Duh Thlan Hun A Ni

“Pathianin ama anpuiin mihring a siam a, Pathian anpui ngeiin a ni a siam ni; mipaah leh hmeichhiaah a siam a ni.”—Genesis 1:27.

BIBLE bu ṭan tîr lama awm he kan thu hriat ṭhan tak hian Pathianin ‘an hun ṭheuhva mawi taka a siam’ thil ropuite zînga pakhat—mihring tuak ṭha famkim, Adama leh Evi a siam thu—chu a târ lang a ni. (Thuhriltu 3:11) Anmahni Siamtu a nih angin, Pathian Jehova chuan an hnênah: “Chi tam tak thlaha lo pungin, leilung hi luah khat ula, in thu thuin awmtîr rawh u; tuifinriata sangha chungah te, chunglêng sava chungah te, thil nung leia bawkvâka kal zawng zawng chungah te thu nei bawk rawh u,” a ti a ni.—Genesis 1:28.

Chutiang chuan Pathianin mihring tuak hmasa ber hnênah a thiltum chu a hriattîr a. Anni chuan chi tam tak thlahin, leilung hi an enkawl tûr a ni a, anmahni leh an thlahte tân khawvêl pum pui hi paradis-ah an siam tûr a ni. An dam chen tûr leh thih hun tûr chu ruat lâwk a ni lo. Pathian chuan an hmâah beiseina ropui  tak a dah zâwk a ni. Duhthlanna dik siamin leh Pathian nêna inrema awm rengin, chatuanin remna leh hlimna ṭha famkim chênin an nung thei a ni.

Duhthlanna dik lo an siam avângin, mi zawng zawngin an tarin, an thih phah a. Thlahtu Joba chuan: “Hmeichhe hrin tawh mihring phawt chu rei lo tê dam, buainaa khat a ni,” tiin a sawi. (Joba 14:1) Eng nge kal sual ta chu?

“Mi pakhat avângin sual khawvêlah a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a,” tiin Bible chuan a hrilhfiah a. (Rom 5:12) Chu “mi pakhat” chu, Pathian thupêk tluangtlam tak leh chiang tak bawhchhe luitu, Adama a ni ngei mai. (Genesis 2:17) Adama chuan a duhthlanna siam avângin lei paradis-a chatuana nun theihna chu a chân ta a. A thlahte tâna rochan tûr hlu tak chu hlohvin, sual leh thihna ânchhia chu a rochun ta zâwk a ni. Beisei tûr rêng awm lo niin a lang. Mahse chutiang chu a ni tak zet em?

Siam Thar Leh Hun

Kum sâng têl a liam hnuah chuan, fakna hla phuahtu chu: “Mi felte chuan ram hi an luah ang a, a chhûngah hian kumkhuain an awm ang,” tia ziak tûra thlarauva thâwk khum a ni a. (Sâm 37:29) Eden huana a thutiam chu a thleng famkim ngei dâwn tih tiam nawn nân, Pathian Thu chuan nakin lawka a thiltih tûr chu heti hian mawi takin a târ lang a ni: “An mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tiin. Tichuan, Pathian ngei chuan: “Ngai teh, thil engkim ka siam thar e,” a ti a ni.—Thu Puan 21:4, 5.

Engkim tân hun ruat a awm avângin, zawhna inâwm tak lo chhuak ta chu, Pathian thutiam ropui tak thleng famkim tûrin, engtikah nge chu siam thar lehna hun chu a lo thlen ang? tih hi a ni. He magazine tichhuaktu Jehova Thuhretute chuan Bible-in ‘ni hnuhnûng’ tia a koh hunah kan awm tawh tih leh ‘thil engkim siam thar’ tûra Pathian hma lâk hun chu a lo thleng thuai dâwn tih mite hriattîr tûrin nasa takin an thawk rim a ni. (2 Timothea 3:1) Bible bih chiang a, i chan theih malsâwmna ropui takte chungchâng zir tûrin kan fuih che a. “Hmuh awla a awm lai hian LALPA chu zawng ula, a hnaih lai hian ko rawh u,” tih sâwmna hi pawm tûrin kan fuih bawk che a ni. (Isaia 55:6) Ruat lâwkna thununna hnuaia awm ahnêkin, chatuana nun beiseina chu nangmahah a innghat tlat zâwk a nih chu! (w09 3/1)

[Phêk 7-naa thu lâk chhuah]

“Ngai teh, thil engkim ka siam thar e”