“Hiyadiña Mpinji Yami Yakufwaku”

Ñendeshi wamotoka yeneni yamwañaña majilu wakañenyi kuteñulula motoka windi. Motoka wapwempukili mumukwakwa nakuhuma antu adisumbula nimukwenzi weyala wayaaka 23 endeleleña kunsa. Kwesekeja nachileji chachipapilu chansañu chamu New York City, awa antu adisumbula afwili hohenohu ilaña mukwenzi walezumukili. Cheliliyi hamesu pajiji nakumona chuma chamwekeni, wasambilili kutoñojoka nindi: ‘Neluki wanyi chuma chinakumwekana. Nzambi añiteji mwani chumichi chibuli kummwekena.’ Wahosheli nindi: “Hiyadiña mpinji yami yakufwaku.”

HADAHA mwatiyahu dehi nsañu yamuchidiwu. Neyi muntu yapuluka kwachi muwubanji, antu ahoshaña nawu, ‘Hiyadiña mpinji yinduku,’ ilaña neyi muntu yafwa mumaposu ahoshaña nawu, ‘Mpinji yindi yinashiki,’ hela nawu ‘Hikukeña kwaNzambi.’ Hela chakwila ahoshaña nawu kufwa kwamuntu akwishimwineñahu dehi, hikuhalwa hela kukeña kwaNzambi, wejima wawu ekala nayitoñojoka yoyimu. Antu amavulu akuhwelela nawu yuma yamwekanaña muwumi wawu ayishimwineñahu dehi nawa nawu kwosi chuma chatela kwilawu hayuma yeniyi. Yitoñojoka yeniyi bayi neyi yakundama hohu kukufwa hela kumaposuku; nawa iyi yitoñojoka yakumashiita.

Chakutalilahu, akwaBabiloni akushankulu akuhweleleli nawu chihandilu chawantu chalombolewaña natutumbwa nichitwendaña. Dichi adiña nakutala yinjikijilu mwiwulu nikuhoña kulonda ayilomboli. A Griki niaRoma adifukwileña kudi anzambi awambanda akwakushimuna yuma yikamwekana, adiña nañovu yakushimuna neyi chakwila antu akamona yuma yayiwahi hela yatama kumbidi, mpinji yikwawu anzambi wenawa adiña nakukañesha nkeñelu yawanzambi jawu amaneni, Zewusi niJupita.

Kumusela waAsia, aHindu niaBuddha akuhwelela nawu, yuma yinakumonayi muntu hanoyu mpinji yamumwekenaña hamuloña wayuma yakoñeliyi kunyima, nawa yuma yinakuzatayi muwumi wayinu mpinji diyikumwekesha yuma yakamonayi muchihandilu chindi chakumbidi. Nsakililu yikwawu, kushilahu niyipompelu yayivulu yamuKristendomu, niyena yeteja yitoñojoka yatama yamuchidiwu kuhitila muntañishilu yawu yakushimwinañahu dehi yuma yikamwekana.

Hela chochu, hitunateli kuhayama chumichuku, hela makonu antu ahoshaña nawu yuma yakuhwelelawu yashindamena hayuma yalala, amavulu achidi akuhwelela nawu nshakaminu yawu, yuma yamwekanaña muchihandilu chawu mafuku ejima, niyuma yikayimwekena ayishimwineñahu dehi nawa kwosi chuma chatela kwilawuku. Komana ninenu dichimwatoñojokaña? Komana chalala yuma yamwekanaña muwumi, kutwesha hela kukañanya kwila chuma, kusemuka nikufwa ayishimwineñahu dehi? Komana yuma yikamwekana muchihandilu chenu ayishimwineñahu dehi? Twayenu tutali Bayibolu chiyatela kutukwasha kwakula awa malwihu.

[Mazu aKusakilila eniMwevulu wudi hefu 3]

Ken Murray/New York Daily News