Engkim Tân Hian Hun Ruat A Awm

“Engkim tân hian hun ruat a awm a, vân hnuaia thiltih zawng zawng tân hun remchâng a awm,” tiin Bible chuan a sawi a. Hêng thute ziaktu, hmân lai Lal fing Solomona chuan pian hun leh thih hun a awm a, siam hun leh ṭhiah hun a awm bawk a, hmangaih hun leh huat hun a awm bawk tih a sawi zawm a ni. A tâwpah chuan: “Hnathawktuin a thawhrimna ata eng hlâwkna nge a hmuh?” a ti hial a ni.—Thuhriltu 3:1-9.

HENG thute an chhiar hian, Bible-in engkim atân hun ruat lâwksa a awm tih a zirtîr ngei niin mi ṭhenkhat chuan an hria a; chu chu Bible-in engkim ruat lâwk a ni tih rinna a thlâwp niin an ngai tihna a ni. Chu chu a ni tak zet em? Bible-in nuna thilthleng zawng zawngte hi ruat lâwk vek a ni tih ngaih dân chu a thlâwp em? “Pathian Lehkha Thu zawng zawng hi Pathian thâwk khuma pêk” a nih avângin, Bible hmun khata kan thu chhiar chu hmun danga mi nên a inmil tûr a ni. Chuvângin, he mi chungchânga Pathian Lehkha Thu, Bible-in sawi tûr a neihte chu i lo en ang u.—2 Timothea 3:16.

Hunin A Rawn Herchhuahpui Hriat Lâwk Loh Thilthleng

Thuhriltu bu-ah, Solomona chuan heti hian a ziak belh a ni: “Ka han thlîr leh a, ni hnuaia intlânsiaknaah mi chak chu a hlawhtling chuang lo va, indonaah mi huai a hlawhtling chuang hek lo; mi fingin ei tûr a hmu bîk lo va, mi nîkhaw hria an hausa chuang hek lo va, mi themthiamin duhsak an hlawh chuang hek lo,” tiin. Engvângin nge? “Mi zawng zawng chungah hun leh khawrêl [“hunin a rawn herchhuahpui hriat lâwk loh thilthleng,” New World Translation] ang angin a thleng mai zâwk tih ka hmu,” tiin a hrilhfiah a ni.—Thuhriltu 9:11.

Nuna thil engkim hi ruat lâwk vek a ni tih sawi hmuh ahnêkin, Solomona chuan ‘hunin a rawn herchhuahpui hriat lâwk loh thilthleng chu mi zawng zawng chunga a thlen’ ṭhin avângin, mihringte’n an thiltih tum a hlawhtlin dâwn leh dâwn loh an sawi lâwk dik thei lo tih a târ lang zâwk a ni. Mi chunga thilthleng engemaw chu a hmun dik leh a hun takah a awm fuh vâng mai emaw, a nih loh leh a hun lo leh a hmun lova a awm palh vâng mai emaw a ni fo ṭhîn.

Entîr nân, he thu: “Intlânsiaknaah mi chak chu a hlawhtling chuang lo,” tih hi han ngaihtuah ta ila. Kum 1984-a Los Angeles, California, U.S.A. rama neih Olympics-a meter 3000 hmeichhe intlânsiakna hmingthang tak leh dangdai bawk sia thilthleng chu i hre chhuak emaw, i chhiar tawh emaw mai thei a. Britain aiawhtu leh United States aiawhtu intlânsiak mi pahnihte chuan gold medal lâk ngei chu an inbeisei ve ve a. Amaherawhchu, kawng chanve vêlah chuan an insû palh hlauh mai a. Pakhat zâwk chu a tlu a, a tlân zawm thei ta lo va; a tlân zawm thei zâwka pawh chuan a lunghnual êm avângin, a pasarihna a hauh pha ṭâwk chauh a ni.

Chutiang thil a thlen chhan chu thleng tûra ruat lâwk a nih vâng em ni? Mi ṭhenkhat chuan a ni an ti mai thei. Mahse, intlânsiaknaa an pahniha chak lohtîrtu chu, mihring tumahin a thleng ang tih pawh an sawi lâwk theih loh insut palhna vâng a ni tih a chiang hle. A nih leh, an pahniha insu palh tûra ruat lâwk an ni em? Ṭhenkhat chuan a ni an ti leh mai thei. Mahse, inkhelh dân chanchin puangtute chuan infiam mi chak tak pahnih chak zâwk nih tuma nasa taka an inel avânga insu palh niin an sawi a ni. Bible sawi ang ngeiin, “hunin a rawn herchhuahpui hriat lâwk loh thilthleng chu mi zawng zawng chungah a thleng ṭhîn” a ni. Mi chu engti khawp pawhin inpuahchah mah se, beisei loh taka a ṭan lâkna tisukuktu thil engemaw a awm fo ṭhîn a; chu chuan ruat lâwkna nên inkûngkaihna a nei lo rêng rêng.

Chuti a nih chuan, Bible-in: “Engkim tân hian hun ruat a awm,” a tih hian eng a tihna nge ni ta ang? Kan nakin hun tûr nghawng theitu tûr thil engemaw tih theih kan nei em?

Ṭan Lâkna Tinrêng Atâna Hun Ṭha Ber

Thlarauva thâwk khum Bible ziaktu chuan mi mal tinte nakin hun tûr ruat lâwkna emaw, mi  nuna a tâwpa thil lo thleng tûr emaw a sawina lam ni lovin, Pathian thiltum leh chu chuan mihringte a nghawng dân tûr chungchâng a sawina a ni zâwk mah a ni. Chu chu engtin nge kan hriat? A bul berah chuan, a hma lam leh a hnung lama thu awmin chutiang a nihzia min hrilh a ni. “Hun ruat” nei anga lang thil tam tak a târ lan hnuah, Solomona chuan: “Pathianin mihring fate hnêna buaipui tûra hna a lo pêk chu ka hmu ta. Engkim hi an hun ṭheuhvah chuan mawi takin a siam a,” tiin a ziak a ni.—Thuhriltu 3:10, 11.

Pathian chuan mihringte hnênah an buaipui tûr hna tam tak a pe a—Solomona chuan chûngte chu a târ lang nual a ni. Pathian chuan kan tih duhzâwng thlang tûrin zalên taka duh thlan theihna min pe a. Amaherawhchu, eng hna pawh hian thawh hun tûr dik, a nih loh leh rah chhuah ṭhat ber hun tûr a nei a ni. Solomona thusawi Thuhriltu 3:2-a kan hmuh: “Phun hun a awm a, thil phun phawi hun a awm,” ti hi entîrna atân han hmang ta ila. Lo neitu chuan eng thlai tân pawh phun hun, a nih loh leh theh hun tûr dik a awm tih a hria a. Ani chuan chu chu ngaihthahin, a hun lovah a thlai chi chu theh ta se engtin nge ni ang? Thawk rim hle mah se, thlai seng tûr a neih ṭhat loh chuan chutiang ni tûra ruat lâwk niah a puh tûr a ni em? Ni lo ve! Thil kal sual chu a hun takah a thlai chi a theh lo hi a ni. Lo neitu chuan Siamtuin a lo din tawh thlai chi theh hun tûra a hun ruat chu zui sela chuan, a ti ṭha mai tûr.

Chuvângin, Pathianin a ruat lâwk chu mi mal tinte nuna thilthleng tûr emaw, thilthleng zawng zawngte rah chhuah tûr emaw ni lovin, a thiltum nêna inmil mihringte thiltih thununtu thu bulte hi a ni. Mihringte chuan an thawhrimna rah hlim taka seng tûr chuan, Pathian thiltum leh a hun ruat chu hria a, chu mi mila thil an tih chu a ngai a ni. Thlâk danglam theih loh tûra ruat lâwk chu mi mal tinte nuna thilthleng tûr ni lovin, Pathian thil tihtum hi a ni. Zâwlnei Isaia kal tlangin, Jehova chuan: “Ka kâ aṭanga ka thu chhuak chu . . . engmah tih nei lovin ka hnênah a kîr leh lo vang a, ka duh ang chu a tizo zâwk ang a, thil ti tûra ka tirhnaah chuan a hlawhtling bawk ang,” tiin a puang chhuak a ni.—Isaia 55:11.

A nih chuan, leilung leh mihringte nakin hun tûr chungchânga “hlawhtling bawk” tûr Pathian “thu,” a nih loh leh a thiltum a sawi chhuah chu eng nge ni?

Pathian Hun Ruat Hre Thiamin

Solomona chuan a sawi hmâwr hmuh a. Pathianin “engkim hi an hun ṭheuhvah chuan mawi  takin a siam a,” a tih hnuah, heti hian a sawi zawm a, “Mihring rilruah chuan chatuan a dah bawk a: mahse, chuti pawhin anni chuan Pathianin a tîr ata a tâwp thlenga thil a tih chu an hmu chhuak thei chuang lo,” tiin.—Thuhriltu 3:11.

He Bible châng ṭanchhanin thu tam tak ziak a ni tawh a. Mahse, thil nih dân dik tak chu kan zavai hian kan thinlung chhûngrîlah nun awmzia leh a tâwpa kan chunga thil lo thleng tûr ngaihtuah chet chet châng kan nei ṭheuh hi a ni. Hmasâng aṭang tawhin, mite chuan thihnaa tâwp mai tûr atâna tih ṭûl apiang tia dam chhûng hun hman chu nun awmzia a ni tih pawm harsa an ti hle. Keini mihringte hi thil nung dangte lakah chuan kan dang lam bîk hle a; tûna kan nunna chauh ni lovin, kan nakin nun tûr pawh kan ngaihtuah tel a. Tin, thi lova, chatuana nun zawm zêl pawh chu kan châk hial a ni. Engvângin nge? Bible chângin a hrilhfiah angin, Pathianin “mihringte rilruah chatuan a dah,” a nih loh leh chatuana nun duhna a pêk vâng a ni.

Chu chatuana nun châkna tihreh nân, mite chuan thih hnu lama nun a awm leh awm loh an ngaihtuah ṭhîn a. Ṭhenkhat chuan kan thih hnuah keimahnia awm thil engemaw chu la nung chhunzawm zêl angah an ngai a ni. Mi dangte chuan kan thih hian kan piangnawn zêl tûrah an ngai bawk a. Mi dang lehte erawh chuan nuna thil engkim hi Pathianin a ruat lâwk vek a, chu mi thlâkthleng tûr chuan tih theih rêng kan nei lo niin an hria a ni. Lungchhiatthlâk takin, hêng hrilhfiahna a enga mah hi a lungawithlâk tak tak lo. Chu chu mihringte’n anmahni ṭan lâkna mai chuan ‘Pathianin a tîr ata a tâwp thlenga thil a tih chu an hmu chhuak thei ngai dâwn lo’ tih Bible-in a sawi vâng a ni.

Hun rei tak ata lo awm tawh he thil hriat châkna leh a chhânna hmuh theih lohna hian mihring chanchin zawng zawnga thil ngaihtuah mite leh mi thiamte chu a tibuai hle a. Amaherawhchu, Pathianin kan thinlungah chatuana nun duhna emaw, châkna emaw min pêk avângin, chu mi châkna tireh tûra kan thil tih ngaite min hrilh tûra amah beisei chu a inâwm hle dâwn lâwm ni? Tihah chuan, Bible chuan Jehova chungchângah: “I kut i phar a, thil nung zawng zawng châkna chu i tihrehsak ṭhîn,” a ti si a. (Sâm 145:16) Pathian Lehkha Thu, Bible zirin, nunna leh thihna chungchâng, leh leilung leh mihringte chungchânga Pathian chatuan remruat hrilhfiahna lungâwithlâk tak chu kan hmu thei a ni.—Ephesi 3:10, 11. (w09 3/1)

[Phêk 5-naa thu lâk chhuah]

“Intlânsiaknaah mi chak chu a hlawhtling chuang lo.”—Thuhriltu 9:11.

[Phêk 5-naa thu lâk chhuah]

Lo neitu chuan a hun lovah a thlai chi chu theh ta sela, a seng ṭhat lohna chu chutiang ni tûra ruat lâwk a nih vângah a puh tûr em ni?

[Phêk 6-naa thu lâk chhuah]

Pathianin “mihring rilruah chatuan a dah” avângin nunna leh thihna chungchâng kan ngaihtuah