Lailim Un ko Unin Ar Mijõk Anij im Jab Armij

JUÕN likao ear lukkun bwilõñ kin juõn men ear jab kõtmene bwe enaj kar walok ñõn e. Ear bwilõñ kin men ko Dri Kennan ro ruo an Jeova rar kwalok ñõn e. Iomin elõñ yiõ ear jab jela etke Anij ej kõtlok nana ak kiõ emwij an lo uak eo jen Baibel eo. Ear jab jela bwe elõñ melele ko remõn rej ber ilo Baibel eo.

Elikin wõt an Dri Kennan ro an Jeova etal jen e, kõra eo an mweo ej jokwe ie ear mõkõj im relõñ ilo rum eo an im ej buroñe im ba, “Wõn armij ro?”

Joñõn an likao eo ilbõk, ear jab maroñ uake kõra eo.

Kõra eo ear lamij im ba, “Ijela wõn ir,” im ej wõnmanlok wõt im ba, “ñe kwonaj bar kadreloñtok ir, kwon drioij jen mwin im kabuk bar jikõm!”

Ke kõra eo ear drioij jen rum eo, ear jab kakõmanmõn an kileke kejem eo.

Dri Kalor ro Remol An Kraist Rej Kõtõmene bwe Renaj Iion Jumae

Men eo ear walok ñõn likao eo, ekkã an walok bareinwõt ñõn dri Kristian ro remol. Nan in Anij ej kemelele: “Ro otemjej re kõnan mour im kwojarjar ilo Kraist Jisõs, naj matõrtõre ir.” (2 Timote 3:​12) Dri Kristian ro rejjab bõk kwonair ilo men ko rebuñbuñ an lõl in. Etke? Dri jilik Jon ear jiroñ dri Kristian ro mõtõn: “Je jela bwe kij jen Anij, im aolepen lõl ej berwõt ilo dri nana eo.” Baibel eo ej pijaik Setan Devil eo, “einwõt laiõn e rorror, ej etetal wõt im bukot eo ej maroñ in kõñi.” (1 Jon 5:​19; 1 Piter 5:⁠8) Mijõk armij ej juõn ian kein tõrinae eo ekeie an Setan.

Meñe ear ejelok jerawiwi iben Jisõs Kraist im ear kõmõn elõñ men ko remõn, ak armij ro rar kajirere im matõrtõr e. Ear ba: “R’ar kijirãte Iõ im ejelok unin.” (Jon 15:​25) Ilo boñin eo wõt mokta jen an kar mij, ear kakkõl dri kalor ro an kin nan kein: “Elañe lõl ej kijirãte kom, komij jela bwe e ar kijirãte Iõ mokta jen kom. Komin kememej nan eo I ar ba ñõn kom, Dri korijer e jab utiej jen iroij eo an. Elañe r’ar matõrtõr Iõ, re naj bareinwõt matõrtõre kom; elañe r’ar kejbãrok Aõ in nan, re naj bareinwõt kejbãrok ami nan.”​​—Jon 15:​18, 20.

Kin nan in kakkõl kein, elõñ rej mijõk in erom dri Kristian ro remol. Ikijen armij ro me rar bukot Jisõs juõn ien, Baibel ej ba: “A ejelok armij ej konono alikar kin E, bwe rem’jõk dri Ju ro.” (Jon 7:​13; 12:​42) Dri tel ro an kabuñ ko ilo ran ko an dri jilik ro rar kakkõl bwe ñe armij ro renaj  tõmak ilo Kraist, renaj bukwelok ir jen imõn kwelok ko air. Inem elõñ rar jab erom dri Kristian kin air mijõk armij.​​—Jerbal 5:​13.

Tokelik, ke kabuñ eo an Kristian kar ejaak, “elap matõrtõr” ear walok nae congregation eo ilo Jerusalem. (Jerbal 8:⁠1) Ilo mol, dri Kristian ro rar ber ilo ailiñ ko me ailiñ in Rom ear kajur ioir, rar iion matõrtõr. Man ro reutiej ilo Rom rar jiroñ dri jilik Paul: “Bwe kin jar in, kim jela ijo ko otemjej rej konono nae e.” (Jerbal 28:​22) Aet, dri Kristian ro remol rar iion elap matõrtõr.

Ñõn ranin, Setan ej kajerbal mijõk armij einwõt kein tõrinae eo an ñõn bõprae elõñ jen air erom dri kalor ro remol an Kraist. Armij ro rej katak Baibel iben Dri Kennan ro an Jeova rej iion jumae im kajirere ilo jikuul, jikin jerbal, jen ro dri turiir, ak ro mõtair. Remaroñ mijõk ñe armij ro ejoko air koutiej ir, renaj luji ro mõtair, ak ejoko air jibõñ ir kin mweiuk. Bõtab, jekron menin kamijõk kein, ak elõñ million armij ro emwij air bebe ñõn liki wõt Anij im mour ekkar ñõn Nan ko an im lor Jisõs Kraist. Air kõmõne men in, Jeova ear kejerammõn ir.

Etke Jej Aikwij Mijõk Anij, im Jab Armij

Baibel eo ej rejañ kij ñõn mijõk Anij im jab armij. Ej ba: “Mijõk Jeova jinoin meletlet.” (Sam 111:​10) Mijõk rot in ej jibõñ kij ñõn kõmõni men ko rej kabuñburuen Eo ej dri Letok Mour, im men in ej ekkejellok ñõn yokwe. Ak etke jej aikwij mijõk Anij im jab armij? Jen etale lailim un ko.

1 Jeova ej Anij Ekajur Potata. Jeova elaplok an kajur jen jabrewõt armij. Ikijen ar koutiej Anij ekajur potata im bokake kien ko an, jej kalikar bwe jej dri kabuñ ro an eo me ej watõk dri ailiñ ko einwõt “juõn biliñliñin dren” ilo juõn bakõj. (Aiseia 40:​15, UBS) Kinke Anij ekajur potata, eor an maroñ ñõn kokkure “jabrewõt ken tõrinae emwij nawãwen” nae ro rej tiljek ñõn e. (Aiseia 54:​17) Im kinke ej bebe eo an ñõn kalet wõn ro renaj bõk mour in drio, jej aikwij jab kõtlok jabrewõt men ñõn kabwijrõk kij jen ar katak kin e im kõmõnmõn ankilan.​​—Reveles̃õn 14:​6, 7.

2 Anij enaj jibõñ im kejbãrok kij. Ilo Jabõn Kennan 29:25 ej ba, “Mijõk armij ej bõktok juõn jen; a eo ej liki Jeova, ejelok an uota.” Aet, mijõk armij ej juõn jen im emaroñ bõprae kij jen ar kwalok tõmak eo ar kin Anij. Anij ej kalimur bwe enaj kajerbal kajur eo an ñõn lomoren kij, ilo an ba: “Kwon jab mijõk, bwe Ña ibõm; kwon jab lelñoñ, bwe Ña am Anij; I naj kakajur yuk, aet, I naj jibõñ yuk; aet I naj baur yuk kin pein anbijmaroñõn wãnik eo Aõ.”​​—Aiseia 41:⁠10.

3 Anij ej yokwe ro rej druaklok ñõn e. Dri jilik Paul ear je nan kein rekõkãtõk: “Bwe ij lemnok e jab mij ak mour, e jab enjel rõn ak jiõb ro, e jab men ko kiõ ak men ko re naj itok, e jab kajur ko, E jab utiej ak imlõl, ak jabrewõt bar juõn men in kõmõn, e naj maroñ in kijbil kij jen yokwe an Anij, eo ilo Kraist Jisõs ar Iroij.” (Dri Rom 8:​37-​39) Elañe jej katak ñõn liki im bokake Anij eo Eutiejtata ijoko otemjej ilõñ im ilõl, jenaj lõñliñ kin yokwe eo an ñõn kij. Ej juõn jerammõn elap!

4 Elap ar kamolol Anij kin aolep men ko ear kõmõni ñõn kij. Jeova ej dri kõmõnmõn eo ar, eo ej unjen mour. Ear jab baj letok wõt men ko jej aikwiji ñõn mour ak ear letok bareinwõt  men ko rej kamõnõnõik kij. Emol, e ej Unjen aolep menin letok ko remõn. (Jemes 1:​17) Eman eo etiljek, Devid, ear kwalok an kamolol Anij kin yokwe eo an emol, ear je nan kein: “O Jeova aõ Anij, elõñ men in bwilõñ, jerbal ko Kw’ar kõmõne, kab lemnok ko Am ñõn kim: re ban kilajrõk ir ñõn Kwe; . . . relõñ jen maroñ in bwini.”​​—Sam 40:⁠5.

5 Ro rej jumae kij remaroñ oktõk. Ilo am jek ilo buruõm ñõn koutiej im yokwe Anij im jab ebwer, kwomaroñ jibõñ ro rej jumae yuk. Lemnok kin ro nukin Jisõs. Mokta rar jab tõmak ilo e, rar ba: “Ej uriekak.” (Mark 3:​21; Jon 7:⁠5) Tokelik, elikin an Jisõs mij im jerkakbiji, elõñ ian ro nukin rar erom dri tõmak ro. Ro jãtin Jisõs, Jemes im Jud, rar bõk kwonair je Baibel eo. Bareinwõt, Saul ãt eo juõn Paul, eo ekin lej im matõrtõr, ear erom dri kaloran Jisõs Kraist. Kin ar beran im bebe ñõn tiljek wõt, jet dri jumae ro kiõ remaroñ kile bwe jej dri kalor ro remol an Jisõs Kraist.​​—1 Timote 1:​13.

Ñõn wanjoñok, Aberash, juõn kõra jen Africa, ekin jar bwe en jela mol eo kin Anij. Elikin wõt an jino katak iben Dri Kennan ro an Jeova kin Baibel eo, baamle eo an im dri tel in kabuñ ko rar lukkun jumae e. Jet ro nukin me rar bareinwõt katak, rar ebwer kin air mijõk armij rein. Ak ear eowore Anij ñõn kakajur im kaberan e, im tokelik ear baptais einwõt juõn ian Dri Kennan ro an Jeova. Ta tõbrõk eo? Joñok eo an ear kaberan drualitõk uan ro nukin bwe ren wõnmanlok im kõmõn oktõk ilo mour ko air ekkar ñõn kien ko an Anij.

Kwomaroñ Bõk Anjo ion Mijõk Armij

Ñõn am bõprae kwe jen am ebwer kin mijõk armij, kwon kate yuk joñõn wõt am maroñ ñõn kakajur yokwe eo am kin Anij. Kwomaroñ kõmõn eindrein ikijen am katak Baibel im kalomõnlokjen kin nan ko rej walok ilo Dri Hibru 13:​6, ke ej ba: “Iroij ej aõ Dri jibõñ; I jamin mijõk: ta eo armij ren kõmõn ñõn iõ?” Jab meloklok un kein, kinke rej kalikar bwe mijõk Anij elaplok jen armij ej men eo ejime jej aikwij kõmõne.

Bareinwõt, kememej wõt bwe elap tokjen ñõn ar jerbali men ko jej katak jen Baibel. Kwomaroñ lo uak ko raurõk im bõk jelalokjen ñõn anjo ion melejoñ ko kin mour. Emaroñ or am kejatdrikdrik meñe lõl in eobrõk kin nana, im kwomaroñ kebak Anij eo ekajur Potata ien otemjej, ikijen jar.

Dri jilik Jon ear je nan kein: “Lõl e jokolok im mõm ko an: a eo ej kõmõnmõn ankil an Anij ej berwõt in drio.” (1 Jon 2:​17) Kiõ ej ien ñõn jutõk bin im mijõk Anij. Jen am ebwer kin am mijõk armij, kwomaroñ kãlet ñõn lore nan kein an Anij: “Nejiõ, kwon meletlet, im kamõnõnõik buruõ, bwe in uak ñõn eo ej kinak iõ.” (Jabõn Kennan Ko 27:​11) Ej juõn jerammõn elap ñõn ar bokake nan kein!

Kememej wõt bwe ejelok juõn armij emaroñ lewoj ñõn yuk men eo Anij emaroñ lelok ñõn ro rej mijõk e. “Wõnan etã buru im mijõk Jeova, mweiuk, im nebar, im mour.”​​—Jabõn Kennan Ko 22:⁠4.

[Pija eo ilo peij 31]

Kin beran eo an Aberash, drualitõk uan ro nukin rar wõnmanlok ilo air katak Baibel