“Paykunaqa Carnerotam qatinku”
“Paykunaqa Carnerotam qatinku”
“Paykunaqa Carnerotam qatinku maymanña riptinpas.” (APO. 14:4.)
1. ¿Imaynatam Jesuspa cheqap qatiqninkunaqa qawachirqaku hinalla qatiy munasqankuta?
YAQA iskay wata partenñam pasarurqa Jesus bautizakuspan Dios serviyta qallarisqanmanta. ‘Capernaum llaqtapi huñunakunanku wasipi’ yachachisqanta uyarispankum, ‘Jesuswan puriqkuna achka karunchakururqaku hinaspam paywanqa manaña purirqakuchu’. Ichaqa Jesusmi 12 apostolninkunata kaynata tapurqa: “¿Qamkunapas pasakuytachu munankichik?”, nispa. Hinaptinmi Pedro kaynata nirqa: “Señor ¿pimantaq riymanku? Qampa rimasqaykiqa wiñay kawsay qokuqmi. Ñoqaykuqa ñam creenikuña hinaspam yachaniku Diosmanta Hamuqqa mana huchayoq kasqaykita”, nispa (Juan 6:48, 59, 60, 66-69). Jesuspa cheqap qatiqninkunaqa manam saqerqakuchu. Tiempopa risqanman hina, chuya espirituta chaskisqanku qepatapas hinallam qatirqaku (Hech. 16:7-10).
2. a) ¿Pikunataq sutichasqa kanku ‘allin yuyayniyoq confianza sirvientewan’ otaq ‘allin yuyayniyoq confianza mayordomowan’? b) ¿Imaynataq kanku hanaq pachaman riy suyaqkunaqa?
2 ¿Imatam nichwan kunan tiempopi hanaq pachaman rinankupaq suyakuyniyoq kaqkunamanta? Atiyninwan ‘kutimunanmanta hinaspa kay pacha puchukananmanta’ Jesus rimaspanmi, hanaq pachaman riy suyaqkunata suticharqa “allin yuyayniyoq confianza sirviente” hinaspa “allin yuyayniyoq confianza mayordomo” nispa (Mat. 24:3, 45; Luc. 12:42). Paykunam allintapuni qawachinku Jesucristota otaq ‘Carnerota maymanña riptinpas qatisqankuta’ (leey Apocalipsis 14:4, 5). Paykunaqa manam qanrachakunkuchu ‘Hatun Babiloniapa’ otaq pantay religionkunapa yachachisqankuwanqa nitaq rurasqankuwanpas (Apo. 17:5). Diosmanta rimaspankuqa ‘manam llullakunkuchu’, hinaspa kay pachapi ruraykunamantapas “mana huchayoqmi” kanku (Juan 15:19). Hamuq tiempopiñataqmi kay Pachapi qepaq ungidokunaqa hanaq pachaman rinqaku Carnerowan otaq Jesucristowan kuska kanankupaq (Juan 13:36).
3. ¿Imanasqataq confiachwan allin yuyayniyoq confianza sirvientepi?
3 Jesusmi allin yuyayniyoq confianza sirvienteta churarqa “sirvientemasinkunata” otaq hanaq pachaman riy suyaqkunata sapakamaman “imam horapi mikuchinanpaq”. Chaymi, “sirvientemasinkunata” nanachikunanpaq nombraruspanpas ‘tukuy kapuqninkunapi’ nanachikunanpaq churarun (Mat. 24:45-47). Chay tukuy kapuqninkunapim tarikun ‘achkallaña runakuna’ otaq kay Pachapi kawsakuy suyaqkuna (Apo. 7:9; Juan 10:16). Hinaptinqa, ¿manachu hanaq pachaman riqkunapas sapakama hinaspa kay Pachapi kawsay suyaqkunapas confiachwan Jesuspa churasqan sirvientepi? Allin yuyayniyoq confianza sirvientepi confianapaqqa achka razonkunam kachkan, iskaymantayá rimasun: Jehová Diosqa confianmi paykunapi hinaspa Jesucristopas confiantaqmi paykunapiqa. Qawasunchik allin yuyayniyoq confianza sirvientepi Jehová Diospas hinaspa Jesucristopas imanasqa confiasqankumanta.
Jehová Diosqa confianmi sirvientepiqa
4. ¿Imanasqataq confiananchik allin yuyayniyoq confianza sirvientepa yachachiwasqanchikpi?
4 ¿Pitaq yanapan allin yuyayniyoq confianza sirvienteta tiempollanpi allin yachachikuykunata qowananchikpaq? Jehová Diosmi nin: “Ñoqam entiendechisqayki qamtaqariki. Ñoqam yachachillasqayki kawsakuytaqa. Ñoqam qawariykullaspay consejasqayki”, nispa (Sal. 32:8). Bibliapa nisqanman hinaqa Jehová Diosmi paykunataqa yanapan. Chaymi confiananchik Bibliapa nisqanman hina chaynataq allinta yachachiwaspanchik pusawasqanchikpi.
5. Espiritunwan Diospa yanapasqanqa, ¿imaynatam sutillata qawakun sirvientepi?
5 Chaymantapas Jehová Diosqa chuya espirituntam qon confianza sirvientemanqa. Chuya espirituta mana rikuptinchikpas, sutillam qawakun paykunata imayna yanapasqanpi. Piensasun, hanaq pachaman riy suyaqkunapa Jehová Diosmanta, Jesucristomanta chaynataq Diospa Gobiernonmanta willasqankupi. Jehová Diospa serviqninkunaqa Diospa Gobiernonmantam willakuchkanku 230 masnin nacionkunapi hinaspa llaqtakunapipas. ¿Manachu enteron Pachapi kayna predicakusqan qawachiwanchik Jehová Diospa chuya espiritun allin yuyayniyoq sirviente yanapasqanta? (Leey Hechos 1:8.) Jehová Diosta serviqkunaqa allpantinpim tarikunku, paykunata tiempollanpi yachachinanpaqmi sirvienteqa imakunatapas allinta tanteananku. Chaymi tanteaspankupas hinaspa tanteasqankuman hina ruraspankupas kuyakuyninkuta, llampu sonqo kasqankuta chaynataq chuya espiritupa wakin rurunkunatapas qawachinku (Gal. 5:22, 23).
6, 7. ¿Imataq qawachin confianza sirvientepi Jehová Dios llumpay confiasqanta?
6 Allin yuyayniyoq confianza sirvientepi Jehová Diospa confiasqanta yachanapaqqa, piensasun paykunaman prometesqanpi. Apostol Pablom kaynata qellqarqa: “Huk qemchiyllatam tikrasqa kasunchik qepa kaq cornetillata tocaykuptin. Hinaptinmi wañuqkuna kawsarimunqa manaña wañunankupaq, ñoqanchikpas tikrasqam kasunchik. Kay tukuruqlla cuerponchikmi mosoq pachawan pachakuchkaq hina tikrakunqa mana tukuqman [otaq mana ismuqman], wañuqlla cuerponchikñataqmi tikrakunqa wiñaypaq kaqman”, nispa (1 Cor. 15:52, 53). Diosta tukuy sonqonkumanta servispanku hinaspa tukuruqlla otaq ismuruqlla cuerpopi wañuspankum, hanaq pachaman riy suyaqkunaqa kawsarichisqa kanku mana rikuy atina cuerpoyoqña. Wiñaypaqmi kawsanqaku, mana wañuchiy atinam kanqaku. Tukuruqlla cuerponkupas mana tukuqmanmi tikrasqa kanqa, yaqachusmi paykunaqa kikillanmantaña kawsanqaku. Apocalipsis 4:4 versiculopim qawachiwanchik umankupi qorimanta coronayoqkama kamachiqkunapa tiyananpi tiyachkaqta, kaywanmi yachanchik kamachiq kanankumanta. Ichaqa manam chaykunallachu qawachin paykunapi Dios confiasqantaqa.
7 Apocalipsis 19:7, 8 nin: ‘Carneropa [otaq Jesucristopa] casarakuyninmi chayaramun chaynataq novianpas listollañam kachkan. Noviaqa yuraq-yuraq linowan pachasqam kachkan. Yuraq-yuraq linoqa Diosllapaqña kawsaqkunapa sumaq kawsakuyninmi kachkan’, nispa. Jehová Diosmi akllarun hanaq pachaman riy suyaqkunata Churinwan casarakunankupaq. Qawasqanchikman hinaqa Diosmi paykunapa tukuruqlla cuerponkuta tikran mana ismuqman, wañuqlla cuerponkutañataq wiñaypaq kaqman chaynataq favorecen reykuna hinaspa Carneropa novian kanankupaqpas. Hanaq pachaman riqkunata Dios kaynata favorecesqanmi qawachin paykunapi confiasqanta, “paykunaqa Carnerotam qatinku maymanña riptinpas”.
Jesusqa confianmi sirvientepiqa
8. ¿Imaynatam yachanchik hanaq pachaman riqkunapi Jesuspa confiasqanta?
8 ¿Imakunataq qawachiwanchik hanaq pachaman riqkunapi Jesucristo mana iskayrayaspa confiasqanta? Qawasunchikyá. Wañukunanpaq huk tutallaña kachkaptinmi kasukuq 11 apostolninkunata kaynata nirqa: “Sasachakuypi kaptiypas qamkunaqa ñoqawanmi karqankichik”, nispa. Hinaspam kaynata prometerqa: “Munaychakunaykichikpaqmi derechota qoykichik imaynam ñoqamanpas Taytay qowasqanman hina. Munaychakuptiymi qamkunapas ñoqawan mikunkichik hinaspa tomankichik, juezkuna hina tiyaykuspam Israelpa chunka iskayniyoq ayllunkunata juzgankichik”, nispa (Luc. 22:28-30). Chunka hukniyoq apostolninkunawan contratota Jesus ruraspanqa 144.000 hanaq pachaman riqkunawanmi rurarqa (Luc. 12:32; Apo. 5:9, 10; 14:1). Piensarisun kaypi, ¿yaqachum Jesucristo paykunapi mana confiaspanqa ninman karqa paykunawan kuska kamachimunankupaq?
9. ¿Imakunataq kanman Jesucristopa ‘kapuqninkunaqa’?
9 Chaymantapas, Jesucristom churarun allin yuyayniyoq confianza sirvienteta kay Allpapi kaq tukuy ‘kapuqninkunapiña nanachikunanpaq’ (Mat. 24:47). Chay kapuqninkunaqa kaykunam: Diospa munayninta enteron Allpapi rurasqanchikta qawanankupaq oficinakuna, sapa nacionpi Jehová Diospa testigonkunapa oficinan, Asambleakuna rurananchik wasikuna, Huñunakunanchik Salonkuna hinaspa predicanapaq chaynataq runakunata yachachinapaq kamachikuy chaskisqanchikpas. Ancha valorniyoq kapuqninta, ¿pitaq saqeykunman mana confiasqanmanqa?
10. ¿Imapiwantaq qawachin hanaq pachaman riqkunata Jesucristo yanapasqanta?
10 Manaraq hanaq pachaman kutichkaspanmi, Jesusqa kawsariramuspan kasukuq qatiqninkunata kaynata nirqa: “Sapa punchawmi ñoqaqa qamkunawan kasaq kay pacha puchukanankama”, nispa (Mat. 28:20). ¿Cumplirqachu Jesusqa prometesqanta? Arí cumplirqam; kunan tiemponchikpim pasaq 15 watallapi Jehová Diospa llaqtanpi congregacionkuna yapakurun: 70 waranqamanta 100 waranqa masnin congregacionkunaman. Chaymantapas, ¿haykataq chay 15 watallapi bautizakururqaku? Yaqa 4 millon 500 waranqa runakunam, otaq sapa punchawmi pusaq pachak masnin bautizakurqaku. Kayna admirakuypaq yapakusqanmi allinta qawachin, huñunakuykunapi hinaspa runakunata yachachiypi hanaq pachaman riqkunata Jesucristo yanapasqanta.
Sirvienteqa confianapaqmi hinaspa allin yuyayniyoqmi
11, 12. ¿Imaynatam sirvienteqa qawachin confianapaq hinaspa allin yuyayniyoq kasqanta?
11 Allin yuyayniyoq confianza sirvientepi Jehová Dioswan Jesucristopas confiaptinkuqa, ¿manachu ñoqanchikpas confiananchik? Ima rurananwan cumplispanmi sirvienteqa confianapaq kasqanta qawachirqa. Ejemplopaq, La Atalaya nisqa revistatam 130 wataña ruramuchkanku. Confianapaq kasqantaqa qawachintaqmi huñunakuykunapi hinaspa asambleakunapi yachasqanchikkunapas, kaykunam iñiyninchikta kallpanchan.
12 Chaymantapas, sirvienteqa confianapaq kaspanpas allin yuyayniyoqmi. Manam imatapas rurankuchu Jehová Diosta llalliriq hinaqa, nitaq qepankuchu Diospa yanapaynin imapipas sutilla qawakuptinqa. Huk ejemplota qawasun. Pantasqa religionkunapi kamachiqkunam allinpaq hapinku runakuna mana allinta ruraspa kawsasqankuta hinaspa kikillankupaq munaspa ima rurasqankutapas. Allin yuyayniyoq confianza sirvientem ichaqa yachaywan hinaspa tiempollanpi willawanchik Satanaspa toqllankunamanta, kaytaqa ruranku Jehová Dios hinaspa Jesucristo yanapaptinmi. Chaymi paykunapiqa mana iskayrayaspa confiananchik. Hinaptinqa, ¿imaynatam confiasqanchikta qawachisun?
Hanaq pachaman riy suyaqkunata yanapasun
13. Zacariaspa willakusqanman hina, ¿imaynatam qawachichwan allin yuyayniyoq confianza sirvientepi confiasqanchikta?
13 Zacarias libropim willawanchik ‘Juda casta runaman’ ‘chunka runakuna’ asuykuspanku, “qamkunawan riytam munaniku” nisqankumanta (leey Zacarias 8:23). Qawasqanchikman hinaqa, ‘Juda casta runaman’ asuykuspanmi ninku “qamkunawan” nispa, chayna nisqankum qawachin achka runakunamanta rimasqanta. Kunan tiempopiqa ‘Juda casta runaqa’ tupanmi hanaq pachaman riqkunamanta kay Pachapi qepaqkunawan, paykunapas kanku ‘Diospa cheqap akllasqankunam’ (Gal. 6:16). ‘Huklaw nacionniyoq hinaspa sapaq idiomakuna rimaq chunka runakunañataqmi’ tupan kay Pachapi kawsakuyta suyaqkunawan. Imaynam hanaq pachaman riy suyaqkunapas Jesusta qatinku maymanña riptinpas, chaynataqmi kay Pachapi kawsakuy suyaqkunapas allin yuyayniyoq confianza sirvienteta qatinku. Kay Pachapi kawsakuyta suyaqkunaqa manam haykapipas penqakunankuchu ‘hanaq pachaman’ riqkunata yanapasqankumantaqa (Heb. 3:1). ‘Jesuspas manam penqakunchu sapaqchasqankunata wawqenwan sutichaytaqa’ (Heb. 2:11).
14. ¿Imaynatam Cristopa wawqenkunata tukuy sonqonchikmanta yanapachwan?
14 Jesusmi nirqa wawqenkunata pipas yanapaqqa paytapas yanapachkanman hina kasqanta (leey Mateo 25:40). Hinaptinqa, ¿imaynatam kay Pachapi kawsakuy suyaqkunaqa yanapanmanku Cristopa wawqenkunata? Puntataqa, Diospa Munaychakusqanmanta willakuspankum (Mat. 24:14; Juan 14:12). Hanaq pachaman riy suyaqkunaqa tiempopa risqanman hinam pisillaña kachkanku, kay Pachapi kawsakuy suyaqkunam ichaqa yapakuchkanku. Paykunam Diospa Gobiernonmanta predicaspanku hanaq pachaman riy suyaqkunata yanapachkanku kamachikuy chaskisqankuta cumplinankupaq, chayqa runakunaman Diosmanta yachachiymi. Atispankuqa yanapankum precursor kaspanku (Mat. 28:19, 20). Manataqmi qonqananchikchu qollqenchikta qospanchikpas predicacion yanapaytaqa.
15. ¿Imaynatam qawananchik sirvientepa yachachiwasqanchikta hinaspa Diospa llaqtanpi imapas rurakunanpaq tanteasqankuta?
15 ¿Imaynatam qawananchik huñunakuykunapi hinaspa qellqanchikkunawan allin yuyayniyoq confianza sirviente tiempollanpi yachachiwasqanchikta? Agradecekunanchikmi hinaspa consejokuna qowasqanchiktapas chayllam kasukunanchik. Chaymantapas, ¿imaynatam qawananchik Jehová Diospa llaqtanpi imapas rurakunanpaq tanteasqankuta? Allin yuyayniyoq confianza sirvientepa niwasqanchikta kasukuspam qawachinchik Jehová Diospi chaynataq imayna rurasqanpi confiasqanchikta (Sant. 3:17).
16. ¿Imanasqataq Diosta serviqkunaqa Jesucristopa wawqenkunata kasukunanku?
16 Jesusmi nirqa: “Ovejaykunaqa vozniytam uyarin, ñoqapas paykunataqa reqsinim, chaymi paykunaqa qatiwanku”, nispa (Juan 10:27). Chaynam kanku hanaq pachaman riy suyaqkunaqa. Hinaptinqa, ¿imatam rurananku kay Pachapi kawsakuy suyaqkunaqa? Jesusta kasukuspankupas, kasukunankum Jesuspa wawqenkunatapas, paykunam churasqa kachkanku Diospa llaqtanpi kaqkunata iñiyninkupi yanapanankupaq. Ichaqa, ¿imaynatam paykunata kasukuchwan?
17. ¿Imaynatam sirvienteta kasukuchwan?
17 Kunan tiempopi allin yuyayniyoq confianza sirvientepa rantinpim Jehová Diospa Llaqtanpi Punta Apaqkuna kachkanku, paykunam enteron Pachapi predicacionmanta cuentallikunku. Jehová Diospa Llaqtanpi Punta Apaqkunaqa kanku hanaq pachaman riyta suyaq ancha experienciayoq ancianokunam. Paykunamantam astawan nichwan ‘pusawaqninchik’ kasqankuta (Heb. 13:7). Enteron Allpapim kachkan 7 millon masnin predicaqkuna 100 waranqa masnin congregacionkunapi, paykunatam nanachikunku hanaq pachaman riy suyaq kay ancianokunaqa chaymi achka ‘llamkayniyoq [kanku] Señorpa rurayninpi’ (1 Cor. 15:58).Chaymi paykunata kasukuspanchikqa sirvienteta kasukuchkanchik.
Sirvienteta kasukusqanchikmanta bendicionkuna
18, 19. a) ¿Ima bendicionkunatam chaskinku allin yuyayniyoq sirvienteta kasukuqkunaqa? b) ¿Pikunata kasukunapaqmi kallpanchakunanchik?
18 Nombrasqa kasqan tiempomantam allin yuyayniyoq confianza sirvienteqa ‘achkallaña runakunata allin ruraymanña pusamuchkan’ (Dan. 12:3). Chay runakunamanta wakinmi kachkan, kay Pachapi mana allin ruraqkuna puchukachisqa kaptin salvasqa kanankupaq suyaqkuna. ¡Mayna allinmi Diospa favorecesqan kayqa!
19 Hamuq tiempopim ‘Mosoq Jerusalenqa’ otaq 144.000 hanaq pachaman riy suyaqkunaqa ‘Diospa qayllanmanta uraykamunqaku, [paykunaqa] allichasqam kachkan novionpaq sumaqllaña adornasqa novia hina’. Chay tiempo chayaramuptin, ¿ima bendicionkunatam chaskinqaku allin yuyayniyoq sirvienteta kasukuqkunaqa? Bibliam kaynata nin: ‘Diosñataqmi kanqa paykunawan [. . .], pichanqam paykunapa weqenta, manañam kanqachu wañuypas [. . .], waqaypas nitaq nanaypas. Ñawpaq kaqkunaqa pasarunñam’ nispa (Apo. 21:2-4). Chaynaqa, hinallayá kasukusunchik Jesucristota hinaspa wawqenkunatapas, paykunaqa confianapaqmi kanku.
¿Imatam yacharunki?
• ¿Imakunataq qawachin allin yuyayniyoq confianza sirvientepi Jehová Dios confiasqanta?
• ¿Imaynatam yachanchik allin yuyayniyoq sirvientepi Jesucristo confiasqanta?
• ¿Imanasqam confiananchik allin yuyayniyoq confianza mayordomopi?
• ¿Imaynatam qawachinchik allin yuyayniyoq sirvientepi confiasqanchikta?
[Kay yachachikuypa tapukuyninkuna]
[25 kaq paginapi dibujo]
¿Yachankichu pikunatam Jehová Dios akllarun Churinpa novian kananpaq?
[26 kaq paginapi fotokuna]
Allin yuyayniyoq sirvientetam Jesusqa churarun ‘kapuqninkunamanta’ nanachikunanpaq
[27 kaq paginapi dibujo]
Diospa Gobiernonmanta predicaspam hanaq pachaman riq cristianokunata yanapanchik