«Jaʼ chchiʼinic batel li Chʼium Chij[e]»
«Jaʼ chchiʼinic batel li Chʼium Chij[e]»
«Jaʼ chchiʼinic batel li Chʼium Chij ti buyuc noʼox chbate.» (APO. 14:4)
1. ¿Kʼuxi laj yakʼ ta ilel li melel yajtsʼaklomtak Jesús ti jpʼel ta yoʼonton tstsʼakliike?
OY XAʼOX van chibuk jabil xchiʼuk oʼlol chchol mantal li Jesuse. Kʼalal laj yaʼiik li kʼusi laj yakʼ ta chanel Jesús te ta «nail tsobobbail [...] ta Capernaume», ep yajtsʼaklomtak ti chopol laj yaʼiike, jaʼ yuʼun «isutic batel; muʼyuc xa bu la xchiʼinic batel ta xanubal». Akʼo mi jech, kʼalal la sjakʼbe li lajcheb yajtsʼaklomtak Jesús mi tskʼan chbatik eke, xi la stakʼ li Simón Pedroe: «Cajval, ¿bochʼo yan chbat jchiʼincutic? Voʼot noʼox chavalbuncutic li cʼop sventa cuxlejal sbatel osile. Li vuʼuncutique laj xa jchʼunotcutic, laj xa jnaʼcutic ti voʼot Cristoote, ti voʼot Tʼujbilot yuʼun Diose» (Juan 6:48, 59, 60, 66-69). Li melel yajtsʼaklomtak Jesuse muʼyuk bu laj yiktaik. Li ta mas jelavel kʼalal yichʼojik xaʼox chʼul espiritue jech-o la stsʼakliik echʼel (Hech. 16:7-10).
2. 1) ¿Buchʼu jaʼ li «jʼabtel ti jun [«tukʼ», NM] yoʼnton [...], ti lec bije» xchiʼuk li «jchabina ti jun [«tukʼ», NM] yoʼnton[e]»? 2) ¿Kʼu yelan lek skʼoplal staoj tal li j-abtele?
2 ¿Kʼusi stakʼ xkaltik ta sventa li tʼujbil yajtsʼaklomtak Jesús ta jkʼakʼaliltik ti chbatik ta vinajele? Li ta albil kʼop laj yal ta sventa li senyail ti «liʼ xa [oye] xchiʼuk li slajebal kʼusitik chkʼotanuk ta pasele», li Jesuse te laj yalbe skʼoplal ti jaʼ li «jʼabtel ti jun [«tukʼ», NM] yoʼnton [...], ti lec bije» xchiʼuk «jchabina ti jun [«tukʼ», NM] yoʼnton» li tʼujbil yajtsʼaklomtak liʼ ta Balumile (Mat. 24:3, NM, 45; Luc. 12:42). Skotol li j-abtel taje lek tajek skʼoplalik, yuʼun «chchiʼinic batel li Chʼium Chij ti buyuc noʼox chbate» (kʼelo Apocalipsis 14:4, 5). Ta jujuntal taje tojol tseb skʼoplalik li ta mantale, yuʼun jaʼ ti muʼyuk bu skapoj sbaik li ta chanubtasel chakʼ «mucʼta lum Babilonia[e]», li jventainvanej yuʼun skotol jecheʼ relijionetik ta spʼejel Balumile (Apo. 17:5). «Me jutuc muʼyuc xtabat yepalcʼopic» ta sventa mantal xchiʼuk muʼyuk xkuchojbeik yikʼobal li sbalumil Satanase (Juan 15:19). Ta mas tsʼakal une, li buchʼutik tʼujbil chbatik ta vinajele tstsʼakliik-o echʼel kʼalal to ta vinajel li Chʼiom Chije (Juan 13:36).
3. ¿Kʼu yuʼun skʼan jpat koʼontontik ta stojolal li j-abtele?
3 Li Jesuse yakʼojbe ta sba li tukʼil pʼijil j-abtel ti akʼo «smacʼlin [...] cʼalal yorail ta xveʼi[k]» li «xchiʼiltac ta abtel[e]», jaʼ xkaltik, li jujun buchʼutik tʼujbile. Maʼuk noʼox akʼbat sventain li «xchiʼiltac ta abtel[e]», moʼoj, yuʼun akʼbat «sventain scotol cʼusitic oy yuʼun li yajvale» (Mat. 24:45-47). Li ta kʼusitik yuʼun yajval abtele te tsakal skʼoplal li «epal cristianoetic» ta yan chijetik ti yantik x-epaje (Apo. 7:9; Juan 10:16). Li tʼujbil yajtsʼaklomtak Cristo xchiʼuk li yan chijetike, ¿mi mu skʼanuk van spat yoʼontonik ta stojolal li j-abtel ti jaʼ vaʼanbil yuʼun Jesuse? Ep srasonal ti kʼu yuʼun sta-o jpat koʼontontik ta stojolal li j-abtel taje, pe oy chib srasonal ti mas tsotse: 1) li Jeovae spatoj yoʼonton ta stojolal xchiʼuk 2) li Jesús eke spatoj yoʼonton ta stojolal. Jkʼeltikik kʼu yuʼun spatoj tajek yoʼontonik ta stojolal tukʼil pʼijil j-abtel li Jeova xchiʼuk Jesucristoe.
Spatoj yoʼonton ta stojolal j-abtel li Jeovae
4. ¿Kʼu yuʼun xuʼ jpat lek koʼontontik li ta veʼlil ta mantal chakʼ li tukʼil pʼijil j-abtele?
4 ¿Kʼu yuʼun ti x-akʼ yuʼun veʼlil ta mantal li j-abtel ti tukʼ xchiʼuk ti lek pʼije, ti ta yorail chakʼe xchiʼuk ti lek tsotsutik yuʼune? Xi chal li Jeovae: «Vuʼun ta jbijubtasot; vuʼun ta jchanubtasot lec. Ta xcacʼbot lec avil bu beal tscʼan chabat; scotol cʼacʼal te oy o jsat ta atojol» (Sal. 32:8). Jech kʼuchaʼal chkiltike, beiltasbil yuʼun Jeova li j-abtele. Jaʼ yuʼun xuʼ jpat lek koʼontontik li ta pʼijubtasel chakʼbutik ta Vivlia li j-abtele, li kʼusitik yichʼoj aʼibel smelolale xchiʼuk li beiltaseletik chakʼe.
5. ¿Kʼu yuʼun lek jamal xvinaj ti oy chʼul espiritu ta stojolal li j-abtele?
5 Jech xtok, li Jeovae chakʼbe bendision ta xchʼul espiritu li tukʼil pʼijil j-abtele. Akʼo mi mu xkiltik li chʼul espiritue, xuʼ chkiltik li kʼusi chkʼot ta pasel yuʼun ta stojolal krixchanoetik ti oy ta stojolalike. Jnoptik noʼox avaʼi ti kʼusi kʼotem ta pasel yuʼun li j-abtel ta sventa yalbel skʼoplal Jeova, xNichʼon xchiʼuk li Ajvalilal yuʼun Diose. Mas ta 230 mukʼtik lumetik xchiʼuk osiletik yakal xcholbeik skʼoplal Ajvalilal yuʼun Dios li yajtuneltak Jeovae. ¿Mi mu jaʼuk slekil vinajeb li chol mantal ta spʼejel Balumil ti oy ta stojolal xchʼul espiritu Dios li j-abtele? (Kʼelo Hechos 1:8.) Sventa chakʼbe sveʼelik ta mantal ta yorail noʼox li yajtuneltak Jeova ta spʼejel Balumile, li jtsop krixchanoetik taje oy kʼusitik tsots skʼoplal skʼan snopik. Kʼalal tspasik li kʼusitik kʼot ta nopel yuʼunike ta me xakʼik ta ilel kʼanelal, ti mu jtoybaikuke xchiʼuk yantik yabtel chʼul espiritu (Gál. 5:22, 23).
6, 7. ¿Kʼu to yepal spatoj yoʼonton ta stojolal tukʼil j-abtel li Jeovae?
6 Sventa xkaʼibetik lek smelolal kʼu to yepal spatoj yoʼonton ta stojolal j-abtel li Jeovae, jnoptik avaʼi li kʼusi yalojbe ta melele. Xi la stsʼiba li jtakbol Pabloe: «Ta xichʼ jupanel li oqʼuese, jech ta xchaʼcuxiic scotol li bochʼotic chamenique, jech mu xa snaʼ xchamic o. Jech ec li vuʼutique chcʼataj ta achʼ li jbecʼtaltique. Yuʼun li cʼusi snaʼ xcʼaʼe tscʼan cʼatajesel ta cʼusi mu snaʼ xcʼaʼ. Li cʼusi oy slajebe tscʼan cʼatajesel ta cʼusi muʼyuc slajeb», xi (1 Cor. 15:52, 53). Kʼalal tukʼ chtunik ta stojolal Dios xchiʼuk ti chchamik kʼuchaʼal jun krixchano ti snaʼ xkʼaʼ sbekʼtale, li tʼujbil yajtsʼaklomtak Cristoe chichʼik chaʼkuxesel kʼuchaʼal kuxlejaletik ti mu xvinaj ta kʼelele. Pe maʼuk noʼox kuxlejal sbatel osil tstaik: ch-akʼbatik jun kuxlejal ti mu snaʼ xlaje, jaʼ xkaltik, kuxulik xa-o xchiʼuk ti mu xa stakʼik lajesele. Jech xtok, mu xa bu chkʼaʼik, yuʼun li sbekʼtal ch-akʼbatike mu xa bu tsok, xchiʼuk ti yaʼeluk xtoke, mu xa kʼusi chtun yuʼunik sventa chkuxiik-o. Li Apocalipsis 4:4 te chal ti te chotolik ta mukʼta chotlebaletike xchiʼuk oy skoronail sjolik ti pasbil ta kʼanal takʼine, taje jaʼ skʼan xal ti chkʼotik ta ajvaliletike. Pe maʼuk noʼox maʼ taje.
7 Xi chal li Apocalipsis 19:7, 8: «Laj xa sta yorail qʼuin nupinel yuʼun li Chʼium Chije; lec xa smeltsanoj sba li yajnile. Iʼacʼbat xa slap scʼuʼ pasbil ta lino no, batsʼi sac ta jyalel, oy xojobal. Yuʼun li lequil lino noe jaʼ senyail li cʼusitic tucʼ spasojic li bochʼo vocʼbilic yuʼun Diose». Li yajtsʼaklomtak Cristo ti chbatik ta vinajele tʼujbilik yuʼun Jeova sventa xkʼotik ta slekom xNichʼon ta jelavel. Jech kʼuchaʼal laj xa kiltike, mu xa bu chlajik, muʼyuk bu chkʼaʼik, staoj smotonik ta ajvalilal xchiʼuk li jun lekilal ti chkʼotik ta slekom Chʼiom Chije. Li mukʼta matanaletik tstaik taje jaʼ te jamal chakʼ ta ilel ti spatoj yoʼonton Dios ta stojolal li buchʼutik chbatik ta vinajele, ti «chchiʼinic batel li Chʼium Chij ti buyuc noʼox chbate».
Spatoj yoʼonton ta stojolal j-abtel li Jesuse
8. ¿Kʼuxi jnaʼojtik ti spatoj tajek yoʼonton ta stojolal tʼujbil yajtsʼaklomtak li Jesuse?
8 ¿Kʼusi sprevail oy ti spatoj tajek yoʼonton ta stojolal tʼujbil yajtsʼaklomtak li Jesuse? Jkʼeltikik. Kʼalal slajeb xaʼox akʼobal kuxi liʼ ta Balumile, xi laj yalbe li buluchib tukʼil yajtakboltake: «Voʼoxuc ti jun avoʼntonic liʼ achiʼinojicun o cʼalal laj quichʼilan contrainele». Vaʼun xi laj yal kʼusi tspas ta melele: «Li vuʼun eqʼue ta xcacʼ apasic mantal jech chac cʼu chaʼal laj yacʼbun jpas mantal li Jtote. Yuʼun jech te chaveʼic, chavuchʼic voʼ ta jmexa ti bu ta jpas mantale. Jech noxtoc te chachotiic ta chotlebaletic sventa chachapanic li lajchaʼchop israeletique» (Luc. 22:28-30). Li trato la spas Jesús xchiʼuk li buluchib yajtakboltake, jaʼ me te skʼoplal chkʼot skotol li 144,000 tʼujbil yajtsʼaklomtake (Luc. 12:32; Apo. 5:9, 10; 14:1). Jnoptik jlikeluk avaʼi liʼe: ¿mi la van yalbe ta melel Jesús ti ch-ajvalilal xchiʼuk li tʼujbil yajtsʼaklomtak ti muʼyukuk bu spatoj-o yoʼontone?
9. ¿Kʼusitik smakojbe skʼoplal li «cʼusitic oy yuʼun» Cristoe?
9 Jech xtok, li «cʼusitic oy yuʼun» Jesucristoe yakʼojbe sbain li tukʼil pʼijil j-abtele, jaʼ xkaltik, skotol li kʼusitik sventa Ajvalilal yuʼun Dios liʼ ta Balumile (Mat. 24:47). Jlom li kʼusitik taje jaʼ li smukʼta nail tsʼibajom yuʼun yajrextikotak Jeovae, li beteletike, li Salonetik sventa Mukʼta Tsobajele xchiʼuk li Salonetik sventa Tsobobbail ta spʼejel Balumile, li xcholel mantal sventa Ajvalilal yuʼun Diose xchiʼuk li spasel ta yajtsʼaklom Cristo li krixchanoetike. ¿Mi oy van buchʼu jech chakʼbe sbain li kʼusitik yuʼun ti tsotsik skʼoplal ti muʼyukuk spatoj yoʼonton ta stojolale?
10. ¿Kʼusi yan sprevail ti tskolta li yajtsʼaklomtak Jesucristo ti chbatik ta vinajele?
10 Kʼalal jutuk xaʼox skʼan xbat ta vinajel ti chaʼkuxiem xaʼox li Jesuse, laj yakʼ sba ta ilel ta stojolal li tukʼil yajtsʼaklomtake xchiʼuk xi laj yalanbee: «Naʼic me, te jchiʼinojoxuc o scotol cʼacʼal cʼalal to ta slajebal cʼacʼal» (Mat. 28:20). ¿Mi kʼotem van ta pasel yuʼun ti kʼusi laj yale? Veno, li voʼlajuneb jabil echʼem tale epajem tajek li tsobobbailetik yuʼun yajrextikotak Jeovae yuʼun mas ta 40% epajem: kʼajomal toʼox 70,000, avi une oy xa mas ta 100,000. ¿Xchiʼuk jayib van achʼ yajtsʼaklomtak Jesús ochemik li ta steklumal Diose? Li voʼlajuneb jabil taje jutuk xa mu chanibuk miyon xchiʼuk oʼlol yichʼojik voʼ, mas ta vaxakib sien krixchanoetik ta jujun kʼakʼal. Ti kʼu xa noʼox yepal epajem taje jamal chakʼ ta ilel ti jaʼ yakal chbeiltasatik yuʼun Cristo ta stsobajelik li tʼujbil yajtsʼaklomtak ti chbatik ta vinajele xchiʼuk ti koltabilik ta spasel ta yajtsʼaklom Cristo li krixchanoetike.
Li j-abtele tukʼ xchiʼuk pʼij
11, 12. ¿Kʼuxi yakʼoj ta ilel ti tukʼ xchiʼuk pʼij li j-abtele?
11 Ta skoj ti spatoj tajek yoʼontonik ta stojolal j-abtel li Jeova xchiʼuk Jesuse, ¿mi mu van skʼanuk jpat koʼontontik ta stojolal ek? Skʼan, yuʼun li j-abtele tukʼ ta skoj ti spasoj li kʼusi akʼbat sbaine. Jun svinajeb taje jaʼ Li Jkʼel osil ta toyole, ti oy xa ta 130 jabil yakal chlokʼe. Yan sprevail xtoke jaʼ li jtsobajeltik xchiʼuk jmukʼta tsobajeltik ti tstsatsubtas tajek xchʼunel koʼontontike.
12 Li tukʼil j-abtele pʼij xtok. Muʼyuk ti snaʼ xa skotol tspas sba ti jaʼ xa jbabe ta stojolal Jeovae, pe jech xtok un oy kʼusi tspas ta anil kʼalal lek jamal xvinaj li kʼusi tskʼan yoʼonton Diose. Jkʼeltik avil. Li jbabeetik ta jecheʼ relijione lek noʼox chilik li kʼusitik chopol tspas krixchanoetik ti jaʼ noʼox tskʼan sba stukike. Pe li j-abtel ti oy spʼijile ta yorail noʼox tspʼijubtasutik ta sventa li spetsʼtak Satanase, taje spas yuʼun ta skoj ti oy ta stojolal li sbendision Jeova xchiʼuk Jesuse. Jaʼ yuʼun sta-o ti jpat lek koʼontontik ta stojolale. Pe ¿kʼuxi xuʼ xkakʼtik ta ilel?
Jchiʼintik echʼel li buchʼutik tʼujbil ti chchiʼinik echʼel li Chʼiom Chije
13. ¿Kʼuxi xuʼ xkakʼtik ta ilel ti jpatoj koʼontontik ta stojolal li tukʼil pʼijil j-abtel jech kʼuchaʼal laj yal j-alkʼop Zacariase?
13 Li slivroal Vivlia ta Zacariase chalbe skʼoplal «lajuneb viniquetic» ti nopajik echʼel ta stojolal «jun judá vinic» xchiʼuk ti xi laj yalbeike: «Ta xbat jchiʼinotcutic ec, yuʼun laj caʼicutic ti te oy ta atojolic li Diose» (kʼelo Zacarías 8:23). Jech kʼuchaʼal chkiltike, kʼalal la skʼoponike la stunesik li jpʼel kʼop «atojolic», xie, jaʼ yuʼun li «vinic» taje jaʼ skʼoplal jtsop krixchanoetik. Li «vinic» ta jkʼakʼaliltike jaʼ skʼoplal li yajtsʼaklomtak Cristo ti tʼujbilik ta chʼul espiritu ti liʼ to oyik ta Balumile, ti te skʼoplalik li ta «Israel [...] sventa Diose» (Gál. 6:16). Yan li «lajuneb viniquetic ta jujuchop cʼop ta scotol banamil[e]» jaʼ skʼoplal li epal krixchanoetik ta yan chijetike. Jech kʼuchaʼal chchiʼinik echʼel buyuk noʼox chbat Jesús li tʼujbil yajtsʼaklomtake, jaʼ jech chchiʼinik echʼel tukʼil pʼijil j-abtel li epal krixchanoetike. Li buchʼutik ta epal krixchanoetike mu me stakʼ ta jyalel ti chkʼexavik ta xchiʼinel ta abtel li buchʼutik ch-ochik ta vinajele (Heb. 3:1). Mu me xchʼay ta joltik ti Jesuse mu xkʼexav ta yalbel «jchiʼiltac ta voqʼuel» li yajtsʼaklomtak ti tʼujbilik ta chʼul espiritue (Heb. 2:11).
14. ¿Kʼuxi xuʼ tukʼuk koʼonton jkoltatik li yermanotak Cristoe?
14 Li Jesucristoe laj yal ti jaʼ la chichʼ koltael chaʼi kʼalal oy buchʼu chkoltabat li yermanotake (kʼelo Mateo 25:40). ¿Kʼuxi xuʼ skoltabeik yermanotak Cristo li buchʼutik spatoj yoʼonton chkuxi ta balumile? Ti kʼusi mas tsots skʼoplale jaʼ ti skoltaik ta xcholel mantal sventa Ajvalilal yuʼun Diose (Mat. 24:14, Ch; Juan 14:12). Ti oy xa ta sjaylajunebal jabil echʼem tale yantik xa xjutukaj echʼel ta Balumil li tʼujbil yajtsʼaklomtak Cristoe, pe li yan chijetike epajem. Kʼalal chcholbeik skʼoplal Ajvalilal yuʼun Dios li yan chijetike yakal skoltaik ta yabtel ta spasel yajtsʼaklomtak Cristo li buchʼutik tʼujbil chbatik ta vinajele. Jech, mi stakʼ chilike ch-abtejik ta tsʼakal ora sventa chkoltavanik (Mat. 28:19, 20). Xchiʼuk mu me xchʼay ta joltik xtok ti kʼutik yelan xuʼ xi jkoltavan ta takʼin ta sventa li abtelal taje.
15. ¿Kʼu yelan skʼan xkiltik li veʼlil ta mantal chakʼ j-abtele xchiʼuk li kʼusitik chkʼot ta nopel yuʼun ta sventa organisasione?
15 ¿Kʼusi ta jnoptik ta jujuntal ta sventa li veʼlil ta mantal ti ta yorail noʼox chakʼ li tukʼil j-abtel, ti jaʼ li ta vunetik ti chalbe skʼoplal Vivlia xchiʼuk li ta tsobajeletike? ¿Mi ta muyubajel ta jchʼamtik xchiʼuk mi chkakʼ ta jkuxlejaltik ta anil li kʼusi ta jchantike? ¿Kʼu yelan chkaʼitik li kʼusitik chkʼot ta nopel ta sventa organisasione? Mi ta sjunul koʼontontik ta jchʼamtik li beiltasel yuʼun j-abtele, ta me xkakʼtik ta ilel ti jpatoj koʼontontik ta stojolal Jeovae xchʼik ti kʼuyelan snaʼ x-abteje (Sant. 3:17).
16. ¿Kʼu yuʼun skʼan xaʼibeik kʼusi chal yermanotak Cristo li yajtsʼaklomtake?
16 Xi laj yal li Jesuse: «Li jchijtaque chaʼibicun li jcʼope xchiʼuc xcotquinan, jech chistsʼaclinicun batel» (Juan 10:27). Batsʼi melel, jaʼ jech xuʼ xkaltik ta stojolal li yajtsʼaklomtak Cristo ti chbatik ta vinajele. ¿Kʼusi skʼan spasik li yan chijetik une? Skʼan xaʼibeik li kʼusi chal Jesuse, pe skʼan xaʼibeik xtok li kʼusi chal yermanotake, ti jaʼakʼbil sbainik li xchabiel ta mantal steklumal Diose. Pe ¿kʼusi smakoj batel ti ta xkaʼibetik li kʼusi chalike?
17. ¿Kʼusi smakoj ti ta jchikintatik li kʼusi chal j-abtele?
17 Li j-abtel ti tukʼ xchiʼuk ti pʼije oy yajkʼopojel li avie: jaʼ li Jtsop Jbeiltasvaneje, ti tsbeiltas xchiʼuk tskʼel li xcholbel skʼoplal Ajvalilal yuʼun Dios ta spʼejel Balumile. Li buchʼutik ta Jtsop Jbeiltasvaneje jaʼ tʼujbil moletik ti chbatik ta vinajel ti lek chanemike. Li buchʼutik taje xuʼ xkaltik ti jaʼik li «bochʼotic sventainoj[utike]» (Heb. 13:7). Li jkʼelvanejetik ti yichʼojik tʼujele «[skotol] ora [ep ch-abtejik-o] yuʼun li Cajvaltique», yuʼun mas xa ta vukub miyon li jchol mantaletik ti oyik mas ta sien mil tsobobbailetik ta spʼejel Balumile (1 Cor. 15:58). Jaʼ yuʼun kʼalal ta jchikintatik lek kʼusi chal li j-abtele jaʼ skʼan xal ti ta jkoltatik bu kʼalal xuʼ kuʼuntik li Jtsop Jbeiltasvanej yuʼune.
Li bendisionetik ta jtatik kʼalal ta jchikintabetik li j-abtele
18, 19. 1) ¿Kʼusi bendisionetik tstaik li buchʼutik chchikintabeik li kʼusi chal tukʼil pʼijil j-abtele? 2) ¿Kʼusi skʼan jpʼeluk ta koʼontontik spasel?
18 Ti kʼalal laj yichʼ vaʼanel li tukʼil j-abtel ti lek pʼije, ep krixchanoetik la «[stojobtas] batel ta lequil be» (Dan. 12:3, Ch). Taje jaʼik li krixchanoetik ti spatoj yoʼonton kuxul chkomik kʼalal chichʼ lajesel li chopol balumil avie. ¡Jaʼ jun mukʼta bendision ti ta jkʼupintik ti tukʼoyutik ta stojolal Diose!
19 Li ta jelavele, li «chʼul lume, jaʼ li achʼ Jerusalene» (ti jaʼik li 144,000), «te [chlik] tal ta stojol Dios ta vinajel» ti chapal «jech chac cʼu chaʼal jun tseb ti lec smeltsanoj sba cʼalal yuʼun xa chnupin[e]». ¿Kʼusi bendisional tstaik li buchʼutik la xchikintabeik kʼusi chal j-abtel kʼalal mi kʼot ta pasel taje? Xi chal ta melel li Vivliae: «Jaʼ Dios yuʼunic o [o te oy-o ta stojolalik]. Li Diose ta scusbe loqʼuel scotol yaʼlel satic, jech muʼyuc xa bochʼo chcham, muʼyuc xa bochʼo chat yoʼnton, muʼyuc xa bochʼo ch-ocʼ, muʼyuc xa bochʼo cʼusi cʼux chaʼay. Yuʼun ilaj xa scʼoplal scotol ti jech toʼox oy ta baʼyuque» (Apo. 21:2-4). Jaʼ yuʼun chaʼa, maʼuk noʼox me skʼan jchikintabeik li kʼusi chal Cristoe, skʼan jchikintabetik ek li yermanotak ti tʼujbilike, yuʼun staik-o ti jpat lek koʼontontik ta stojolalike.
¿Kʼusi achanoj?
• ¿Kʼusi sprevailtak oy ti spatoj yoʼonton ta stojolal tukʼil pʼijil j-abtel li Jeovae?
• ¿Kʼuxi jnaʼojtik ti spatoj tajek yoʼonton ta stojolal j-abtel li Jesuse?
• ¿Kʼu yuʼun sta-o jpat koʼontontik ta stojolal li «jchabina ti jun [«tukʼ», NM] yoʼnton[e]»?
• ¿Kʼuxi chkakʼtik ta ilel ti jpatoj koʼontontik ta stojolal li j-abtele?
[Sjakʼobiltak sventa xchanobil]
[Lokʼol ta pajina 25]
¿Mi xa naʼ buchʼutik stʼujoj Jeova sventa xkʼotik ta slekom xNichʼon li ta jelavele?
[Lokʼol ta pajina 26]
Li Jesucristoe yakʼojbe sbain «cʼusitic oy yuʼun» li tukʼil pʼijil j-abtele
[Lokʼol ta pajina 27]
Ta jkoltatik li yajtsʼaklomtak Cristo ti tʼujbilik ta chʼul espiritu kʼalal ta xkalbetik skʼoplal li Ajvalilal yuʼun Diose