O le Taimi Lenei e Filifili Ai

“Ona faia lea e le Atua o le tagata i lona faatusa, o le faatusa o le Atua na ia fai ai o ia; na faia e ia o i laʻua o le tane ma le fafine.”—Kenese 1:27.

UA TAʻU mai e na upu masani i uluaʻi itulau o le Tusi Paia, se tasi o mea silisili na ‘faia e le Atua e matagofie i o latou lava tausaga’—o le faia lea o se ulugalii lelei atoatoa, o Atamu ma Eva. (Failauga 3:11) I le avea ai ma Lē na Faia i laʻua, na fetalai atu Ieova le Atua iā i laʻua e faapea: “Ia fanafanau ia, ma ia uluola, ma ia tumu ai le lalolagi, ia faatoʻilalo i ai, ma ia pule i iʻa i le sami, ma manu felelei, atoa ma mea ola uma e fetolofi i le eleele.”—Kenese 1:28.

E ala i lenā faamatalaga, na faailoa atu ai e le Atua i le uluaʻi ulugalii lana fuafuaga mo i laʻua. Sa tatau ona la fanafanau ma tausia le lalolagi, ma fai le lalolagi atoa e avea ma aiga parataiso mo i laʻua ma a la fanau. Sa leʻi fuafuaina e le Atua se taimi mo i laʻua e soifua ai ma maliliu. Nai lo lea, sa tuuina atu e le Atua iā i laʻua se faamoemoe matagofie. E ala i le faia o le filifiliga saʻo ma tausisi i ai e ōgatusa ma le finagalo o le Atua, e mafai ai ona la ola i le filemu lelei atoatoa ma fiafia e faavavau.

 Sa leaga le la filifiliga, ma ua iʻu ina ola matutua ma feoti ai tagata uma. O le mea moni, na faailoa mai e le augātamā o Iopu e faapea: “O le tagata ua fanau mai i le fafine, ua saasaa ona aso, mona ua tumu i le atuatuvale.” (Iopu 14:1) O le ā le mea na sesē?

Ua faapea mai le Tusi Paia, ‘Ua oo mai le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.’ (Roma 5:12) Ioe, o lenā “tagata e toʻatasi,” o Atamu, o lē na filifili ma le loto i ai e solia le tulafono faigofie ma manino a le Atua. (Kenese 2:17) E ala i lana filifiliga, na melea ai e Atamu lona avanoa e ola ai e faavavau i se lalolagi parataiso. Na ia melea ai foʻi le tofi matagofie mo lana fanau, ma tuufaasolo mai iā i latou āuga leaga o le agasala ma le oti. Na foliga mai ua lē mafai ona toe maua mai le mea ua leiloa, ma ua leai foʻi se faamoemoe.

Taimi o le Toe Faafouina o Mea

I tausaga e tele mulimuli ane, na faagaeeina ai le faisalamo e tusi e faapea: “E fai lava le nuu mo tagata amiotonu, e nonofo ai pea i latou.” (Salamo 37:29) Ina ia faamautinoa o le a faataunuuina lana folafolaga na faia i Etena, o loo faamatalaina lelei mai i le Afioga a le Atua le mea ua toe o se aga ona ia faia lea: “E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.” Ona fetalai mai lea o le Atua: “Vaai foʻi! Ou te faia ia fou mea uma lava.”—Faaaliga 21:4, 5.

Ona o le mea ma lona taimi e tupu ai, ua lāgā ai la le fesili e faapea, O fea le taimi o le a toe faafouina ai mea, ma faataunuu moni ai folafolaga matagofie a le Atua? O loo taumafai malosi i latou na lomiaina lenei mekasini, o Molimau a Ieova, e faailoa atu i tagata e faapea ua tatou ola i taimi ua taʻua i le Tusi Paia “o aso e gata ai,” ma ua lata le taimi mo le Atua e gaoioi ai e “faia ia fou mea uma lava.” (2 Timoteo 3:1) Matou te faalaeiau oe ia iloilo le Tusi Paia ma aʻoaʻo e faatatau i faamoemoe matagofie e mafai ona e maua. E matou te faalaeiau foʻi oe ina ia talia le valaaulia lenei: “Ia outou saʻili iā Ieova manū o mafai ona maua o ia; ia outou valaau iā te ia manū o latalata mai o ia.” (Isaia 55:6) Nai lo le pulea e iʻuga tuupōina, o loo faalagolago iā te oe lou faamoemoe o le ola e faavavau!

[Faamatalaga faaopoopo i le itulau 8]

“Vaai foʻi! Ou te faia ia fou mea uma lava”