‘Mecho tsechopis Achcastam qatikäyan’

“Pecunaqa mecho tsechopis Achcastam qatiyarqan.” (APO. 14:4.)

1. ¿Jesucristupa qateqninkuna imanötaq rikätsikuyarqan Jesusta mana haqishpa qatita munayanqanta?

JESUS yachatsikur qallanqampitaqa ishkë wata hoqta killakunanönam pasarishqa. “Capernaum marcapa ellucayänan wayincho” yachatsikonqanta wiyarirninmi, “atscaq qatiraqnincuna Jesusta jaqiricur eucuyarqan. Pewan mananam puriyarqannatsu. Tsenam tse chunca ishque (12) disipuluncunata Jesus nerqan: —¿Qamcunapis jaqirayämanquicu? [...] Tsenam Simon nishqan Pedru queno nerqan: —Teyta, ¿pimanraq ewallayäshaq? ¡Qamllataq parlanqui wiñe cawaquipaq! Noqalläcunaqa qamllamanmi  marcäculläyä. Y musyayämi Dios Acrashqan canqequita” (Juan 6:48, 59, 60, 66-69). Rasumpa qateqninkunaqa manam Jesusta haqirir ewkïta munayarqantsu. Santu espïrituta chaskirirnimpis manam haqiyarqantsu (Hech. 16:7-10).

2. a) ¿Pitaq ‘mäcoq, mäcoq, cumplidu sirweq’ y “mäcoq, mäcoq, cumplidu mayural”? b) ¿Imanö kayanqantataq rikätsikuyashqa ciëlopa ëwaqpaq kaq cristianokuna?

² ¿Imataq nishwan kanan tiempochö ciëlopa ëwaqpaq akrashqa cristianokunapaq? Qateqninkunam Jesusta kënö tapuyarqan: “¿Ima señata ricarnintaq musyariyäshaq cutimunequipaq y juisiu junaqpaq?”. Kë tapukïta contestanqanchömi kë patsachö këkaq akrashqa cristianokunata kënö qayarqan: ‘Mäcoq, mäcoq, cumplidu sirweq’ y “mäcoq, mäcoq, cumplidu mayural” nishpa (Mat. 24:3, 45; Luc. 12:42). Kë cristianokunam rikätsikuyashqa ‘mecho tsechopis Achcasta’ qatikäyanqanta (lei Apocalipsis 14:4, 5). Pëkunaqa manam takukäyashqatsu ‘jatungare Babiloniapa’ o kë patsachö llapan mana alli religionkunapa yachatsikïninkunawan (Apo. 17:5). Pëkunapa shiminkunachöqa manam ulikï o llullakï parlakïkuna kashqatsu, y kë mana alli mundopa rurëninkunawan takukäyashqatsu (Juan 15:19). Y shamoq tiempochöqa ciëlopa ëwaqpaq kaq akrashqa cristianokunaqa, Jesuswan juntom ciëlochö kayanqa (Juan 13:36).

3. ¿Imanirtaq markäkushwan mäkoq mäkoq cumplido sirveqman?

³ Jesusqa kë ‘mäcoq, mäcoq, cumplidu sirweqtam’ churashqa “wayinman, tsëcho caqcunata miquinincuna örancho qarananpaq”, kë wayinchö kaqkunaqa, llapampis ciëlopa ëwaqpaq kaq kastallapitam kayan. Hinamampis churashqa “imecancunamanpis confiacur mayuralnin cananpaq[mi]” (Mat. 24:45-47). “Imecancunamanpis” nirnenqa parlëkan “mana yupetapis puedipaq” atskaq nunakunapaqwanmi, kë atskaq nunakunaqa kë Patsachö quedaqpaq kaqkunam kayan, hina kë nunakunapaqmi Jesusqa “mas üshäcunapis capamanmi” nerqan (Apo. 7:9; Juan 10:16). Tsëpenqa, ¿manatsuraq Jesus churashqan mäkoq mäkoq cumplido sirveqman markäkuyanman o yärakuyanman ciëlopa ëwaqpaq kaq akrashqakuna y kë Patsachö quedaqpaq kaqkunapis? Awmi, ¿imanir? Musyarinapaq ishkëllata rikärishun: 1) Kikin Jehovämi markäkun mäkoq mäkoq cumplido sirveqman 2) y Jesuspis Teytannöllam markäkun. Rikärishun mä imanöshi Jehoväwan Jesus pasëpa markäkuyan mäkoq mäkoq cumplido sirveqman.

Jehoväqa markäkunmi o yärakunmi mäkoq mäkoq cumplido sirveqman

4. ¿Imanirtaq markäkushwan mäkoq mäkoq cumplido sirveq yachatsimanqantsikman?

⁴ Këman yarpärishun, ¿imataq yanapan kë cumplido sirveqta tiemponchö espiritual kaq mikïnintsik qaramänantsikpaq? Jehovämi kënö nin: “Noqa Jehová[mi] käyikïniki qoshqëki, y alli nänipa purinëkipaqmi yachatsishqëki. Rikëkashqëkim willapänaqpaq” nishpa (Sal. 32:8). Rikanqantsiknöpis kikin Jehovämi yanapan. Y pëkunaqa yachatsimantsik Bibliallapitam, tsëmi, markäkunantsik llapan yachatsimanqantsikman, y alli nänipa pushamänapaq imëkata ruramonqantapis.

5. ¿Imachötaq rikantsik mäkoq mäkoq cumplido sirveqta Diosnintsik santo espïritunwan yanapëkanqanta?

⁵ Hinamampis kë mäkoq mäkoq cumplido sirveqtaqa Jehová yanapan santu espirïtunwanmi. Santu espïrituta mana rikarnimpis, tukïnöpa yanapakonqantaqa rikantsikmi. Yarpärishun mäkoq mäkoq cumplido sirveq ruranqanman, pëkunaqa Jehoväpita, Jesuspita, y Gobiernompitam yachatsikuyashqa. Y këtaqa Jehoväpa sirveqninkuna manam huk ishkë markallachötsu yachatsikïkäyan, sinöqa ishkë pachak kima chunka (230) nacionkunapitapis maschömi. ¿Manaku këwanqa claro rikëkantsik mäkoq mäkoq cumplido sirveqta Diosnintsik santu espïritunwan yanapëkanqanta? (Lei Hechos 1:8.) Hinantin patsachö Diospa sirveqninkunata tiemponchö yachatsinampaqqa manam fäciltsu, tsëmi mäkoq mäkoq cumplido sirveqqa alleqraq pensanan. Y tsë llapan pensayanqantaqa kuyakïwan y humildadwanmi rurayan, tsëchömi santu espíritu yanapëkanqanta rikätsikuyan (Gál. 5:22, 23).

6, 7. ¿Imanötaq musyantsik mäkoq mäkoq cumplido sirveqman Jehová pasëpa markäkonqanta?

⁶ Jehová, mäkoq mäkoq cumplido sirveqman markäkonqanta o yärakonqanta maslla musyarinapaqqa kë änenqanman alleq yarpärishun.  Apóstol Pablum kënö qellqarqan: “Trompeta waqecamonqan öram llapan wanushqacuna cawarirayämonqa, manana mas wanuyänanpaq, y cawecaq caqcunanam juclaya cuerpuyoqna ticrariyanqa, manana mas wanuyänanpaq. Tsemi que ushacäcoqlla cuerpuntsic manana ushacäcoqna ticrarenqa, y que wanucoqlla etsantsicmi manana mas wanucoq juclaya cuerpumanna ticrarenqa” (1 Cor. 15:52, 53). Kë patsachö wanuyanqanyaq Diosta servirirninmi, ciëlopa ëwaqpaq kaqkunaqa yapë kawariyämonqa, pero huk espíritu cuerpoyoqna. Pero manam espïritunö kawayänanllapaqtsu Diosnintsik kawaritsimun, sinöqa chaskiyan ni imanöpapis “manana ushacäcoqna” y “manana mas wanucoq” kawakïtam, tsëqa manam ni imapis ushakätsenqanatsu ninanmi. Tsënö karqa itsa hukpa kallpantaraqtsu wanayanqa imëyaqpis kawakuyänampaq, sinöqa kikinkunallachönam kawë kanqa. Apocalipsis 4:4 nishqanchönam rikätsimantsik oropita corönashqa tëkäyaqta, tsëmi rikätsimantsik pëkunapis ciëlopita patsë Jesuswan paqta gobernayämunanta. Pero manam tsëllatsu, mastaraq rikärishun.

⁷ Apocalipsis 19:7, 8, nishqanchömi kënö willamantsik: “¡Allapa cushiquiwan alabecushun Diosta! Porqui chäramushqanam Achcaspa casaquinin öra; y nobianpis alistacushqanam shuyarëcan. Tse nobiapaqmi linupita yulaq püru chipapäquicaq alli ropata yacacunanpaq Teyta Dios alistashqa. Tse finu telapita rurashga alli ropaqa Dios Yayaman creyicoqcuna allillata rurayanqanmi”. Awmi, Jehová Diosqa kë ciëlopa ëwaqpaq kaqkunata akrashqa Wambrampa novian kayänampaqmi. Y mana ushakäkoqna y mana wanukoqna kawëtam qoshqa, hina Jesuswan gobernayämunampaq, y Cristupa novian kayänampaqpis akrashqam. Kë rikanqantsikwanmi alleq musyantsik Jehová Diosqa mäkoq mäkoq cumplido sirveqman pasëpa markäkonqanta, y “pecunaqa mecho tsechopis Achcastam” qatikäyan.

Jesuspis kë mäkoq mäkoq cumplido sirveqmanqa markäkunmi

8. Mandakayämunampaq huk conträtota qateqninkunawan Jesus ruranqanqa, ¿imatataq rikätsimantsik?

⁸ ¿Imanötaq musyantsik ciëlopa ëwaqpaq kaq cristianokunaman Jesuspis pasëpa markäkonqanta? Mä rikärishun. Wanukunan paqasmi Jesus kënö nerqan chunka huk apostolninkunata: “Qamcuna noqawanmi ima nacaquinïcunachopis cayarqonqui”. Tsëpitanam kënö prometerqan: “Papänï noqata mandacunäpaq churamanqannolla[m], qamcunatapis mandacuyänequipaq churayashqequi. Tsenam noqapa mandaquinïcho qamcuna micuyanqui upuyanqui  mesächo. Tsechonam noqapa nopächo alli täcunacunaman tëcur, chunca ishque (12) israel casta nunacunata jusgayanqui” (Luc. 22:28-30). Tsë chunka huk apostolninkunata mandakuyänampaq änenqanqa ciëlota llapan ëwaqpaq kaqkunapaqmi karqan, y këkunaqa kayan pachak chusku chunka chusku waranqa (144.000) akrashqakunam (Luc. 12:32; Apo. 5:9, 10; 14:1). Këman yarpärishun, ¿gobernayämunampaq conträtota ruranmantsuraq karqan Jesus pëkunaman mana markäkurnin o yärakurnenqa?

9. “Llapan imecancunamanpis” nerqa, ¿imakunapaqtaq Jesus parlëkan?

⁹ Hinamampis, Jesusqa kë mäkoq mäkoq cumplido sirveqninkunatam “llapan imecancunamanpis confiacur mayuralnin cananpaq” churashqa (Mat. 24:47). Kë “llapan imecancunamanpis” nerqa rikëkätsimantsik, Jehoväpa testïgonkunapa principal oficinan, y hinantin nacionkunachö sucursalninkuna, y asambleata rurakuyänampaq localkuna, y Jehoväpa testïgonkuna yachatsikuyänampaq wayikuna, y yachatsikur puriyanqampis Jesusllapa kanqantam. Tsëkunata rikänampaqmi ciëlopa ëwaqpaq kaq nunakunata churashqa. ¿Piraq imëkankunatapis rikänampaq churëkunman mana markäkurqa?

10. ¿Imakunachötaq más Jesus mäkoq mäkoq cumplido sirveqninta yanapëkan?

¹⁰ Tsë 33 watachö 16 de nisán hunaqchömi, wanonqampita sharkamurnin qateqninkunata Jesus kënö nerqan: “Noqaqa qamcunawanmi quecashaq imecamayaqpis, asta que patsapa usheninyaq” (Mat. 28:20). ¿Tsënö änikushqanta Jesus cumplishqaku?, awmi. Tantearinallapaq, chunka pitsqa (15) watakuna pasarishqanllachömi allipa mirëkushqa Jehová Diospa markan, y congregacionkunapis setenta milpita kananqa cien milpitapis masnam pasarin. ¿Y kë chunka pitsqa watakuna pasarishqancho ëkaqtaq bautizakuyashqa? Tsë watakunachöqa casi chusku millón y mediom nunakuna bautizakuyashqa, y këqa rikätsimantsik cada hunaq puwaq pachakpitapis (800) más bautizakuyanqantam. Kënö pasëpa Jehová Diospa markan miranqanmi rikätsimantsik kikin Jesus mäkoq mäkoq cumplido sirveqninta congregacionchö y yachatsikur puriyanqanchöpis yanapëkanqanta.

Mäkoq mäkoq cumplido sirveq

11, 12. ¿Imanötaq mäkoq mäkoq kanqanta rikätsikushqa cumplido sirveq?

¹¹ Jehoväpis, Jesuspis mäkoq mäkoq cumplido sirveqman pasëpa markäkïkäyaptin o yärakïkäyaptenqa, ¿manatsuraq noqantsikpis pëkunaman  markäkushwan? Awmi, pëkunaqa Jesus churashqannömi llapanta cumpliyashqa. Këtaqa musyarintsik pachak kima chunka (130) watakunana mana haqishpa kë Täpakoq o La Atalaya nishqan revista yarqëkämonqanta rikarmi. Hina manam tsëllatsu, kanmi reunionnintsikkuna, asambleantsikkunapis Jehoväman markäkïnintsikta más sinchiyätsinampaq.

¹² Kë sirveqqa, imëpis mäkoq mäkoqllam këkan. Manaraq Jehová niptenqa manam llutaqa imatapis rurantsu, ni musyëkarnimpis manam pakarätsikuntsu, ni puntäkurkuntsu, sinöqa llapantapis tiemponchömi ruran Jehová munanqannö. Këta maslla rikärishun, mana alli religionkunapa pushaqninkunaqa nunankuna imëka mana allikunata rurar kakuyaptimpis rikaräkuyanmi y manam imapis niyantsu. Pero mäkoq mäkoq cumplido sirveqqa alleqmi willamantsik Satanaspa toqllanman mana ishkinantsikpaq, tsënöqa willamantsik Jehoväwan Jesucristu yanapayaptinmi. Tsëmi llapantsik pëkunamanqa shonquntsikpita patsë markäkunantsik. Pero, ¿imanötaq tsëtaqa rikätsikushun?

Ciëlopa ëwaqpaq kaqkuna rurayanqanta llapantsik qatishun

13. Zacarías librochö nenqannö, ¿imanötaq rikätsikushwan mäkoq mäkoq cumplido sirveqman markäkonqantsikta?

¹³ Zacarias librom parlan “chunka nunakuna” huk judío nunaman witïkur “qamkunawanmi ewayäshaq” niyanqampaq (lei Zacarías 8:23). Rikanqantsiknöpis, kë chunka nunakunaqa kë judío nunata “qamkunawanmi” niyanmi, këqa rikätsimantsik judío nunaqa atskaq kayanqantam. Kanan tiempontsikchöqa tsë judío nunaqa kayan Teyta Dios santu espïritunwan akrashqan kaqkunam, y pëkunaqa kayan ‘Diospa rasonpa israel nunancunam’ o ciëlopa ëwaqpaq kaqkunam (Gál. 6:16). Y tsë “tukï idiömata parlaq chunka nunakunaqa” kayan, kë patsachö quedaqpaq mana yupëtapis puëdepaq atska nunakunam, këkunaqa Jesuspa wakinkaq üshankunam kayan. Imanöllam ciëlota ewaqpaq kaqkuna Jesusta qatiyan mëpa tsëpa ëwaptimpis, tsënöllam kë patsachö quedaqpaq kaqkunapis qatiyan mäkoq mäkoq cumplido sirveqta. Kë patsachö quedaqpaqkaqkunaqa manam penqakuyänantsu ciëlota ëwaqpaq kaqkunata yanapayanqanta (Heb. 3:1). Jesucristupis manam penqakuntsu ciëlopa ëwaqpaq kaqkunata “‘Wauqïcunam, panïcunam cayanqui’ nita” (Heb. 2:11).

14. ¿Imanötaq yanapashwan Jesuspa wawqinkunata y paninkunata?

¹⁴ Jesusmi nerqan, wawqïkunata y panïkunata yanaparqa, noqata yanapëkamaq cuentam rurëkäyanki (lei Mateo 25:40). ¿Imanötaq kë patsachö quedaqpaq kaqkunaqa yanapayanman Jesuspa wawqinkunata y paninkunata? Pëkunataqa yanapayan Diospa gobiernompita nuna mayinkunata yachatsirninmi (Mat. 24:14; Juan 14:12). Watakuna pasanqanmannömi ciëlopa ëwaqpaq kaq cristianokunaqa más wallkaqllana kayan, pero patsachö quedaqpaq kaqkunaqa cada watam más mirayan. Ciëlopa ewaqpaq kaqkunatam yachatsikuyänampaq Jesusqa churarqan, y tsë rurëchömi kë patsachö quedaqpaqkaqkuna yanapayan. Y wakinnäqa llapan tiemponkunawanmi yanapakuyan (Mat. 28:19, 20). Hina yarpänantsikmi tukïnöpa llapan kapamanqantsikwan yanapakïta puëdenqantsiktapis.

15. ¿Imanötaq rikashwan kë mäkoq mäkoq cumplido sirveq espiritual kaq mikïta tiemponchö qomanqantsikta, y markan imanöpis kanampaq decidiyanqankunata?

 ¹⁵ ¿Ima nintsiktaq mäkoq mäkoq cumplido sirveq espiritual kaq mikïta tiemponchö qomanqantsikpaq y reunionkunapaqpis? ¿Kushishqaku chaskikuntsik y llapan nimanqantsiktaku rurar qallëkuntsik? ¿Markan imanöpis kanampaq decidiyanqankunata imanötaq rikëkantsik? Diospa mäkoq mäkoq cumplido sirveqnin nimanqantsikta wiyakurnenqa rikätsikushun Jehoväman markäkonqantsiktam (Sant. 3:17).

16. ¿Imanirtaq llapan cristianokuna wiyakuyanman ciëlopa ëwaqpaq akrashqa cristianokuna niyanqanta?

¹⁶ Jesusmi kënö nerqan: “Parlanqätam üshäcunaqa wiyayan. Pecunatam noqa reqï, y pecunam noqata qatiyäman” (Juan 10:27). Ciëlopa ewaqpaq kaq cristianokunaqa rasumpëpam tsëta rurayan. ¿Y kë Patsachö quedaqpaq kaqkunaqa imatataq rurayänan? Jesustam wiyakuyänan y ciëlota ewaqpaq kaqkunatapis, Jesusqa pëkunatam churashqa markanta rikänampaq. Pero ¿ima ninantaq pëkuna niyanqanta wiyakïqa?

17. ¿Imanötaq wiyakuntsik mäkoq mäkoq cumplido sirveqta?

¹⁷ Mäkoq mäkoq cumplido sirveqqa, kanan tiempontsikchö churashqa yupashqalla huk grupo wawqikunatam, pëkunatam Jehoväpa Testïgonkunata Pushaqkuna nishpa reqintsik, pëkunam rikäyan y dirigiyan hinantin patsachö Jehoväpita yachatsikïkäyanqanta. Jehoväpa Testïgonkunata Pushaqkunaqa alli yachaq y musyaq ancianokunam kayan. Pëkunapaqmi Biblia nimantsik: “Diospa palabranta yachatsir pushayäshoqniquicunata ama qonqayëtsu” nishpa (Heb. 13:7). Casi siete millonnam hinantin Patsachö Jehoväpita yachatsikoqkuna kayan, y cien milpitapis masmi congregacionkuna kan, tsëmi Jehoväpa Testïgonkunata Pushaqkunapaqa atska rurëninkuna kan (1 Cor. 15:58). Tsëmi mäkoq mäkoq cumplido sirveqta wiyakurnenqa yanapëkantsik Jehoväpa Testïgonkunapa Pushaqninkunata.

Mäkoq mäkoq cumplido sirveqta wiyakïqa atska bendicionkunatam apamun

18, 19. a) ¿Ima bendicionkunatataq chaskiyanqa mäkoq mäkoq cumplido sirveqta wiyakoqkunaqa? b) ¿Imata ruranapaqtaq listo këkashwan?

¹⁸ Jesus churanqampita patsëmi mäkoq mäkoq cumplido sirveqqa, atskaq nunakunata yanapëkan Jehoväpa markanman yëkuyänampaq y “alli kaqllatana rurayänampaq” (Dan. 12:3). Y Jehoväpa juicio hunaqnin chämuptenqa wakinqa kawëkarmi pasanqa. ¡Alläpa kushikïpaqmi Jehoväpa rikënimpaq alli ruraq nuna këqa!

¹⁹ ‘Mushoq santu Jerusalen marcaqa’ pachak chusku chunka chusku waranqa (144.000) akrashqakunam kayan, pëkunapaqmi apóstol Juan kënö qellqarqan: “Riquecorqäqa mushoq santu Jerusalen marcatam, quiquin Diospa nopanpita uräquecamoqta. Tse marcam allapa cuyellapaq carqan. Imeca casacunanpaq shumaq bistishqa shipash nobiunta shuyarëcaqno”. Shamoq tiempochö kë cumplikäriptin, ¿ima bendicionkunataraq chaskiyanqa mäkoq mäkoq cumplido sirveqta wiyakoqkunaqa? Bibliachömi kënö nin: “Pellam [Jehovällam] Diosnincunapis canqa. Cananqa mananam waqayanqanatsu ni llaquiyanqanatsu, mananam imancunapis nananqanatsu, ni wanuyanqanatsu. Porqui tse sufrimientucunaqa ushacärishqanam” (Apo. 21:2-4). Tsënö këkaptenqa, imëpis wiyakïkäshun Cristuta y ciëlopa ëwaqpaq kaqkunatapis, wiyakïqa alläpam precisan.

¿Imatataq yachakorqonki?

• ¿Imanötaq musyantsik Jehová mäkoq mäkoq cumplido sirveqman markäkonqanta o yärakonqanta?

• ¿Imanötaq musyantsik Jesucristu mäkoq mäkoq cumplido sirveqman markäkonqanta?

• ¿Imanirtaq markäkushwan mäkoq mäkoq cumplido sirveqman?

• ¿Imanötaq rikätsikuntsik mäkoq mäkoq cumplido sirveqman markäkonqantsikta?

[Yachakunapaq kaqpa tapukïninkuna]

[26 kaq päginachö dibüju]

¿Musyankiku pikunatataq Jehová akrashqa wambrampa novian kayänampaq?

[27 kaq päginachö fötukuna]

Jesucristuqa “imecancunamanpis confiacur[mi] mayuralnin cananpaq” churashqa mäkoq mäkoq cumplido sirveqninta

[28 kaq päginachö dibüju]

Diospa Gobiernompita yachatsikurninmi yanapantsik ciëlopa ewaqpaq kaq akrashqakunata