed saray sisisiaen tan kagagawa na “Babilonia a Baleg,” say sankamundoan ya empiryo na palson relihyon. (Apo. 17:5) Anggapoy “aromog” a tilan doktrina ed “saray sangi ra,” tan mansiasiansia ran ‘ag-atilolan’ na mundo nen Satanas. (Juan 15:19) Diad arapen, saray alanaan a wadia ni’d dalin et ‘tumboken’ da lay Kordero ed tawen.—Juan 13:36.
3. Akin ya importantin panmatalkan tayo so aripen?
3 Tinuro nen Jesus so matoor tan makabat ya aripen a “mangimaton ed sankaabungan to,” salanti, say balang membro na aripen, pian “mangiter ed sikara na tagano ed panaon a kinepeg to.” Impudir to met ed sayan aripen so “amin a wala ed sikato” odino amin a kaykayarian to. (Mat. 24:45-47) Kabiangan ed saratan a kaykayarian so ondarakel a “baleg ya ulop” na ‘arum a karnero.’ (Apo. 7:9; Juan 10:16) Agta nepeg labat a panmatalkan na balang membro na alanaan tan ‘arum a karnero’ so aripen a tinuron mangasikaso ed sikara? Dakel so rason no akin a kanepegan na aripen so panagmatalek tayo. Say duaran manunan rason et: (1) Panmamatalkan nen Jehova so aripen. (2) Panmamatalkan met nen Jesus so aripen. Usisaen tayo pay ebidensya a sigpot a panmamatalkan nen Jehova a Dios tan si Jesu-Kristo so matoor tan makabat ya aripen.
Panmamatalkan nen Jehova so Aripen
4. Akin a napanmatalkan tayo so espiritual a taganon itatarya na matoor tan makabat ya aripen?
4 Imanoen tayo pa no akin a makapangitatarya so matoor tan makabat ya aripen na nipanpanaon tan masustansian espiritual a tagano. Oniay inkuan nen Jehova: “Bilinen ta ka tan ibangat ta ka ed dalan a nepeg mo a laen.” Tan inyarum to ni: “Simbawaen ta ka a sinenengneng so matak ed sika.” (Sal. 32:8) On, iwawanwan nen Jehova so matoor ya aripen. No ontan sirin, sigpot tayon napanmatalkan so Makasulatan a pakatebek, pakatalos, tan panangiwanwan a naaawat tayo ed aripen.
5. Antoy pakapatnagan a papabiskegen na espiritu na Dios so aripen?
5 Ipapagamor met nen Jehova so masanton espiritu to ed sayan aripen. Anggaman agnanengneng so espiritu na Dios, sankaimano ed saramay inikdan so pawawalaen na satan. Nonoten pay agawaan la na matoor tan makabat ya aripen diad sankamundoan a pantatasi nipaakar ed si Jehova a Dios, ed Anak to, tan ed Panarian. Aktibon iyaabawag na saray mandadayew ed si Jehova so mensahe na Panarian diad masulok a 230 iran bansa tan isla. Agta satan et agniburin paneknek a papabiskegen na espiritu na Dios so aripen? (Basaen so Gawa 1:8.) Pian nitarya na aripen so nipanpanaon ya espiritual a tagano parad saray totoo nen Jehova ed interon mundo, kaukolan toy manggawa na importante iran desisyon. Tan sano gagawaen tan ipapaakseb na aripen iratan, lawas katekep toy panangaro, tayadno, tan arum ni ran aspekto na bunga na espiritu.—Gal. 5:22, 23.
6, 7. Panoy kabaleg na talek nen Jehova ed matoor ya aripen?
6 Pian natalosan tayoy kabaleg na talek nen Jehova ed matoor ya aripen, molimolien pay insipan to ed saray membro na satan. Insulat nen apostol Pablo: “Say trumpeta ontanol, tan saray inatey onoli ra ed bilay ya agnaderal, tan nauman itayo. Ta saya a naderal kaukolan a kawesan na agnaderal, tan sayan ompatey kaukolan a kawesan na ag-ompatey.” (1 Cor. 15:52, 53) Saray alanaan a papatumbok nen Kristo, a matoor a manlilingkor ed Dios, tan ompatey ed pisikal a laman a naderal, so paolien tan pagamoran na bengatlan mas mabalor ni nen say andi-anggaan a bilay a walad saray espiritun pinalsa. Iter ed saraya so imortalidad, salanti, bilay ya agmangangga tan agnaderal. Niarum ni, ikdan ira na laman ya agnabulok. Tan mapatnag a satan a laman et makasustuni ed inkasikaton dili, salanti, agla mankaukolay enerhiyan manlalapud arum. Inkuan na Apocalipsis 4:4 a sarayan apaoli et akayurong ed saray trono tan say kauloan da et walaay balanget a balitok. Sirin et manatalaran ed sikara so pribilehyon magmaliw ya ari. Balet, aliwan satan labat.
7 Oniay inkuan na Apocalipsis 19:7, 8: “Sinmabi la so bansal na Kordero, et say asawa to nantadia la. Tan niiter ed sikato a mankawes na pino a lienzo, masnag tan malinis, ta say pino a lienzo sikato so matunong a gawa na saray sasantos.” Pinili nen Jehova iray alanaan a Kristiano a magmaliw a nobya na Anak to. Agkaderal, imortalidad, inkaari, “bansal na Kordero”—agaylan dakep irayan regalo! Saraya et makapaseseg a paneknek a panmamatalkan na Dios so alanaan, a lawas “mantumbok ed Kordero ed anggan iner a laen to.”
Panmamatalkan nen Jesus so Aripen
8. Panon ya impanengneng nen Jesus a panmamatalkan to ray nilanaan na espiritu a papatumbok to?
8 Antoy paneknek a sigpot a panmamatalkan nen Jesus iray nilanaan na espiritu a papatumbok to? Diad samay unor lan labi nen Jesus diad dalin, walay insipan to ed saray matoor a 11 ya apostol to. Inkuan to’d sikara: “Sikayo so nansiansia ed siak ed saray inkatuktuksok. Et manuro ak ed sikayo na sakey a panarian, a singa say Amak anuro ed siak. Pian makapikan tan makapiinum kayo ed dulang ko dia ed panarian ko; et onyurong kayo ed saray trono a mangukom ed labindua a poli na Israel.” (Luc. 22:28-30) Satan a sipan nen Jesus ed 11 et sakopen to met lay amin a 144,000 ya alanaan a Kristiano. (Luc. 12:32; Apo. 5:9, 10; 14:1) No ag-ira panmamatalkan nen Jesus, isipan to kasi so panuley ton kaiba ra ed Panarian to?
9. Antoray pigara ed saray kaykayarian nen Kristo?
9 Niarum ni, impudir nen Jesu-Kristo ed matoor tan makabat ya aripen so “amin a wala ed sikato,” salanti, amin a kaykayarian to diad dalin. (Mat. 24:47) Kabiangan ed saratan a kaykayarian iray pasilidad diad hedkuarter na saray Tasi nen Jehova, diad saray sangan opisina ed nanduruman bansa, diad saray Assembly Hall tan Kingdom Hall ed interon mundo. Kalaktip met ed saratan so panangipulong ed Panarian tan panaggaway babangatan a kimey. Wala tay siopaman ya ipaasikaso tan ipausar toy kaykayarian to ed agto panmamatalkan?
10. Antoy mangipapanengneng a si Jesu-Kristo et “wala” ed saray nilanaan a papatumbok to?
10 Antis a sinmegep ed tawen, pinmayawar so pinaolin si Jesus ed saray matoor a babangatan to tan oniay insipan to ed sikara: “Nia, wala ak a naynay ed sikayo, ya angga ed kasampotan na [sistema na] mundo.” (Mat. 28:20) Tinoor to kasi iyan sipan to? Diad apalabas a 15 taon, say manga 70,000 a kongregasyon na saray Tasi nen Jehova ed interon mundo et nagmaliw lan masulok a 100,000—dinmakel na masulok a 40 porsiento. Tan pigaray niarum a balon babangatan? Ngalngali 4.5 milyon a babangatan so abautismoan ed apalabas a 15 taon—diad aberids et masulok a 800 kada agew. Sarayan makapadinayew ya indakel et mabitabitar a paneknek ya iwawanwan nen Kristo iray alanaan a papatumbok to diad saray pantitipon da ed kongregasyon tan susuportaan to ra ed panaggaway babangatan.
Say Aripen et Matoor tan Makabat
11, 12. Panon ya impanengneng na aripen a sikatoy matoor tan makabat?
11 Lapud si Jehova a Dios tan si Jesu-Kristo et sigpot a manmamatalek ed matoor tan makabat ya aripen, agta nepeg labat a panmatalkan tayo met iyan aripen? Lalo la ta impanengneng to a matoor ton gagawaen iray niasain a kimey to. Alimbawa, say magasin a Watchtower et impalapag la ed loob na manga 130 a taon. Niarum ni, saray aral, asemblea, tan kombension na saray Tasi nen Jehova et tuloytuloy a mamapabiskeg ed espiritualidad tayo.
12 Makabat met so matoor ya aripen lapud sikatoy aliwan mapalakbat, agto uunaan si Jehova, nisay masuyat a manguunor sano mapatpatnag lay instruksion na Dios ed sakey a bengatla. Alimbawa, bangta saray palson relihyoson lider et pasekreton mangokonsente odino parungtalan a mangibabagan normal labat so sinisiblet tan andiay takot ed Dios a kagagawa na totoo, say matoor ya aripen balet et mamapasakbay ed saray patit na marelmeng a sistema nen Satanas. Nitatarya na aripen so nipanpanaon tan makabat iran pasakbay lapud panamendisyon nen Jehova a Dios tan si Jesu-Kristo. Kanepegan sirin na aripen so sigpot a panagmatalek tayo. Balet, panon tayon nipanengneng a panmamatalkan tayo so matoor tan makabat ya aripen?
“Mila” ed Alanaan Legan Dan Tutumboken so Kordero
13. Unong ed propesiya nen Zacarias, panon tayon nipanengneng so talek ed matoor tan makabat ya aripen?
13 Sinalambit na libro na Biblia a Zacarias so “samploran lalaki” a linma ed ‘samay Judio’ tan inkuan da: “Mila kami naani ed sikayo.” (Basaen so Zacarias 8:23.) Lapud say impanukoy ed ‘samay Judio’ et “sikayo,” grupo na totoo sirin so nasasaglawi. Diad panaon tayo, irereperesenta to iray nakdaan a Kristiano a nilanaan na espiritu—a kabiangan na “Israel na Dios.” (Gal. 6:16) Say “samploran lalaki [a] manlapu ed saray amin a pansasalita na saray nasyon” et mangirerepresenta ed baleg ya ulop na arum a karnero. Singa saray alanaan a Kristiano a manutumbok ed si Jesus ed anggan iner a laen to, say baleg ya ulop et ‘mimila’ odino mangiiba met ed matoor tan makabat ya aripen. Nepeg ya agbalot ibabaing na baleg ya ulop so pangiiba ra ed saray “minanabang [odino kabiangan] ed inkatawag a mangatatawen.” (Heb. 3:1) Si Jesus et agto imbaing a tawagen ya “agagi” iray alanaan.—Heb. 2:11.
14. Panon tayon matoor a nasuportaan iray agagi nen Kristo?
14 Ipapasen nen Jesu-Kristo a no matoor tayon susuportaan iray agagi to, singa tayo met lanlamang gagawaen itan ed sikato. (Basaen so Mateo 25:40.) Panon sirin a nasuportaan na saray walaay mangaraldalin ya ilalo iray alanaan na espiritun agagi nen Kristo? Say manunan paraan et diad panulong ed sikaran ipulong so Panarian. (Mat. 24:14; Juan 14:12) Diad ilalabas na saray dekada, ondaraiset so alanaan diad dalin, balet ta ondarakel iray arum a karnero. Sano mibiang ed panagpulong iray walaay ilalon manbilay diad dalin, a no posible et manlingkor bilang sigpot-panaon ya ebanghelisador, susuportaan da ray alanaan pian nasumpal so nipabtang ed sikaran kimey a panaggaway babangatan. (Mat. 28:19, 20) Tan say sakey nin agtayo lilingwanan et say pribilehyon pandonasyon bilang suporta ed sayan kimey.
15. Antoy nepeg a reaksion na balang Kristiano ed nipanpanaon ya espiritual a tagano a manlalapud aripen tan ed saray desisyon na aripen nipaakar ed organisasyon?
15 Bilang indibidual a Kristiano, panoy pangipapasen tayo ed nipanpanaon ya espiritual a tagano ya itatarya na matoor ya aripen panamegley na saray base’d Biblia a publikasyon tan saray pantitipon? Kasin maapresya tayon aawaten itan tan mabulos ya iyaaplika so nanaaralan tayo? Antoy reaksion tayo ed saray desisyon na aripen nipaakar ed organisasyon? No mabulos tayon uunoren iray instruksion, ipapanengneng tayoy panagmatalek tayo ed saray uksoyan nen Jehova.—Sant. 3:17.
16. Akin a nepeg a dengelen na amin a Kristiano iray agagi nen Kristo?
16 Inkuan nen Jesus: “Saray karnerok dengelen da so boses ko, et kabat ko ra, tan ontumbok ira ed siak.” (Juan 10:27) Ontan so gagawaen na saray alanaan a Kristiano. Saraman balet so ‘mimila’ ed sikara ey? Nepeg day ondengel ed si Jesus. Ontan met, nepeg dan dengelen iray agagi to. Lalo la ta inmatalek ed aripen so manunan responsabilidad a pangasikaso ed espiritual a pankaabigan na totoo na Dios. Antoy kabaliksan na idengel ed boses na agagi nen Kristo?
17. Antoy kabaliksan na idengel ed aripen?
17 Say matoor tan makabat ya aripen natan et irerepresenta na Mananguley ya Ulop, a mangidadaulo tan mangoorganisa ed kimey a panangipulong na Panarian diad interon mundo. Saray membro na Mananguley ya Ulop et eksperiensyado tan nilanaan na espiritu a mamatatken. Sikara imay nagkalautlan nadedeskribe a “mangidadaulo” ed sikatayo. (Heb. 13:7, NW) Lapud aasikasoen na sarayan nilanaan a manangidaulo so masulok a 7,000,000 a manangiyabawag na Panarian ed interon mundo diad masulok a 100,000 a kongregasyon, ‘daakan so kimey da ed Katawan.’ (1 Cor. 15:58) Say idengel ed aripen et kabaliksan ton sigpot itayon mikoopera ed Mananguley ya Ulop.
Nabebendisyonan Iramay Ondedengel ed Aripen
18, 19. (a) Panon a nabebendisyonan iramay ondedengel ed matoor tan makabat ya aripen? (b) Antoy nepeg a determinado tayon gawaen?
18 Manlapu la’d impakaturo na matoor tan makabat ya aripen, ‘aawiten to so dakerakel ed inkatunong.’ (Dan. 12:3) Kaiba’d saraya iramay walaan na ilalon makaliktar ed kaderal na kaplesan a marelmeng a sistema na bengabengatla. Agaylan bendisyon iyan matunong a talindeg ed Dios!
19 Diad arapen, sano say ‘masantos a syudad, say balo a Jerusalem [tugyopen na 144,000], et onepas a nanlapu ed tawen dia ed Dios, a nitadia a singa sakey a nobya ya akawesan nipaakar ed asawa to,’ antoy naeksperiensya na saramay dinmengel ed aripen? “Say Dios met lanlamang so wala naani ed sikara,” kuan na Biblia. “Tan punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” (Apo. 21:2-4) No ontan sirin, gawaen tayo komon so anggaay nayarian tayon dengelen si Kristo tan saray napanmatalkan ya alanaan na espiritun agagi to.
Antoy Naaralan Mo?
• Antoy paneknek a panmamatalkan nen Jehova so matoor tan makabat ya aripen?
• Antoy mangipapanengneng a sigpot a panmamatalkan nen Jesu-Kristo so aripen?
• Akin a kanepegan na ‘napanmatalkan a managpaga’ so panagmatalek tayo?
• Panon tayon nipanengneng a panmamatalkan tayo so aripen?
[Tepetepet Parad Panagaral]
[Litrato ed pahina 25]
Antam ta no siopay pinili nen Jehova a magmaliw a nobya na Anak to?
[Saray litrato ed pahina 26]
Inmatalek nen Jesu-Kristo ed matoor tan makabat ya aripen so “amin a wala ed sikato”
[Litrato ed pahina 27]
Sano mitutulongan itayo ed panagpulong, susuportaan tayo iray alanaan