“Suli toqusussaasimanngilanga”

Biilit eqqagassanik assartuutit angisuut aquttuata aqussinnaajunnaarmagit aappariit angullu 23-nik ukiulik pisuinnartunut aqqutissiakkoortut aportipput. New Yorkimi aviisi naapertorlugu aappariit aportinnerminni toqupput angullu inuusuttoq ilisimajunnaarluni. Angutip ilisimmarluni paasigamiuk susoqarsimanersoq eqqarsaataa siulleq unaavoq: ‘Taama pisoqarnera upperiuminaappoq. Guuti, ikiunnga matuma anigornissaanut.’ Ima oqarpoq: “Suli toqusussaasimanngilanga.”

OQALUTTUANIK assingusunik tusartarsimassaatit. Ajunaarnermi annaqqartoqaraangat, inuit ima oqarajupput: ‘Suli toqusussaasimanngilaq.’ Ajunaarnermili toqusoqaraangat, ima oqartarput: ‘Toqusussaasimavoq,’ imaluunniit: ‘Guutimuna piumasaa.’ Pisut kingunerisaannut pisuutinneqartoq atugassarititatut isigineqaraluarpat, iluatsitsinerugaluarpat Guutiugaluarpalluunniit, tunngavilersuutigineqartartoq ataasiuvoq. Inuppassuit isumaqarput inuunerminni pisartut tamakkualu kingunerisaat siumut aalajangeriigaasut namminnerlu iliuuseqarfigisinnaanngilluinnaritik. Toqumuinnaanngitsoq ajunaarnernuinnaanngitsorlu allanulli aamma tunngatillugu taama eqqarsartoqartarpoq; aamma nalitsinniinnaanngitsoq taama eqqarsartoqartarpoq.

Assersuutigalugu itsaq Babylonimiut upperaat ullorissat taakkualu ingerlanerat inuit inuunerannut sunniuteqartartut. Taamaattumik qilak isiginnaartarpaat nalunaaqutinik naasaanillu siulersortissarsiorlutik. Grækerit Romamiullu pallorfigisarpaat guutit arnat qanoq atugaqarnissamik aalajangiisartut, taakkua inunnik atugarissaartitsisinnaanermik atugarliortitsisinnaanermilluunniit aalajangiisinnaanerat allaat guutimik qullersaasa, Zeusip Jupiterillu, piumasaannik ilaannikkut qimmuisarunarput.

Kangiani hindut buddhistillu upperaat maannakkut misigisatik inuunerminni siullermi iliuuserisamik kingunerigaat, inuunermilu matumani iliuuserisatik aalajangiisuussasut inuunermik tullissaata qanoq ikkumaarneranut. Upperisarsiornerni allani, aamma kristumiuunerartut oqaluffeqarfiini amerlasuuni, siunissap siumut aalajangeriigaaneranik ajoqersuuteqarnikkut isummat taamaattut akuersaarneqarput.

Taamaattumik tupinnanngilaq allaat nalitsinni ukiuni qaammaasaqarfiusorinartuni piviusorsiorfiusorinartunilu suli inuppassuit upperimmassuk inuunerminni atugarisatik, iliuutsimik kinguneri inuunertillu qanoq naggateqarumaarnersoq siumut aalajangeriigaasut iliuuseqarfigisinnaanngikkitillu. Illit taama isumaqarpit? Nalaattakkatit tamarmik — iluatsitsinitit iluatsinngitsuukkatit, allaat inunngornerit toqunissallu — siumut aalajangeriigaappat? Inuunerit siumut aalajangeriigaava? Apeqqutit taakkua akissutissarsiorneranni Biibili qanoq iluaqutigisinnaanerlugu misissoriartigu.

[Qupp. 3-mi suminngaanneernera]

Ken Murray/​New York Daily News