Va ‘Hambeta Va Landzela Xinyimpfana’
Va ‘Hambeta Va Landzela Xinyimpfana’
“Lava hi vona lava hambetaka va landzela Xinyimpfana ku nga khathariseki leswaku xi ya kwihi.”—NHLAV. 14:4.
1. Vadyondzisiwa va Yesu va ntiyiso va titwe njhani malunghana ni ku n’wi landzela?
ENDZHAKU ka malembe ya kwalomu ka mambirhi ni hafu Yesu a ri karhi a endla vutirheli bya yena, “a [a] ri karhi a dyondzisa enhlengeletanweni ya tiko eKapernawume.” Leswi va voneke leswaku mhaka leyi a a vulavula ha yona a yi tsema nhlana, “vo tala va vadyondzisiwa vakwe va tlhelel[e] eka swilo swa le ndzhaku naswona va nga ha fambi na yena.” Loko Yesu a vutise vaapostola va yena va 12 loko na vona va lava ku famba, Simoni Petro u te: “Hosi, xana hi ta ya eka mani? Hi wena u nga ni marito ya vutomi lebyi nga heriki; naswona hi khorwile ni ku tiva leswaku u Mukwetsimi wa Xikwembu.” (Yoh. 6:48, 59, 60, 66-69) Vadyondzisiwa va ntiyiso va Yesu a va tshikanga ku n’wi landzela. Endzhaku ka loko va totiwe hi moya lowo kwetsima, va hambete va titsongahatela nkongomiso wa Yesu.—Mint. 16:7-10.
2. (a) I mani “hlonga ro tshembeka ni ro tlhariha,” kumbe “mulanguteri wo tshembeka”? (b) Hlonga ri ni rhekhodo leyinene yo “landzela Xinyimpfana” hi ndlela yihi?
2 Ku nga vuriwa yini malunghana ni Vakreste lava totiweke manguva lawa? Eka vuprofeta bya yena lebyi vulavulaka hi “xikombiso xa vukona bya [yena] ni xa makumu ya mafambiselo ya swilo,” Yesu u vule leswaku ntlawa wa valandzeri va yena lava totiweke hi moya lava nga emisaveni i “hlonga ro tshembeka ni ro tlhariha,” kumbe “mulanguteri wo tshembeka.” (Mat. 24:3, 45; Luka 12:42) Ntlawa wa hlonga wu ni rhekhodo leyinene ngopfu yo “landzela Xinyimpfana ku nga khathariseki leswaku xi ya kwihi.” (Hlaya Nhlavutelo 14:4, 5.) Swirho swa wona swi tshama swi ri tinghwendza hileswi swi nga tithyakisangiki hi tidyondzo ni mikhuva ya “Babilona Lonkulu,” mfumo wa misava wa vukhongeri bya mavunwa. (Nhlav. 17:5) Ku hava dyondzo leyi nga mavunwa leyi ‘kumiweke emilon’wini ya vona,’ naswona “a va na xisolo” xa misava ya Sathana. (Yoh. 15:19) Enkarhini lowu taka, masalela ya vatotiwa lama nga laha misaveni ma ‘ta landzela’ Xinyimpfana etilweni.—Yoh. 13:36.
3. Ha yini swi ri swa nkoka leswaku hi tshemba ntlawa wa hlonga?
3 Yesu u veke hlonga ro tshembeka ni ro tlhariha “ehenhla ka va yindlu yakwe,” hileswaku xirho ha xin’we xa ntlawa wa hlonga, “ku va nyika swakudya swa vona hi nkarhi lowu faneleke.” U tlhele a veka hlonga “ehenhla ka hinkwaswo leswi nga swa yena.” (Mat. 24:45-47) “Leswi nga swa yena” swi katsa “ntshungu lowukulu” wa “tinyimpfu tin’wana.” (Nhlav. 7:9; Yoh. 10:16) Xana mutotiwa ha un’we-un’we ni “tinyimpfu tin’wana” a va fanelanga va tshemba hlonga leri vekiweke ehenhla ka vona? Ku ni swivangelo swo tala leswi endlaka hi boheka ku ri tshemba hlonga. Swivangelo swimbirhi leswikulu hi leswi: (1) Yehovha wa wu tshemba ntlawa wa hlonga. (2) Yesu na yena wa wu tshemba ntlawa wa hlonga. A hi kambisiseni vumbhoni lebyi kombisaka leswaku Yehovha Xikwembu na Yesu Kreste va ri tshemba hi ku helela hlonga ro tshembeka ni ro tlhariha.
Yehovha Wa Ri Tshemba Hlonga
4. Ha yini hi nga swi tshembaka swakudya swa moya leswi phameriwaka hi hlonga ro tshembeka ni ro tlhariha?
4 Xiya leswi endlaka leswaku hlonga ro tshembeka ni ro tlhariha ri kota ku hi phamela swakudya swa moya leswi hi swi lavaka hi nkarhi lowu faneleke. Yehovha u ri: “Ndzi ta endla leswaku u va ni ku twisisa naswona ndzi ku letela hi ndlela leyi u faneleke u famba ha yona.” U ya emahlweni a ku: “Ndzi ta ku tsundzuxa ndzi veke tihlo ra mina ri ri ehenhla ka wena.” (Ps. 32:8) Ina, Yehovha u kongomisa hlonga. Hikwalaho hi nga ku tshemba hi ku helela ku twisisa ka Matsalwa ni nkongomiso lowu sekeriweke eka wona lowu hi wu kumaka eka hlonga.
5. I yini lexi kombisaka leswaku moya wa Xikwembu wu nyika ntlawa wa hlonga matimba?
5 Yehovha u tlhela a katekisa ntlawa wa hlonga hi moya wa yena lowo kwetsima. Hambileswi moya wa Yehovha wu nga vonakiki, mihandzu ya wona ya vonaka eka lava wu tirhaka eka vona. Anakanya hi leswi hlonga ro tshembeka ni ro tlhariha ri koteke ku swi hetisisa eku nyikeleni ka vumbhoni emisaveni hinkwayo malunghana na Yehovha Xikwembu, N’wana wa xona ni hi Mfumo. Vagandzeri va Yehovha va chumayela rungula ra Mfumo hi ku hiseka ematikweni yo tlula 230 ni le swihlaleni. Xana sweswo a swi nyikeli vumbhoni lebyi nga le rivaleni bya leswaku moya wa Xikwembu wu nyika hlonga matimba? (Hlaya Mintirho 1:8.) Ntlawa wa hlonga wu fanele wu endla swiboho swo tala swa nkoka leswaku wu lunghiselela ni ku phamela swakudya swa moya hi nkarhi lowu faneleke eka vanhu va Yehovha emisaveni hinkwayo. Loko ri endla ri tlhela ri hetisisa swiboho swoleswo, hlonga ri kombisa rirhandzu, vunene ni timfanelo tin’wana ta moya.—Gal. 5:22, 23.
6, 7. Yehovha u ri tshemba ku fikela kwihi hlonga ro tshembeka?
6 Leswaku u twisisa ndlela leyi Yehovha a ri tshembaka ha yona hlonga ro tshembeka, anakanyisisa hi leswi a swi tshembiseke swirho swa rona. Muapostola Pawulo u tsarile a ku: “Mhalamhala yi ta rila, ivi vafi va pfuxiwa va ri lava nga onhakiki, kutani hi ta hundzuriwa. Hikuva nchumu lowu wu onhakaka wu fanele ku ambala ku ka wu nga onhaki, ni nchumu lowu wu faka, wu fanele wu ambala ni ku ka wu nga fi.” (1 Kor. 15:52, 53) Valandzeri lava totiweke va Kreste, lava tirhelaka Xikwembu hi ku tshembeka naswona va faka hi mimiri leyi onhakaka ya nyama, va pfuxiwa va tlula swivumbiwa swa moya naswona va ta hanya vutomi lebyi nga heriki. Va nyikiwa ku nga fi, ku nga vutomi lebyi nga heriki ni ku ka va nga ha lovisiwi. Ku tlula kwalaho, va kuma ku nga onhaki, hileswi va nyikiweke mimiri leyi nga taka yi nga boli naswona yi kotaka ku tihanyela. Nhlavutelo 4:4 yi vula leswaku vanhu lava va pfuxiweke eku feni va tshame eswiluvelweni va ri ni tiharhi ta nsuku etinhlokweni ta vona. Vakreste lava totiweke va rindzeriwe hi ku vangama ka le vuhosini. Kambe ka ha ri ni vumbhoni byin’wana bya leswaku Xikwembu xa va tshemba.
7 Nhlavutelo 19:7, 8 yi ri: “Nkhuvo wa vukati bya Xinyimpfana wu fikile naswona nsati wa xona u tilunghisile. Ina, u pfumeleriwe ku ambala nguvu ya ntsembyana wa risima, yo vangama, leyi baseke, hikuva nguvu ya ntsembyana wa risima yi yimela swiendlo swo lulama swa vakwetsimi.” Yehovha u hlawule Vakreste lava totiweke leswaku va va mutekiwa wa le nkarhini lowu taka wa N’wana wa yena. Ku nga onhaki, ku nga fi, vuhosi ni “nkhuvo wa vukati bya Xinyimpfana” i tinyiko letikulu swinene! I vumbhoni lebyi khumbaka mbilu bya leswaku Xikwembu xa va tshemba vatotiwa, lava “hambetaka va landzela Xinyimpfana ku nga khathariseki leswaku xi ya kwihi.”
Yesu Wa Ri Tshemba Hlonga
8. Yesu u swi kombisa njhani leswaku wa va tshemba valandzeri va yena lava totiweke hi moya?
8 Hi byihi vumbhoni lebyi nga kona bya leswaku Yesu u va tshemba hi ku helela valandzeri va yena lava totiweke hi moya? Hi vusiku byo hetelela bya vutomi bya yena bya laha misaveni, Yesu u endle xitshembiso eka vaapostola va yena vo tshembeka va 11. U va byele leswi: “Hi n’wina mi khomeleleke swin’we na mina emiringweni ya mina; kutani ndzi endla ntwanano swin’we na n’wina, hilaha Tata wa mina a endleke hakona ntwanano wa mfumo swin’we na mina, leswaku mi ta dya ni ku nwa etafuleni ra mina emfun’weni wa mina, kutani mi tshama eswiluvelweni leswaku mi avanyisa tinyimba ta 12 ta Israyele.” (Luka 22:28-30) Ntwanano lowu Yesu a wu endleke hi nkarhi wolowo ni vaapostola va 11 wu ta katsa ni Vakreste hinkwavo lava totiweke va 144 000. (Luka 12:32; Nhlav. 5:9, 10; 14:1) Yesu a a nga ta endla ntwanano lowu a wu vula leswaku a va ta fuma na yena eMfun’weni loko a a nga va tshembi.
9. I yini swilo swin’wana “leswi nga swa [Kreste]”?
9 Ku tlula kwalaho, Yesu Kreste u veke hlonga ro tshembeka ni ro tlhariha “ehenhla ka hinkwaswo leswi nga swa yena,” ku nga swilo swa yena hinkwaswo swa Mfumo leswi nga laha misaveni. (Mat. 24:47) Swin’wana swa swilo sweswo i miako leyi nga eyindlu-nkulu ya Timbhoni ta Yehovha, tihofisi ta marhavi ematikweni yo hambana-hambana, Tiholo ta Tinhlengeletano ni Tiholo ta Mfumo emisaveni hinkwayo. Swin’wana leswi katsekaka i ntirho wo chumayela hi Mfumo ni wo endla vadyondzisiwa. Munhu a nge aveli munhu loyi a nga n’wi tshembiki leswaku a hlayisa a tlhela a tirhisa swilo swa yena swa risima.
10. I yini lexi kombisaka leswaku Yesu Kreste u ni valandzeri va yena lava totiweke?
10 Loko Yesu la pfuxiweke a nga si tlhandlukela etilweni, u humelele eka vadyondzisiwa va yena vo tshembeka kutani a va tshembisa a ku: “Maswivo, ndzi na n’wina masiku hinkwawo ku fikela emakumu ka mafambiselo ya swilo.” (Mat. 28:20) Xana u xi hetisisile xitshembiso lexi? Emalembeni ya 15 lama hundzeke, nhlayo ya mavandlha ya Timbhoni ta Yehovha emisaveni hinkwayo yi kule yi suka eka 70 000 yi ya tlula 100 000, ku nga ku andza loku tlulaka tiphesente ta 40. Naswona ku vuriwa yini hi vadyondzisiwa lava engeteriweke? Kwalomu ka vadyondzisiwa va 4,5 wa timiliyoni va khuvuriwile emalembeni ya 15 lama hundzeke, ku nga xiringaniso xa vadyondzisiwa vo tlula 800 hi siku. Ku andza loku loku hlamarisaka i vumbhoni lebyi nga erivaleni bya leswaku Kreste u kongomisa valandzeri va yena lava totiweke eminhlanganweni ya vona ya vandlha naswona wa va seketela entirhweni wa vona wo endla vadyondzisiwa.
Hlonga Ri Tshembekile Ri Tlhela Ri Tlhariha
11, 12. Hlonga ri swi kombise njhani leswaku ra tshembeka naswona ri tlharihile?
11 Leswi Yehovha Xikwembu na Yesu Kreste va ri tshembaka hi ku helela hlonga ro tshembeka ni ro tlhariha, xana na hina a hi fanelanga hi ri tshemba? Phela, hlonga ri tikombe ri tshembeka loko ri endla ntirho lowu ri averiweke wona. Hi xikombiso, Xihondzo xo Rindza se xi ni malembe ya kwalomu ka 130 xi ri karhi xi kandziyisiwa. Minhlangano, tinhlengeletano ni mintsombano ya Timbhoni ta Yehovha swi hambeta swi hi tiyisa ripfumelo.
12 Nakambe hlonga ro tshembeka ri tlharihile hileswi ri nga tikukumuxiki, a ri rhangeli Yehovha kumbe ri salela endzhaku loko a nyikela nkongomiso wo karhi. Hi xikombiso, loko varhangeri va vukhongeri bya mavunwa va nga lemukisi munhu kambe va vula leswaku vutianakanyi ni mahanyelo ya vanhu emisaveni leyi nga xiximiki Xikwembu i swilo swa ntumbuluko, hlonga ri nyikele switsundzuxo malunghana ni mintlhamu ya mafambiselo yo homboloka ya Sathana. Hlonga ri kota ku nyikela switsundzuxo swa vutlhari leswi nga le nkarhini hikuva Yehovha Xikwembu na Yesu Kreste va ri katekisa. Hikwalaho hi fanele hi ri tshemba hi ku helela hlonga. Kambe, hi nga swi kombisa njhani leswaku ha ri tshemba hlonga ro tshembeka ni ro tlhariha?
“Famba Na” Vatotiwa Loko Va Landzela Xinyimpfana
13. Hi ku ya hi vuprofeta bya Zakariya, hi nga swi kombisa njhani leswaku ha ri tshemba hlonga ro tshembeka ni ro tlhariha?
13 Buku ya le Bibeleni ya Zakariya yi vulavula hi “vavanuna va khume” lava yaka eka “wanuna la nga Muyuda” kutani va ku: “Hi ta famba na n’wina.” (Hlaya Zakariya 8:23.) Tanihi leswi “wanuna la nga Muyuda” a vuriwaka “n’wina,” u fanekisela ntlawa wa vanhu. Enkarhini wa hina u fanekisela masalela ya Vakreste lava totiweke hi moya, ku nga xiphemu xa “Israyele wa Xikwembu.” (Gal. 6:16) “Vavanuna va khume lava humaka eka tindzimi hinkwato ta matiko” va yimela ntshungu lowukulu wa tinyimpfu tin’wana. Tanihi leswi Vakreste lava totiweke va landzelaka Yesu ku nga khathariseki leswaku u ya kwihi, ntshungu lowukulu wu heleketa kumbe wu ‘famba ni,’ hlonga ro tshembeka ni ro tlhariha. Lava ntshungu lowukulu a va fanelanga va chava ku tivitana vanakulobye va vanhu “lava hlanganyelaka eku vitaniweni ka le tilweni.” (Hev. 3:1) Yesu a nga khomiwi hi tingana hi ku vitana vatotiwa a ku i “vamakwerhu.”—Hev. 2:11.
14. Xana vamakwavo va Kreste va nga seketeriwa njhani hi ku tshembeka?
14 Yesu Kreste u teka nseketelo wo tshembeka lowu kombisiwaka vamakwavo tanihi lowu kombisiwaka yena. (Hlaya Matewu 25:40.) Kutani, xana lava nga ni ntshembo wo hanya laha misaveni va va seketela njhani vamakwavo va Kreste lava totiweke hi moya? Va va seketela swinene hi ku va pfuna entirhweni wo chumayela hi Mfumo. (Mat. 24:14; Yoh. 14:12) Hambileswi nhlayo ya vatotiwa lava nga laha misaveni yi hungutekeke eka makume ya malembe lama hundzeke, nhlayo ya tinyimpfu tin’wana yi andzile. Loko lava nga ni ntshembo wo hanya laha misaveni va hlanganyela entirhweni wo chumayela, loko va swi kota va va vavuri va evhangeli va nkarhi hinkwawo, va seketela vatotiwa eku endleni ka ntirho wo endla vadyondzisiwa. (Mat. 28:19, 20) Lexi nga fanelangiki xi honisiwa i lunghelo ro seketela ntirho lowu hi ku endla minyikelo ya timali hi tindlela to hambana-hambana.
15. Xana Mukreste ha un’we u fanele a angula njhani eka swakudya swa moya leswi lunghiseleriweke hi nkarhi hi hlonga ni le ka swiboho swa nhlengeletano leswi endliwaka hi rona?
15 Tanihi Vakreste ha un’we-un’we, xana hi swi teka njhani swakudya swa moya leswi lunghiseleriweke hi nkarhi lowu faneleke leswi hlonga ro tshembeka ri swi lunghiselelaka hi ku tirhisa minkandziyiso leyi sekeriweke eBibeleni na hi minhlangano ni tinhlengeletano ta Vukreste? Xana hi swi dya hi ntsako ivi hi tirhisa leswi hi swi dyondzaka hi ku swi rhandza? Xana hi angula njhani eka swiboho swa nhlengeletano leswi endliwaka hi hlonga? Loko hi yingisa nkongomiso lowu hi wu kumaka hi ku swi rhandza hi kombisa leswaku hi ni ripfumelo eka ndlela leyi Yehovha a nyikelaka nkongomiso ha yona.—Yak. 3:17.
16. Ha yini Vakreste hinkwavo va fanele va yingisa vamakwavo va Kreste?
16 Yesu u te: “Tinyimpfu ta mina ti yingisa rito ra mina, naswona ndza ti tiva, kutani ta ndzi landzela.” (Yoh. 10:27) Vakreste lava totiweke va endla tano. Ku vuriwa yini hi lava va ‘fambaka na’ vona? Vanhu volavo va fanele va yingisa Yesu. Va fanele va tlhela va yingisa vamakwavo va yena. Phela, vutihlamuleri lebyikulu byo kongomisa ni ku khathalela vanhu va Xikwembu byi nyikiwe vona. Xana ku yingisa rito ra vamakwavo va Kreste swi katsa yini?
17. Ku yingisa ntlawa wa hlonga swi katsa yini?
17 Hlonga ro tshembeka ni ro tlhariha namuntlha ri yimeriwa hi Huvo leyi Fumaka, leyi rhangelaka yi tlhela yi kongomisa ntirho wo chumayela hi Mfumo emisaveni hinkwayo. Swirho swa Huvo leyi Fumaka i vakulu lava nga ni ntokoto, lava totiweke hi moya. Ku nga vuriwa leswaku vona hi “lava rhangelaka” exikarhi ka hina. (Hev. 13:7) Leswi va khathalelaka vahuweleri va Mfumo va kwalomu ka 7 000 000 emisaveni hinkwayo emavandlheni yo tlula 100 000, valanguteri lava lava totiweke va ni “swo tala swo swi endla entirhweni wa Hosi.” (1 Kor. 15:58) Ku yingisa ntlawa wa hlonga swi vula ku tirhisana hi ku helela ni Huvo ya rona leyi Fumaka.
Lava Va Yingisaka Hlonga Va Katekisiwa
18, 19. (a) Lava yingisaka hlonga ro tshembeka ni ro tlhariha va katekisiwa njhani? (b) Xana hi fanele hi tiyimisela yini?
18 Ku sukela loko ri vekiwile, hlonga ro tshembeka ni ro tlhariha a ri “[tisa] vo tala eku lulameni.” (Dan. 12:3) Vanhu volavo va katsa lava nga ni ntshembo wa ku pona loko ku lovisiwa mafambiselo lawa yo homboloka ya swilo. Hakunene ku va la lulameke emahlweni ka Xikwembu i nkateko!
19 Ku nga ri khale, loko “muti wo kwetsima, Yerusalema Lowuntshwa [lowu vumbiwaka hi vanhu va 144 000], wu xika hi le tilweni wu huma eka Xikwembu, wu lunghisiwe wonge i mutekiwa a tisasekisele nuna wa yena,” xana lava yingiseke rito ra hlonga va ta humeleriwa hi yini? Bibele yi ri: “Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” (Nhlav. 21:2-4) Kutani hi ni swivangelo swo tala swo yingisa Kreste ni vamakwavo va yena lava tshembekaka lava totiweke hi moya.
U Dyondze Yini?
Hi byihi vumbhoni lebyi nga kona bya leswaku Yehovha u tshemba hlonga ro tshembeka ni ro tlhariha?
• I yini leswi kombisaka leswaku Yesu Kreste u tshemba ntlawa wa hlonga hi ku helela?
• Ha yini hi fanele hi tshemba mulanguteri la tshembekaka?
• Hi swi kombisa njhani leswaku ha ri tshemba hlonga?
[Swivutiso Swa Dyondzo]
[Xifaniso lexi nga eka tluka 25]
Xana wa swi tiva leswaku Yehovha u hlawule mani leswaku a va mutekiwa wa le nkarhini lowu taka wa N’wana wa yena?
[Xifaniso lexi nga eka tluka 26]
Yesu Kreste u veke ‘swilo’ swa yena ehenhla ka hlonga ro tshembeka ni ro tlhariha
[Xifaniso lexi nga eka tluka 27]
Loko hi hlanganyela entirhweni wo chumayela, hi seketela vatotiwa