Malu atanu a kutshinyina Nzambi pamutu pa bantu

NSONGALUME mukuabu wakakema wanyina. Uvua mumone bualu buvuaye kayi mutekemene. Muyiki uvuaye muyikile ne Bantemu ba Yehowa bakuabu babidi uvua mumutabuluje. Bidimu bia bungi uvua utata udikonka anu tshitu Nzambi mulekele malu mabi, kadi dîba adi wakapeta diandamuna dia lukonko alu dipatuila mu Bible. Kavua mumanye ne: Bible utu ne malu bungi nanku a mushinga mukole adi asangaja muoyo nansha.

Minite mikese pakaya Bantemu, mamuende wa lupangu luvuaye ufutshila e kudiela mu nzubu muende ne tshiji webeja ne: “Bavua muaba eu mbanganyi?”

Biakakemesha nsongalume au, kupangaye tshia kumuandamuna.

Mamu au kusamaye ne: “Ndi mumanye bantu abu! Wewe mubakidile kabidi muaba eu, upatuke uye kukeba nzubu muaba mukuabu!”

Ke mamu kututa tshiibi ne tshiji, kupatukaye.

Bayidi balelela ba Kristo mbatekemene buluishi

Bualu buvua bufikile nsongalume eu butu buenzeka bikole. Dîyi dia Nzambi didi diamba ne: ‘Bantu bonso badi basue kuikala bena kanemu mu Kristo Yezu nebakengeshibue.’ (2 Timote 3:12) Bena Kristo balelela kabatu anu babasue kudi bantu bonso to. Bua tshinyi? Mupostolo Yone wakambila bena Kristo nende ne: ‘Tudi bamanye ne: Tuetu tudi ba Nzambi, ne ba pa buloba bonso badi balala mu bubi.’ Badi bamba kabidi  bua Satana Diabolo ne: ‘Udi wendakana bu nyama wa ntambue udi ukungula, ukeba bantu ba kudiaye.’ (1 Yone 5:19; 1 Petelo 5:8) Ditshina dia bantu ke tshimue tshia ku bingoma binene bitu Satana wenza nabi mudimu.

Nansha Yezu Kristo wakenzela bantu malu mimpe a bungi kayi muenze bubi bakamuseka ne kumukengesha. Wakamba ne: ‘Bakadi nanyi lukuna tshianana.’ (Yone 15:25) Dia muladilu wa lufu luende wakalongolola bayidi bende ne mêyi aa: ‘Bikala ba pa buloba nenu lukuna, nudi bamanye ne: Bakadi nanyi lukuna diambedi. Nuvuluke dîyi dingakanuambila ne: Mupika kena mutambe mfumu wende. Biankengeshabu, nebanukengeshe kabidi.’​—Yone 15:18, 20.

Bua bualu ebu, bantu ba bungi bakelakana bua kulamata ku ntendelelu mulelela. Bible udi wamba bua bantu bavua benda bakeba Yezu musangu kampanda ne: ‘Kakuakadi muntu wakamuamba ku mêsu kua bantu, bualu bakatshina bena Yuda.’ (Yone 7:13; 12:42) Bamfumu ba ntendelelu ba mu tshikondo atshi bavua bakana bua kuipata muntu yonso uvua witabuja Kristo mu nsunagoga. Nunku, ditshina dia bantu diakapangisha bantu ba bungi bua kulua bena Kristo.​—Bienzedi 5:13.

Pashishe, pakajalama tshisumbu tshia bena Kristo, Bible udi wakula bua “dikenga dikole” diakakuata bena mu tshisumbu tshia ku Yelushalema. (Bienzedi 8:1) Bena Kristo bakakengeshibua bikole mu miaba yonso ivua bena Lomo bakokesha. Banene ba ku Lomo bakambila mupostolo Paulo ne: ‘Bualu bua tshisumbu etshi, tudi bamanye ne: Badi batshibanda kuonso.’ (Bienzedi 28:22) Mmuomu, bavua baluisha bena Kristo balelela miaba yonso.

Nansha lelu, Satana utshidi usakangana ku ditshina dia bantu. Mmudivuije bu tshingoma tshia kupangisha natshi bakuabu ba bungi bua kulua bayidi balelela ba Kristo. Bantu bimpe badi balonga Bible ne Bantemu ba Yehowa badi bapeta buluishi anyi babaseka mu tulasa, ku midimu, kudi bena mutumba anyi kudi balunda babu. Badi pamuapa mua kutshina bua kujimija kanemu, balunda anyi diambuluisha ditubu bapeta. Mu imue misoko, babidima batu batshina se: bena mutumba babu kabalu kubenga kubambuluisha dîba dia kunowa anyi bua kubalamina bimuna. Kadi nansha mudi bakuabu batshina nunku, bantu miliyo mivule mbadisuike bua kueyemena Nzambi ne kutumikila Dîyi diende anu bu Yezu Kristo. Yehowa mmubabeneshe bua bienzedi biabu ebi.

Tshitudi ne bua kutshinyina anu Nzambi pamutu pa bantu

Bible udi utubela bua kutshina anu Nzambi pamutu pa bantu. Udi wamba ne: “Ditshina dia Yehowa didi tshibangidilu tshia meji.” (Musambu 111:10) Ditshina edi ki ndukanku lua buôwa bua patupu to, kadi nkudienzeja kuimpe bua kubenga kubipila Mufuki wetu. Ditshina dia Nzambi edi mmuaku udi umvuangana ne dinanga. Kadi bua tshinyi kutshina anu Nzambi pamutu pa bantu? Mbua malu atanu aa.

1 Yehowa mMfumu mutambe bunene. Yehowa udi ne bukole butambidile bua muntu kayi yonso. Patudi tutshina Nzambi, tudi tulamata kudi Wa Bukole Buonso udi ‘bisamba bia bantu bikale bu dimata dia mâyi ditankuke mu luesu’ ku mêsu kuende. (Yeshaya 40:15) Bu mudi Nzambi Wa Bukole Buonso, udi ne bukole bua kutshimuna ‘tshielelu tshia mvita tshionso tshidibu batula bua kuluisha’ natshi bonso badi bamulamate. (Yeshaya 54:17) Bu muikalaye yeye nkayende mua kumanya bikala bakumbanyine kupeta muoyo wa kashidi, netuleje mutudi ne meji pa kubenga kulekela tshintu nansha tshimue tshitupangisha bua kulonga mua kumumanya ne kuenza disua diende.​—Buakabuluibua 14:6, 7.

2 Nzambi neatuambuluishe ne neatulame. Bible udi wamba mu Nsumuinu 29:25 ne: ‘Patshina muntu bakuabu, bualu ebu budi buteyi kudiye, kadi udi weyemena Yehowa neapanduke.’ Kutshina muntu mbuteyi, bualu kudi mua kutupangisha bua kuambila bakuabu bualu bua ditabuja dietu kudi Nzambi. Nzambi udi utujadikila mudiye ne bukole bua kutulama wamba ne: ‘Kutshinyi, bualu bua ndi nebe; kukenzakanyi bua buowa nansha, bualu bua ndi Nzambi webe; nenkukoleshe, bulelela, nenkukuatshishe; bulelela, nenkujadike ne tshianza tshianyi tshia balume tshia buakane buanyi.’​—Yeshaya 41:10.

3 Nzambi mmunange bantu badi basemena kudiye. Mupostolo Paulo wakafunda mêyi aa ne: ‘Ndi ngitabujibua ne: Kakuena lufu, kakuena muoyo, kakuena banjelu,  kakuena bakokeshi, kakuena malu atshidiku, kakuena malu atshilualua, kakuena makalenge, kakuena bule, kakuena ndondo, kakuena tshintu tshionso tshikuabu tshifukibue tshidi ne bukole bua kutupandulula ku dinanga dia Nzambi didi mu Kristo Yezu Mukalenge wetu.’ (Lomo 8:37-39) Tuetu balonge bua kueyemena Nzambi udi Mfumuetu Mutambe bunene ne kumutumikila, neatunange bikole. Ndiakalengapu kayi nunku!

4 Tudi banange malu onso adi Nzambi mutuenzele. Yehowa mMufuki wetu, yeye ngudi mutupe muoyo. Kabidi, ki mmutupeshe anu biakudia nkayabi to, kadi mmutupeshe ne bintu bidi bivuija dikala ne muoyo bualu bua disanka. Bushuwa, yeye ke mufidi wa kupa kuonso kuimpe. (Yakobo 1:17) Pakamona Davidi luse lujalame lua Nzambi, wakafunda ne: ‘Yehowa Nzambi wanyi, wakuvudija malu a kukema awakuenza ne malu awakupangadija bua kutuenzela. Neampite bua kuabala.’​—Musambu 40:5.

5 Bamue bantu badi batuluisha badi mua kushintuluka. Udi mua kuambuluisha badi bakuluisha pa kubenga kupingana tshianyima, kadi kushala mulamate anu Nzambi ne kumunanga. Tuangate tshilejilu tshia bana babu ne Yezu. Ku ntuadijilu, kabavua bitabuja Yezu to, bavua bamuamba ne: ‘Yeye udi mupale.’ (Mâko 3:21; Yone 7:5) Matuku panyima pa lufu lua Yezu ne dibika diende, ba bungi ba kudibu bakalua bayidi bende. Bana babu ne Yezu, bu mudi Yakobo ne Yuda bakafunda too ne imue mikanda ya mu Bible. Kuvua kabidi Shaula uvua ukengesha bena Kristo wakalua mupostolo Paulo. Bamue bantu badi batukengesha mpindieu badi mua kulua kumona ne: tudi ne bulelela bua mu Bible anu bua lulamatu lutudi tushala nalu ne dikima padibu batuluisha.​—1 Timote 1:13.

Tshilejilu, Aberash (mamu mukuabu wa munu mu Afrike) uvua ulomba Nzambi bua kumanyaye bualu bua Nzambi bulelela. Pakatuadijaye kulonga Bible ne Bantemu ba Yehowa, ba mu dîku diabu ne bamfumu ba tshitendelelu tshivuaye bakabanga kumuluisha bikole. Balela bende bakavua batuadije pabu kulonga Bible bakalekela anu bua ditshina dia bantu. Kadi yeye wakalomba Nzambi bukole ne dikima e kutambulaye, kuluaye Ntemu wa Yehowa. Tshiakenzeka ntshinyi? Balela bende bakuabu muanda mukulu bakapeta dikima, kubangululabu kabidi kulonga Bible; mpindieu bayaya batangile kumpala.

Udi mua kutshimuna ditshina dia bantu

Bua kuepuka buteyi bua ditshina dia bantu, enza muebe muonso bua dinanga diebe dia Nzambi dikole. Udi mua kuenza nanku pa kulonga Bible ne kuelangana meji a malu adi mu mvese bu mudi wa Ebelu 13:6 eu: ‘Mukalenge udi mukuatshishi wanyi; tshiena ntshina; muntu neangenzele tshinyi?’ Malu adi aleja mudi kutshina Nzambi pamutu pa bantu bualu buimpe bua meji bua kuenza, kuapu muoyo to.

Vuluka kabidi mabenesha a bungi adi afumina ku ditumikila malu audi ulonga mu Bible. Udi mua kupeta mandamuna akusankisha a nkonko minene iutu udiela mu nsombelu webe. Udi mua kupeta lungenyi luimpe lua mua kupita ne ntatu ya mu nsombelu. Nansha wewe mu nsombelu wa lutatu, udi mua kutekemena malu mimpe be! Kabidi udi mua kuyikila ne Nzambi wa bukole buonso dîba dionso mu disambila.

Mupostolo Yone wakafunda ne: “Buloba budi bujimina ne lukuka luabu kabidi; kadi yeye udi wenza mudi disua dia Nzambi udi ushalaku tshiendelele.” (1 Yone 2:17) Etshi ke tshikondo tshia kushala bimane bashindame, tshia kuenda mu ditshina dia Nzambi! Pamutu pa kulekela ditshina dia bantu ditekesha ditabuja diebe, keba bua kuenza tshidi Nzambi utulomba etshi: ‘Muananyi, wikale ne meji, usankishe mutshima wanyi, bua mmanye mua kuitaba kudi muntu udi umpenda.’ (Nsumuinu 27:11) Kutumikila mubelu eu ndiakalenga dinene be!

Umanye ne: kakuena muntu wakupa tshintu tshipite tshialua Nzambi kupesha badi bamutshina etshi: ‘Difutu dia kudipuekesha ne dia ditshina dietu dia Yehowa didi bubanji, butumbi ne muoyo.’​—Nsumuinu 22:4.

[Tshimfuanyi mu dibeji 14]

Bua dikima dia Aberash, balela bende muanda mukulu mbatungunuke ne kulonga Bible