Yuma Yejima Yikweti Mpinji

Bayibolu yahosha nawu: “Yuma yejima yikweti yilaaka yayu, niyuma yejima yafuukulawu mwishina dewulu yikweti hawililu wayu.” Nsoneki yanawa mazu, Mwanta Solomoni wamaana wakushankulu, wahosheli cheñi nindi, kwekala mpinji yakuvwalika, nimpinji yakufwa, mpinji yakutuña, nimpinji yakuhumuna, mpinji yakukeña, nimpinji yakuhela. Nkumininaku wahosheli nindi: “Muntu wakalakalaña wamwenañamu chumanyi china chakabakanañayi china?” —Mukwakutaŋisha 3:1-9.

CHATAÑAWU awa mazu, antu amakwawu ahoshaña nawu Bayibolu yatañishaña nawu yuma yejima ayishimwineñahu dehi; dikwila nawu, atoñojokaña nawu Bayibolu yahakwilañaku yitoñojoka yakwila nawu yuma yejima yikamwekana kumbidi ayishimwineñahu dehi. Komana dimu? Komana Bayibolu yahakwilañaku yitoñojoka yakwila nawu yuma yejima yamwekanaña muwumi ayishimwineñahu dehi? Chineli ‘Nyikanda yejima ayonena dehi kudi Nzambi,’ nsañu yitwatañaña muchibalu chimu chaBayibolu yatela kuditeja nayitwatañaña muchibalu chikwawu. Dichi, tushinshikenu chahosha Izu daNzambi Bayibolu, haniyi nsañu.—2 Timotewu 3:16.

Mpinji niKululakana kwaYilulakenu

Solomoni wasonekeli cheñi mumukanda waMukwakutaŋisha nindi: “Hinukuhitamu cheñi, hinukumona mwishina detañwa nami, Kukutemuka, akwalufuchi hidiwu ashiyañamu akwawuku; hela kunjita, akwañovu hidiwu atapaña akwawuku; hela kudya, akwamaana hidiwu akumonañaku; hela maheta, akwakashinshi hidiwu ayihetañaku; hela wuselewa, akweti wukalawenu hidiwu awumonañaku.” Muloñadi? Walumbulwili nindi: “Mpinji nakululakana chayilulakenaña tuhu wejima wawu.”—Mukwakutaŋisha 9:11.

Chatela yahoshi nindi yuma yejima yamuwumi ayishimwineñahu dehi, Solomoni wahosheli nindi antu hiyanateli kushimunañahu dehi yuma yikamwekana muyuma yejima yelañawuku, muloña “mpinji nakululakana chayilulakenaña tuhu wejima wawu.” Kakavulu, chuma chinateli kumumwekena muntu muloña wudi heluña dadiwahi nawa hampinji yayiwahi, hela netu chuma chatama chinateli kumumwekena muntu muloña wudi heluña datama nawa hampinji yatama.

Chakutalilahu, shinshikenu mazu akwila nawu: “Akwalufuchi hidiwu ashiyañamu akwawuku.” Hadaha mwatañahu dehi nsañu yaya mpuhu hela himwayilukaku, yawambanda akwakutemuka lufuchi jimita 3000 muchaaka cha 1984 muCalifornia Los Angeles, mwituña daU.S.A. Akwakutemuka ayedi, wumu wadiña nakwimenaku Britain mukwawu United States, wejima wawu afwilileña kutambula palata yawuru [gold medal]. Ilaña, chashikiluwu hakachi, adihumini iku anakutemuka. Wumu wadimbukili nawa walekeli kutemuka, mukwawu watiyili kutama muloña wedikili naambala 7.

Komana ichi chuma chamwekeni achishimwineñahu dehi? Amakwawu anateli kwiteja. Ilaña, adihumini hohu, kwosi welukili nindi kukumwekana maposuku, chumichi chaletesheli wejima wawu abuli kutambula isomu. Komana achishimwineñahu dehi nawu akudihuma? Amakwawu anateli cheñi kwiteja. Ilaña, akwakushimuna nsañu ahosheli nawu maposu wenawa amwekeni muloña wakwila akakudibecha wenawa adiña nañovu yesekana hakutemuka, nawa wejima wawu afwilileña  kubadika mukwawu. Neyi chochahosha Bayibolu, “mpinji nakululakana chayilulakenaña tuhu wejima wawu.” Hela chakwila muntu nadiloñeshi chamuchidinyi, mpinji yejima kwekalaña yuma yafumañamu yakubula kukuhwelela yinateli kuluwañesha yuma yinakwilayi muntu, nawa hiyayishimwineñahu dehuku.

Hanu dinu, Bayibolu yatalisha mudihi hakuhosha nawu: ‘Yuma yejima yikweti mpinji yayu’? Komana kuduhu chuma chidi chejima chitwatela kwila chinateli kukwasha hela kuluwañesha yuma yamuwumi wetu—yuma yikatumwekena kumbidi?

Mpinji Yayiwahi Yakwila Yuma Yitwafwilaña

Nsoneki yaBayibolu hadiña nakutena yuma yayimwekenaña antu hela yuma yashimwineñahu dehi muwumi wamuntuku, ilaña wadiña nakuhosha hankeñelu yaNzambi nichiyatela kukwasha antu. Tweluka ñahi mwenimu? Iyi nsañu dichiyatulejaña. Hanyima yakutena yuma yayivulu yamwekana neyi yikweti ‘mpinji yayu,’ Solomoni wasonekeli nindi: ‘Namoni dehi mudimu wanenkiyi Nzambi anyana kawantu wakudikabisha nachu hohu. Nzambi wela dehi yuma yejima yiikali nalubanji hampinji yayu.’—Mukwakutaŋisha 3:10, 11.

Nzambi wayinka antu nyidimu yayivulu, hela yuma yakwila, Solomoni wateneni yuma yayivulu. Nzambi watwinka cheñi wuswa wakudifuukwila yuma yitunakukeña kwila. Hela chochu, mudimu wejima wukweti mpinji yatelela, hela yayiwahi yakufumisha yuma yayiwahi. Chakutalilahu talenu mazu aSolomoni ekala haMukwakutaŋisha 3:2, akwila nawu, “mpinji yakutumba, nimpinji yakubwita yatumbawu.” Andimi eluka nawu, mbutu yejima yikweti mpinji yatelela kuyitumba. Indi neyi ndimi yadiwula chumichi nakutumba mbutu  muchilaaka chabula kutelela? Komana wukuhosha nindi chumichi achishimwineñahu dehi neyi yabula kwañula mbutu yayivulu, hela chakwila wazatili nañovu? Inehi. Wabulili hohu kutumba mbutu hachilaaka chatelela. Ndimi yeniwu wadi kwañula mbutu yayivulu neyi chakwila walondeleli yilaaka yatanjikawu kudi Nleñi.

Dichi chuma chafuukulayi Nzambi bayi neyi wachishimwineñahu dehi nindi chikamwekena antu hela yuma yejima yafumañamuku, ilaña hinshimbi jikwawu jalombolaña nyidimu yawantu kwesekana nankeñelu yindi. Hakwila nawu antu azati chiwahi nyidimu yinakufwilawu, atela kutoñojoka nikuzata kwesekeja nankeñelu nimpinji yaNzambi. Yuma yashimwineñahu dehi nawa yakañanyaña kuhimpawu antu bayi neyi hiyuma yashimwineñahu dehi nawu yikayimwekena antuku, ilaña hiyuma yafuukulayi Nzambi kwila. Yehova wahosheli kuhitila mudi kaprofwetu Isaya nindi: “Dichi chakekala izu dami dakafuma mukanwa kami, hidakafunta kudami makasakasaku, dakela munakeña, dakakoña chachiwahi mudimu wadu wunaditemesheleli.”—Isaya 55:11.

Indi “Izu” daNzambi “dakakoña chachiwahi” hela mwafuukulayi, kutalisha heseki nichihandilu chawantu chakumbidi hichumanyi?

Kwiluka Mpinji yaNzambi

Solomoni washimwini chuma chakwiluka nachu. Hanyima yakuhosha nindi, ‘Nzambi wela dehi yuma yejima yiikali nalubanji hampinji yayu,’ wahosheli cheñi nindi, ‘Washa dehi nawa mpinji yahaya nyaka munyichima yawu, kulonda muntu yakañanyi kwiluka mwaya mudimu waNzambi walala welayi, kufumisha kutachi ndo-o nikunsa.’—Mukwakutaŋisha 3:11.

Antu asoneka nsañu yayivulu kutalisha haniyi vasi. Kuhosha hohu chalala, wejima wetu twadihulahu dehi hakulema kwawumi niyuma yikatumwekena kumbidi. Mukuhanda kwawantu kwejima, antu chayikalilaña kwiteja nawu muchihandilu mwekala hohu kuzata nañovu hayuma yinakukeñeka kuyizata, nkumininaku hikufwa. Etu antu atuleña munjila yambukaku nayileñaleña yejima yikweti wumi, muloña hitwatoñojokaña hohu hawumi wetu wakatatakaku, ilaña twatoñojokaña cheñi niwumi wakumbidi. Twafwilaña nikutwalekahu kuhanda haya nyaka. Muloñadi? Kwesekeja nachalumbulula nsona, Nzambi ‘washa dehi mpinji yahaya nyaka munyichima yawantu.’ Hakwila nawu aditiyishi kuwaha, antu ajinookaña neyi chakwila kwekala wumi hanyima yakufwa. Amakwawu ahoshaña nawu kwekala chuma chatwalekañahu kuhanda neyi tunafwi. Amakwawu akuhwelela nawu neyi tunafwi twatwalekañahu kuvwalika mumujimba wacheñi haya nyaka. Ilaña amakwawu atoñojokaña nawu yuma yejima yamuwumi ayishimwineñahu dehi nawa kwosi chuma chitwatela kwila nayuma yeniyi. Chawushona hama, kwosi walumbulula mwalala chikupu kutalisha haniyi nsañuku. Muloña Bayibolu  yahosha nawu hela chakwila akuzata nañovu ‘antu akakañanya kwiluka mwaya mudimu waNzambi walala welayi, kufumisha kutachi ndo-o nikunsa.’

Ichi chaambu chekala hakachi kampwila yakufwila kwiluka nikukañanya kwiluka ñakwilu chinakabishi akwakukeñakeña maana hadi yaaka yayivulu. Hela chochu, chineli Nzambi washa dehi mpwila yeniyi munyichima yetu, komana hichikuwaha neyi tumulomba kulonda yatwinki yuma yitwakeñaña hakwila nawu tumanishi mpwila? Kafwampi Bayibolu yahosha nawu: “Wakamununaña muchikasa cheyi, yuma yejima yikweti wumi wayiikutishaña nayuma yakeñawu.” (Masamu 145:16) Kuhitila mukudiza Izu daNzambi, Bayibolu, tunateli kuwana nsañu yalumbululawu chachiwahi kutalisha hawumi nikufwa ninkeñelu yaNzambi yahaya nyaka kutalisha kwiseki niantu.—Aefwesesa 3:11.

[Mazu ekoku adi hefu 5]

“Akwalufuchi hidiwu ashiyañamu akwawuku.”—Mukwakutaŋisha 9:11

[Mazu ekoku adi hefu 6]

Neyi ndimi yotumba mbutu muchilaaka chabula kutelela, komana wukuhosha nindi chumichi achishimwineñahu dehi neyi yabula kwañula mbutu yayivulu?

[Mazu ekoku adi hefu 7]

Twatoñojokaña hawumi nikufwa muloña Nzambi ‘washa dehi mpinji yahaya nyaka munyichima yawantu’