Ubbabau Wodee Deˈees

Geeshsha Maxaafay: “Ubbabau wodee de7⁠ees; saloppe garssa baggaara oosettiyaabau ubbau a laittai laittai de7⁠ees” yaagees. Hagaa xaafida, beni wode erancha Kawuwaa Solomoni, yelettanaunne hayqqanau, keexxanaunne qolanau, dosanaunne ixxanau wodee deˈiyoogaa yootiis. Wurssettan i: “Yaatin, oosanchchi ba daafurido daafuraappe aiba wore demmii?” yaagiis. —Eranchchaa 3:1-9.

ISSI issi asay ha xiqisiyaa nabbabidi, ubbabay haniyo wodee kasetidi kuuyettidoogaa Geeshsha Maxaafay tumuppe tamaarissees giidi qoppees; eti Geeshsha Maxaafay qaadan ammaniyoogaa kaafees giidi qoppoosona. Hegee tumee? Deˈuwan hanettiya ubbabay kasetidi kuuyettiis giyo qofaa Geeshsha Maxaafay kaafii? “Xoossaa maxaafa ubban Xoossaa Ayyaanai” deˈiyo gishshau, Geeshsha Maxaafan issisan nuuni nabbabiyoobay harasan deˈiyaagaara moggottana bessees. Yaatiyo gishshau, ha yohuwaa xeelliyaagan Xoossaa Qaalaa, Geeshsha Maxaafay woygiyaakko ane beˈoos.—2 Ximootiyoosa 3:16.

Wodiyaanne Qoppennan Gayttiyaabaa

Eranchchaa maxaafan Solomoni gujjidikka: “Taani saloppe garssaara harabaakka be7aas; hegeekka, eesotiya wottanchchati ubba wode xoonokkona; woikko mino olanchchatikka ubba wode olan xoonokkona; woikko aadhdhida eranchchati ubba wode qumaa demmokkona; woikko cinccati ubba wode duretokkona; woikko tamaarida asati ubba wode sabettokkona” yaagidi xaafiis. Aybissi? I: “Ubbaikka [“qoppennan gayttiyaabaynne,” NW] wodee oottoogaadan” haniyo gishshataassa gidiyoogaa qonccissiis.—Eranchchaa 9:11.

 Solomoni ubbabay deˈuwan gakkiyoy qaadaana giyoogaappe, asaa naati oottiyoobay kaalettiyoobaa kasetidi erennay “qoppennan gayttiyaabaynne wodee oottoogaadan” haniyo gishshataassa gidiyoogaa qonccissiis. Darotoo, issi ura deˈuwan hanettiya issibay he uri loˈˈo wodiyan loˈˈ sohuwan deˈido gishshataassa, woykko iita wodiyan iita sohuwan deˈido gishshataassa gaana danddayeettees.

Leemisuwau, “Eesotiya wottanchchati ubba wode xoonokkona” giyaagaa qoppa. Amerkkan, Kalforniyan, Los Anjeles kataman, 1984 Olomppikiyan, 3000 meetiriyaa macca naatu wottan hanida, meeze gidenna hanotaabaa erennan woy nabbabennan aggakka. Biritaaniyaa biittaa kalˈˈatidanne Amerkkaa biittaa kalˈˈatida naaˈˈu wottanchatikka worqqa madaaliyaa demmanau hidootidosona. Gidikkokka, bagga gidiyaagaa woxxidi issoy issuwaara domˈˈettidosona. Issinna kunddada wottaappe attaagaasu; haranna qassi laappuntta kiyada keehippe azzanaasu.

Hegee hanidoy qaadaanee? Issi issi asay hegaadan gaana danddayees. SHin eti xoonennan attidoy domˈˈettido gishshataassa gidiyoogee qoncce; hegaa ooninne kasetidi qoppana danddayenna. Yaatin, eti domˈˈettidoy qaadaanee? Haˈˈikka issoti issoti hegaadaana gaana danddayoosona. Gidikkokka, ispporttiyaabaa yootiyaageeti he daafay gakkidoy naaˈˈu mino wottanchati issoy issuwaa xoonanau baaxetido gishshataassa gidiyoogaa yootidosona. Geeshsha Maxaafay yootiyoogaadan, “ubbabaikka qoppennan gayttiyaabaynne wodee oottoogaadan hanees.” Issi uri ay keena loyttidi giigettikkonne, issi qoppennabay ubbatoo a oosuwaa ayfiyaa bochana danddayees; hegee qaadaara gayttidaba gidenna.

Yaatin, Geeshsha Maxaafay “ubbabau wodee de7⁠ees” giyoogee woygiyoogee? Nu sinttanaa deˈuwaa bochiya, nuuni oottana danddayiyoobi deˈii?

Oottiyo Ubbabau Keehippe Loˈˈo Wodiyaa

Geeshsha Maxaafaa xaafee issi uraa qaadaabaa woykko wodeppe a deˈuwan gakkanabaa gidennan, Xoossaa halchuwaabaanne hegee asaa naata bochiyo ogiyaabaa yootiis. Hegaa aybin eriyoo? Yuushuwan deˈiya qofay hegaa qonccissees. Solomoni a ‘wodee wodee deˈiyo’ darobaa yooti simmidi: “Taani qassi, asaa naati daafuridi oottana mala, Xoossai immido  toohoi keehi deexo gidiyoogaa be7aas. Xoossai ubbabaa a wodiyan wodiyan loittidi oottiis” yaagidi xaafiis.—Eranchchaa 3:10, 11.

Xoossay asaa naati oottanaadan darobaa immiis—Solomoni hegeetuppe daruwaa yootiis. Xoossay nuuni oottanabaa dooranaadan laˈatettaakka immiis. Gidikkokka, ubba oosuwaukka loˈˈo ayfiyaa demissiya injje wodee woy loˈˈo wodee deˈees. Leemisuwau, Eranchchaa 3:2n, Solomoni “tokkanau wodee de7⁠ees; tokkidoogaa shoddanaukka wodee de7⁠ees” giidoogaa akeeka. Ubba kattaa tokkanau a wodee wodee deˈiyoogaa goshshanchati eroosona. Issi goshshanchay hegaa eriiddi issi kattaa bessenna wodiyan tokkikko shin? I minni oottikkonne loˈˈo ayfiyaa demmana xayikko, hegaa qaadan gaasoyana koshshii? Koshshennaagee qoncce. I kattaa bessiya wodiyan tokkibeenna. Medhidaagee giigissido meretaa maaraa goshshanchay kaallidaba gidiyaakko, loˈˈo ayfe demmana shin.

Yaatiyo gishshau, Xoossay issi uraa qaadaa woykko haniya ubbabaa gidennan, ba halchuwaara moggottiya hanotan asay oottanaadan issi issi baaso siraatata kuuyiis. Asay ba oottiyooban ayfiyaa demmanau, Xoossaa halchuwaanne a wodiyaa akeekanaunne hegaara moggottidi oottanau bessees. Kasetidi kuuyettidabaynne laamettennabay issi ura gakkanabaa gidennan, Xoossay oottanau halchidobaa. Yihooway hananabaa yootiya Isiyaasa baggaara: “Ta doonaappe kiyiya qaalaikka . . . taani halchchidoogaa polana; qassi kiittidoogaa oottanaappe attin, taakko coo simmenna” yaagiis.—Isiyaasa 55:11.

Yaatin, saˈaanne asaa naatu sinttanaabaa xeelliyaagan Xoossay ‘kiittidoogaa oottiya’ a ‘qaalay’ woykko halchoy aybee?

Xoossaa Wodiyaa Akeekiyoogaa

Solomoni hegaa akeekanau maaddiyaaba yootiis. “Xoossai ubbabaa a wodiyan wodiyan loittidi oottiis” gi simmidi, “asaa wozanan merinatettaa wottiis; hegaa gidikkonne, Xoossai oottidobaa ubbaa koiruwaappe wurssettai gakkanaashin, asai wurssidi eranau danddayenna” yaagiis.—Eranchchaa 3:11.

Ha xiqisiyaa xeelliyaagan darobay xaafettiis. SHin hegaa birshshettay akeekanau metennaba; nuuni ubbay nu deˈuwaanne sinttappe nuna naagiyaabaa xeelliyaagan issi wode wozanappe qoppennan aggokko. Asaa naati deˈido wode ubban, deˈoy hayqqana gakkanaashin oottana koshshiyaabaa minnidi oottiyoogaa xalla gidiyoogaa asay ammanidi ekkanau metootiis. Asaa naati haˈˈibaa xalla gidennan, sintta wodiyaabaakka qoppiyoogan deˈon deˈiya mereta ubbaappe dumma. Ubba nuuni merinau deˈanaukka amottoos. Aybissi? Geeshsha Maxaafay yootiyoogaadan, “Xoossai asaa wozanan merinatettaa” wottido gishshataassa.

He amoy polettanaadan koyiyo gishshau, asay darotoo hayquwaappe simmin deˈoy deˈiishsha giidi qoppiiddi takkiis. Issoti issoti nuuni hayqqiyo wode hayqqennabi nu giddon deˈees giidi ammanoosona. Harati nuuni hayqqiyo wode zaaretti zaaretti yelettiiddi merinau deˈiyoogaa ammanoosona. Harati qassi deˈon gakkiya ubbabay nuuni laammana danddayenna, qaadan gakkiyaaba woykko Xoossa shene giidi qoppoosona. Ha giyoobati ubbay aliya zaaruwaa immennaagee azzanttiyaaba.  Hegee hanidoy Geeshsha Maxaafay, “Xoossai oottidobaa ubbaa koiruwaappe wurssettai gakkanaashin, asai wurssidi eranau danddayenna” yaagiyo gishshataassa.

Era koshshaynne zaaro demmanau danddayennaagee kaalettido ha daro wodiyau takkida metoy, asi deˈido wode ubban palasppata barche bessidaba. Gidoppe attin, Xoossay nu wozanan he amuwaa wottido gishshau, he amuwaa polanau aybi koshshiyaakko eranau akko xeelliyoogee bessiyaaba gidennee? Hegaa bollikka, Geeshsha Maxaafay Yihoowa xeelliyaagan: “Neeni ne kushiyaappe yeggada, paxa de7⁠iyaageeta ubbaa amuwaa alaasa” yaagees. (Mazamure 145:16) Xoossaa Qaalaa, Geeshsha Maxaafaa xannaˈiyoogan, deˈuwaabaanne hayquwaabaa, qassi saˈaanne asaa naata xeelliyaagan Xoossaa merinaa halchuwaabaa aliya zaaruwaa demmana danddayoos.—Efisoona 3:11.

[Sinttaa 5n deʼiya misiliyaa qonccissuwaa]

“Eesotiya wottanchchati ubba wode xoonokkona.” —Eranchchaa 9:11

[Sinttaa 6n deʼiya misiliyaa qonccissuwaa]

Issi goshshanchay issi kattaa a wodiyan tokkana xayikko, i loˈˈo ayfiyaa demmibeennaagaa qaadan gaasoyana koshshii?

[Sinttaa 7n deʼiya misiliyaa qonccissuwaa]

Nuuni deˈuwaabaanne hayquwaabaa qoppiyoy Xoossay nu “wozanan merinatettaa” wottido gishshataassa