Lima ka Rason nga Mahadlok sa Diyos ug Dili sa Tawo

NALIPAY pag-ayo ang usa ka batan-ong lalaki. Wala gayod niya damha ang nahitabo. Sa dihang nakig-estorya siya sa duha ka Saksi ni Jehova, siya nakakat-on ug bag-ong mga butang. Dugay na siyang nalibog kon nganong gitugotan sa Diyos ang pag-antos, apan nianang higayona, siya natin-awan sa tubag gikan sa Bibliya. Wala siya mahibalo nga ang Bibliya naundag bililhon ug makapalipay kaayong mga impormasyon.

Pipila ka minuto human makahawa ang mga Saksi ni Jehova, ang babaye nga tag-iya sa balay nga iyang gipuy-an midalidalig adto kaniya ug misingka, “Kinsa kadtong mga tawhana?”

Kay nakuratan, wala siya makatubag.

“Nahibalo ko kon kinsa sila,” misingka ang babaye, “kon imo pa gani silang pasudlon pag-usab, papahawaon gyod ta ka!”

Gilamba sa babaye ang pultahan ug milakaw.

Gidahom sa Matuod nga mga Sumusunod ni Jesus ang Pagsupak

Ang kasinatian sa batan-ong lalaki nasinati usab sa uban. Ang Pulong sa Diyos, ang Bibliya, nag-ingon: “Ang tanan nga nagtinguha sa pagkinabuhi uban ang diyosnong pagkamahinalaron kalangkit ni Kristo Jesus pagalutoson usab.” (2 Timoteo 3:12) Sa katibuk-an, ang matuod nga mga Kristohanon ginadumtan gayod. Ngano? Si apostol Juan miingon sa iyang mga isigka-Kristohanon: “Kita nahibalo nga kita nagagikan sa Diyos, apan ang tibuok kalibotan nailalom sa gahom sa usa nga daotan.” Si Satanas nga Yawa gihulagway usab nga sama sa “usa ka  leyon nga nagangulob, nga nagapangitag matukob.” (1 Juan 5:19; 1 Pedro 5:8) Ang usa sa labing epektibong mga paagi nga gigamit ni Satanas mao ang pagkahadlok sa tawo.

Bisan gani si Jesu-Kristo, nga usa ka maayong tawo ug walay sala, gibiaybiay ug gilutos usab. Siya miingon: “Sila nagdumot kanako nga walay pasikaranan.” (Juan 15:25) Sa gabii una siya mamatay, iyang gipasidan-an ang iyang mga tinun-an: “Kon ang kalibotan nagdumot kaninyo, kamo nahibalo nga kini nagdumot na kanako sa wala pa kini magdumot kaninyo. Hinumdomi ang pulong nga akong giingon kaninyo, Ang ulipon dili labaw kay sa iyang agalon. Kon sila naglutos kanako, sila magalutos usab kaninyo.”—Juan 15:18, 20.

Tungod sa maong pasidaan, daghan ang nagpanuko sa pagbarog sa matuod nga pagsimba. Sa usa ka higayon, dihay mga tawo nga nangita kang Jesus, ug maylabot kanila ang Bibliya nag-ingon: “Sa pagkatinuod, walay usa nga nagsulti bahin kaniya sa dayag tungod sa kahadlok sa mga Hudiyo.” (Juan 7:13; 12:42) Ang mga relihiyosong lider niadtong adlawa nanghulga nga isalikway si bisan kinsa nga motuo kang Kristo. Busa, ang pagkahadlok sa tawo nakapugong sa daghan nga mahimong Kristohanon.—Buhat 5:13.

Human maestablisar ang Kristohanong kongregasyon, atong mabasa nga ang mga Kristohanon sa Jerusalem nakasinatig “dakong paglutos.” (Buhat 8:1) Sa pagkatinuod, gilutos ang mga Kristohanon sa tibuok Imperyo sa Roma. Ang inilang mga tawo sa Roma miingon kang apostol Pablo: “Mahitungod niining sektaha nahibaloan namo nga kini ginasupak bisan diin.” (Buhat 28:22) Oo, kaylap kaayong gisupak ang matuod nga mga Kristohanon.

Bisan karon, gigamit gihapon ni Satanas ang pagkahadlok sa tawo ingong paagi aron mababagan ang daghan nga mahimong matuod nga mga sumusunod ni Jesus. Ang sinserong mga tawo nga nagtuon sa Bibliya uban sa mga Saksi ni Jehova makaatubang ug mga pagsupak o pagbiaybiay sa eskuylahan, sa trabahoan, sa mga silingan o, sa ilang mga higala. Ang uban mahadlok tingali nga dili na sila tahoron, mawad-an silag mga higala, o kaha basin dili na sila makadawat ug materyal nga suporta. Sa ubang mga lugar, ang mga mag-uuma mahadlok nga basin dili na sila tabangan sa ilang mga silingan sa pagpangani o sa pagpanalipod sa ilang kahayopan. Bisan pa niana, milyonmilyon gihapon ang misalig sa Diyos ug nagkinabuhi sumala sa mga sukdanan sa Bibliya isip pagsundog kang Jesus. Tungod niana, gipanalanginan sila ni Jehova.

Kon Nganong Mahadlok sa Diyos, Dili sa Tawo

Giawhag kita sa Bibliya nga mahadlok sa Diyos, dili sa tawo. Kini nag-ingon: “Ang pagkahadlok kang Jehova mao ang sinugdanan sa kaalam.” (Salmo 111:10) Kini nga kahadlok dili sa negatibong diwa, kondili kahadlok nga dili mapahimut-an ang atong Maghahatag ug Kinabuhi. Ang pagkahadlok sa Diyos nalangkit sa paghigugma kaniya. Apan, nganong angay kitang mahadlok sa Diyos ug dili sa tawo? Atong tagdon ang lima ka rason.

1 Si Jehova ang Labing Gamhanan. Si Jehova mas gamhanan kay kang bisan kinsa. Kon mahadlok kita sa Diyos, atong gipaila nga kita alagad sa Labing Gamhanan, nga para niya ang “mga nasod sama [lang] sa usa ka tinulo gikan sa timba.” (Isaias 40:15) Kay gamhanan man kaayo ang Diyos, siya makadugmok sa “bisan unsa nga hinagiban nga buhaton” ug gamiton batok sa nagmaunongon kaniya. (Isaias 54:17) Ug sanglit ang Diyos maoy mohukom kon kinsa kadtong takos sa kinabuhing walay kataposan, maalamon kita kon dili kita magpapugong sa pagtuon bahin kaniya ug sa pagtuman sa iyang kabubut-on.—Pinadayag 14:6, 7.

2 Ang Diyos motabang ug manalipod kanato. “Ang pagpangurog tungod sa mga tawo nagadala ug usa ka lit-ag, apan siya nga nagasalig kang Jehova pagapanalipdan,” nag-ingon ang Proverbio 29:25. Ang pagkahadlok sa tawo maoy usa ka lit-ag tungod kay kini makababag kanato sa pagpahayag sa atong pagtuo sa Diyos. Apan ang Diyos nagpasalig nga siya makaluwas kanato: “Ayaw kahadlok, kay ako uban kanimo. Ayaw iliraw ang imong panan-aw, kay ako imong Diyos. Ako magapalig-on kanimo. Ako sa pagkatinuod magatabang kanimo. Ako sa pagkatinuod magahawid kanimo sa akong tuong kamot sa pagkamatarong.”—Isaias 41:10.

3 Gihigugma sa Diyos kadtong makigsuod kaniya. Si apostol Pablo misulat niining makapatandog nga mga pulong: “Kombinsido ako nga dili ang kamatayon ni kinabuhi ni mga manulonda ni mga kagamhanan ni mga butang nga  ania karon ni mga butang nga moabot ni mga gahom ni gihabogon ni giladmon ni bisan unsang ubang linalang ang makabulag kanato gikan sa gugma sa Diyos nga anaa kang Kristo Jesus nga atong Ginoo.” (Roma 8:37-39) Kon kita mosalig ug motuman sa Diyos, kita higugmaon gayod sa Soberano sa Uniberso. Pagkadakong pribilehiyo niana!

4 Atong gipabilhan pag-ayo ang tanang gihimo sa Diyos alang kanato. Si Jehova ang atong Maglalalang, ang usa nga nagpatungha sa kinabuhi. Dugang pa, siya nagtagana dili lamang sa mga panginahanglan sa kinabuhi kondili sa mga butang usab nga makapalipay sa kinabuhi. Sa pagkatinuod, siya ang tinubdan sa tanang maayong gasa. (Santiago 1:17) Si David, nga usa ka maunongong tawo nga nagpabili sa mahigugmaong-kalulot sa Diyos, misulat: “Daghang butang ang imong nabuhat, Oh Jehova nga Diyos ko, bisan ang imong katingalahang mga buhat ug ang imong mga hunahuna nganhi kanamo . . . Daghan pa sila kay sa akong ikabatbat.”—Salmo 40:5.

5 Ang ubang mosupak kanato mahimong mausab. Kon lig-on ang imong determinasyon nga pasidunggan ug higugmaon ang Diyos, imong matabangan kadtong mosupak kanimo. Tagda pananglitan ang mga paryente ni Jesus. Sa sinugdan, wala sila motuo kaniya, ug gani sila miingon: “Nalisoan siya sa iyang pangisip.” (Marcos 3:21; Juan 7:5) Apan human mabanhaw si Jesus, daghan kanila nahimong mga magtutuo. Ang mga igsoon ni Jesus sa inahan nga si Santiago ug Judas nakapribelihiyo pa gani sa pagsulat ug mga basahon sa Bibliya. Ang laing magsusupak mao ang panatikong si Saulo, nga sa ulahi nahimong apostol Pablo. Tungod sa atong lig-ong baroganan, lagmit makaamgo ang mga magsusupak nga anaa kanato ang kamatuoran.—1 Timoteo 1:13.

Pananglitan, ang usa ka babaye sa Aprika nga si Aberash nag-ampo nga makahibalo sa kamatuoran bahin sa Diyos. Sa dihang siya nagtuon sa Bibliya uban sa mga Saksi ni Jehova, siya grabeng gisupak sa iyang pamilya ug sa mga lider sa relihiyon. Ang uban niyang paryente nga nagtuon na usab sa Bibliya miundang tungod kay gidaog sa kahadlok sa tawo. Apan siya miampo sa Diyos aron malig-on ug makabatog kaisog, ug siya nabawtismohan ingong usa sa mga Saksi ni Jehova. Unsay resulta? Walo sa iyang paryente ang nadasig sa iyang gihimo mao nga sila mipadayon sa ilang pagtuon sa Bibliya ug miuswag.

Imong Mabuntog ang Pagkahadlok sa Tawo

Aron dili mabitik sa pagkahadlok sa tawo, himoa ang imong maarangan nga molig-on ang imong gugma sa Diyos. Mahimo nimo kini pinaagi sa pagtuon sa Bibliya ug sa pagpamalandong sa mga teksto sama sa Hebreohanon 13:6, nga nag-ingon: “Si Jehova ang akong magtatabang; dili ako mahadlok. Unsay arang mabuhat sa tawo kanako?” Ayaw kalimti ang mga rason kon nganong angay kitang mahadlok sa Diyos ug dili sa tawo.

Hunahunaa usab ang mga kaayohan kon imong ipadapat ang imong nakat-onan sa Bibliya. Imong mahibaloan ang makapatagbawng tubag sa hinungdanong mga pangutana bahin sa kinabuhi. Makabaton kag praktikal nga kaalam kon unsaon pag-atubang ang mga kalisdanan sa kinabuhi. Makabaton kag makalilipayng paglaom bisan pa sa malisod nga mga kahimtang karon. Ug makaduol ka usab sa labing gamhanang Diyos sa bisan unsang panahon, pinaagi sa pag-ampo.

Si apostol Juan misulat: “Ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.” (1 Juan 2:17) Karon na ang panahon nga ang usa lig-ong mobarog ug magpasundayag ug kahadlok sa Diyos. Inay magpadaog sa kahadlok sa tawo, atong sundon ang pag-awhag sa Diyos: “Magmaalamon, anak ko, ug lipaya ang akong kasingkasing, aron matubag ko siya nga nagatamay kanako.” (Proverbio 27:11) Dako gayod kana nga pribilehiyo!

Hinumdomi, walay tawo nga makahatag sa kon unsay ihatag sa Diyos niadtong nahadlok kaniya: “Ang sangpotanan sa pagpaubos ug pagkahadlok kang Jehova maoy bahandi ug himaya ug kinabuhi.”—Proverbio 22:4.

[Hulagway sa panid 14]

Tungod sa kaisog ni Aberash, walo sa iyang paryente ang mipadayon sa pagtuon sa Bibliya