Yiŋtoi Enumɔ Ahewɔ ni Esa akɛ Ashe Nyɔŋmɔ Gbeyei shi Jeee Gbɔmɔ

OBLANYO lɛ naa kpɛ ehe kɛ miishɛɛ. Ekpaaa gbɛ kwraa akɛ ekɛ shihilɛ ni tamɔ nɛkɛ baakpe. Sane ni ekɛ Yehowa Odasefoi ateŋ mɛi enyɔ komɛi gba lɛ eha ekase nɔ ko hee. No mli lɛ, ekɛ afii abɔ esusu nɔ hewɔ ni Nyɔŋmɔ ŋmɛɔ piŋmɔ gbɛ lɛ he, shi amrɔ nɛɛ aha lɛ hetoo ni yɔɔ faŋŋ kɛjɛ Biblia lɛ mli. Eleee kwraa akɛ saji ni sɛɛnamɔ yɔɔ he waa ni baanyɛ aha mɔ tsui anyɔ emli yɛ Biblia lɛ mli.

Beni Odasefoi lɛ shi kɛtee lɛ sɛɛ minitii fioo ko lɛ, oblanyo lɛ shianyɛ lɛ sha foi kɛbote oblanyo lɛ tsu lɛ mli ni ekɛ mlifu bi lɛ akɛ, “Namɛi ba oŋɔɔ lɛ?”

Shianyɛ lɛ nifeemɔ lɛ ha oblanyo lɛ naa kpɛ ehe aahu akɛ enyɛɛɛ eha lɛ hetoo.

Shianyɛ lɛ bo wo eyi akɛ, “Mile mɛi ni amɛji.” Ni ekɛshi sɛɛ akɛ, “Kɛ́ oha amɛba oŋɔɔ ekoŋŋ lɛ, no lɛ obaafã ni oyatao tsũ yɛ he kroko!”

Etsi shinaa lɛ eŋa waa ni eje kpo.

Kristo Sɛɛnyiɛlɔi Anɔkwafoi lɛ Le akɛ Abaate Shi Awo Amɛ

Shihilɛ ni oblanyo nɛɛ kɛkpe lɛ jeee nɔ ko ni efɔɔɔ kaa. Nyɔŋmɔ Wiemɔ ni ji Biblia lɛ tsɔɔ mli akɛ: “Mɛi fɛɛ hu ni taoɔ akɛ amɛaahi shi yɛ Nyɔŋmɔ–jamɔ naa yɛ Kristo Yesu mli lɛ, aaawa amɛyi.” (2 Timoteo 3:12) Kɛjɛ blema aahu kɛbashi bianɛ lɛ, mɛi babaoo sumɔɔɔ anɔkwa Kristofoi asane. Mɛni hewɔ? Bɔfo Yohane kɛɛ enanemɛi Kristofoi akɛ: “Wɔle akɛ wɔjɛ Nyɔŋmɔ mli, ni jeŋ muu lɛ fɛɛ kã mɔ fɔŋ lɛ mli.” Agbɛnɛ hu afeɔ Satan Abonsam he mfoniri yɛ Biblia lɛ mli  akɛ “jata ni hũuɔ eetao mɔ ni eeemi.” (1 Yohane 5:19; 1 Petro 5:8) Gbɔmɔ gbeyeishemɔ ji Satan ŋaatsɔi ni yeɔ omanye waa lɛ ateŋ ekome.

Agbe Yesu Kristo po ni fee nibii kpakpai pii ni efeee esha ko kwraa lɛ he guɔ ni awa lɛ yi. Ekɛɛ akɛ: “Amɛnyɛ mi yakatswaa.” (Yohane 15:25) Gbi gbɛkɛ ni enɔ jetsɛremɔ lɛ agbe Yesu lɛ, ekɛ wiemɔi nɛɛ saa esɛɛnyiɛlɔi lɛ ajwɛŋmɔ akɛ: “Kɛji je lɛ miinyɛ nyɛ lɛ, nyɛnáa nyɛlea akɛ mi tsutsu enyɛ. Nyɛhiɛ ahia wiemɔ ní mi nɔŋŋ mikɛɛ nyɛ lɛ nɔ, akɛ: Nyɔŋ efeee enuŋtsɔ. Kɛ́ amɛwa mi yi lɛ, amɛaawa nyɛ hu yi.”—Yohane 15:18, 20.

Yɛ enɛ hewɔ lɛ, Yesu beaŋ bii lɛ ateŋ mɛi babaoo fiii anɔkwa jamɔ sɛɛ. Biblia lɛ wie mɛi komɛi ni be ko lɛ amɛyatao Yesu lɛ ahe akɛ: “Tsɛbelɛ mɔ ko ejeee faŋŋ ewieee ehe yɛ Yudafoi lɛ ashemɔ hewɔ.” (Yohane 7:13; 12:42) Jamɔŋ hiɛnyiɛlɔi ni hi shi yɛ nakai beaŋ lɛ ka akɛ amɛaakpoo mɔ fɛɛ mɔ ni heɔ Kristo nɔ eyeɔ lɛ. No hewɔ lɛ, gbɔmɔ gbeyeishemɔ haaa mɛi babaoo atsɔmɔ Kristofoi.—Bɔfoi lɛ Asaji 5:13.

Kplaŋŋ bɔ sɛɛ beni ato Kristojamɔ ama shi lɛ, Biblia lɛ kɛɛ akɛ, “yiwalɛ kpele” te shi wo asafo ni yɔɔ Yerusalem lɛ. (Bɔfoi lɛ Asaji 8:1) Yɛ anɔkwale mli lɛ, awa Kristofoi ni yɔɔ maji fɛɛ ni yɔɔ Roma Nɔyeli lɛ shishi lɛ amli lɛ ayi. Hiɛnaanɔbii ni yɔɔ Roma lɛ kɛɛ bɔfo Paulo akɛ: “Nɛkɛ kuu fã nɛɛ wɔle akɛ awieɔ he efɔŋ yɛ he fɛɛ he.” (Bɔfoi lɛ Asaji 28:22) Hɛɛ, ate shi awo anɔkwa Kristofoi yɛ hei babaoo.

Ŋmɛnɛ po lɛ, Satan miiya nɔ lolo ekɛ gbɔmɔ gbeyeishemɔ miitsu nii koni ekɛtsi mɛi pii anaa ni amɛkabatsɔmɔ Kristo sɛɛnyiɛlɔi anɔkwafoi. Ateɔ shi awoɔ loo agbeɔ mɛi ni yɔɔ tsui kpakpa ni kɛ Yehowa Odasefoi kaseɔ Biblia lɛ ahe guɔ yɛ amɛskul, amɛnitsumɔhe, amɛkutsoŋ, loo yɛ amɛnanemɛi ateŋ. Ekolɛ mɛi nɛɛ baashe gbeyei akɛ abuŋ amɛ, amɛnanemɛi baakpoo amɛ, loo amɛnáŋ heloonaa yelikɛbuamɔ kɛjɛŋ mɛi krokomɛi aŋɔɔ dɔŋŋ. Yɛ akrowai komɛi amli lɛ, okwaafoi sheɔ gbeyei akɛ ekolɛ amɛkutsoŋbii lɛ baakpoo akɛ amɛaaye amɛbua amɛ kɛkpa amɛŋmɔshi nibii loo amɛbu amɛkooloi lɛ ahe. Shi yɛ gbeyeishemɔ ni tamɔ nɛkɛ lɛ fɛɛ sɛɛ lɛ, mɛi akpekpei abɔ etswa amɛfai shi akɛ amɛbaamu amɛfɔ̃ Nyɔŋmɔ nɔ, ni amɛbaahi shi yɛ Nyɔŋmɔ Wiemɔ lɛ naa kɛkase Yesu Kristo. Yehowa jɔɔ amɛ yɛ nakai ni amɛfeɔ lɛ hewɔ.

Nɔ Hewɔ ni Esa akɛ Ashe Nyɔŋmɔ Gbeyei, shi Jeee Gbɔmɔ

Biblia lɛ woɔ wɔ hewalɛ ni wɔshe Nyɔŋmɔ gbeyei, shi jeee gbɔmɔ. Ekɛɔ akɛ: “Yehowa gbeyeishemɔ ji nilee shishijee.” (Lala 111:10) Gbeyeishemɔ ni tamɔ nɛkɛ lɛ jeee nɔ ko he ŋmiŋmi ni mɔɔ mɔ, shi eji shwelɛ kpakpa ni anáa akɛ afeŋ nɔ ko ni esaaa wɔ-Wala Halɔ lɛ hiɛ. Nyɔŋmɔ gbeyeishemɔ kɛ suɔmɔ yɛ tsakpãa waa. Shi, mɛni hewɔ esa akɛ wɔshe Nyɔŋmɔ gbeyei shi jeee gbɔmɔ? Nyɛhaa wɔsusua yiŋtoi enumɔ ahewɔ ni esa akɛ wɔfee nakai lɛ ahe wɔkwɛa.

1 Yehowa ji Ofe. Yehowa yɛ hewalɛ kwraa fe adesa fɛɛ adesa. Kɛ́ wɔjie Nyɔŋmɔ gbeyeishemɔ su kpo lɛ, no tsɔɔ akɛ wɔfiɔ Ofe ni “jeŋmaji lɛ tamɔ nu kuli yɛ blage he” yɛ ehiɛ lɛ sɛɛ. (Yesaia 40:15) Akɛni Nyɔŋmɔ ji ofe hewɔ lɛ, eyɛ hewalɛ ni ebaanyɛ ekɛkpata ‘tawuu nii fɛɛ ní asɔ̃ɔ ashiɔ’ mɛi ni yeɔ lɛ anɔkwa lɛ ahiɛ. (Yesaia 54:17) Ni akɛni lɛ etsɔɔ mɔ ni sa akɛ ená naanɔ wala hewɔ lɛ, nilee yɛ mli akɛ wɔɔkase ehe nii ni wɔfee esuɔmɔnaa nii ni wɔkaha nɔ ko kwraa tsi wɔnaa.—Kpojiemɔ 14:6, 7.

2 Nyɔŋmɔ baaye ebua wɔ ni ebu wɔhe. Biblia lɛ kɛɔ yɛ Abɛi 29:25 lɛ akɛ: “Gbɔmɔ shemɔ tsɔɔ tsɔne; shi mɔ ni ŋɔɔ ehiɛ efɔ̃ɔ Yehowa nɔ lɛ, aaabu ehe.” Gbɔmɔ gbeyeishemɔ ji tsɔne ejaakɛ ebaanyɛ eha wɔkajie hemɔkɛyeli ni wɔyɔɔ yɛ Nyɔŋmɔ mli lɛ kpo faŋŋ. Nyɔŋmɔ ma nɔ mi eha wɔ akɛ ebaanyɛ ehere wɔyiwala be ni ekɛɛ akɛ: “Kaashe gbeyei, shi mi, mikɛo yɔɔ! Kaakwɛkwɛɛ ohe, shi mi ji o-Nyɔŋmɔ lɛ! Mawajeo, ni maye mabuao; ni mahiɛ omli kɛ mijalɛ ninejurɔ lɛ.”—Yesaia 41:10.

3 Nyɔŋmɔ sumɔɔ mɛi ni tsiɔ amɛbɛŋkɛɔ lɛ lɛ. Bɔfo Paulo ŋma wiemɔi ni taa mɔ tsuiŋ nɛɛ akɛ: “Miyɛ hewalɛ yɛ nɔ, ákɛ gbele jio wala jio, ŋwɛibɔfoi jio nɔyelɔi jio hewalɛi jio, nii ni yɔɔ nɛɛ jio, nii ni baaba lɛ jio, ŋwɛi jio shishi jio, aloo nii ní abɔ lɛ amli nɔ kroko jio,  amɛnyɛŋ amɛgbála wɔkɛ Nyɔŋmɔ suɔmɔ ní yɔɔ Kristo Yesu, wɔ-Nuŋtsɔ lɛ, mli lɛ mli.” (Romabii 8:37-39) Kɛ́ wɔná hekɛnɔfɔ̃ɔ yɛ Nyɔŋmɔ mli ni wɔfee toiboo wɔha lɛ lɛ, no lɛ wɔbaaná Jeŋ Muu Fɛɛ Maŋtsɛ lɛ suɔmɔ ni sɛɛ efooo lɛ he sɛɛ. Enɛ ji hegbɛ kpele diɛŋtsɛ!

4 Wɔhiɛ sɔɔ nibii fɛɛ ni Nyɔŋmɔ feɔ ehaa wɔ lɛ waa. Yehowa ji wɔ-Bɔlɔ, lɛ ji wala halɔ. Kɛfata he lɛ, jeee akɛ ehaa wɔ shihilɛ mli hiamɔ nii kɛkɛ, shi moŋ ekɛ nibii ni haa shihilɛ ŋɔɔ ni miishɛɛ hiɔ mli hu fataa he. Eji anɔkwale akɛ, lɛ ji duromɔ nii kpakpai fɛɛ Jɛɛhe. (Yakobo 1:17) Nuu anɔkwafo David ni hiɛ sɔ Nyɔŋmɔ suɔmɔ kpojiemɔ lɛ ŋma akɛ: “Yehowa, mi-Nyɔŋmɔ, onaakpɛɛ nii ni otsuɔ kɛ ojwɛŋmɔi ni ojwɛŋɔ yɛ wɔhe lɛ fa naakpa . . . Amɛfa fe bɔ ni aaanyɛ akane.”—Lala 40:6.

5 Mɛi ni teɔ shi woɔ wɔ lɛ ateŋ mɛi komɛi baanyɛ atsake. Kɛ́ oŋmɛɛɛ saji ahe kɛsaaa shi otee nɔ oshe Nyɔŋmɔ gbeyei ni oná suɔmɔ oha lɛ lɛ, no baanyɛ aye abua mɛi ni teɔ shi woɔ bo lɛ. Bo lɛ susumɔ Yesu wekumɛi lɛ ahe okwɛ. Shishijee mli lɛ, amɛheee enɔ amɛyeee, ni amɛkɛɛ akɛ: “Eyiŋ miikã lɛ.” (Marko 3:21; Yohane 7:5) Yesu gbele kɛ eshitee lɛ sɛɛ lɛ, amɛteŋ mɛi babaoo he enɔ amɛye. Yesu nyɛbii ni ji Yakobo kɛ Yuda po ŋmala Ŋmalɛi lɛ eko. Mɔ kroko hu ni tsutsu ko lɛ eheee Yesu nɔ eyeee ji Saulo, ni ji yiwalɔ kpanaku ni batsɔ bɔfo Paulo lɛ. Kɛ́ wɔtee nɔ wɔkɛ ekãa fi shi lɛ, ekolɛ no baaha mɛi ni teɔ shi woɔ wɔ lɛ ana akɛ wɔ ji mɛi ni tsɔɔ Biblia lɛ mli anɔkwale lɛ.—1 Timoteo 1:13.

Ákɛ nɔkwɛmɔnɔ lɛ, yoo ko ni yɔɔ Afrika ni atsɛɔ lɛ Aberash lɛ sɔle shii abɔ koni ena anɔkwale lɛ. Beni Yehowa Odasefoi kɛ lɛ bɔi Biblia lɛ kasemɔ lɛ, ewekumɛi kɛ ejamɔ lɛ mli hiɛnyiɛlɔi lɛ te shi amɛwo lɛ waa. Ewekumɛi lɛ ateŋ mɛi komɛi ni no mli lɛ amɛ hu amɛkɛ Odasefoi lɛ miikase nii lɛ kpa nikasemɔ lɛ yɛ gbɔmɔ gbeyeishemɔ hewɔ. Shi Aberash kpa Nyɔŋmɔ fai koni eha lɛ hewalɛ kɛ ekãa ni ekɛdamɔ naa, ni sɛɛ mli lɛ abaptisi lɛ akɛ Yehowa Odasefoi lɛ ateŋ mɔ kome. Mɛni jɛ mli ba? Enɛ wo ewekumɛi lɛ ateŋ mɛi kpaanyɔ ekãa, ni amɛha akɛ amɛ bɔi Biblia lɛ kasemɔ ekoŋŋ, ni amɛmiiya amɛhiɛ yɛ amɛnikasemɔi lɛ amli.

Obaanyɛ Oye Gbɔmɔ Gbeyeishemɔ Nɔ

Bɔni afee ni gbɔmɔ gbeyeishemɔ tsɔne lɛ akadu bo lɛ, bɔɔ mɔdɛŋ fɛɛ ni ooonyɛ ni owaje suɔmɔ ni oyɔɔ kɛha Nyɔŋmɔ lɛ. Obaanyɛ ofee nakai kɛtsɔ Biblia lɛ ni oookase ni ojwɛŋ ŋmalɛi tamɔ Hebribii 13:6 lɛ anɔ. Hebribii 13:6 lɛ kɛɔ akɛ: “Nuŋtsɔ lɛ ji mibobalɔ, ni misheŋ gbeyei; mɛni gbɔmɔ aaafee mi?” Ohiɛ akakpa yiŋtoi ahewɔ ni Nyɔŋmɔ gbeyeishemɔ, shi jeee gbɔmɔ gbeyeishemɔ, ji nifeemɔ ni ja ni nilee yɔɔ mli hu lɛ anɔ.

Agbɛnɛ hu, ha ehi ojwɛŋmɔ mli akɛ, kɛ́ okɛ nɔ ni okaseɔ yɛ Biblia lɛ mli lɛ tsu nii lɛ, obaaná jɔɔmɔi babaoo. Obaanyɛ oná sanebimɔi ni he hiaa yɛ shihilɛ mli lɛ ahetoo ni haa mɔ tsui nyɔɔ emli. Obaanyɛ oná nilee kpakpa koni okɛtsu shihilɛ mli naagbai ahe nii yɛ omanyeyeli mli. Yɛ shihilɛ mli naagbai ni haoɔ mɔ ŋmɛnɛ lɛ fɛɛ sɛɛ lɛ, obaanyɛ oná hiɛnɔkamɔ ni yɔɔ miishɛɛ. Ni obaanyɛ otsi obɛŋkɛ Nyɔŋmɔ ofe lɛ be fɛɛ be yɛ sɔlemɔ mli.

Bɔfo Yohane ŋma akɛ: “Je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” (1 Yohane 2:17) Amrɔ nɛɛ ji be ni esa akɛ wɔfi shi shiŋŋ ni wɔnyiɛ yɛ Nyɔŋmɔ gbeyeishemɔ mli. Yɛ nɔ najiaŋ ni oooha gbɔmɔ gbeyeishemɔ aye onɔ lɛ, obaanyɛ ohala akɛ ooobo Nyɔŋmɔ ŋaawoo nɛɛ toi akɛ: “Mibi, feemɔ ohe nilelɔ, ní oha mitsui anyɔ mimli, ní maná hetoo maha mɔ ni bɔɔ mi ahora lɛ.” (Abɛi 27:11) Mɛɛ hegbɛ kpele po enɛ ji nɛkɛ!

Kaimɔ akɛ, adesa ko adesa ko bɛ ni baanyɛ aha bo nɔ ni Nyɔŋmɔ kɛhaa mɛi ni sheɔ lɛ gbeyei lɛ. Biblia lɛ kɛɔ akɛ: “Heshibaa kɛ Yehowa gbeyeishemɔ nyɔmɔwoo ji nii kɛ hiɛnyam kɛ wala.”—Abɛi 22:4.—w09 03/01-E.

[Mfoniri ni yɔɔ baafa 14]

Aberash ekãafeemɔ lɛ ha ewekumɛi lɛ ateŋ mɛi kpaanyɔ tee nɔ amɛkase Biblia lɛ