Tion sa Pagpili

“Ang Dios nagtuga sang tawo sa iya kaugalingon nga dagway, sa dagway sang Dios gintuga niya sia; lalaki kag babayi gintuga niya sila.”—Genesis 1:27.

INING pamilyar nga mga tinaga sa una nga mga pahina sang Biblia nagasugid nga ginhimo sang Dios ang isa sa pinakamatahom nga mga tinuga, ang himpit nga mag-asawa nga sanday Adan kag Eva “sa nagakaigo nga tion sini.” (Eclesiastes 3:11, Biblia sang Katilingban sang mga Kristiano) Subong ila Manunuga, ginsilingan sila ni Jehova nga Dios: “Magmabungahon kag magbuad, kag magtugub sang duta kag magpakaagalon sa iya; kag maggahum sang kaisdaan sang dagat kag sang kapispisan sang kahanginan kag sang tagsa ka buhi nga butang nga nagagiho sa duta.”—Genesis 1:28.

Paagi sa sini nga mga pinamulong ginpahibalo sang Dios ang iya katuyuan sa una nga mag-asawa. Dapat sila magpamata, atipanon ang duta kag himuon ini nga paraiso. Dayon diri sila magapuyo sang ila mga anak. Gintuyo gid sang Dios nga magkabuhi sila sing walay katapusan. May isa pa ka maayo nga butang nga ginhatag ang Dios sa ila. Kon pilion nila ang husto nga dalanon kag magtuman sa Dios, magakabuhi sila sing mahidaiton kag malipayon sing walay katapusan.

 Sayop ang ila ginpili, gani ang tanan nga tawo nagatigulang kag nagakapatay. Ang matuod, si Job nagsiling: “Ang tawo nga natawo sa babayi malip-ot sing mga adlaw, kag puno sang kagamo.” (Job 14:1) Ano ang natabo?

Ang Biblia nagapaathag: “Paagi sa isa ka tawo nagsulod ang sala sa kalibutan kag ang kamatayon paagi sa sala, kag gani ang kamatayon naglapnag sa tanan nga tawo bangod sila tanan nakasala.” (Roma 5:12) Ang “isa ka tawo” nga ginatumod diri amo si Adan. Hungod niya nga wala gintuman ang simple pero maathag nga sugo sang Dios. (Genesis 2:17) Bangod sa iya indi husto nga pagpili nadula ni Adan ang pribilehiyo nga mabuhi sing walay katapusan sa paraiso sa duta. Kag nadula man sang iya mga anak ang maayo nga palanublion, amo nga nagapakasala sila kag nagakapatay. Daw masiling nga nadula na ang tanan. Pero, nadula na gid bala?

Tion sa Pagbag-o

Ginatos ka tuig sang ulihi, ang manunulat sang Salmo gin-inspirar nga magsulat: “Ang mga matarung magapanubli sang duta, kag magapuyo dira sa gihapon.” (Salmo 37:29) Ginapasalig kita sang Dios nga tumanon gid niya ang iya saad sa Eden, amo nga matahom ang paglaragway sang Biblia sa himuon niya sa indi madugay: “Pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.” Nian, ang Dios mismo nagsiling: “Yari karon! Ginahimo ko nga bag-o ang tanan nga butang.”—Bugna 21:4, 5.

Nahibaluan naton nga may nagakaigo nga tion para sa tanan nga butang, gani mahimo mamangkot kita, San-o maabot ang tion sang pagbag-o nga matuman ang matahom nga mga saad sang Dios? Ang mga manugbalhag sini nga magasin, ang mga Saksi ni Jehova, nagatinguha nga ipahibalo sa mga tawo nga nagakabuhi na kita sa ginatawag sang Biblia nga “katapusan nga mga adlaw” kag malapit na ang tion nga himuon sang Dios nga ‘bag-o ang tanan nga butang.’ (2 Timoteo 3:1) Ginapalig-on ka namon nga usisaon ang Biblia kag tun-an ang matahom nga butang nga himuon sang Dios sa palaabuton. Ginapalig-on ka man namon nga batunon ini nga imbitasyon: “Pangitaa ninyo ang GINOO samtang nga makita pa sia, tawga ninyo sia samtang nga malapit pa sia.” (Isaias 55:6) Kon amo, ang imo kabuhi kag palaabuton wala nasandig sa kapalaran, kundi nagadepende sa imo!

[Blurb sa pahina 8]

“Yari karon! Ginahimo ko nga bag-o ang tanan nga butang”