‘Balamutobela Mwanaambelele’
‘Balamutobela Mwanaambelele’
“Mbimbabo batobela Mwanambelele koonse nkwaya.”—CIY. 14:4.
1. Ino mbuti basikwiiya beni-beni ba Jesu mbobakalimvwa kujatikizya kumutobela?
MYAKA yobile acisela kuzwa ciindi naakatalika mulimo wakwe wakukambauka, Jesu ‘wakali kuyiisya bantu bakabungene mu Kapernauma.’ Nobakatyompwa amajwi aakwe, “basikwiiya bakwe banjibanji bakapiluka, tabacili kweenda limbi awalo.” Jesu naakabuzya baapostolo bakwe ibali 12 ncobatakali kuyandila kuunka abalo, Simoni Petro wakaingula kuti: “Omwami, tuye kuli? Nduwe oojisi majwi aabuumi ubutamani. Eno swebo twakasyoma, alimwi tulizi kuti nduwe Uusalala wa-Leza.” (Joh. 6:48, 59, 60, 66-69) Basikwiiya beni-beni ba Jesu tiibakacileka kumutobela. Nobakananikwa amuuya uusalala, bakazumanana kulibombya kubusolozi bwa Jesu.—Inc. 16:7-10.
2. (a) Ino nguni “muzike musyomesi uucenjede,” naa ‘mubanzi uusyomekede’? (b) Ino mbuti muzike mbwali cikozyanyo cibotu “[muku]tobela Mwanambelele”?
2 Ino ncinzi cikonzya kwaambwa kujatikizya Banakristo bananike bamazuba aano? Mubusinsimi bwakwe bujatikizya “citondezyo cakuboola kwak[we] acamamanino aaciindi,” Jesu wakaamba kakamu kabasikumutobela bananikidwe amuuya ibali anyika kuti “muzike musyomesi uucenjede,” naa ‘mubanzi uusyomekede.’ (Mt. 24:3, 45; Lk. 12:42) Kabali kakamu, baciinga camuzike baba cikozyanyo cibotu “[caku]tobela Mwanambelele koonse nkwaya.” (Amubale Ciyubunuzyo 14:4, 5.) Ibali mukakamu aaka mbaanabutema munzila yakumuuya kwiinda mukutalisofwaazya azyintu nzyasyoma alimwi anzyacita “BABULONI MUPATI,” ibulelo bwanyika yoonse bwabukombi bwakubeja. (Ciy. 17:5) “Mumilomo yabo teemwakajanwa bubeji” mutwaambo twanjiisyo zyabukombi, alimwi “tabajisi mulandu nuuba umwi” kunyika ya Saatani. (Joh. 15:19) Kumbele, bananike ibasyeede anyika ‘bayoomucilila’ Mwanaambelele kujulu kwini.—Joh. 13:36.
3. Ino nkaambo nzi ncociyandika kapati kulindiswe kuti katubasyoma baciinga camuzike?
3 Jesu wasala muzike musyomesi uucenjede “kuti abe mwami wabo basiŋanda bakwe,” nkokuti ibali muciinga camuzike aumwi kumugama, ikubaabila “zilyo zyabo kuciindi ceelede.” Alimwi wamukkazyika muzike ooyu “kuti abe mupati wazintu zyoonse nzyajisi.” (Mt. 24:45-47) “Zintu” eezyi zibikkilizya “inkamu impati” iiyaabukomena “[ya]mbelele zimwi.” (Ciy. 7:9; Joh. 10:16) Sena ibananike aumwi kumugama alimwi aba “mbelele zimwi” tabeelede kumusyoma muzike iwakabikkwa kuti kabalanganya? Kuli twaambo tunji tupa kuti katubasyoma ibaciinga camuzike. Twaambo tobile tulibonya kapati ntootu: (1) Jehova ulabasyoma baciinga camuzike. (2) Awalo Jesu ulamusyoma muzike. Atulange-lange bumboni bwakuti Jehova Leza alimwi a Jesu balamusyoma cakumaninina muzike musyomesi uucenjede.
Jehova Ulamusyoma Muzike
4. Ino nkaambo nzi ncotukonzya kuba alusyomo mucakulya cakumuuya icipegwa amuzike musyomesi uucenjede?
4 Amubone cipa kuti muzike musyomesi uucenjede acikonzye ikupa zyakulya zyakumuuya aciindi ceelede. Jehova waamba kuti: “Njookulaya akukutondezya inzila njoelede kutola.” Uyungizya kuti: “Njookweenzya kukubika liso lyangu alinduwe.” (Int. 32:8) Masimpe, Jehova ulapa busolozi kumuzike. Aboobo tulakonzya kuba alusyomo mubusongo, luzyibo lwamu Magwalo alimwi abusolozi bwakumuuya bwalo mbotutambula kuzwa kumuzike.
5. Ino ncinzi citondezya kuti muuya wa Leza nguubasololela ibaciinga camuzike?
5 Alimwi Jehova ulabapa muuya wakwe uusalala baciinga camuzike. Nokuba kuti muuya wa Jehova tuulibonyi, nzyoucita zilalibonya kubantu. Amuyeeye buyo zyintu nzyaazuzikizya muzike musyomesi uucenjede mukupa bumboni munyika yoonse kujatikizya Jehova, Mwanaakwe alimwi a Bwami. Bakombi ba Jehova balaambilizya mulumbe wa Bwami cabusungu mumasi aayinda ku 230 alimwi amutubunga twansumbu. Sena eeci tacili citondezyo citakonzyi kuzumbauzyigwa cakuti muuya wa Leza nguumusololela muzike? (Amubale Incito 1:8.) Kutegwa baabile cakulya cakumuuya kubantu ba Jehova munyika yoonse, ibaciinga camuzike bajisi zyakusala ziyandika kapati. Ciindi nobasala alimwi akubelesya twaambo ntobasala, batondezya luyando, kulibombya alimwi amicelo iimbi yamuuya.—Gal. 5:22, 23.
6, 7. Ino Jehova ujisi lusyomo luli buti mumuzike musyomesi?
6 Kutegwa tukonzye kumvwisya lusyomo Jehova ndwajisi mumuzike musyomesi, atulange ncaakasyomezya bantu ibali mukakamu aaka. Mwaapostolo Paulo wakalemba kuti: “Mweembo uyoolila, elyo bafu bayoobuka mbuli batafwiki, aswebo nituyoosanduka. Nkaambo eci ciboleka cileelede kusamikwa butaboli, acalo eci cifwika cileelede kusamikwa butafwiki.” (1 Kor. 15:52, 53) Basikutobela Kristo bananike balo ibabelekela Leza cakusyomeka akufwa amibili iibola, balabusyigwa acintu cipati kwiinda zilenge zyamuuya izijisi buumi butamani. Balapegwa butafwiki—buumi butamani alimwi butakonzyi kufwa. Kunze lyaboobo, balapegwa butaboli, nkokuti mibili iitakonzyi kubola. Lugwalo lwa Ciyubunuzyo 4:4 lupandulula bantu aaba ibabusyidwe kuti balikkede azyuuno zyabwami alimwi akuti bajisi misini yangolida amitwe yabo. Banakristo bananike aaba bayooba abulemu bwabwami. Pele kuli bumboni bunji bwalo ibutondezya kuti ulabasyoma bananike.
7 Lugwalo lwa Ciyubunuzyo 19:7, 8 lwaamba kuti: “Buzuba bwabwiinga bwa-Mwanambelele bwasika, amwanakazi wakwe walibamba kale. Mbukubede, nkaambo wazumizigwa kuti asame masani mabotu aatuba buu aabekema. Aya masani mbubululami bwabasalali.” Jehova wakasala Banakristo bananike kuti bakabe mwanakazi wa Mwanaakwe. Butaboli, butafwiki, bulemu bwabwami, “bwiinga bwa-Mwanambelele”—elo kaka tazilikomeneni zipego eezyi! Mbumboni bupati bwalusyomo ndwajisi Leza kubananike, balo “batobela Mwanambelele koonse nkwaya.”
Jesu Ulamusyoma Muzike
8. Ino mbuti Jesu mbwatondezya kuti ulabasyoma basikumutobela bananikidwe amuuya?
8 Ino mbumboni nzi ibutondezya kuti Jesu ulabasyoma kapati basikumutobela bananikidwe amuuya? Masiku aamamanino aabuumi bwakwe anyika, Jesu wakabasyomezya baapostolo bakwe basyomeka ibali 11. Wakabaambila kuti: “Nywebo ndinywe mwandiiminina mumapenzi aangu, eno nda[bamba cizuminano ca]bwami mbubonya Taata mbwaa[bamba cizuminano andime], kuti mukalye akunywa atafule lyangu mubwami bwangu, alimwi muyookala azyuuno zyabwami akubeteka misyobo iili kumi ayobile ya-Israyeli.” (Lk. 22:28-30) Cizuminano ncaakabamba Jesu abaapostolo ibali 11 ciyoojatikizya Banakristo bananike boonse ibali 144,000. (Lk. 12:32; Ciy. 5:9, 10; 14:1) Ikuti naa Jesu taakali kubasyoma, sena naakabamba cizuminano calo icaamba kuti bayoolela antoomwe mubwami?
9. Ino nzyintu nzi zimwi zibikkilizyidwe “[mu]zintu zyoonse nzyajisi” Kristo?
9 Kunze lyaboobo, Jesu Kristo wakasala muzike musyomesi uucenjede “kuti abe mupati wazintu zyoonse nzyajisi”. (Mt. 24:47) Zyintu eezyi zibikkilizya mayake aali kumaofesi mapati aa Bakamboni ba Jehova, maofesi aamitabi mumasi aasiyene-siyene, Maanda Aakucitila Miswaangano Mipati a Maanda aa Bwami aali munyika yoonse. Acimwi cibikkilizyidwe mmulimo wakukambauka Bwami akugwasya bantu kuba basikwiiya. Sena kuli uuli woonse uukonzya kusala muntu ngwatasyomi kuti alanganye zyintu ziyandisi?
10. Ino ncinzi citondezya kuti Jesu Kristo uli aabasikumutobela bananike?
10 Mazuba masyoonto buyo katanaunka kujulu, Jesu iwakabusyigwa wakalibonya kuli basikwiiya bakwe basyomeka akubasyomezya kuti: “Amulange, ndaba anywe mazuba oonse nikuba kusikila kumamanino aaciindi.” (Mt. 28:20) Sena cisyomezyo eeci cakazuzikizyigwa? Myaka iili 15 yainda, mweelwe wambungano zya Bakamboni ba Jehova munyika yoonse wakomena kuzwa kumbungano zili 70,000 kusika kumbungano ziinda ku 100,000—kuyungizyigwa amweelwe wiinda ku 40 pesenti. Ino mbuti kujatikizya basikwiiya bapya? Basikwiiya batandila ku 4,500,000 bakabbapatizyigwa mumyaka iili 15 yainda—mweelwe waakati-kati wabantu bainda ku 800 abuzuba. Kuyungizyigwa ooku kugambya ncitondezyo cakuti Kristo ulabasololela basikumutobela bananike kumiswaangano yabo yambungano alimwi ulabagwasya mumulimo wakugwasya bantu kuba basikwiiya.
Muzike Ulasyomeka Alimwi Ulicenjede
11, 12. Ino mbuti muzike mbwaalibonya kuba muntu uusyomeka alimwi uucenjede?
11 Mbwaanga Jehova alimwi a Jesu Kristo balamusyoma kapati muzike musyomesi uucenjede, sena andiswe tatweelede kumusyoma? Kayi muzike walibonya kuba muntu uusyomeka mumulimo woonse ngwapedwe. Mucikozyanyo, magazini ya Ngazi Yamulindizi yamwaigwa kwamyaka iili 130. Miswaangano yambungano alimwi amiswaangano mipati ya Bakamboni ba Jehova yazumanana kutuyaka kumuuya.
12 Alimwi muzike musyomesi ulicenjede mukuti ulalibombya, lyoonse ucita zyintu kweelana abusolozi bwa Jehova. Mucikozyanyo, ciindi basololi babukombi bwakubeja nobazumizya naa nobalekela zyintu zitakkomanisyi Leza nzyobacita bantu bamunyika, muzike ulacenjezya kujatikizya micito mibyaabi eeyi yabweende bwa Saatani. Muzike ulapa kucenjezya ooku munzila yabusongo alimwi aciindi ceelede akaambo kakuti Jehova Leza alimwi a Jesu Kristo balamulongezya. Aboobo, tweelede kumusyoma kapati muzike. Pele ino mbuti mbotukonzya kutondezya kuti tulamusyoma muzike musyomesi uucenjede?
‘Amweende’ Abananike Ciindi Nobatobela Mwanaambelele
13. Kweelana abusinsimi bwa Zekariya, ino mbuti mbocikonzyeka kuba alusyomo mumuzike musyomesi uucenjede?
13 Ibbuku lya Zekariya lyaamba kujatikizya “bantu bali ikumi” balo ibaunka “[ku]muntu mu-Juda” akwaamba kuti: “Atweende anywebo.” (Amubale Zekariya 8:23.) Mbwaanga “muntu mu-Juda” waambwa kuti “anywebo,” nkokuti wiiminina kakamu kabantu. Mumazuba eesu, wiiminina Banakristo bananike ibasyeede—cibeela ca “ba-Israyeli ba-Leza.” (Gal. 6:16) “Bantu bali ikumi bazwa kumisyobo yoonse akumyaambo yoonse” baiminina inkamu mpati yambelele zimwi. Mbubwenya mbuli Banakristo bananike ibatobela Jesu kuli koonse nkwaya, bankamu mpati ‘baleenda’ naa kumusangana muzike musyomesi uucenjede. Ibankamu mpati tabeelede kulisenda kulizyibya kuba beenzinyina babaabo “[iba]salilwa bukalilo kujulu.” (Heb. 3:1) Jesu talisendi kwiita bananike kuti “banabakwesu.”—Heb. 2:11.
14. Ino mbuti mbotukonzya kubagwasyilizya banabakwabo Kristo?
14 Jesu Kristo wakaamba kuti ciindi notugwasya banabakwabo cili mbuli kuti tugwasya nguwe. (Amubale Matayo 25:40.) Mpoonya ino mmuunzila nzi aabo ibalangila kuyoopona anyika mobakonzya kubagwasya banabakwabo Kristo ibananikidwe amuuya? Nzila mpati njakubagwasya mumulimo wakukambauka Bwami. (Mt. 24:14; Joh. 14:12) Eelyo mweelwe wabananike ibali anyika nowiinka aansi kuzwa mumyaka minji yainda, imweelwe wambelele zimwi walo uunka ambele. Ciindi aabo ibajisi bulangizi bwakupona anyika nobatola lubazu mumulimo wakukambauka, ikuti kacikonzyeka kabacita bupainiya bwaciindi coonse, bagwasya bananike mukuzuzikizya mulimo wakugwasya bantu kuba basikwiiya. (Mt. 28:19, 20) Lugwasyo lumbi lupati nkugwasyilizya mulimo kwiinda mukusanga munzila ziindene-indene.
15. Ino mbuti Munakristo aumwi kumugama mbwayelede kucita kuli cakulya cakumuuya muzike ncapa aciindi ceelede alimwi akuli zyakusala zicitwa mumbunga kuzwa kumuzike?
15 Mbotuli Banakristo kutugama, ino mbuti mbotucibona cakulya cakumuuya calo ncabamba muzike musyomesi kwiinda mumabbuku aapandulula Bbaibbele alimwi amumiswaangano yambungano amipati? Sena tulaswiilila alimwi akuzibelesya nzyotwiiya? Ino tucita buti kujatikizya zyakusala zicitwa mumbunga zyalo zizwa kumuzike? Ciindi notutobela camoyo woonse busolozi mbotupegwa, tutondezya lusyomo munzila Jehova njatusololela.—Jak. 3:17.
16. Ino nkaambo nzi Banakristo boonse ncobeelede kuswiilila kubanabakwabo Kristo?
16 Jesu wakati: “Imbelele zyangu zilamvwa ijwi lyangu, ndilizizi, zilandicilila.” (Joh. 10:27) Aaya majwi aamba Banakristo bananike. Ino mbuti kujatikizya aabo ‘ibeenda’ ambabo? Bantu bali boobu beelede kuswiilila kuli Jesu. Beelede kuswiilila kubanabakwabo Jesu. Kayi mulimo mupati wakusololela alimwi akulanganya bantu ba Leza wakapegwa kuli mbabo. Ino kuswiilila ijwi lyabanabakwabo Kristo kubikkilizya nzi?
17. Ino kuswiilila kuciinga camuzike caamba nzi?
17 Mazuba aano muzike musyomesi uucenjede wiimininwa aa Kabunga Keendelezya, kalo kasololela alimwi akweendelezya mulimo wakukambauka Bwami munyika yoonse. Ibamu Kabunga Keendelezya mbaalu ibananikidwe amuuya ibajisi luzyibo. Aabo kubagama balakonzya kwaambwa kuba “basololi” besu. (Heb. 13:7) Kwiinda mukulanganya basikwaambilizya Bwami munyika yoonse balo ibatandila ku 7,000,000 mumbungano ziinda ku 100,000, balangizi ibananikidwe aaba ‘bapangika myoyo yabo lyoonse kumilimo ya-Mwami.’ (1 Kor. 15:58) Kuswiilila kuciinga camuzike caamba kubelekela antoomwe a Kabunga kakwe Keendelezya.
Aabo Ibaswiilila Kumuzike Balalongezyegwa
18, 19. (a) Ino mbuti aabo ibaswiilila muzike musyomesi uucenjede mbobalongezyegwa? (b) Ino ncinzi ncotweelede kukanza kucita?
18 Kuzwa ciindi naakasalwa, muzike musyomesi uucenjede wali “kupilusya bantu banji kubululami.” (Dan. 12:3) Bantu aaba babikkilizya baabo ibajisi bulangizi bwakufwutuka lunyonyooko lwabweende bwazyintu oobu ibubyaabi. Elo kaka kululama mumeso aa Leza ncilongezyo cipati!
19 Kumbele, ciindi ‘munzi mulemu, Jerusalemu mupya [uubambidwe aba 144,000] nayooseluka kuzwa kujulu kuli Leza, kabambidwe mbuli nabwiinga uulisakatizizya mulumi wakwe,’ ino ncinzi ciyoocitikila bantu ibaswiilila muzike? Bbaibbele lyaamba kuti: “Leza mwini uzookala kulimbabo, azoobe Leza wabo. Nkabela uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.” (Ciy. 21:2-4) Aboobo, tujisi twaambo tunji tupa kuti tuswiilile Kristo alimwi abanabakwabo bananikidwe amuuya ibasyomeka.
Ino Ncinzi Ncomwaiya?
• Ino mbumboni nzi buliko bwakuti Jehova ulamusyoma muzike musyomesi uucenjede?
• Ino ncinzi citondezya kuti Jesu Kristo ulamusyoma kapati muzike?
• Ino nkaambo nzi ncotweelede kumusyoma mubanzi uusyomeka?
• Ino mbuti mbotutondezya kuti tulamusyoma muzike?
[Mibuzyo yaciiyo]
[Cifwanikiso icili apeeji 25]
Sena mulimuzyi ngwasalide Jehova kuti akabe mwanakazi wa Mwanaakwe?
[Zifwanikiso izili apeeji 26]
Jesu Kristo wakapa muzike musyomesi uucenjede ‘zyintu’ zyakwe kuti azilanganye
[Cifwanikiso icili apeeji 27]
Ciindi notutola lubazu mumulimo wakukambauka, tugwasyilizya bananike