‘Corderowan kuskan purinku’

‘Paykunan Corderowan kuska purinku maytaña riqtinpas.’ (APO. 14:4.)

1. ¿Imaynatan Jesuspa cheqaq qatikuqninkuna rikuchiranku payta qatikushanallankupaq decidisqa kasqankuta?

ÑAN iskay wata kuskanña pasarun Jesús predicayta qallarisqanmantapacha. “Capernaúm llaqtapi” Jesuspa yachachisqanta uyarispankun askha qatikuqninkuna phiñakuranku chaymi “qhepaman kutipurqanku, manañataq paywan purirqankuñachu”. Chayraykun “Jesusqa chunka iskayniyoq yachachisqankunata nirqan: –¿Qankunapas kutipuytachu munankichis? nispa. Chaymi Simón Pedroqa nirqan: –Señor, ¿pimantaq risaqku? Qanpa rimasqaykikunaqa wiñay kawsay simikunan. Chaymi ñoqaykuqa iñiyku hinaspan yachayku qanqa Diospa Ch’uya Churin kasqaykita”, nispa (Juan 6:48, 59, 60, 66-69). Jesuspa cheqaq qatikuqninkunaqa manan saqerpariyta munarankuchu. Qhepaman santo espirituwan hawisqa kaspankupas qatikushallarankun (Hech. 16:7-10).

2. a) ¿Pin “allin yuyayniyoq hunt’aq kamachi”, ‘allin yuyayniyoq hunt’aq mayordomopas’? b) ¿Imaraykun chay kamachi allin qhawarisqa?

² ¿Imanisunmantaq kay tiempopi hanaq pachapaq akllasqa cristianokunamantari? Runakunaq mana rikusqallan ’kutimuñanpaqña kashaqtin kay tiempopas p’uchukapunanpaqña kashaqtin’ imakuna kananmanta willaspan Jesusqa kay Hallp’api llapa hawisqa qatikuqninkunata suticharan: “Allin yuyayniyoq hunt’aq kamachi”, ‘allin yuyayniyoq hunt’aq mayordomo’, nispa (Mat. 24:3, 45; Luc. 12:42). Kay cristianokunaqa llapallankun ‘Corderowan kuska purinku maytaña riqtinpas ’, chayraykun allin qhawarisqa kanku (leeychis Apocalipsis 14:4, 5). Paykunaqa manan ‘Hatun Babiloniaq’ otaq pachantinpi pantasqa religionkunaq yachachikuyninkunawan ruwayninkunawanpas qhellichakurankuchu (Apo. 17:5). Mana ‘llullakuspan’ cheqaqta Bibliamanta yachachinku, Satanaspa kamachisqan pachawanpas mana chhaqrukusqankuraykun ‘mana ima huchayoq kanku’ (Juan 15:19). Hamuq tiempopitaq kay pachapiraq kashaq hawisqa cristianokunaqa hanaq pachakama Cristota qatikunqaku (Juan 13:36).

3. ¿Imaraykun allin yuyayniyoq hunt’aq kamachipi confiananchis?

³ Jesusqa ‘allin yuyayniyoq hunt’aq kamachitan [...] churaran tiempollanpi kamachinkunaman mikhunata qonanpaq’, chay kamachikunaqa sapanka hawisqa cristianokunan kanku. Chaymantapas ‘tukuy kaqninkunata qhawananpaqwanmi’ churaran (Mat. 24:45-47). Chay kaqninkuna ukhupin tarikun ‘wak ovejamanta’ kaq ancha askha runakuna (Juan 10:16; Apo. 7:9 ). Chayrayku, ¿manachu sapanka hawisqa cristianokuna, ‘wak ovejamanta’ kaqkunapas confiananku Jesuspa churasqan kamachipi? Paykunapi confiananchispaqqa askha razonkunan kashan, astawanqa Jehová Dios kay kamachipi confiasqanrayku, Jesuspas tukuy confianzanta paykunapi churasqanrayku. Qhawarisunchis imaynata Jehová Diospas Jesuspas rikuchinku allin yuyayniyoq hunt’aq kamachipi confiasqankuta.

Jehová Diosqa confianmi hunt’aq kamachipi

4. ¿Imaraykun allin yuyayniyoq hunt’aq kamachiq yachachisqanpi confiasunman?

⁴ ¿Imaraykun allin yuyayniyoq hunt’aq kamachi tiempollanpi allin espiritual mikhunata qowanchis? Jehová Diosmi nin: “Qantan qhawashayki. Ñoqan yachachisqayki, ñoqan yuyaychasqayki, ñoqan maynin purinayki ñanta yachachisqayki”, nispa (Sal. 32:8). Rikusqanchis hina Diosmi hunt’aq kamachitaqa pusarishan.  Chayraykun anchata confiasunman Bibliaq nisqanta entiendechiwasqanchispi yachachisqanman hina pusariwasqanchispipas.

5. ¿Imaraykun nisunman Jehová Diosmi kamachinta santo espiritunwan yanapashan nispa?

⁵ Chaymantapas Jehová Diosqa santo espiritunwanmi hunt’aq kamachinta yanapan. Chay espiritutaqa manan rikuyta atisunmanchu, ichaqa rikusunmanmi runakunata imayna yanapasqanta. Kay kamachiqa allintan hunt’ashan kamachikuy chaskisqanta Jehová Diosmanta, Churinmanta, Reinonmantawan willakuykunata mast’arispa. Jehová Diospa testigonkunaqa iskay pachak kinsa chunka soqtayoq nacionkunapin, islakunapi ima predicashanku. Arí, pachantinpin predicakushan, chaypin sut’ita rikunchis Jehová Dios kamachinta santo espiritunwan yanapasqanta (leeychis Hechos 1:8). Kay kamachiqa ancha importante ruwaykunatan decidinan pachantinpi Diosta serviqkunaman tiempollanpi espiritual mikhunata qonanpaq. Paykunaqa imatapas decidispa otaq ruwaspapas santo espirituq rurun munakuyta, llamp’u sonqo-kayta huk sumaq rurukunatawanmi rikuchinku (Gál. 5:22, 23).

6, 7. ¿Maykaman Jehová Dios allin yuyayniyoq hunt’aq kamachipi confian?

⁶ Maykamachus Jehová Dios hunt’aq kamachipi confiasqanta entiendenapaq qhawarisun imatas chay cristianokunaman prometeran chayta. Apóstol Pablon qelqaran: “Trompetaqa waqanqan, hinaqtinmi wañusqakunaqa mana ismuqña kausarichinpusqa kanqaku, ñoqanchistaq huj niraqman tukuchisqa kasunchis. Kay ismuqqa mana ismuqwanmi p’achallisqapuni kanan, kay wañuqpas mana wañuqwantaqmi p’achallisqapuni kanan”, nispa (1 Cor. 15:52, 53, MR). Kay cristianokunaqa Diosta hunt’aq sonqowan servispa ismupuq aycha cuerponkupi wañupuspan espíritu cuerpopi kawsarichisqa kanku. Paykunaqa manan wiñay kawsayllatachu chaskinku aswanpas ‘mana wañuq’ mana hayk’aq tukukuq kawsaytan. Chaymantapas ‘mana ismuq’ mana gastakuq cuerpotan chaskinku, yaqachus hina paykunaqa manaña necesitankuchu Diospa fuerzanta otaq kallpanta kawsanankupaq. Apocalipsis 4:4 textoq nisqanman hina, kay cristianokunan kamachikuy tiyanakunapi tiyashanku qori coronayoqkama, chaymi rikuchin qhepa tiempoman rey kanankuta. Ichaqa manan chayllachu.

⁷ Apocalipsis 19:7, 8 nin: “Corderoq casarakuyninmi chayamunña, novianpas wakichikamunñan, noviamanqa ch’uya k’ancharishaq sumaq lino p’achan qosqa karqan p’achakunanpaq [...]. Chay sumaq linoqa Diospaq ch’uya kawsaqkunaq chanin ruwasqankunan”, nispa. Jehová Diosqa hawisqa cristianokunatan akllaran  Churinpa novian kananpaq. Rikusqanchis hina paykunataqa Diosmi mana hayk’aq wañuq, mana ismuq cuerpopi kawsarichinqa, chaymantapas paykunan rey kanqaku Corderoq novian ima, chayqa ¡Diospa ancha hatun regalonmi paykunapaq! Chaykunan sut’ita rikuchin hawisqa cristianokunapi Dios anchata confiasqanta, ‘paykunaqa Corderowan kuskan purinku maytaña riqtinpas’.

Jesusqa confianmi hunt’aq kamachipi

8. ¿Imaynapin yachanchis Jesús hawisqa qatikuqninkunapi confiasqanta?

⁸ ¿Imaynapin yachasunman hawisqa qatikuqninkunapi Jesús anchata confiasqanta? Chaymanta qhawarisunchis. Wañuchinankupaq hap’inanku tutapin chunka hukniyoq apostolninkunata Jesús niran: “Qankunaqa wateqasqa kasqaykunapin ñoqallawanpuni kasharqankichis”, nispa. Chaymantataq paykunaman prometeran: ‘Ñoqan kamachikuqta churaykichis, imaynan Yayaypas ñoqata churawarqan hinata. Qhapaqsuyuypin, mesaypi mikhunaykichispaq ukyanaykichispaq tiyaykunkichis, hinaspan Israelpa chunka iskayniyoq ayllunta juzgaspa kamachinaykichispaq tiyaykunkichis’, nispa (Luc. 22:28-30). Arí, Jesusqa chunka hukniyoq apostolninkunawanmi rimanakuran paywan kuska kamachikuq kanankupaq, ichaqa manan paykunallachu kamachimunqaku llapankupiqa 144.000 hawisqa cristianokunan kanku (Luc. 12:32; Apo. 5:9, 10; 14:1). Kaypi yuyaykusun: sichus Jesús mana kay qatikuqninkunapi confianmanchu chayqa, ¿akllanmanchu karan paywan kuska kamachikuq kanankupaq?

9. ¿Imakunan kashan Jesuspa ‘tukuy kaqninkuna’ ukhupi?

⁹ Chaymantapas Jesusqa allin yuyayniyoq hunt’aq kamachitan churaran “tukuy kaqninkunata qhawananpaq”, chayqa Reinonmanta willakuykuna mast’arikunanpaq ruwaykunan, tukuy kaqkuna ima (Mat. 24:47). Kay pachapi Jesuspa kaqninkunaqa kaykunan: Estados Unidospi Jehová Diospa testigonkunaq principal oficinan, huk suyukunapi Betel wasikuna, hatun huñunakuyta ruwanapaq wasikuna, pachantinpi Testigokunaq huñunakunanku wasikuna, Reinomanta predicay, runakunata Jesusta qatikunankupaq yachachiypas. ¿Pipas ancha valorniyoq kaqninkunata saqenmanchu mana confiasqan runapi?

10. ¿Imapin rikukullantaq Jesucristo hawisqa qatikuqninkuna yanapasqanta?

¹⁰ Jesusqa hanaq pachaman ripunanña kashaqtinmi hunt’aq qatikuqninkunaman rikhurispa niran: “Ñoqaqa qankunawanmi sapa p’unchay  kashani kay pachaq p’uchukanankama”, nispa (Mat. 28:20). ¿Hunt’aranchu Jesús chay nisqanta? Hunt’aranmi, 1993 watamantapachan pachantinpi iñiq t’aqakuna otaq congregacionkuna yapakuran qanchis chunka waranqamanta pachak waranqa masmanraq. ¿Jesuspa qatikuqninkunari hayk’amantaq yapakuranku? Chay watakunallapitaqmi yaqa 4.500.000 runakuna bautizakuranku, sapa p’unchaymi pusaq pachak masraq bautizakuranku. Chhaynaniraq yapakusqanmi sut’ita rikuchin Jesucristo hawisqa qatikuqninkunawan huñunakuykunapi kashasqanta, predicacionpipas yanapashasqanta.

Kamachiqa hunt’aq allin yuyayniyoqmi

11, 12. ¿Imaynatan kamachi rikuchiran hunt’aq, allin yuyayniyoq kasqanta?

¹¹ Jehová Diospas Jesucristopas anchatataq hunt’aq kamachipi confianku chayqa, ¿manachu ñoqanchispas paykuna hina confiananchis? Kay kamachiqa allintan hunt’aran imakunachus ruwananta. Chaykunamanta hukninmi Qhawaq revista, kay revistataqa pachak kinsa chunka watañan ruwakushan. Huktaq lliw huñunakuyninchiskuna, chaykunan anchata iñiyninchista kallpachan.

¹² Chaymantapas hunt’aq kamachiqa allin yuyayniyoqmi. Manan imatapas willanchu Jehová Dios manaraq sut’inchashaqtinqa ichaqa usqhayllan willan sut’i kashaqtinqa. Yachanapaq, pantasqa religionpi umalliqkunaqa allinpaqmi qhawarinku runakunaq millay ruwasqankuta. Hunt’aq kamachin ichaqa yachaywan tiemponpi Saqraq trampankunamanta cuidakunanchispaq yuyaychawanchis, chaytaqa niwanchis Jehová Diospa, Jesucristoq pusarisqan kasqanraykun. Chayraykun kamachiqa confiananchispaq hinapuni. Ichaqa, ¿imaynatan chayta rikuchisunman?

Hawisqakunawan purisun Corderota qatikusqankurayku

13. Zacariaspa nisqan hina, ¿imaynatan rikuchisunman allin yuyayniyoq hunt’aq kamachipi confiasqanchista?

¹³ Zacarías libroq nisqan hina, ‘chunka runakunan huk judío runata’ ninku: “Ñoqaykun uyariyku qankunawan Dios kashasqanta, chayrayku pusakapuwayku”, nispa (leeychis Zacarías 8:23). Rikusqanchis hina, “judío runata[n]” ninku “qankunawan” nispa, chaymi rikuchin huk t’aqa runakuna kasqankuta. Kay tiemponchispin chay ‘runa’ hanaq pachapaq akllasqa cristianokunata representan, paykunan “Diospa cheqaq Israel llaqtanqa” kanku (Gál. 6:16). ‘Suyukunapi kaq imaymana rimay rimaqkunamanta chunka runakunataq’ wak ovejamanta ancha askha runakuna kanku. Imaynan akllasqa cristianokunapas Jesusta qatikunku maytaña riqtinpas chhaynatan ancha askha runakunapas allin yuyayniyoq hunt’aq kamachiwan kuska purinku. Wak ovejamanta kaq cristianokunaqa manan hayk’aqpas p’enqakunankuchu ‘hanaq pachapaq waqyasqa’ kaqkunawan kuska purisqankumantaqa (Heb. 3:1). Jesuspas manan p’enqakunchu paykunata “wawqeykuna” niyta (Heb. 2:11).

14. ¿Imaynatan Cristoq wayqenkunata yanapasunman?

¹⁴ Jesuspa nisqan hina, wayqenkunata yanapaspaqa paytan yanapashanchis (leeychis Mateo 25:40). ¿Imaynatan wak ovejamanta kaq cristianokuna yanapankuman Cristoq wayqenkunata? Astawanqa Reinomanta predicaspan (Mat. 24:14;  Juan 14:12). Hanaq pachapaq akllasqa cristianokunaqa watakunaq pasasqanman hinan pisiyapushanku, wak ovejamanta kaqkunataq yapakushanku. Chay cristianokunaqa, Reinomanta predicaspankun hawisqa cristianokunata yanapanku runakuna Jesuspa qatikuqninman tukupunankupaq. Atispankuqa tukuy tiemponkuwan predicaspan yanapanku (Mat. 28:19, 20). Kay llank’aypiqa donacionkunata churaspapas yanapakusunmanmi.

15. ¿Imaynatan qhawarinanchis hunt’aq kamachiq qowasqanchis espiritual mikhunata, ima decidisqankutapas?

¹⁵ Allin yuyayniyoq hunt’aq kamachiqa tiempollanpin espiritual mikhunata qowanchis Bibliamanta yachachiq lliw qelqakunawan hinallataq huñunakuykunawanpas. ¿Imaynatan chaykunata qhawarinchis? ¿Agradecekunchischu chaykunamanta, yachasqanchisman hinachu kawsashanchis? ¿Imaynatan Diospa llaqtanpi ima decidisqankutapas chaskinchis? Sichus allin yuyayniyoq hunt’aq kamachiq nisqanta tukuy sonqomanta ruwasun chayqa Jehová Diospi, imayna ruwasqanpipas confiasqanchistan rikuchinchis (Sant. 3:17).

16. ¿Imaraykun Jesuspa wayqenkunata llapa cristianokuna uyarinanku?

¹⁶ Jesusmi niran: “Ovejaykunaqa kunkaytan uyarinku, ñoqapas paykunataqa reqsinin, qhepaytataq purinkupas”, nispa (Juan 10:27). Hawisqa cristianokunaqa chaypi nisqanman hinapunin ruwanku. Chhaynaqa, ¿imatan wak ovejamanta kaqkuna ruwananku? Uyarinankun Jesusta, ichaqa Jesuspa wayqenkunatapas uyarinallankutaqmi, Diosqa paykunatan churan llaqtanta qhawarinankupaq. ¿Imaynatan chay cristianokunata uyarisunman?

17. ¿Imatan ruwashanchis hunt’aq kamachita uyarispa?

¹⁷ Kay tiemponchispi allin yuyayniyoq hunt’aq kamachitaqa Umalliq T’aqan representan, paykunan umallishanku pachantinpi Reinomanta predicación aparikunanpaq. Chay umallikunaqa ancha experienciayoq hawisqa cristianokunan kanku. Paykunamantan nisunman Diospa llaqtantan ‘umallishanku’ nispa (Heb. 13:7). Pachantinpin yaqa qanchis millón predicaqkunaña pachak waranqa t’aqakunapiña kashanchis, chaymi hawisqa cristianokunapaqqa “Señorpa llank’ananpi” askha ruwananku kashan (1 Cor. 15:58). Chayrayku, hunt’aq kamachita uyarispaqa Umalliq T’aqata yanapashanchis.

Hunt’aq kamachita uyariyqa allinninchispaqmi

18, 19. a) ¿Ima bendicionkunatan chaskinqaku hunt’aq kamachita uyariqkuna? b) ¿Imatan ruwashanallanchis?

¹⁸ Allin yuyayniyoq hunt’aq kamachiqa churasqa kasqanmantapachan ‘askha runata chanin kawsayman kutirichishan’ (Dan. 12:3). Chanin kawsaq runakunaqa kay millay pacha tukuchisqa kaqtin wiñay kawsayta kay Hallp’api suyakuqkunan kanku. ¡May allinmi Diospa chaninpaq qhawarisqan kayqa!

¹⁹ Hamuq tiempopiqa ‘mosoq ch’uya Jerusalén llaqta’ 144.000 hawisqa cristianokunan ‘Diospa qayllan hanaq pachamanta uraykamunqaku, casarakuqmasin waynapaq sumaq k’acha p’achasqa sipas hina’. Chay sucedeqtin, ¿ima bendicionkunatan hunt’aq kamachita uyariqkuna chaskinqaku? Biblian nin: “Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñawpaqkaqkunaqa manaña kapusqanrayku”, nispa (Apo. 21:2-4). Chhaynaqa, uyarishallasun Cristota hawisqa wayqenkunatapas, paykunaqa confiananchispaq hinapunin kanku.

¿Imatan yacharanki?

• ¿Imakunan rikuchin Jehová Dios allin yuyayniyoq hunt’aq kamachipi confiasqanta?

• ¿Imaynapin yachanchis Jesucristo hunt’aq kamachipi anchata confiasqanta?

• ¿Imaraykun hunt’aq mayordomo confiananchispaq hinapuni?

• ¿Imaynatan rikuchinchis hunt’aq kamachipi confiasqanchista?

[Tapuykuna]

[25 paginapi dibujo]

¿Pikunatan Jehová Dios akllaran hamuq tiempopi Churinpa novian kanankupaq?

[26 paginapi fotokuna]

Jesusqa allin yuyayniyoq hunt’aq kamachimanmi saqen “tukuy kaqninkunata qhawananpaq”

[27 paginapi foto]

Reinomanta predicaspaqa hanaq pachapaq akllasqa cristianokunatan yanapashanchis