“Mitia Dios a milebii a chad, el rirellii a chad el okesiul a Dios. Ng milebii a sechal ma redil.”​—Genesis 1:27.

AIKA el tekoi el ngar er a uchelel a Biblia a ouchais el kmo a Dios a “mla oterekokl a ungil temel a bek el tekoi” er sera lomeob er tirke el kot el obekel el Adam me a Eba el mle mecherrungel el chad. (Olisechakl 3:11) A Jehovah el Dios, el Ulemeob a dilu er tir el kmo: “Bo le betok a re ngelekiu, ma ruldidellel a rsechiu bo le kiei er ker me ker er a beluulchad e bo lorreder er ngii. Ak meskemiu a klisiich er omerreder er a ngikel, ma suebek el charm, ma rokui el meklou ma mekekerel tebelik el charm.”​—Genesis 1:28.

Ngar er sel tekingel el mo er tirke el teru el obekel e a Dios a mileketeklii a moktek er ngii el mo er tir. Ngmle kirir el mo oungalek e mo omekerreu er tia el chutem, e rullii ngii el delengcheklir el mo paradis el kirir tir me a rengelekir. Ngdimlak a mloterekokl el taem el kirel a kodellir. A Dios a bai milsterir a kmal ungil el omelatk er a klengar. A lsekum e te melilt el melemolem el meruul a soal a rengul a Dios, e ngsebechir el kiei el ngar er a budech me a deurreng el mo cherechar.

 Engdi tir a mlo mekngit el melilt a tekoi me a uchul a rokui el chad a mo chuodel e mad. Nguaisei, a rubak el Job a dilu el kmo: “A chad a di kedeb a klengar er ngii e betok a ringelel.” (Job 14:1) Ngera el mekngit el tekoi a dilubech?

A Biblia a mesaod el kmo: “Le tal chad a uchul ma klengit a siliseb ra belulechad ma rokuil chad a mlora klengit, me ngsiliseb ra rokuil chad a kodall, el ua kodall luleak a klengit el me soiseb.” (Rom 5:12) Ngike el “tal chad” a mle Adam, el mle durengul el omtok er a bleketakl el llechul a Dios. (Genesis 2:17) A tekoi el lengileltii a Adam a mlo uchul e nguridii a techall el mo kiei el mo cherechar el ngar er a paradis el chutem. Ngdirrek el mlo uchul e a rengelekel a urridii sel mekreos el dikesir e bai ngiluu a klengit me a kodall. Ngkora ua leririid a omelatk el kirel a rokui el tekoi. Engdi tia ngmera el mle uaisei?

A Taem el Mo Omekbeches a Rokui el Tekoi

A betok el rak er a uriul, e a milluches er a Psalm a mlukreng el meluches el kmo: “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.” (Psalm 37:29) Tia el telbiil el meldung er a sers er a Eden a ulterekokl el mo mutaut e le Tekingel a Dios a mesaod a bo loruul el kmo: “E mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak, ele ngmla nguemed a ikel dimla ngarngii.” E dirrek el dilu el kmo: “Mesang, ak meruul a bek el tekoi el mo beches.”​—Chocholt 21:4, 5.

Ngar er ngii a blsechel a rokui el tekoi a uchul me a ker a duubech el kmo, Ngoingerang e ngmei sel taem el mo omekbeches a rokui el tekoi, me bo el taut aike el kmal ungil el telbilel a Dios? A Resioning er a Jehovah, el tirke el meruul er tia el babier, a oureor el ouchais er a rechad el kmo kede kiei er a taem er “a ikel uriul sils” el losaod er ngii a Biblia, e di kmedung e a Dios a mo “meruul a bek el tekoi el mo beches.” (2 Timoteus 3:1) Aki mengelechel er kau el mo mesuub er a Biblia me bo modengei aike el ungil el omelatk el kirem. Aki dirrek el mengelechel er kau me mkengei er tia el okedong el kmo: “Mobult el mor a [Jehovah], e moluluuch er ngii er chelechal le keed.” (Isaia 55:6) A klengar er kau er a chelechang me a omeltkem el mo kiei el mo cherechar a di ultuil er kau, el diak el ultuil er a tekoi el di mla moterekokl er a uchei.

[Blurb er a 8 el llel]

“Mesang, ak meruul a bek el tekoi el mo beches”