“Iei ussun Kot a föri aramas lon püsin lapalapan, eman mwän me eman fefin.”​—Keneses 1:27.

EKKEEI kapas le poputään Paipel, aramas ra silei, a apworausa eü me lein ekkewe mettoch mi amwarar Kot a “föri a unusen mürina lon ar fansoun,” ina an föratä ewe pean aramas mi unusöch, Atam me If. (Än Salomon Afalafal 3:11) Jiowa Kot, ewe Chon Föratä a apasa ngeniir: “Oupwe nöünöü o achomongakemi pwe fanüfan epwe masou remi o nom fän nemeniemi. Oupwe nemeni ekewe ikenen leset me ekewe mansüsü me mönün won unusen fanüfan.”​—Keneses 1:28.

Lon ena pworaus ngeni ewe äkkäeüin pean aramas, Kot a pwär ngeniir an we kokkot. Repwe achommongerelo me tümünü ewe fönüfan pwe epwe wiliti eü paratis fän iter me nöür kewe. Kot ese pwal affata ükükün ttamen manauer me ineet atun repwe mälo. Nge Kot a isetiu mwer eü äpilükülük mi amwarar. Ika ra filiöch me atipeeüfengeni manauer me letipen Kot, ra tongeni manau lon kinamwe me pwapwa tori feilfeilo chök.

Nge ra filingaü, ina minne aramas ra chinnapelo me mälo. Ina popun Hiop a  pwal apasa: “Eman aramas mi uputiu me ren eman fefin a chök manau lon fansoun mochomoch, nge manauan a uren weires.” (Hiop 14:1) Pwata a fis ena osukosuk?

“Iwe, ren eman mwän tipis a tolong lon fanüfan, nge an tipis a atoto mäla. Iei popun mäla a tori aramas meinisin, pun ir meinisin ra tipis.” (Rom 5:12) Ena “eman aramas,” Atam, a pwisin filatä an epwe älleasolapa än Kot we allük mi ffatöch. (Keneses 2:17) Ren minne a filatä, Atam a pöütalo ewe äpilükülükün manau tori feilfeilo lon paratis woon fönüfan. A pwal pöüt seni mwirimwirin kewe meinisin älemwirier mi aüchea me a pwal toriir anümamaüen tipis me mälo. Ussun itä mettoch meinisin a pöütülo are met?

Eü Fansoun Asefösefäli Mettoch

Fite ngeröü ier mwirin, ewe sou köl a makkeei: “Ekewe chon pwüng repwe fanüeni ewe fanü o nonom won tori feilfeilachök.” (Kölfel 37:29) Jiowa a alükülüküükich pwe epwe apwönüetä an we pwon lon Eten ren an äweweöchü met epwele föri: “Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.” Mürin ewe mi mot won ewe lenien motun king a apasa, “Nengeni, üpwe asöfösefäli mettoch meinisin.”​—Pwarata 21:4, 5.

Pokiten mettoch meinisin mei wor en me an fansoun an epwe fis, iwe sipwe kapas eis “Ineet ewe fansoun mettoch meinisin epwe sefösefäl pwe meinisin än Jiowa pwon mi amwarar repwe pwönüetä?” Ekkewe Chon Pwäratä Jiowa ra föri ei puk, ra achocho le öüröüra aramas pwe sia nonnom lon met ewe Paipel a eita ngeni “ränin lesopolan” me ekiselo chök Jiowa epwele mwöküt le “asöfösefäli mettoch meinisin.” (2 Timoti 3:1) Sia peseok le etittina ewe Paipel me käeö ussun ekkewe mettoch mi amwarar kopwe tongeni pwapwaiti. Sia pwal peseok le etiwa ekkeei kapasen etiwetiw: “Oupwe kütta ewe Samol mi Lapalap lupwen fansoun oua tongeni küna, oupwe köri, lupwen a arap.” (Aisea 55:6) Met epwe fis lon manauom ese kkotolo me mwan, pun manauom a pwisin longolong woom, ka tongeni pwisin filatä met kopwe föri ika ka mochen manau tori feilfeilo!

[Ekis Pworous lon pekin taropwe 8]

“Nengeni, üpwe asöfösefäli mettoch meinisin”