Efoch taraku mi watte a mäkitikit, ewe chon ünteng esap chüen tongeni eriki. Iwe, ewe taraku a riki ngeni ikewe aramas ra feffetäl ie me purei eü pean pwüpwülü pwal emön alüwöl 23 ierin. Me ren ewe simpung lon ena telinimw New York, lon chök ena atun ewe pean pwüpwülü ra mälo nge ewe alüwöl a chök pelo. Lupwen a meefi me mirititi met a fis, a erä: ‘Use fokkun lükü pwe a fis ngeniei ei mettoch. Kese mochen Kot, kopwe älisiei. Ese mwo tori ai fansoun pwe upwe mälo.’

NEMAN ka fen rongorong ena sokkun pworaus. Lupwen a chippü pwe emön epwe feiengaü, aramas ra kan apasa, “Esaamwo tori an fansoun pwe epwe mälo.” Nge atun emön a mälo pwe a akseten, iwe repwe apasa, “A tori fansoun an epwe mälo,” are “Ina letipen Kot.” Ekkoch ra ekieki pwe mettoch meinisin efisien Kot, iwe, sisap tongeni nemeni minne a fis. Chommong aramas ra lükü pwe meinisin met a fis lon manauer a fen kkotolo me mwan me resap tongeni sü seni minne epwe fis. Resap chök eäni ei sokkun ekiek lon fansoun a wor mi mä are akseten, nge ei ekiek a fen poputä seni chök me loom.

Ren chök äwewe, ekkewe chon Papilon loom ra nennengeni napanapen fetälin ekkewe füü ren ar repwe silei met epwe fis lon manauen aramas. Ina popun ra kütta och esissil seni läng an epwe emmweniir. Ekkewe chon Kris me chon Rom ra fel ngeni ekkewe anu fefin mi wor ar manaman le efeiöchü are anümamaüa aramas, nge fän ekkoch ussun itä letipen ekkeei anu fefin a pwönüetä lap seni letipen ekkewe anu mwän mi tekia iter Zeus me Jupiter.

Lon Esia chon Hindu me chon Buddha ra lükü pwe mei wor eü manau ra piin manaueni akkomw, mwirin ar mälo repwe pwal eäni och manau. Napanapen manauer iei epwe longolong woon met ra fen piin manaueni akkomw. Manauer iei epwe kküü manauer lon pwal och manau repwe eäni lon mwachkkan. Pwal ekkoch lamalam kapachelong ekkewe tipitipin lamalamen Kraist ra pwal etiwa ena lükü pwe mettoch meinisin a fiffis lon manauach iei, a fen kkotolo me mwan.

Ina minne, sisap mäirü pwe pwal mwo nge ekkewe mi watte ar silelap lon chommong mettoch ra chüen lükü pwe nonnomun manauer, me met epwe fis lon manauer iei, me lon mwachkkan a fen kkotolo, resap tongeni nemeni minne epwe fis. Pwal ina meefiom? Met a kan fis lon manauen emön, sopwöchün me sopwongaüan, pwal mwo nge ränin uputiuan me ränin mäloon, meinisin mi fen kkotolo? Mei wor mettoch a kan nemeni met epwe fis lon manauom? Sipwe ppii ifa ussun ewe Paipel a tongeni älisikich le pölüweni ekkeei kapas eis.

[Sasing lon pekin taropwe 3]

Ken Murray/​New York Daily News