“So ayeke lango ti mbi la pëpe”

Mbeni zo ti kpengo na kota kutukutu ti rongo azende azia ndo ti lege; kutukutu ni akpo mbeni wali na koli ti lo na mbeni maseka-koli ti ngu 23 so ayeke tambela na tere ti lege. Mbeni mbeti-sango ti gbata ti New York na Amerika atene so koli na wali ni akui gi na lê ni lê ni, na maseka-koli ni ayeke na popo ti kuâ na zingo. Na ngoi so maseka-koli ni akiri dä na lo mä tënë ti ye so asi, kozo tënë so lo tene ayeke so: ‘So tâ ye la! Pardon Nzapa, zia si mbi sigigi na yâ ti ye so asi na mbi.’ Lo kiri lo tene: “So ayeke lango ti mbi la pëpe.”

KITE ayeke dä pëpe so mo mä amara ti tënë tongaso awe. Tongana mbeni zo asigigi na lê ti kuâ, azo ayeke tene: ‘Lango ti lo ade.’ Me tongana mbeni zo akui na yâ ti mbeni ndao, ala yeke tene: ‘Lango ti lo alingbi awe’ wala ‘Nzapa la aye tongaso.’ Atâa tongana azo atene so ye so asi na zo ni ayeke ye so a diko ni kozoni awe wala Nzapa la aye tongaso, bibe so apusu ala ti tene tongaso ayeke gi oko. Azo mingi apensé so aye so ayeke si na yâ ti gigi ti ala nga na aye so aga na pekoni ayeke aye so a diko ni kozoni awe na ala lingbi pëpe ti sara mbeni ye ti changé ni. Nga, azo ayeke tene mara ti atënë tongaso gi pëpe na ngoi so mbeni zo akui wala mbeni ndao asi; na mara ti bibe tongaso andu gi ngoi ti e pëpe, a to nda ni giriri.

Na tapande, azo ti Babylone ti giriri apensé so atongoro nga na lege so ala yeke tambela na lê ti nduzu ayeke sara ngangu na ndo ti aye so azo ayeke sara. Ni la ala yeke bâ lê ti nduzu ti gi afä si ala hinga ye so ala lingbi ti sara wala ti sara pëpe. A-Grec nga na azo ti Rome ayeke voro anzapa-wali ti aye so ayeke si kekereke, so ala pensé so ala yeke na ngangu ti sara si azo awara aye ti nzoni wala ti sioni; na azo ni abâ so ngoi na ngoi ngangu ti anzapa-wali so ahon ti Zeus na Jupiter, akota nzapa ti ala.

Na yâ ti akodoro ti mbage so lâ alondo dä, aHindou na aBouddhiste amä na bê so ye so ayeke si na zo na ndembe so lo yeke na fini ayeke ye ti peko ti aye so lo sara na yâ ti gigi ti lo kozoni si lo kui na a kiri a dü lo. Na ndo ni, aye so lo yeke sara na ndembe so ayeke sara ande ngangu na ndo ti gigi ti lo ti peko. Ambeni bungbi ti vorongo nzapa, so na popo ni a yeke wara gbâ ti a-eglize so atene ala yeke mû peko ti Christ me ala yeke sara ni pëpe, afa so a diko kozoni awe aye so ayeke si na zo na zo alingbi pëpe ti changé ni.

Tongaso, a yeke ye ti dongo bê pëpe so même laso, mbeni ngoi so azo apensé so lê ti ala azi mingi na ala yeke yeda na aye kirikiri pëpe, azo mingi angbâ ti bâ so a diko kozoni awe aye so ayeke si na ala, na ala lingbi pëpe ti changé dutingo ti ala, aye so ayeke si na peko ti aye so ala yeke sara lâ oko oko nga na ye so ayeke si na ala na nda ni. Mo nga kue mo bâ ni tongaso? A diko kozoni awe aye so ayeke si na yâ ti gigi ti zo nga na andao so lo wara? aye ti lo so aga nzoni wala so atï na ngu? même lango ti dungo lo na ti kuâ ti lo? A diko kozoni awe aye so ayeke si na mo? Zia e bâ tongana nyen Bible alingbi ti mû maboko na e ti kiri tënë na ahundango tënë so.

[Lingu ti foto na lembeti 3]

Ken Murray/New York Daily News