Yu ben sabi a sani disi?

Fa Gado ben feni en taki den Israelsma ben e luku den stari fu si san ben o pasa?

Soleki fa wan wortubuku e taki, dan sma di e luku den stari fu si san o pasa, e „ondrosuku fa den planeiti, a son, a mun, nanga den stari e buweigi, èn den e bribi taki a sani dati abi krakti tapu a libi fu sma”. Te grontapu e drai lontu a son ibri yari, dan a gersi leki den stari sistema e go tanapu tra fasi. Sensi owruten, sma ben kon si a sani disi, èn den feni taki a kenki disi abi furu krakti tapu a libi fu den.

A kan de so taki den Babilonsma fu owruten, ben de den fosi sma di bigin luku den stari fu kon sabi san ben o pasa. Den sma disi ben e anbegi den stari nanga den stari sistema. Den Israelsma teki na anbegi disi abra di den ben drai baka gi a tru anbegi. Na a ten fu Kownu Yosia fu Yudea, sma na ini a heri kondre ben e luku den stari fu kon sabi san ben o pasa. A de krin fu si fa Gado feni a sani disi. Hondrohondro yari bifo dati, a Wèt di Gado ben gi Moses, ben taki dati den ben musu kiri a sma di ben e anbegi den stari.—Deuteronomium 17:2-5.

Wan fu den sani di Kownu Yosia ben du fu seti a tru anbegi baka, na taki a ben poti a wèt taki den sma fu Yudea no ben musu tyari ofrandi „gi a son, gi a mun, gi den stari sistema, èn gi ala den tra sani na hemel”. Soleki fa a tori disi na ini Bijbel e taki, dan a kownu ben du disi fu di a ben wani „gi yesi na Yehovah” èn „hori den komando” fu en (2 Kownu 23:3-5). A sani disi na wan eksempre gi sma na ini a ten disi di wani anbegi Gado „nanga yeye èn nanga waarheid”.—Yohanes 4:24.

Suma na „den Manpikin fu Zeus”, di kari na ini Tori fu den Apostel 28:11?

A Bijbel buku Tori fu den Apostel e taki dati di na apostel Paulus ben e go na Rome, a teki boto fu Malta go na Puteoli, èn a boto ben nen „den Manpikin fu Zeus” (Tori fu den Apostel 28:11). Na ini owruten, den botoman nanga sma di ben e go nanga boto, ben gwenti fu kari den boto na a nen dati.

Soleki fa den anansitori fu den Grikisma nanga den Romesma e sori, dan Zeus (di sma sabi tu leki Yupiter) nanga Leda, ben abi twelengi manpikin, Castor nanga Pollux. „Den manpikin fu Zeus” ben man du difrenti sani, èn sma ben si den tu leki bun botoman di ben abi makti tapu winti nanga skwala. Fu dati ede, sma ben anbegi den leki den gado di ben kibri den botoman. Den sma di ben e go nanga boto, ben e tyari ofrandi gi den gado disi, èn den ben e begi den fu kibri den gi bigi winti tapu se. Sma ben e bribi taki den twelengi gado disi ben e sori densrefi èn a makti di den ben abi fu kibri sma, na ini wan faya. A faya disi ben de fu si son leisi na tapusei fu a mast fu den sipi, te bigi winti ben e wai. Sma e kari a faya disi, a faya fu Sint Elmo.

Furu fu den Grikisma nanga den Romesma, ben anbegi Castor nanga Pollux. Èn wan owruten buku e taki dati spesrutu den sma fu Sireine, na Noord Afrika, ben lobi fu anbegi den gado disi. A boto di kari na ini Tori fu den Apostel, ben de fu Aleksandria, na ini Egepte, di ben de krosibei fu Sireine.

[Prenki na tapu bladzijde 17]

Wan ston fu Babilon pe kownu Nazimaruttash nanga den stari sistema de na tapu

[Prenki na tapu bladzijde 17]

Wan denarius fu a yari 114-113 bifo krestes, di abi „Den manpikin fu Zeus” na tapu

[Sma di abi a reti fu a prenki na tapu bladzijde 17]

Stela: Réunion des Musées Nationaux/Art Resource, NY; coin: Courtesy Classical Numismatic Group, Inc./cngcoins.com