‘Dorssay Biyoosaa Eti Kaalloosona’

“Dorssai biyoosaa ubbaa eti kaalloosona.” —AJJUUTAA 14:4.

1. Yesuusi erissiyo tumu ashkkarati a kaalliyoogaa waatidi xeellidonaa?

YESUUSI ba haggaazuwau naˈˈu layttaa bagga heeran, “Qifirinaahooma kataman Aihuda woosa keettan tamaarissiiddi” deˈees. Timirtte gelennaagaappe denddidaagan, “Yesuusa kaalliyaageetuppe daroti a aggi bayidi, guyye simmidosona; naa77antto a kaallibookkona.” Yesuusi qassi ba 12⁠u erissiyo ashkkarata, etikka aggi bayidi baanau koyiyaakkonne oychin, Simoon PHeexiroosi zaaridi, “Godau, nuuni ookko baanee? Neeyyo merinaa de7⁠uwaa qaalai de7⁠ees. Neeni Xoossaa geeshshaa gidiyoogaa nuuni ammanoosinne eroos” yaagiis. (Yohaannisa 6:48, 59, 60, 66-69) Yesuusi erissiyo tumu ashkkarati a kaalliyoogaa aggibookkona. Geeshsha ayyaanan tiyetti simmidi, eti Yesuusa kaaletuwaa aggennan kaallidosona.—Oosuwaa 16:7-10.

2. (a) “Ammanettida wozannaama ashkkari” oonee? (b)  Ashkkaray “Dorssai biyoosaa” kaalliyoogaa muruta ogiyan waati bessidee?

² Geeshsha ayyaanan tiyettida ha wodiyan deˈiya Kiristtaanetubaa woygana danddayiyoo? Ba “yuussaayyoonne wodiyaa wurssettaayyo” malaata gidiya hiraagaa yootido wode, Yesuusi saˈan deˈiya, geeshsha ayyaanan tiyettida ba erissiyo ashkkarata citan ‘ammanettida wozannaama ashkkara’ giidi yootiis. (Maatiyoosa 24:3, 45) Ashkkaray citan “Dorssai biyoosaa ubbaa” kaalliyoogaa muruta ogiyan bessiis. (Ajjuutaa 14:4, 5 nabbaba.) Ashkkaraa yameti, worddo haymaanoote ubbaa xaaxa waaxa oyqqida ‘Gita Baabilooni’ timirttiyaaninne oosuwan, ayyaanaaban banttana tunissennan geeshsha gididi deˈidoosna. (Ajjuutaa 17:5) “Eti mulekka worddoti erokkona;” worddo timirtte tamaarissibookkona; Seexaana alamiyan eti ‘moorettennan’ deˈidosona. (Yohaannisa 15:19) Sinttappe, saˈan deˈiya tiyettidaageetuppe attidaageeti Dorssaakko saluwaa ‘kaallana.’—Yohaannisa 13:36.

3. Nuuni ashkkaran ammanettiyoogee keehippe koshshidoy aybissee?

³ Yesuusi ammanettida wozannaama ashkkaraa “ba so asau,” hegeekka ashkkaratussi huuphe xekkan “qumaa koshshiyo wodiyan immana mala” sunttiis. I he ashkkaraa “babaa ubbaa” bollikka sunttiis. (Maatiyoosa 24:45-47) “Babaa” geetettidaagee dariiddi deˈiya ‘hara dorssaa’ yame gidida “zawai bainna daro asaa” gujjees. (Ajjuutaa 7:9; Yohaannisa 10:16) Tiyettidaageetunne ‘hara dorssaa’ yameti ubbay huuphe xekkan bantta bolli sunttettida ashkkaran ammanettana koshshennee? Nuuni ashkkaran ammanettana bessiyo daro gaasoti deˈoosona. Naaˈˈu waanna gaasoti: (1) Yihooway ashkkaran ammanettees. (2) Yesuusikka ashkkaran ammanettees. Xoossaa Yihoowaynne Yesuusi Kiristtoosi ammanettida wozannaama ashkkaran wozanappe ammanettiyoogaa bessiya naqaashata ane pilggoos.

Yihooway Ashkkaran Ammanettees

4. Ammanettida wozannaama ashkkaray giigissiyo ayyaana quman nuuni ammanettana danddayiyoy aybissee?

⁴ Ammanettida wozannaama ashkkaray koshshiya wodiyan nuussi ayyaana qumaa giigissanaadan danddayissiyay aybakko akeeka. Yihooway: “Taani nena erissananne neeni baanau bessiya ogiyaa nena tamaarissana; taani nena zorananne naagana” yaagiis. (Mazamure 32:8) Ee, Yihooway ashkkarau kaaletuwaa immees. Yaatiyo gishshau, ashkkaray nuussi immiyo Geeshsha Maxaafaa timirttiyan, akeekaaninne kaaletuwan wozanappe ammanettana danddayoos.

5. Xoossaa ayyaanay ashkkaraa maaddiiddi deˈiyoogaa bessiyay aybee?

 ⁵ Yihooway ashkkarau geeshsha ayyaanaa immiyoogankka a anjjiis. Yihoowa ayyaanay beettennaba gidikkonne, he ayyaanay imettidoogeeti oottiyooban qonccidi beettees. Ammanettida wozannaama ashkkaray Xoossaa Yihoowabaa, a Naˈaabaanne Kawotettaabaa alame yuushuwan markkattiyoogan poliyo oosuwaa qoppa. Yihoowayyo goynniyaageeti Kawotettaa kiitaa 230⁠ppe dariya biittatuuninne haruurotun minttidi awaajjiiddi deˈoosona. Hagee Xoossaa ayyaanay he ashkkaraa maaddiiddi deˈiyoogaa bessiya qoncce naqaasha gidennee? (Oosuwaa 1:8 nabbaba.) Alame yuushuwan Yihoowa asaassi koshshiya wodiyan ayyaana qumaa giigissanau, ashkkaray keehippe koshshiya daro kuushshata kuuyana bessees. He kuushshata kuuyiyo wodenne oosuwan peeshshiyo wode, ashkkaray siiquwaa, ashkketettaanne geeshsha ayyaanaa ayfiyaa hara macarata qonccissees.—Galaatiyaa 5:22, 23.

6, 7. Yihooway ammanettida ashkkaran ay keenaa ammanettii?

⁶ Yihooway ammanettida wozannaama ashkkaran ay keena ammanettiyaakko akeekanau, he ashkkaraa yametussi ay qaalaa gelidaakko wotta dentta qoppa. Kiitettida PHauloosi: “Malkkatai punettiyo wode, haiqqida asai musenna asa gididi denddana; nuunikka laamettana. Aissi giikko, hagee musiyaagee musennaagaa maayanau bessees; qassi hagee haiqqiyaageekka haiqqennaagaa maayanau bessees” yaagidi xaafiis. (1 Qoronttoosa 15:52, 53) Kiristtoosa kaalliya tiyettidaageeti, Xoossaayyo ammanetti oottidi musiya bollaara hayqqikkonne, merinaa deˈuwau xayenna ayyaana bollaara denddoosona. Etau hayqqenna bollay, giishin merinau xayenna bollay imettees. Eti musenna woykko moorettenna bollaa ekkoosona. Hegee barkka bana ooraxissiya bollaa gidana danddayees. Ajjuutaa 4:4y hayquwaappe denddida hegeeti worqqaa kallachaa goxxidi araatan uttidoogaa yootees. Tiyettida Kiristtaaneta kawotiyo boncho maatay naagees. SHin Xoossay etan ammanettiyoogaa bessiya hara naqaashaykka deˈees.

⁷Ajjuutaa 19:7, 8y: “Dorssaa bullachchaa gallassai gakkido gishshaunne bullashettiyaarakka bullachchaayyo bana giigissido gishshau, . . . bullashettiyaariyyo maayanau liinuwaa giyo kiriyan dadettida phooliya bootta maayoi imettiis. . . . Liinuwaa giyo kiriyan dadettida maayoi geeshshatu xillo oosuwaa” yaagees. Yihooway tiyettida Kiristtaaneta sinttappe ba Naˈaassi bullashettiyaaridan oottidi dooriis. Musenna hanotay, hayqqenna hanotay, kawo gidiyo hanotaynne ‘Dorssaa bullachchan’ bullashettiyaageeta  gidiyo hanotay keehippe gita maata! Ha mino naqaashati “Dorssai biyoosaa ubbaa” kaalliya tiyettidaageetun Xoossay ammanettiyoogaa bessoosona.

Yesuusi Ashkkaran Ammanettees

8. Yesuusi bana kaalliya ayyaanan tiyettidaageetun ammanettiyoogaa waati bessidee?

⁸ Yesuusi bana kaalliya ayyaanan tiyettidaageetun wozanaappe ammanettiyoogau ayba naqaashi deˈii? Saˈan deˈido wurssetta qammi, Yesuusi ba kiittido ammanettida 11⁠tussi qaalaa geliis. I: “Taani paacettiyo wode tana yeggibeennaageeta. Ta kawotettan taani qumaa miyo sohuwan intte maana malanne, uyana mala, qassi tammanne naa77⁠u Israa7⁠eela zaretu bolli pirddiiddi, araatatun uttana mala, ta Aawai tana sunttidoogaadan, taani inttena sunttais” yaagiis. (Luqaasa 22:28-30) He wode Yesuusi 11⁠tuura maacettido maachay 144,000 tiyettida Kiristtaanetu ubbaassi haniyaagaa. (Luqaasa 12:32; Ajjuutaa 5:9, 10; 14:1) Yesuusi etan ammanettennaakko, eti banaara Kawotettan haaranaadan maacettii?

9. “[Kiristtoosabaa] ubbaa” geetettidabay ay ay gujjii?

⁹ Hegaa bollan, Yesuus Kiristtoosi ammanettida wozannaama ashkkaraa “babaa ubbaa bolli,” giishin Xoossaa Kawotettaara gayttida saˈan deˈiya ubbaban sunttiis. (Maatiyoosa 24:47) Abaa geetettidaageetuppe amaridaageeti, alame yuushuwan Yihoowa Markkatu oosuwaa kaalettiya waanna biiruwaa, dumma dumma biittan deˈiya macara biirota, Gita SHiiquwaa Addaraashatanne Kawotettaa Addaraashshata. Kawotettaabaa sabbakiyoonne erissiyo ashkkara oottiyo oosuwaakka gujjees. Issi uri ba alˈˈo miishshaa naaganaadaaninne goˈettanaadan ammanettenna asassi immii?

10. Yesuus Kiristtoosi bana kaalliya tiyettidaageetuura deˈiyoogaa bessiyay aybee?

¹⁰ Hayquwaappe denddida Yesuusi saluwaa baanaappe guuttaa kasetidi, ba ammanettida erissiyo ashkkaratussi qonccidi, etau kaallidi deˈiya qaalaa geliis: “Taani wodiyaa wurssettai gakkanaassikka ubba wode inttenaara de7⁠iyoogaa akeekite.” (Maatiyoosa 28:20) I gelido ha qaalay polettidee? Aadhida 15⁠u layttatun, alame yuushuwan Yihoowa Markkatu gubaaˈiyaa qooday 70,000⁠ppe biidi 100,000⁠ppe dariyaagaa gidiis; hegee xeetaappe 40 kusheppe bolla dicciis giyoogaa. Gujettida ooratta erissiyo ashkkaratubaa shin woygana danddayettii? Aadhida 15⁠u layttan 4.5 miiloone erissiyo ashkkarati xammaqettidosona;  hegee amakaayiyan issi galla 800⁠ppe dariya asay xammaqettees giyoogaa. Ha maalaalissiya dichay Kiristtoosi bana kaalliya tiyettidaageeti gubaaˈiyau shiiqiyo wode eta kaalettiyoogaunne eti erissiyo ashkkara oottiyo oosuwan kaafiyoogau qoncce naqaasha.

Ashkkaray Ammanettiyaagaanne Wozannaama

11, 12. Ashkkaray ammanettiyaagaanne wozannaama gidiyoogaa waati bessidee?

¹¹ Yihoowaynne Yesuus Kiristtoosi ammanettida wozannaama ashkkaran wozanappe ammanettiyaaba gidikko, nuuni shin ammanettana koshshennee? Ashkkaraykka baassi imettida oosuwaa poliyoogan ammanettiyaagaa gidiyoogaa bessiis. Leemisuwau, Wochiyo Keelaa maxeetee 130 gidiya layttau attamettiiddi takkiis. Yihoowa Markkatu gubaaˈiyaa shiiqoti, dumma shiiquwaa, woradaanne awuraajjaa shiiqoti nu ayyaana hanotaa ubba wode minttoosona.

¹² Ammanettida wozannaama ashkkaray otoruwan Yihoowa qofaappe kasetidi oottiyoobi deˈennanne Xoossaa kaaletoy qoncce hanotan issibaassi imettiyo wode polanau gameˈˈenna. Leemisuwau, worddo haymaanootiyaa kaalettiyaageeti Xoossaappe haakkida alamiyaa asaa yaare deˈuwaa qoncce gidenna ogiyan kaafoosona woykko eriiddi coˈˈu giidi aadhoosona. SHin ashkkaray Seexaanaa alamiyaa piriyaappe naagettiyo ogiyaa akeekissiiddi takkiis. Koshshiya wodiyan aadhida eratettay deˈiyo zoriyaa ashkkaray immana danddayidoy Yihoowaynne Yesuus Kiristtoosi a anjjido gishshaassa. Yaatiyo gishshau, nuuni ashkkaran wozanappe ammanettana bessees. Gido shin, ammanettida wozannaama ashkkaran ammanettiyoogaa waatidi bessana danddayiyoo?

Dorssaa Kaalliya Tiyettidaageetuura ‘Ba’

13. Zakkaariyaasa hiraagaa maaraadan, ammanettida wozannaama ashkkaran waanidi ammanettiyoogaa bessana danddayiyoo?

¹³ Geeshsha Maxaafan Zakkaariyaasa maxaafay “tammu asati yiidi, issi Aihuda bitaniyaa maayuwaa macaraa oiqqidi,” “Xoossai inttenaara de7⁠iyoogaa nuuni siyido gishshau, ane nuunikka nenaara boos” yaagidoogaa yootees. (Zakkaariyaasa 8:23 nabbaba.) ‘Ayhuda bitanee’ ‘inttena’ geetettido gishshau, i issi citaa malaatees. Nu wodiyan i ayyaanan tiyettida Kiristtaanetuppe saˈan attidaageeta malaatees; eti “Xoossaa Israaˈeele” yame. (Galaatiyaa 6:16, NW) ‘Dumma dumma qaalan haasayiya kawotettatu ubbaappe yiida tammu asati’ hara dorssa yame gidida zawi baynna daro asata malaatoosona. Tiyettida Kiristtaaneti Yesuusi biyoosaa ubbaa kaalliyoogaadan, zawi baynna daro asaykka ammanettida wozannaama ashkkaraara ‘bees’ woykko aara zuppetees. Zawi baynna daro asay saluwaa ‘xeegettidaageetuura’ hashettiyoogan mule yeellatana koshshenna. (Ibraawe 3:1) Yesuusi tiyettidaageeta “ta ishantta” giidi xeeganau yeellatibeenna.—Ibraawe 2:11.

14. Kiristtoosa ishantta ammanettidi maaddana danddayiyoy ayba ogiyaanee?

¹⁴ Yesuus Kiristtoosi nuuni a ishantta ammanettidi maaddiyoogaa bana maaddiyoogaadan xeellees. (Maatiyoosa 25:40 nabbaba.) Yaatin, saˈan deˈiyo hidootay deˈiyoogeeti ayyaanan tiyettida Kiristtoosa ishantta ayba ogiyan maaddana danddayiyoonaa? Eta maaddiyo waanna ogee Kawotettaabaa sabbakiyoogaana.  (Maatiyoosa 24:14; Yohaannisa 14:12) Saˈan deˈiya tiyettidaageetu qooday wodiyaappe wodiyan guuxxiiddi deˈees; shin hara dorssatu qooday dariiddi deˈees. Saˈan deˈiyo hidootay deˈiyoogeeti sabbakiyo oosuwan shaahettiyo wode, ubba qassi danddayiyaaba gidikko kumetta wodiyaa haggaaziyo wode, erissiyo ashkkara oottiyo oosuwaa poliyoogan ayyaanan tiyettidaageeta maaddoosona. (Maatiyoosa 28:19, 20) Ha oosuwaa maaddanau dumma dumma ogiyan miishsha immiyo injjee guutti xeelliyooba gidenna.

15. Kiristtaaneti ubbay ashkkaray koshshiya wodiyan giigissiyo ayyaana qumaanne dirijjite oosuwaara gayttidaagan i kuuyiyo kuushshata waati xeellana koshshii?

¹⁵ Nuuni Kiristtaane gidiyoogaadan ammanettida ashkkaray Geeshsha Maxaafan baasettida xuufetuuninne Kiristtaane shiiqotu baggaara ayyaana qumaa koshshiya wodiyan giigissiyoogaa waati xeellana bessii? Nuuni hegaa galatidi ekkiyoonne tamaaridobaa sohuwaara oosuwan peeshshiyoo? Ashkkaray dirijjite oosuwaara gayttidaban kuuyiyo kuushshata waati xeelliyoo? Nuussi imettiya kaaletuwaa eeno giidi azazettiyoogee Yihoowa giigissotun ammanettiyoogaa qonccissees.—Yaaqooba 3:17.

16. Ubba Kiristtaaneti Kiristtoosa ishantta siyana koshshidoy aybissee?

¹⁶ Yesuusi: “Ta dorssati ta qaalaa siyoosona; taani eta erais; etikka tana kaalloosona” yaagiis. (Yohaannisa 10:27) Tiyettida Kiristtaaneta xeelliyaagan hegee tuma. Etaara ‘biyaageeta’ xeelliyaagan shin woygana danddayettii? Etikka Yesuusa siyana bessees. Qassi Yesuusa ishanttakka siyana bessees. Xoossaa asaa ayyaana hanotaa kaallanaadan gita aawatettay imettidoykka tiyettida Kiristtaanetussa. Kiristtoosa ishantta siyiyoogee ay ay gujjii?

17. Ashkkaraa siyoogee ay gujjii?

¹⁷ Ha wodiyan ammanettida wozannaama ashkkaraa kalˈˈatiyay Bollaara Heemmiyaagaa. Bollaara Heemmiyaagee alame yuusho ubban Kawotettaabaa sabbakiyo oosuwaa sintta xeera gididi kaaletteesinne giigissees. Bollaara Heemmiyaagaa yameti ayyaanan tiyettida kaymida cimata. Waannatidi nuna “kaalettiyaageeta” geetettana danddayiyay eta. (Ibraawe 13:7) Alame yuushuwan 100,000⁠ppe bolla gidida gubbaaˈiyan deˈiya 7,000,000⁠ppe dariya Kawotettaabaa aassiyaageetu hanotaa kaalliyoogan, ayyaanan tiyettida ha cimatuyyo ‘Godaa oosuwan’ oottiyo darobay deˈees. (1 Qoronttoosa 15:58) Ashkkaraa siyiyoogaa giyoogee Bollaara Heemmiyaagaara wozanappe hashetiyoogaa giyoogaa.

Ashkkaraa Siyiyaageeti Anjjettidaageeta

18, 19. (a) Ammanettida wozannaama ashkkaraa siyiyaageeti ayba ogiyan anjjettiyoonaa? (b) Nu murttee ay gidana koshshii?

¹⁸ Ammanettida wozannaama ashkkaray sunttettoosappe doommidi, ‘darota xillotettaa ogiyaa kaalettiiddi’ deˈees. (Daaneela 12:3) Hagee ha iita alamiyaa bashshaappe attanau hidootay deˈiyoogeeta gujjees. Xoossaa xeelan xillo gidiyoogee ayba gita anjjoo!

¹⁹ Ashkkaraa siyidaageeti sinttappe, ‘geeshsha katamiyaa ooratta Yerusalaama [144,000 yameta oyqqidaara], ba azinaayyo gixxa giigida bullashettiya maccaaseedan, giiga uttidaara saluwaappe Xoossaa matappe duge wodhiyo’ wode ay anjjo demmanee? Geeshsha Maxaafay: “Xoossai asaara issippe de7ana. . . . Xoossai ba huuphen etaara de7ana. I eta Xoossaa gidana. Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7⁠enna. Aissi giikko, ceegabai xayiis” yaagees. (Ajjuutaa 21:2-4) Yaatiyo gishshau, nuuyyo danddayettida keena ubban, Kiristtoosanne i ammanettiyo ayyaanan tiyettida a ishantta siyiyaageeta gidoos.

Ay Akeekadii?

• Yihooway ammanettida wozannaama ashkkaran ammanettiyoogaa bessiya ayba naqaashati deˈiyoonaa?

• Yesuus Kiristtoosi ashkkaran wozanappe ammanettiyoogaa bessiyay aybee?

• Nuuni ammanettida wozannaama ashkkaran ammanettana bessiyoy aybissee?

• Nuuni ashkkaran ammanettiyoogaa waatidi bessana danddayiyoo?

[Oyshata]

[Sinttaa 25n deʼiya misiliyaa]

Yihooway ba Naˈaassi sinttappe bullashettiyaaridan oottidi dooridoy oonakko eray?

[Sinttaa 26n deʼiya misiliyaa]

Yesuus Kiristtoosi ammanettida wozannaama ashkkaraa “babaa ubbaa” bolli sunttiis

[Sinttaa 27n deʼiya misiliyaa]

Nuuni sibikate oosuwan shaahettiyo wode, ayyaanan tiyettidaageeta maaddoos