Sweswi I Nkarhi Wo Tihlawulela Vumundzuku Bya Wena

“Xikwembu xi ya emahlweni xi tumbuluxa munhu hi xifaniso xa xona, xi n’wi tumbuluxe hi xifaniso xa Xikwembu; xi va tumbuluxe va ri waxinuna ni waxisati.”—Genesa 1:27.

MARITO wolawo lama tolovelekeke lama kumekaka eka matluka yo sungula ya Bibele ma kombisa swin’wana swa swilo leswinene ngopfu leswi Xikwembu “xi swi [endleke] swi saseka hi nkarhi wa swona,” ku nga ku vumba wanuna ni wansati wo sungula, Adamu na Evha, lava a va hetisekile. (Eklesiasta 3:11) Leswi Yehovha Xikwembu a nga Muvumbi wa vona u va byele leswi: “Tswalanani mi andza, mi tata misava, mi yi fuma, mi fuma tinhlampfi ta lwandle ni swivumbiwa leswi hahaka swa matilo ni swivumbiwa hinkwaswo leswi famba-fambaka ehenhla ka misava.”—Genesa 1:28.

Eka marito wolawo lawa Xikwembu xi ma byeleke vanhu vambirhi vo sungula, xi va tivise xikongomelo xa xona. A va fanele va ndlandlamuxa misava va tlhela va yi khathalela, va yi endla yi va paradeyisi leyi a yi ta va kaya ra vona swin’we ni vana va vona. Xikwembu a xi nga va vekelanga nkarhi lowu a va ta fa ha wona. Ematshan’weni ya sweswo, xi  va tshembise nchumu lowunene ngopfu. Loko va endla xiboho lexinene naswona va hanya hi ku ya hi ku rhandza ka Xikwembu, a va ta hanya hi ku rhula ni ntsako hilaha ku nga heriki.

Va endle xiboho lexi hoxeke lexi endleke leswaku vanhu hinkwavo va dyuhala va tlhela va fa. Entiyisweni, kokwa wa hina Yobo u te: “Munhu la velekiweke hi wansati, u hanya nkarhi wo koma naswona u taleriwe hi ku karhateka.” (Yobo 14:1) Xana swilo swi onhake kwihi?

Bibele yi ri: “Xidyoho xi [nghene] emisaveni hi munhu un’we, ni rifu hikwalaho ka xidyoho, xisweswo rifu ri tlulele vanhu hinkwavo hikuva hinkwavo va dyohile.” (Varhoma 5:12) “Munhu” yoloye a ku ri Adamu, loyi a tluleke nawu wa Xikwembu hi vomu lowu a wu nga tiki naswona a wu kongomile. (Genesa 2:17) Hikwalaho ka sweswo, Adamu u lahle lunghelo rakwe ro hanya hilaha ku nga heriki emisaveni leyi nga paradeyisi. U tlhele a endla leswaku vana vakwe va lahlekeriwa hi ndzhaka ya risima kutani a hundzisela xigwevo xa xidyoho ni rifu eka vona. A swi tikomba onge swilo hinkwaswo a swi lahlekile. A swi tano ke?

Nkarhi Wo Lunghisa Swilo Hi Vuntshwa

Endzhaku ka loko ku hundze malembe ya magidi, mupisalema u huhuteriwe ku tsala a ku: “Lavo lulama va ta dya ndzhaka ya misava, va ta tshama eka yona hi masiku.” (Pisalema 37:29) Leswaku Rito ra Xikwembu ri hi tiyisekisa leswaku xitshembiso lexi xi xi vuleke eNtangeni wa Edeni xi ta hetiseka, ri swi hlamusela kahle leswi xi nga ta swi endla ku nga ri khale: “Xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” Kutani Xikwembu xi te: “Waswivo, ndzi endla swilo hinkwaswo swi va leswintshwa.”—Nhlavutelo 21:4, 5.

Leswi xin’wana ni xin’wana xi nga ni nkarhi wa xona lowu vekiweke, ku tlakuka xivutiso lexi nge, Xana wu ta fika rini nkarhi wa leswaku swilo swi tlhela swi lunghisiwa, leswaku switshembiso leswi tsakisaka leswi tshembisiweke hi Xikwembu swi hetiseka? Timbhoni ta Yehovha leti kandziyiseke magazini lowu ti ringeta hi matimba ku tivisa vanhu leswaku hi hanya eminkarhini leyi Bibele yi yi vitanaka ‘masiku yo hetelela’ nileswaku nkarhi lowu Xikwembu xi nga ta teka goza ro “endla swilo hinkwaswo swi va leswintshwa” wu tshinele. (2 Timotiya 3:1) Hi ku khutaza leswaku u hlaya Bibele kutani u tiva hi ta mikateko leyi u nga yi kumaka. Nakambe hi ku khutaza leswaku u amukela xirhambo lexi: “Lavisisani Yehovha, loko a ha kumeka. N’wi vitaneni a ha ri ekusuhi.” (Esaya 55:6) Ematshan’weni yo vula leswaku swilo hinkwaswo leswi ku humelelaka evuton’wini swi kunguhatiwe hi Xikwembu, ntshembo wa wena wo hanya hilaha ku nga heriki wu titshege hi wena!

[Marito lama tshahiweke exihlokweni lama nga eka tluka 8]

“Waswivo, ndzi endla swilo hinkwaswo swi va leswintshwa”