“I No Taem Blong Mi Yet, Blong Mi Ded”

Draeva blong wan bigfala trak doti i no moa save kontrolem trak blong hem. Nao trak ya i go antap long saed blong rod we ol man oli stap wokbaot long hem, mo i bangem wan man mo woman blong hem, mo wan yangfala man we i gat 23 yia blong hem. Niuspepa blong New York i talem se, man ya mo woman blong hem tufala i ded wantaem, mo yangfala ya i foldaon we i no moa save wan samting. Taem yangfala ya i wekap mo i luk samting we i bin hapen long hem, faswan toktok blong hem hemia se: ‘Mi no save bilivim se wan samting olsem i hapen. Plis God, yu letem mi mi winim samting ya.’ Hem i talem se: “I no taem blong mi yet, blong mi ded.”

MAET yu bin harem sam stori olsem tu. Taem wan trabol i kasem wan man be hem i no ded, ol man oli talem se, ‘Hemia i no taem blong hem yet.’ Be sipos hem i ded, bambae oli talem se, ‘Taem blong hem nao,’ no ‘Hemia wil blong God.’ Nomata se ol man oli bilif se ol samting oli hapen from laki nomo, no from we God i wantem se i olsem, be bigfala tingting biaen long bilif blong olgeta i sem mak. Hemia se evri samting we i hapen long laef blong man i folem wan plan we yumi no save jenisim. Plante man oli tingbaot bilif ya taem wan famle no fren i ded, no taem i gat wan aksiden. Be plante man oli ting se bilif ya i tru long saed blong plante narafala samting tu we i hapen long laef blong olgeta. Hemia i no wan niufala bilif be hem i stanap longtaem bifo finis.

Ol man Babilon bifo oli bilif se ol samting we oli hapen long laef blong ol man i dipen long ol sta mo fasin blong olgeta blong muv. From samting ya, oli stap lukluk i go long skae blong faenemaot ol saen mo samting blong gudlak we i save lidim olgeta. Ol man Gris mo Rom oli wosipim woman god ya we oli talem se hem i stap makemaot samting we i hapen long laef blong man. Oli talem se god ya i gat paoa blong talemaot sipos fiuja blong wan man bambae i gud no i nogud, nomata se samtaem samting we hem i talem i agensem tingting blong tufala jif god ya blong olgeta, Sus mo Jupiter.

Long ol kantri blong is, ol man Hindu mo Budis oli bilif se samting we i stap hapen long laef blong wan man, hemia ol frut we hem i kasem from ol samting we hem i bin mekem long wan laef blong hem bifo. Mo ol samting we hem i stap mekem naoia i soemaot wanem we bambae hem i mekem long wan narafala laef blong hem long fiuja. Plante narafala skul, olsem plante skul blong Krisendom, olgeta tu oli tijim bilif ya se laef blong man i folem wan plan we yumi no save jenisim. Oli tijim se God i makemaot finis samting we bambae i hapen long laef blong man.

From samting ya, nating se ol man tede oli talem se oli bilif long samting we oli save pruvum wetem ol save nomo, yumi no sapraes we plante man tede oli bilif yet se wan samting i makemaot finis laef blong olgeta. Plante man oli bilif se God i makemaot finis samting we i hapen long  laef blong olgeta, frut blong samting we oli mekem, mo en blong laef blong olgeta. Mo oli bilif se evri samting we i hapen long laef blong man i folem wan plan we yumi no save jenisim. ?Hemia nao tingting blong yu long saed blong laef? ?I tru se God i makemaot finis ol samting long laef, frut we i kamaot from samting we i hapen, man we i win mo man we i no win, taem we man i bon mo man i ded? ?Laef blong yu i folem wan plan we yu no save jenisim? Bambae yumi luk olsem wanem Baebol i save halpem yumi blong ansa long ol kwestin ya.

[Foto Credit Line blong pija long pej 3]

Ken Murray/New York Daily News