Táan u binoʼob tu paach le Tamanoʼ
Táan u binoʼob tu paach le Tamanoʼ
«Leloʼobaʼ letiʼ le máaxoʼob [...] táan u binoʼob tu paach le tamanoʼ jeʼel tuʼuxak ka xiʼikeʼ.» (APO. 14:4)
1. Le disipuloʼoboʼ, ¿bix tu yeʼesiloʼob u kʼáat u seguer u tsaypachtoʼob Jesús?
KAʼAPʼÉEL jaʼaboʼob kaʼa tak táankoch káajak u kʼaʼaytaj Jesuseʼ joʼopʼ u kaʼansaj «tu sinagogail Capernaum». Yaʼab tiʼ u disipuloʼobeʼ tumen maʼ jach maʼalob tu kʼamiloʼob le baʼax tu kaʼansoʼ «tu kúulpachkúuntajoʼob ka jáaw u máanoʼob tu yéetel». Baʼaleʼ le ka tu kʼáataj Jesús tiʼ u doce apostoloʼob wa tak letiʼob kun xuʼulul u tsaypachtikoʼobeʼ, Simón Pedroeʼ tu yaʼalaj: «Yuumtsil, ¿tiʼ máax jeʼel u páajtal k-bineʼ? A tʼaanoʼobeʼ u tʼaaniloʼob kuxtal minaʼan u xuul. Toʼoneʼ tsʼoʼok k-oksaj óoltik, yéetel k-ojel techeʼ [...] letiʼ le Cristooʼ, u Paal le kuxaʼan Jajal Diosoʼ» (Juan 6:48, 59, 60, 66-69). Jeʼex k-ilkoʼ le máaxoʼob jach tu jaajil u yóoloʼob táan u tsaypachkoʼob kaʼach Jesusoʼ maʼ jáaw u máanoʼob tu yéeteliʼ. Yéetel le ka tsʼoʼok u kʼamikoʼob le kiliʼich muukʼoʼ maas maʼ xuʼul u beetkoʼobiʼ (Hch. 16:7-10).
2. 1) ¿Máax «le palitsil chúukpajaʼan u yóol yéetel yaan u naʼa[toʼ]»? 2) ¿Baʼax ku yaʼalaʼal yoʼolal le palitsilaʼ?
2 ¿Baʼax táan u beetik bejlaʼa le sukuʼunoʼob yéeyaʼanoʼob utiaʼal u binoʼob kaʼanoʼ? Le ka tʼaanaj tiʼ le profecía ken u yeʼes tsʼoʼok u káajal u gobernar yéetel tsʼoʼok u náatsʼal u kʼiinil le xuʼulsajiloʼ, Jesuseʼ tu yaʼaleʼ u yalab le máaxoʼob yéeyaʼanoʼoboʼ letiʼe «palitsil chúukpajaʼan u yóol yéetel yaan u naʼa[toʼ]» (Mat. 24:3, 45). Tumen tsʼoʼok u jach kʼubik u yóoloʼobeʼ ku yaʼalaʼal «táan u binoʼob tu paach le tamanoʼ jeʼel tuʼuxak ka xiʼikeʼ» (xokaʼak Apocalipsis 14:4, 5). Ku yaʼalaʼal xan maʼ u núupkʼebankúuntubaʼobiʼ tumen maʼ u kaʼansoʼob mix u beetoʼob le baʼaxoʼob ku beetik «le nojoch Babilonia», wa le religionoʼob maʼatech u kaʼanskoʼob u jaajiloʼ (Apo. 17:5). Maʼ u kaʼansoʼob baʼaloʼob maʼ jaajtak tu yoʼolal Diosiʼ, yéetel maʼatech u yoksikubaʼob tiʼ u baʼalubaʼob le yóokʼol kaabaʼ (Juan 15:19). Yéetel maʼ kun xáantaleʼ u yalab le máaxoʼob yéeyaʼanoʼoboʼ yaan xan u binoʼob teʼ kaʼanoʼ (Juan 13:36).
3. ¿Baʼaxten unaj k-kʼubik óol tiʼ le palitsil chúukpajaʼan u yóol yéetel yaan u naʼatoʼ?
3 Jesuseʼ tu kʼubéentaj tiʼ le palitsil chúukpajaʼan u yóol yéetel yaan u naʼat ka u tsʼáa le janal jach tu yorai tiʼ le otochnáaloʼoboʼ, wa tiʼ cada utúul tiʼ le máaxoʼob kun binoʼob kaʼanoʼ. Tsʼoʼoleʼ tu kʼubéentaj tiʼ ka «u kanáant tuláakal baʼax yantiʼ» way Luʼumeʼ (Mat. 24:45-47). Ichil le baʼaloʼobaʼ táakaʼan le «yaʼabkach máakoʼob» wa le «uláakʼ tamanoʼo[boʼ]» (Apo. 7:9; Juan 10:16). Le oʼolaleʼ ¿máasaʼ jach unaj u kʼubik u yóoloʼob tiʼ le palitsil chúukpajaʼan u yóol yéetel yaan u naʼat cada utúul tiʼ le yéeyaʼanoʼob bey xan le «uláakʼ tamanoʼo[boʼ]»? Yaʼab baʼax oʼolal unaj u beetaʼal leloʼ, baʼaleʼ yaan kaʼapʼéel baʼax oʼolal maases unaj u beetaʼal: Yáaxeʼ tumen Jéeobaeʼ u kʼubmaj u yóol tiʼ le palitsiloʼ yéetel u kaʼapʼéeleʼ Jesuseʼ u kʼubmaj u yóol xan tiʼ. Koʼox ilik baʼaxten k-aʼalik Jéeoba yéetel Jesuseʼ u kʼubmaj u yóoloʼob tiʼ le palitsiloʼ.
Jéeobaeʼ u kʼubmaj u yóol tiʼ le palitsiloʼ
4. ¿Baʼaxten unaj k-kʼamik le kaʼansaj ku tsʼáaik le palitsil chúukpajaʼan u yóol yéetel yaan u naʼatoʼ?
4 ¿Baʼax áantik le palitsil chúukpajaʼan u yóol yéetel yaan u naʼat utiaʼal u tsʼáaik le kaʼansaj ku keʼetel yéetel maʼalob jaanloʼ? Jéeobaeʼ tu yaʼalaj: «In wichoʼobeʼ táan u paktikechoʼob. Bíin in tsʼáatech kaʼambesajiloʼob; bíin in tsʼáatech tsolxikinoʼob; bíin in weʼestech le bej unaj a bisikoʼ» (Sal. 32:8). Jeʼex k-ilkoʼ Jéeoba nuʼuktik le palitsiloʼ. Le oʼolal jeʼel u páajtal k-kʼubik k-óol tiʼ le naʼatil yéetel le tsolnuʼukoʼob ku jóoʼskoʼob tiʼ le Bibliaoʼ.
5. ¿Baʼax eʼesik Jéeoba nuʼuktik le meyaj ku beetik le palitsil chúukpajaʼan u yóol yéetel yaan u naʼatoʼ?
5 Tsʼoʼoleʼ Jéeobaeʼ ku tsʼáaik u kiliʼich muukʼ tiʼ le palitsiloʼ. Kex tumen maʼ tu páajtal k-ilik le kiliʼich muukʼoʼ, ku béeytal k-ilik bix u yáantik le máakoʼob utiaʼal ka u kʼex bix u kuxtaloʼoboʼ. Tuukulnakoʼon tiʼ bix táan u tsʼoʼokbeskoʼob u nojoch meeyjul u kʼaʼaytkoʼob máax Jéeoba, máax Jesús yéetel baʼax le Reinooʼ. U j-jaajkunajoʼob Jéeobaeʼ táan u kʼaʼaytajoʼob tiʼ maas tiʼ doscientos treinta luʼumiloʼob. ¿Máasaʼ lelaʼ jach ku chíikbesik Jéeoba nuʼuktik le palitsiloʼ? (Xokaʼak Beetaʼanoʼob [Hechos] 1:8.) Utiaʼal u tsʼáaik jach tu yorai le kaʼansaj ku keʼetel yéetel jaanloʼ, le palitsiloʼ kʼaʼabéet u chʼaʼatuklik tubeel le baʼaxoʼob ken u beetoʼ. Yéetel ken u chʼaʼatukult baʼax maas maʼalob utiaʼal u kaajal Jéeobaeʼ táanil ku tuukul yoʼolal le sukuʼunoʼoboʼ, ku yeʼesik yaabilaj bey xan uláakʼ jatsʼuts modos ku tsʼáaik le kiliʼich muukʼoʼ (Gal. 5:22, 23).
6, 7. ¿Jach bukaʼaj u kʼubmil u yóol Jéeoba tiʼ le palitsiloʼ?
6 Utiaʼal k-naʼatik jach bukaʼaj u kʼubmil u yóol Jéeoba tiʼ le palitsiloʼ, tuukulnakoʼon tiʼ baʼax u yaʼalmaj u tsʼáaik tiʼ cada utúul tiʼ le yéeyaʼanoʼoboʼ. Le apóstol Pablooʼ tu yaʼalaj: «Bíin juumnak le trompetaoʼ, le kimenoʼob túunoʼ yaan u kaʼapúut kuxtaloʼob utiaʼal maʼ u kíimiloʼob tu kaʼatéen mix bikʼin; toʼon túuneʼ yaan k-jelbesaʼal. Tumen le k-wíinklil maʼ tu xáantalaʼ, yaan u búukbesaʼal yéetel le baʼax ku xáantal mantatsʼoʼ; yéetel le k-wíinklil ku kíimilaʼ yaan u búukbesaʼal yéetel le wíinklil maʼ tu kíimil mix bikʼinoʼ» (1 Cor. 15:52, 53). Le sukuʼunoʼob yéeyaʼanoʼob ku chúukpajal u yóol u meyajtoʼob Diosoʼ, ken kíimkoʼobeʼ ku kuxkíintaʼaloʼob bey espirituʼobeʼ. Baʼaleʼ maʼ chéen ku tsʼaʼabal kuxtal minaʼan u xuul tiʼobiʼ, ku tsʼaʼabal xan tiʼob upʼéel kuxtal maʼ tu páajtal u xuʼulsaʼal mix tu páajtal u kʼastal, tsʼoʼoleʼ ku tsʼaʼabaltiʼob upʼéel nojoch páajtalil tumen Dios utiaʼal u pʼáataloʼob jumpáayil tiʼ le yaan tiʼ Letiʼoʼ. Apocalipsis 4:4 ku yaʼalikeʼ letiʼobeʼ kulukbaloʼob tiʼ tronoʼob yéetel yaan u coronaʼob, lelaʼ ku yeʼesik yaan u beetik u reyiloʼob. Baʼaleʼ yaan uláakʼ jatsʼuts páajtalil kun tsʼaabiltiʼob.
7 Apocalipsis 19:7, 8 ku yaʼalik: «Tsʼoʼok u kʼuchul u kʼiinil u tsʼoʼokol u beel le Tamanoʼ. U yataneʼ tsʼoʼok u nuʼukbesikuba. [...] U búukbes[muba] yéetel lino, ku léembal tu yoʼolal u jach sakil tumen ku yeʼesik u tojil u kuxtal le máaxoʼob kiliʼichoʼoboʼ». Jéeobaeʼ tsʼoʼok u yaʼalikeʼ le máaxoʼob yéeyaʼanoʼoboʼ ku keʼetloʼob yéetel utúul novia yaan u tsʼoʼokol u beel yéetel u Hijo. Jeʼex tsʼoʼok k-ilkoʼ Jéeobaeʼ ku tsʼáaiktiʼob upʼéel kuxtal maʼ tu páajtal u xuʼulsaʼal, maʼ tu páajtal u kʼastal yéetel ku tsʼaʼabaltiʼob u páajtalil u beetik u reyiloʼob bey xan u novia le Tamanoʼ. Le jatsʼuts páajtaliloʼobaʼ ku yeʼesikoʼobeʼ Jéeobaeʼ jach u kʼubmaj u yóol tiʼ le máaxoʼob yéeyaʼanoʼob utiaʼal u binoʼob kaʼanoʼ, wa «le máaxoʼob [...] táan u binoʼob tu paach le tamanoʼ jeʼel tuʼuxak ka xiʼikeʼ».
Jesuseʼ u kʼubmaj u yóol tiʼ le palitsiloʼ
8. ¿Bix k-ojéeltik Jesuseʼ jach u kʼubmaj u yóol tiʼ le máaxoʼob yéeyaʼanoʼoboʼ?
8 ¿Baʼaxoʼob eʼesik Jesuseʼ jach u kʼubmaj xan u yóol tiʼ le máaxoʼob yéeyaʼanoʼob utiaʼal u binoʼob kaʼanoʼ? Le áakʼab táanil tiʼ u kíimsaʼaloʼ Jesuseʼ tu yaʼalaj tiʼ u once apostoloʼob: «Teʼex máax yanchajaʼaneʼex tin wéetel mantatsʼ tiʼ in túuntaj óolal[oʼob]». Tsʼoʼoleʼ tu yaʼalaj xan tiʼob: «Kin tsʼáaikteʼex jumpʼéel [reino] jeʼel bix tsʼaʼanil tiʼ teen tumen in Taataeʼ, utiaʼal ka yanakeʼex yéetel ka ukʼulnakeʼex tin wéetel tin [reino], bey xan utiaʼal ka kulakeʼex tiʼ jalaʼach kʼáancheʼob utiaʼal ka pʼis óolteʼex u doce chʼiʼibaliloʼob Israel» (Luc. 22:28-30). Teʼ pacto tu beetaj yéetel u once apostoloʼoboʼ yaan xan u táakpajal tuláakal le máaxoʼob kun binoʼob kaʼanoʼ (Luc. 12:32; Apo. 5:9, 10; 14:1). Tukult lelaʼ: ¿jeʼel wa u yóotik Jesús múul gobernar tu yéeteloʼob wa maʼ u kʼubmaj u yóol tiʼobeʼ?
9. ¿Baʼaxoʼob táakaʼan ichil le baʼaxoʼob yaan tiʼ Cristo way Luʼumeʼ?
9 Jesuseʼ u kʼubéentmaj xan tiʼ le palitsil chúukpajaʼan u yóol yéetel yaan u naʼat ka u kanáant «tuláakal baʼax yantiʼ» way Luʼumeʼ (Mat. 24:47). Ichil le baʼaloʼobaʼ táakaʼan u Najil Betel yaan Estados Unidos, uláakʼ najiloʼob Betel, u najiloʼob Asamblea, u najiloʼob Reino bey xan le u kʼaʼaytaʼal le maʼalob péektsiloʼ yéetel u kaʼansaʼal uláakʼ máakoʼob tiʼ Dios. ¿Máasaʼ mix máak jeʼel u kʼubéentik tiʼ wa máax tuláakal baʼax yantiʼ wa maʼ u kʼubmaj u yóol tiʼeʼ?
10. ¿Baʼax uláakʼ eʼesik Jesuseʼ táan u nuʼuktik le máaxoʼob yéeyaʼanoʼoboʼ?
10 Le ka tsʼoʼok u kaʼa kuxkíintaʼal yéetel le taʼaytak u bin teʼ kaʼanoʼ, Jesuseʼ tu chíikbesuba tiʼ u disipuloʼobeʼ ka tu yaʼalajtiʼob: «Ojéelteʼexeʼ teneʼ tiʼ yanen ta wéeteleʼex tuláakal kʼiinoʼob tak tu xuul yóokʼol kaab» (Mat. 28:20). ¿Tsʼoʼok wa u béeykuntik Jesús le baʼax tu yaʼalaʼ? Tiʼ le quince jaʼaboʼob tsʼoʼok u máanoʼobaʼ, le múuchʼuliloʼoboʼ tsʼoʼok u yaʼabtaloʼob maas tiʼ cuarenta por ciento wa tsʼoʼok u chukik maas tiʼ cien mil upʼéelel. Ichil le quince jaʼaboʼob xanaʼ tsʼoʼok u yokjaʼ óoliʼ cuatro millones kaʼa tak táankoch máakoʼob wa maas tiʼ ochocientos utúulal sáamsamal. Tuláakal lelaʼ tsʼoʼok u yeʼesik Jesús nuʼuktik le baʼax ku kaʼansaʼal teʼ muchʼtáambaloʼoboʼ bey xan le u kaʼansaʼal uláakʼ máakoʼob tiʼ Diosoʼ.
Le palitsil chúukpajaʼan u yóol yéetel yaan u naʼatoʼ
11, 12. Le palitsiloʼ, ¿bix tsʼoʼok u yeʼesik chúukaʼan u yóol yéetel yaan u naʼat?
11 Tumen Jéeoba yéetel Jesús u kʼubmaj u yóoloʼob tiʼ le palitsiloʼ, toʼoneʼ bey xan unaj k-beetkoʼ tumen maʼ xuʼuluk u tsʼáaik u yóol u tsʼoʼokbes le meyaj kʼubéentaʼan tiʼoʼ. Upʼéel baʼax eʼesikeʼ letiʼe revista kʼaj óolaʼan bejlaʼa U Pʼíich Tulumil Kanan, tsʼoʼok ciento treinta jaʼaboʼob káajak u jóoʼsaʼal. Uláakʼeʼ letiʼe muchʼtáambaloʼob yéetel le asambleaʼob ku muʼukʼaʼankúuntikoʼob k-fejoʼ.
12 Le palitsiloʼ maʼ chéen chúukaʼan u yóoliʼ baʼaxeʼ jach yaan xan u naʼat. Maʼatech u jáan kaʼansik upʼéel baʼax maʼ áantaʼak u naʼat tumen Jéeobaiʼ, baʼaleʼ ken áantaʼak u naʼateʼ tu séebaʼanil xan ku kaʼansik. Tʼaanakoʼon tiʼ baʼax suuk u beetik u nuuktakil le religionoʼob maʼatech u kaʼanskoʼob u jaajiloʼ, le máakoʼobaʼ ku yaʼalikoʼobeʼ maʼ kʼaas ka yanak upʼéel kʼaakʼas kuxtal tiʼ máakiʼ mix ka u kaxt chéen u yutsiliʼ. Baʼaleʼ le palitsil chúukpajaʼan u yóol yéetel yaan u naʼatoʼ jach ku yaʼaliktoʼon tu yorai ka k-kanáantba tiʼ u táabsajiloʼob le kʼasaʼan yóokʼol kaabaʼ, lelaʼ ku páajtal u beetik ikil u yáantaʼal tumen Jéeoba yéetel tumen Jesucristo. Le oʼolal jach unaj k-kʼubik k-óol tiʼ le palitsiloʼ. Baʼaleʼ, ¿bix jeʼel k-eʼesik jach k-kʼubmaj k-óol tiʼeʼ?
Múul meyajnakoʼon yéetel le máaxoʼob tsaypachtik Cristooʼ
13. Jeʼex tu yaʼalil le profeta Zacaríasoʼ, ¿bix jeʼel k-eʼesik k-kʼubmaj k-óol tiʼ le palitsil chúukpajaʼan u yóol yéetel yaan u naʼatoʼ?
13 U libroi Zacaríaseʼ ku tʼaan tiʼ «diez j-táanxel luʼumiloʼob» ku natsʼkubaʼob tiʼ «juntúul judío» yéetel ku yaʼalikoʼob tiʼ: «Toʼoneʼ k-kʼáat bin ta wéeteleʼex» (xokaʼak Zacarías 8:23). Jeʼex k-ilkoʼ le ken u yaʼaloʼob «ta wéeteleʼex[eʼ]», ku yeʼesikeʼ táan u tʼaanoʼob tiʼ junmúuchʼ máakoʼob. Bejlaʼeʼ le judío ku chʼaʼachiʼitaʼaloʼ ku chíikbesik le u yalab le máaxoʼob yéeyaʼanoʼob utiaʼal u binoʼob kaʼanoʼ wa «u Israel Jajal Dios» (Gál. 6:16, LTN). Baʼaleʼ le «diez j-táanxel luʼumiloʼoboʼ» ku chíikbeskoʼob le yaʼabkach máakoʼoboʼ wa le uláakʼ tamanoʼoboʼ. Jeʼex le máaxoʼob yéeyaʼanoʼob ku tsaypachkoʼob Cristo jeʼel tuʼuxak ka xiʼikeʼ, le yaʼabkach máakoʼoboʼ bey xan u múul meyajoʼob yéetel le palitsil chúukpajaʼan u yóol yéetel yaan u naʼatoʼ. Le yaʼabkach máakoʼoboʼ maʼ unaj u sublaktaloʼob ikil u múul meyajoʼob yéetel «le máaxoʼob tʼanaʼanoʼob tumen Jajal Diosoʼ» (Heb. 3:1). Maʼ u tuʼubultoʼoneʼ Jesuseʼ maʼatech u sublaktal u «yaʼalik sukuʼun» tiʼ le máaxoʼob yéeyaʼanoʼoboʼ (Heb. 2:11).
14. ¿Bix jeʼel k-áantik le u sukuʼunoʼob Cristooʼ?
14 Jesuseʼ tu yaʼaleʼ ken áantaʼak u sukuʼunoʼobeʼ, bey tiʼ letiʼ táan u beetaʼaleʼ (xokaʼak Mateo 25:40). Baʼaleʼ le máaxoʼob kun u pʼáatloʼob kuxtal way Luʼumeʼ ¿bix jeʼel u yáantkoʼob u sukuʼunoʼob Cristooʼ? Maases ken u kʼaʼaytoʼob u maʼalob péektsilil le Reinooʼ (Mat. 24:14; Juan 14:12). Kex tumen le máaxoʼob yéeyaʼanoʼob pʼaatloʼob way Luʼum táan u pʼíittaloʼobeʼ, le uláakʼ tamanoʼoboʼ táan u bin u maas yaʼabtaloʼob. Ken u kʼaʼaytoʼob u maʼalob péektsilil le Reinooʼ, ku yáantkoʼob le yéeyaʼanoʼob utiaʼal ka u kaʼansoʼob u maasil máakoʼob yoʼolal Jéeoba. Tsʼoʼoleʼ wa ku páajtaleʼ ku beetkoʼob xan u precursoriloʼob (Mat. 28:19, 20). Maʼ u tuʼubultoʼon xaneʼ jejeláas bix jeʼel k-áantkoʼob le ken k-tsʼáa k-siibaloʼob wa uláakʼ baʼaloʼob yantoʼon.
15. ¿Bix unaj k-ilik le kaʼansaj ku tsʼáaiktoʼon le palitsiloʼ, bey xan le túumben baʼaloʼob ku chʼaʼatuklaʼal u beetaʼal ichil u kaajal Diosoʼ?
15 ¿Bix k-ilik le kaʼansaj ku tsʼáaik le palitsil jach tu yorai teʼ jóoʼsaʼaniloʼob yéetel teʼ muchʼtáambaloʼoboʼ? ¿K-kʼamik wa yéetel kiʼimak óolal yéetel tu séebaʼanil wa k-tsʼáaik ichil k-kuxtal? ¿K-kʼamik wa le túumben baʼaxoʼob ku chʼaʼatuklaʼal u beetaʼal ichil u kaajal Diosoʼ? Wa yéetel kiʼimak óolal k-chaʼik u nuʼuktikoʼon le palitsiloʼ yaan k-eʼesik kʼubmaj k-óol tiʼ Jéeoba yéetel tiʼ le nuʼuktaj ku tsʼáaikoʼ (Sant. 3:17).
16. Le uláakʼ tamanoʼoboʼ, ¿baʼaxten unaj xan u yuʼubikoʼob u tʼaan le máaxoʼob yéeyaʼanoʼoboʼ?
16 Jesuseʼ tu yaʼalaj: «In tamanoʼobeʼ ku kʼaj óoltikoʼob in tʼaan, teneʼ in kʼaj óoloʼob yéetel ku taaloʼob tin paach» (Juan 10:27). U jaajileʼ le máaxoʼob yéeyaʼanoʼoboʼ ku tsʼoʼokbeskoʼob le baʼax ku yaʼalik le tekstoaʼ. ¿Baʼax unaj xan u beetik le uláakʼ tamanoʼoboʼ? Unaj u yuʼubikoʼob u tʼaan Jesús bey xan u tʼaan le máaxoʼob yéeyaʼanoʼoboʼ, tumen letiʼob tsʼaʼanoʼob ka u nuʼuktoʼob u kaajal Diosoʼ. ¿Baʼax táakaʼan ichil u yuʼubaʼal u tʼaanoʼob?
17. ¿Baʼax táakaʼan ichil u yuʼubaʼal u tʼaan le palitsiloʼ?
17 Bejlaʼeʼ le Cuerpo Gobernanteoʼ ku tʼaan tu yoʼolal le palitsil chúukpajaʼan u yóol yéetel yaan u naʼatoʼ yéetel ku nuʼuktik le kʼaʼaytaj ku beetaʼal tiʼ tuláakal le yóokʼol kaabaʼ. Le sukuʼunoʼob táakaʼanoʼob ichil le Cuerpo Gobernanteoʼ úuch joʼopʼok u kʼubik u yóol u meyajtoʼob Jéeoba. Le sukuʼunoʼobaʼ maases letiʼob nuʼuktikoʼon tiʼ bix unaj k-meyajtik Diosoʼ (Heb. 13:7). Tumen yaan maas tiʼ siete millones j-kʼaʼaytajoʼob ichil maas tiʼ cien mil múuchʼuliloʼobeʼ, le sukuʼunoʼobaʼ jach yaʼab meyaj táan u beetkoʼob ichil u kaajal Jéeoba (1 Cor. 15:58). Le oʼolaleʼ ken múul meyajnakoʼon yéetel le Cuerpo Gobernanteoʼ táan k-múul meyaj xan yéetel le palitsil chúukpajaʼan u yóol yéetel yaan u naʼatoʼ.
Le utsiloʼob ku taasik k-uʼuyik u tʼaan le palitsiloʼ
18, 19. 1) ¿Baʼax utsiloʼob ken u kʼam le máaxoʼob ku yuʼubikoʼob u tʼaan le palitsil chúukpajaʼan u yóol yéetel yaan u naʼatoʼ? 2) ¿Baʼax unaj k-chʼaʼatuklik beetik mantatsʼ?
18 Desde ka tsʼaʼab le meyaj u beetoʼ, le palitsiloʼ tsʼoʼok u «[kaʼambesik] baʼax tubeel tiʼ yaʼabkach máakoʼob» (Dan. 12:3). Ichil le máakoʼobaʼ táakaʼan le ken u salvartubaʼob ken xuʼulsaʼak tiʼ le kʼasaʼan yóokʼol kaabaʼ. Le oʼolaleʼ ¿máasaʼ jach maʼalob ka lúubuk utsil máak tiʼ Dios?
19 Maʼ kun xáantaleʼ «le nojoch kiliʼich kaaj» wa «le túumben Jerusale[noʼ]», (le 144,000 yéeyaʼanoʼoboʼ) tiʼ Jajal Dios kun taal u líiʼsmuba «bey juntúul x-tsʼoʼokol beel utiaʼal, u yíichameʼ». Ken úuchuk leloʼ, ¿baʼax utsiloʼob ken u kʼam le máaxoʼob tu yuʼuboʼob u tʼaan le palitsiloʼ? Le Bibliaoʼ ku yaʼalik: «Jajal Dioseʼ yaan u yantal tu yéeteloʼob [...]. Jajal Dios kun choʼik tuláakal u jaʼil u yichoʼob, maʼ tun yantal kíimil, mix okʼol, mix yaj óolal, mix kʼiʼinamil, tumen tuláakal baʼax yaan kaʼacheʼ tsʼoʼok u máan» (Apo. 21:2-4). Le oʼolaleʼ mantatsʼ unaj k-uʼuyik u tʼaan Cristo bey xan le máaxoʼob yéeyaʼanoʼoboʼ, tumen letiʼobeʼ ku náajmatkoʼob ka k-kʼub k-óol tiʼob.
¿Baʼax tsʼoʼok a kanik?
• ¿Baʼax eʼesik Jéeobaeʼ u kʼubmaj u yóol tiʼ le palitsil chúukpajaʼan u yóol yéetel yaan u naʼatoʼ?
• ¿Bix k-ojéeltik Jesuseʼ jach u kʼubmaj u yóol tiʼ le palitsiloʼ?
• ¿Baʼaxten unaj k-kʼubik k-óol tiʼ le palitsiloʼ?
• ¿Bix k-eʼesik k-kʼubmaj k-óol tiʼ le palitsiloʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 25]
¿A wojel wa máaxoʼob u yéeymaj Jéeoba utiaʼal ka u beetubaʼob bey u novia u Hijoeʼ?
[U tsolajil le oochel teʼ táan juʼun 26]
Jesuseʼ u kʼubéentmaj tiʼ le palitsil chúukpajaʼan u yóol yéetel yaan u naʼat le baʼaloʼob yantiʼ way Luʼumeʼ
[U tsolajil le oochel teʼ táan juʼun 27]
Ken k-kʼaʼayt le maʼalob péektsiloʼ k-áantik le máaxoʼob yéeyaʼanoʼoboʼ