“No Tabata Mi Dia”

E shofùr di un trùk di sushi grandi a pèrdè kontròl riba su vehíkulo. E trùk a subi asera i a dal un hòmber i un muhé, ámbos tabatin 47 aña di edat, i un yònkuman di 23 aña. Segun un informe den un korant di e stat New York, e dos personanan di e mesun edat a muri mesora i e yònkuman a pèrdè konosementu debí na e sla ku el a haña. Ora e yònkuman a bin bei i a haña sa loke a sosodé, e promé kos ku el a pensa tabata: ‘Mi no por kere loke ta pasando ku mi. Por fabor Dios, no laga mi muri.’ El a bisa: “No tabata mi dia.”

KISAS bo a yega di tende di relatonan similar. Ora un persona skapa na wowo di angua di un desaster, hende sa bisa: ‘No tabata su dia.’ Pero ora un hende muri den un aksidente straño òf inusual, nan ta konkluí: ‘Ta su dia a yega’ òf ‘Ta Dios su boluntat.’ Sea ku nan ta kulpa Dios pa loke a pasa òf nan ta bisa ku ta mala suerte òf destino, e rasonamentu tras di e pensamentunan ei ta básikamente meskos. Hopi hende ta kere ku loke nan ta eksperensiá den bida i e konsekuensia di esei ta predeterminá i ku nan no por hasi nada pa evitá esei. No ta solamente den kaso di morto òf aksidente, hende ta reakshoná asina. Ademas, no ta aworakí hende a kuminsá reakshoná asina.

Por ehèmpel, e babilonionan di antigwedat tabata kere ku e streanan i nan movementu tin influensia riba asuntunan humano. P’esei, nan tabata buska señal den shelu pa guia nan. E griego- i e romanonan tabata adorá diosanan di destino, kendenan su poder pa determiná bon i mala suerte tin biaha asta a parse di tabata surpasá e boluntat di nan diosnan prinsipal, Zeus i Júpiter.

Na Oriente, budistanan i hende di religion hindú ta kere ku loke un hende ta pasa aden aktualmente ta resultado di loke el a hasi den su bida anterior. Nan ta kere tambe ku loke un hende hasi den su bida aktual lo determiná loke lo e eksperensiá den su siguiente bida. Otro religionnan, inkluso hopi iglesia di kristiandat, tambe ta aseptá e ideanan fatalista ei mediante nan doktrina di predestinashon.

P’esei, no ta nada straño ku asta den e asina yamá era moderno akí—den kua hende ta pretendé ku nan kreensia i opinion ta basá riba realidat—hopi hende te ainda ta kere ku nan situashon den bida, e resultado di nan akshonnan diario i nan destinashon final ta predeterminá i ku nan no por hasi nada pa kambia esei. Ta asina abo tambe ta mira bida? Suseso- i insidentenan den bida, éksito i frakaso—asta nasementu i morto—realmente ta predeterminá? Destino ta determiná bo bida? Laga nos wak kon Beibel por yuda nos haña kontesta riba e preguntanan akí.

[Rekonosementu pa Potrèt na página 3]

Ken Murray/New York Daily News