‘Aru Ratou i te Punua-Mamoe’

“Ko te aronga teia i aru i te Punua-mamoe i tona au aerenga ravarai.”​—APO. 14:4.

1. Eaa ra te manako o te au pipi mou a Iesu no runga i te aru anga iaia?

MEI tetai rua e te apa mataiti i roto i tana angaanga orometua, ‘te apii ra Iesu i Kaperenauma.’ No to ratou rikarika i tana tuatua, ‘akaruke maira tetai papaki pipi ana i reira ra e manganui, kare i aru akaou iaia.’ I te ui anga a Iesu ki tana au apotetoro e 12 e me ka inangaro katoa ratou i te aere, kua pau mai a Simona Petero e: “E te Atu, ka aere tika matou kiaai ra? tei ia koe te tuatua o te ora mutu kore ra. Kua akarongo akenei oki matou, e kua kite oki matou e, ko koe te Mesia, te Tamaiti a te Atua ora ra.” (Ioa. 6:48, 59, 60, 66-69) Kare te au pipi mou a Iesu i akamutu ana i te aru iaia. I muri ake i te akatainuia anga i te vaerua tapu, kua kauraro ua atu rai ratou ki te aratakianga a Iesu.​—Anga. 16:7-10.

2. (a) Koai “te tavini akono meitaki e te pakari,” me kore “te akaaere pikikaa kore”? (e) Akapeea ra te tavini i te akanoo anga i tetai rekoti meitaki kia “aru i te Punua-mamoe”?

² Eaa te ka tau kia tuatuaia no runga i te au Kerititiano akatainuia i teia tuatau? I roto i tana totou no runga i “te akairo o [tona] ra parutia e te akaopengaanga o te akatereanga o te au mea nei,” kua tuatua a Iesu no runga i te pupu katoa o tana au pipi akatainuia i te vaerua e ko “te tavini akono meitaki e te pakari,” me kore ko “te akaaere pikikaa kore.” (Mata. 24:3, 45, NW; Luka 12:42) Ei pupu, kua akanoo te pupu tavini i tetai rekoti meitaki tikai kia “aru i te Punua-mamoe i tona au aerenga ravarai.” (E tatau ia Apokalupo 14:4, 5.) Te vai paretenia nei rai tona au mema i te pae vaerua i te kore anga e akaviivii ia ratou uaorai ki te au irinakianga e te au peu o “Babulonia Maata,” te patireia o te akonoanga pikikaa o teianei ao. (Apo. 17:5) Kare roa tetai apiianga pikikaa “i kitea i roto i to ratou vaa,” e “kare oki a ratou apa” mei teianei ao o Satani. (Ioa. 15:19) I te tuatau ki mua, “ka aru” tika te toenga o te aronga akatainuia i te enua nei, i te Punua Mamoe ki te rangi.​—Ioa. 13:36.

3. Eaa ra i puapinga ai no tatou kia irinaki i te pupu tavini?

³ Kua iki a Iesu i te tavini akono meitaki e te pakari ei “akaaere i tona ngutuare,” koia oki, i te au mema tataki tai o te pupu tavini, “ei tua i te kai na ratou i te ora mou ra.” Kua iki katoa aia i te tavini “ei akaaere i te au apinga ravarai nana ra.” (Mata. 24:45-47) Ko teia “au apinga” te kapiti maira i te “aronga maata rava” o te “mamoe ke atu” e tupu ua atura ki te maata. (Apo. 7:9; Ioa. 10:16) Kare ainei i te mea tau no te au mema tataki tai o te aronga akatainuia e te “mamoe ke atu” kia irinaki i te tavini tei ikiia ki rungao ia ratou? E maata te au tumu i tau ei kia irinaki tatou i te pupu tavini. E rua nga tumu puapinga roa atu: (1) Irinaki a Iehova i te pupu tavini. (2) Irinaki katoa a Iesu i te tavini. Ka makitoro marie ana tatou i te akapapuanga e e irinakianga pu tikai to te Atua ko Iehova e to Iesu Karaiti i roto i te tavini akono meitaki e te pakari.

Irinaki a Iehova i te Tavini

4. Eaa ra ka rauka ai ia tatou kia irinaki i te kai pae vaerua e orongaia maira e te tavini akono meitaki e te pakari?

⁴ Ka akamanako ana e eaa i rauka ai i te tavini akono meitaki e te pakari i te oronga mai i te kai pae vaerua meitaki tei anoanoia i te tuatau tau. “E apii atu au ia koe, e akakite atu ei kia koe i taau arataa kia aere ra,” i akakite ei a Iehova. Kua karanga katoa atu aia e “e ako atu au ia koe; ei runga ia koe toku mata vaoo ei.” (Sala. 32:8) Ae, te arataki nei a Iehova i te tavini. No reira ka rauka ia tatou kia irinaki pu tikai i roto i te pakari, te marama e te aratakianga a te Tuatua Tapu, e rauka maira ia tatou mei te tavini.

5. Eaa te akaari maira e te akamana nei te vaerua o te Atua i te pupu tavini?

 ⁵ Te akameitaki katoa ra a Iehova i te pupu tavini ki tona vaerua tapu. Noatu kare e kite mataia ana to Iehova vaerua, te kiteaia ra te tupuanga o te reira ki runga i te aronga ta te reira e angaanga ra. E akamanako ana i tei rauka i te tavini akono meitaki e te pakari i te rave i te oronga anga i te akakiteanga ki te ao katoa no runga i te Atua ko Iehova, tana Tamaiti, e te Patireia. Te akakitekite maroiroi ua nei to Iehova aronga akamori i te karere o te Patireia i roto i te au enua tei tere atu i te 230. Kare ainei te reira i te akapapuanga tika tikai e te akamana ra te vaerua o te Atua i te tavini? (E tatau ia Angaanga 1:8.) I te oronga anga i te kai pae vaerua tei anoanoia i te tuatau tau no te iti tangata o Iehova i te ao katoa nei, ka anoanoia te pupu tavini kia rave i tetai au ikianga puapinga. I te rave anga e te taangaanga anga i te reira, te akaari ra te tavini i te aroa, te maru, e tetai au tu ke mai o te ua o te vaerua.​—Gala. 5:22, 23.

6, 7. Mei teaa ra te maata o to Iehova irinaki i roto i te tavini akono meitaki?

⁶ Kia marama tikai i te maata o to Iehova irinaki i roto i te tavini akono meitaki, e akamanako no runga i tana i taputou ki te au mema o te pupu tavini. “E tangi tikai oki te pu,” i tata ai te apotetoro ko Paulo, “e e akatuia tei mate ma te pe kore, e e akatu keia tatou. E teianei kopapa pe ua, kia riro ei kopapa pe kore e tikaʼi, e teianei kopapa mate ua, kia riro ei kopapa mate kore e tikaʼi.” (1 Kori. 15:52, 53) Ko te au pipi akatainuia a Karaiti, tei tavini akarongo mou i te Atua e tei mate i roto i te kopapa pe ua, ka akatuia mai ratou ki tetai turanga meitaki atu i to te riro ua anga ei au peretana vaerua tei rauka te oraanga mutu kore. Ka orongaia te oraanga mate kore kia ratou​—te oraanga e tuatau ua atu e kare rava e rauka kia takoreia. Tetai katoa, ka rauka ia ratou te turanga pe kore, ka orongaia te au kopapa kare rava e pe, e kare e irinaki ki runga i tetai ua atu apinga no to ratou ora. Te akataka maira a Apokalupo 4:4 i teia aronga tei akatuia mai, i te noo anga ki runga i te au terono e te korona auro i rungao i to ratou upoko. Te vai ua maira te turanga ariki kaka no te au Kerititiano akatainuia. Inara e maata ua atu te akapapuanga no to te Atua irinakianga i roto i te aronga akatainuia.

⁷ “Kua tae oki ki te akaipoipo anga a te Punua-mamoe, e kua akamanea tana vaine iaia uaorai. E kua tukuia iaia te kakau i te kakau meitaki, e mea viivii kore, e te teatea e taua kakau meitaki ra, ko te tuatua-tika ïa a te aronga tapu ra,” e akakite ra a Apokalupo 19:7, 8. Kua iki a Iehova i te au Kerititiano akatainuia kia riro e ko te vaine akaipoipo na tana Tamaiti no te tuatau ki mua. Te turanga pe kore, te mate kore, te turanga ariki, e “te akaipoipo anga a te Punua-mamoe”​—e au apinga  aroa umeremere tikai teia! E akapapuanga umere tikai teia i to te Atua irinakianga i roto i te aronga akatainuia, tei “aru i te Punua-mamoe i tona au aerenga ravarai.”

Irinakiia te Tavini e Iesu

8. Akapeea ra a Iesu i te akaari anga e e irinakianga tona i roto i tana au pipi akatainuia i te vaerua?

⁸ Eaa te akapapuanga e e irinaki pu tikai to Iesu i tana au pipi akatainuia i te vaerua? I te po openga o tona oraanga i te enua nei, kua taputou a Iesu ki tana au apotetoro akarongo mou e 11. “Ko kotou ko te aronga e noo tamou i vaitata iaku i toku au timataanga nei,” i akakite ei aia kia ratou, “mei toku metua i akono i tetai basileia noku ra, kua akono katoa au ia kotou; Kia kai katoa kotou e kia inu oki i taku kaingakai i toku basileia ra, e kia noo ki rungao i te au terono i te akava anga i nga kopu tino ngauru ma rua o Iseraela ra.” (Luka 22:28-30) Ko te koreromotu ta Iesu i papau ki te au apotetoro e 11 i te reira taime, ka o katoatoa mai te 144,000 o te au Kerititiano akatainuia. (Luka 12:32; Apo. 5:9, 10; 14:1) Naringa kare aia e irinaki ana ia ratou, ka papau ainei a Iesu i tetai koreromotu kia tutara kapiti e ratou i roto i te Patireia?

9. Eaa ua ai te o maira ki roto i “te au apinga ravarai [a Karaiti]”?

⁹ Tetai katoa, kua iki a Iesu Karaiti i te tavini akono meitaki e te pakari “ei akaaere i te au apinga ravarai nana”​—te au apinga ravarai o te Patireia i runga i te enua nei. (Mata. 24:47) Ko tetai pae o teia au apinga ravarai koia oki, ko te au ngai e te au apinga angaanga i ko i te opati maata o te Au Kite o Iehova i te ao nei, te au opati manga i te au enua tukeke, e i ko i te au Are Akaputuputuanga e te au Are Uipaanga Patireia i te ao katoa. Kapiti katoaia mai ko te angaanga tutuanga i te Patireia e te akariro anga i te tangata ei pipi. Ka iki ainei aia i tetai tangata kare aia e irinaki ana kia akono e kia taangaanga i tana au apinga puapinga?

10. Eaa te akapapuanga e te vaitata uao ra a Karaiti ki tana au pipi akatainuia?

¹⁰ I mua poto ua ake ka aere ei aia ki te rangi, kua mama atu a Iesu tei akatuia mai, ki tana au pipi akarongo mou, e kua taputou kia ratou i te na ko anga e: “E i na, tei vaitata ua ra au ia kotou, e tae ua atu ki te openga o teianei ao.” (Mata. 28:20) Kua akatupu ainei a Iesu i teia taputou? I te 15 mataiti i topa, kua maata atu te au putuputuanga o te Au Kite o Iehova i te ao katoa nei mei te 70,000 ki te 100,000 tuma​—vaitata rai e kua tere atu i te 40 patene te maata. Peea i reira te au pipi ou tei kapitiia mai? Vaitata rai i te 4.5 mirioni au pipi tei papetitoia i te 15 mataiti i topa​—mei te 800 e tere atu te avereti i te ra okotai. E akapapuanga taka meitaki teia au tupuanga  umere e te arataki nei a Karaiti ki tana au pipi akatainuia i ko i ta ratou au uipaanga putuputuanga, e te turuturu ra ia ratou i roto i ta ratou angaanga i te akariro anga i te tangata ei pipi.

E Tavini Akono Meitaki e te Pakari

11, 12. Akapeea ra te tavini i te akaari anga e e tavini akono meitaki aia e te pakari?

¹¹ I te mea e kua irinaki pu tikai te Atua ko Iehova e Iesu Karaiti i te tavini akono meitaki e te pakari, kare ainei e tau kia akapera katoa tatou? I na e, kua akaari te tavini e e tu akono meitaki tona i te rave anga i tana angaanga i tukuia mai. Ei akaraanga, kua neneiia mai ana te makatini Punanga Tiaki no tetai 130 mataiti. Te riro nei te au uipaanga, te au akaputuputuanga, e te au uruoaanga a te Au Kite o Iehova i te akamatutu ua atu rai i to tatou akarongo.

¹² E pakari katoa to te tavini akono meitaki i roto i te tu e kare ratou e rave i tetai mea i mua ake ka oronga mai ei a Iehova i te aratakianga taka meitaki, e kare katoa ratou e poka ana i te rave i tetai mea me te taka ua ra ta Iehova aratakianga no runga i te reira. Ei akaraanga, noatu e te ariki ra me kore te akatika ra te au arataki akonoanga pikikaa e te meitaki ua ra te tu noinoi o te tangata o teianei ao e to ratou tu akono kore i te Atua, te oronga ra ra te tavini i te au akamatakiteanga no runga i te au ereere a te akatereanga kino a Satani. Te rauka ra i te tavini i te oronga i te au akamatakiteanga pakari tei anoanoia i te tuatau tau, no te mea te akameitaki ra te Atua ko Iehova e Iesu Karaiti i te reira. No reira ka tau rai tatou kia irinaki pu tikai i te tavini. Ka akapeea ra tatou i te akaari anga e te irinaki ra tatou i te tavini akono meitaki e te pakari?

“Aere” ma te Aronga Akatainuia, ia Ratou e Aru ra i te Punua Mamoe

13. Kia tau ki te totou a Zekaria, akapeea ra e rauka ai i te akaari i te irinakianga i roto i te tavini akono meitaki e te pakari?

¹³ Te tuatua ra te puka Pipiria o Zekaria no runga i te “nga tangata tino ngauru” tei aere atu ki “tetai ngati Iuda” i te na ko anga e: ‘Ka aere katoa matou e kotou.’ (E tatau ia Zekaria 8:23.) I te mea e te tuatuaia ra “tetai ngati Iuda” e ko “kotou,” te akatutu maira te reira i tetai pupu tangata. I to tatou nei tuatau, te akatutu maira aia i te toenga o te au Kerititiano akatainuia​—e tuanga no “te Iseraela o te Atua.” (Gala. 6:16) Te akatutu ra te “nga tangata tino ngauru, no roto i te au reo katoa o te pa enua” i te aronga maata rava o te au mamoe ke atu. Mei te au Kerititiano akatainuia e aru ra ia Iesu noatu e ka aere aia kiea, ‘te aere katoa’ ra me kore te aru ra te aronga maata rava i te tavini akono meitaki e te pakari. Eiaa rava te aronga maata rava kia akama i te akakite e e au oa ratou uaorai no “te au taeake tapu, ko tei rauka katoa te kapiki anga no te rangi.” (Ebe. 3:1) Kare a Iesu e akama ana i te kapiki i te aronga akatainuia ei au “taeake.”​—Ebe. 2:11.

14. Ka akapeea me oronga i te turuturuanga tiratiratu ki to Karaiti au taeake?

¹⁴ Kua akakite a Iesu e me turuturu tatou i tona au taeake, te turu ra rai tatou iaia. (E tatau ia Mataio 25:40.) Na roto i teea mataara i reira, e rauka ai i te aronga e manakonakoanga to ratou no te enua i te turuturu i te au taeake o Karaiti tei akatainuia i te vaerua? Ko te mataara maata rava atu koia oki, na te tauturu anga ia ratou i roto i te angaanga tutu aere i te Patireia. (Mata. 24:14; Ioa. 14:12) Noatu kua iti mai te numero o te aronga  akatainuia i te enua nei i te au raungauru mataiti tei aereia mai ana, kua maata atu ra te numero o te mamoe ke atu. Me piri te aronga e manakonakoanga to ratou no te enua ki roto i te angaanga akakitekite aere, i te tavini anga ei aronga tutu evangeria tamou me ka rauka, te turuturu ra ratou i te aronga akatainuia i te vaerua kia akatupu i te angaanga akariro i te tangata ei pipi. (Mata. 28:19, 20) Eiaa katoa kia akangaropoinaia te au atianga kia turuturu i teia angaanga na roto i te au mataara tukeke no te oronga anga i te moni tauturu.

15. Mei teaa tikai ra te tu o te au Kerititiano tataki tai ki te kai pae vaerua ta te tavini e oronga maira i te tuatau tau e te au tukuanga tika a te akaaerenga?

¹⁵ Ei au Kerititiano tataki tai, eaa to tatou manako no runga i te kai pae vaerua ta te tavini akono meitaki e oronga maira i te tuatau tau, na roto i te au puka tei akatumuia ki runga i te Pipiria e na roto i te au akaputuputuanga Kerititiano? Te ariki rekareka ra ainei tatou i te reira e te taangaanga puareinga ua ra ainei i ta tatou i apii? Mei teaa ra to tatou tu ki te au tukuanga tika a te akaaerenga tei akanooia e te tavini? Ka riro to tatou tu kauraro puareinga ua ki te aratakianga tei orongaia mai, ei akapapuanga no to tatou akarongo i roto i ta Iehova akanoonooanga.​—Iako. 3:17.

16. Eaa ra te au Kerititiano katoatoa ka tau ei kia akarongo ki te au taeake o Karaiti?

¹⁶ “Ka akarongo mai taku mamoe i toku reo,” i akakite ei a Iesu, “kua kite oki au ia ratou, e ka aru mai oki ratou iaku.” (Ioa. 10:27) E mea tika rava te reira i te au Kerititiano akatainuia. Akapeea ra te aronga tei “aere katoa” e ratou? Ka anoanoia taua aronga ra kia akarongo kia Iesu. Ka anoano katoaia ratou kia akarongo ki tona au taeake. I na e, kua orongaia te apainga maata no te akono i te turanga pae vaerua o te iti tangata o te Atua kia ratou. Eaa te o maira ki te akarongo anga ki te reo o te au taeake o Karaiti?

17. Eaa te o maira ki te akarongo anga ki te pupu tavini?

¹⁷ Ko te Pupu Akaaere te mata o te tavini akono meitaki i teia tuatau, e arataki ra e e akaaere nei i te angaanga tutu aere i te Patireia i te enua katoa nei. E aronga pakari kite karape te au mema o te Pupu Akaaere, tei akatainuia i te vaerua. Ka tau katoa tikai ratou kia akatakaia ei “au arataki” i rotopu ia tatou. (Ebe. 13:7) Ko teia au akaaere akatainuia, e maata ta ratou angaanga e rave nei i roto i te angaanga a te Atu, i te akono anga tere atu i te 7,000,000 aronga akakitekite i te Patireia i te ao katoa nei, i roto i te au putuputuanga tei tere atu i te 100,000. (1 Kori. 15:58) Ko te aiteanga kia akarongo ki te pupu tavini koia oki, kia taokotai pu tikai ki tona Pupu Akaaere.

Akameitakiia te Aronga tei Akarongo ki te Tavini

18, 19. (a) Ka akapeea te aronga tei akarongo ki te tavini akono meitaki e te pakari me akameitakiia? (e) Eaa ra to tatou akakoroanga ngaueue kore?

¹⁸ Mei tona ikiia anga mai, kua rauka i te tavini akono meitaki e te pakari i te “akaariu i te tangata e manganui ki te tuatua-tika.” (Dani. 12:3) Te kapiti maira teia i te aronga e manakonakoanga to ratou kia ora mai i te akapouanga o teia akatereanga kino. E akameitakianga tikai teia turanga tuatua tika i mua i te aroaro o te Atua!

¹⁹ I te tuatau ki mua, me eke mai ‘te oire tapu ra, ko Ierusalema ou, [koia oki e 144,000] mei ko mai i te Atua i runga i te rangi, tei akamaneaia mei te vaine i akamaneaia no te akaipoipo i tana tane,’ eaa ta te aronga tei akarongo ki te reo o te tavini ka kite? “E noo te Atua ki rotopu ia ratou,” i akakite ei te Pipiria. “E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” (Apo. 21:2-4) No reira, kia akarongo tatou kia Karaiti e tona au taeake irinakiia tei akatainuia i te vaerua.

Eaa Taau i Kite?

• Eaa te akapapuanga e te irinaki ra a Iehova i te tavini akono meitaki e te pakari?

• Eaa te akaari ra e te irinaki pu tikai ra a Iesu Karaiti i te pupu tavini?

• Eaa ra i tau ei kia irinaki tatou i te akaaere pikikaa kore?

• Akapeea tatou i te akaari anga e te irinaki ra tatou i te tavini?

[Au Uianga Apii]

[Tutu i te kapi 25]

Kua kite ainei koe e koai ta Iehova i iki ei vaine akaipoipo na tana Tamaiti i te tuatau ki mua?

[Au Tutu i te kapi 26]

Kua oronga a Iesu Karaiti i tana “au apinga” ki te tavini akono meitaki e te pakari

[Tutu i te kapi 27]

Me piri tatou ki roto i te angaanga akakitekite aere, te turuturu ra tatou i te aronga akatainuia i te vaerua