Diosta mantsanapaq y nunata mana mantsanapaq pitsqa yachatsikïkuna

JEHOVÄPA TESTÏGONKUNA mana imëpis musyanqanta yacharatsiyaptinmi, huk joven alläpa kushishqa këkarqan. Imanir-raq Diosqa imëka mana allikuna kananta rikaräkun nirshi unëpitana tapukunaq, y kananqa Testïgokunash llapan tapukonqanta Bibliawan shumaq yacharatsishqa kayänaq. Manash imëpis musyanaqtsu tsë llapankunata Biblia shumaq yachatsikonqanta.

Yacharatsir ëwakuyanqanllachöshi, alläpa piñashqa tsë jövenpa cuartonman wayiyoq yëkurir, kënö ninaq: “¿Pikunataq kayashqa tsë ishkaq parlapäshoqnikikuna?”.

Mantsakarnash joven ima nita puëdenatsu.

“¡Pikuna kayanqantapis alleqmi musyä, paqtaraq yapë këpa purikämoqta rikëköman, tsëqa mëchöpis wayiki ashikurëkëna!” nirshi qayapëkunaq.

Tsënö nirirshi, punkuta sinchipa wichqar-raq yarqurinaq.

Diosta sirveqkunaqa musyayänanmi chikishqa kayänanta

Këkunanö pasanampaqqa musyënam karqan, Diospa Palabranmi kënö nin: “Änirpis, rasonpam Teyta Jesus munanqanno cawe munaqcunataqa maltratar qaticachäyanqa” (2 Timoteu 3:12). Y tsëqa rasunmi, Diosta sirveqkunaqa imëpis manam kuyashqatsu kayashqa. ¿Imanir? Apóstol Juanmi kënö nerqan: “Musyantsicmi Diospana canqantsicta. Peru que munducho Diospa mana caqcunaqa diablupa muneninchomi caquicayan”. Hinamampis, “diabloqa, imeca mallaqashqa leonnomi qaparir qayarir, purican qamcunapa marcäquiniquicunata [yärakuynikikunata]  ushacäratsinanpaq” ninmi Bibliaqa (1 Juan 5:19; 1 Pedru 5:8). ¿Imanötaq tsëtaqa ruran? Makinman ishkinantsikrëkurmi nunakunata mantsanantsikta munan.

Rikanqantsiknöpis, cristiänokuna chikishqa kayänanqa musyënam. Kikin Jesuspis hutsannaq këkar y imëka allikunata rurëkarnimpis chikishqa y burlapashqam karqan. Wanukunan paqaspis, “porgustum chiquiyäman” nerqanmi (Juan 15:25). Puntallapitanam qateqninkunatapis kënö nirnin yachatserqan: “Sitsun noqaman mana creyeq nunacuna qamcunata chiquiyäshunqui; yarpäyë puntata noqata chiquiyämashqanta. Niyashqaqta yarpäyë: ‘Patronninpitaqa sirweqnin manam mas puedeqtsu.’ Noqata chiquiyämarneqa, qamcunatapis chiquiyäshunquim” (Juan 15:18, 20).

Chikiyänanta mantsarmi wakinkunaqa alli kaq religionchö këkäyanqanta musyatsikïta munayarqantsu. Wakinkunaqa nunakuna hananchö manash Jesuspaq parlayaqtsu “judyukunata mantsarnin” ninmi Bibliaqa (Juan 7:13; 12:42, QKW). Unë witsan religiösokunaqa, ëllukäyänan o qorikäyänan wayinkunapita qarqïta munarmi cristianokunata mantsakätsiyaq. Rikanqantsiknöpis nuna mayinkunata mantsarmi wakinkunaqa cristiano këman chäyarqantsu (Hechos 5:13).

Tsëpitanam, Jerusalen congregacionchö cristianokunata “ushacätsita munar” qatikachar qallakïkuyarqan (Hechos 8:1). Hina, romänokuna gobernayanqan witsan cristianokunapis alläpa chikishqam kayarqan. Y tsë markachö alli respetashqa judïokunam, “tse juclayapa yachatsiconqequipa contran jinantincho parlayanqantam musyayä” niyarqan Pablutapis (Hechos 28:22). Rikanqantsiknöpis, Diosta rasumpa sirveqkunaqa më tsëchöpis alläpa chikishqam kayarqan.

Kanan witsampis, tsënöllam Satanasqa Cristupa qateqnin këta munaqkunata nunakunawan mantsakätsin. Tsëmi Jehoväpa testïgonkunawan Biblia yachakïkaqkunata marka mayinkuna, yanaqinkuna y reqinakushqankuna chikipäyan. Itsa tsëchi wakinkunaqa mantsayan manana respetayänanta, amïgonkuna oqreta, hina qellëwan manana yanapayänantapis. Y chakrachö täraqkunapis itsa mantsayan cosëchankunachö manana yanapayänanta, o animalninkunata manana mitsipäyänanta. Tsënö kaptimpis, Jesucristu ruranqannöllam atska millón nunakuna mana ni imatapis mantsashpa Jehoväman markäkïkäyan o yärakuykäyan, y Biblia nenqannö kawëkäyan. Y Jehoväqa pëkunata bendecishqam.

Diosta mantsashun, ama nunataqa

Diosta mantsanapaqmi Bibliaqa yachatsimantsik, manam nunakunata mantsanapaqtsu. Tsëmi “Jehová Diosta mantsëqa alli yachëpa qallananmi” nimantsik Bibliaqa (Salmo 111:10). Pero ¿imataq Diosta mantsëqa? Manam feyupa mantsënötsu o imatapis rurëkamanqachi nir mantsënötsu, antis Jehoväta kuyëkarqa mana allikuna rurëta mantsëmi. Tsëpenqa, ¿imanirtaq Diosllata mantsanantsik? Pitsqa yachatsikïkunata rikärishun.

1 Jehovällam Llapan Puëdeq. Pï nunakunapitapis Diosqa alläpa puëdeqmi. Pëpaqqa, “matipita huk shutuy yakunöllam nacionkuna kayan” (Isaías 40:15). Llapan kallpayoq Diosqa sirveqninkunata chikeqninkunapa ‘imëka armankunatapis’ ushakäratsinmanmi (Isaías 54:17). Hina Jehoväpitaraqmi pipis mana wanushpa kawakïman chanqa. Tsëmi Diospa lädonman churakarqa allita rurëkantsik. Y, ¿imata rurartaq lädonman churakantsik? Pëpita yachakur y nenqankunata wiyakurmi, y tsëmi Diosta mantsëqa (Apocalipsis 14:6, 7).

2 Diosqa yanapamantsikmi y imëkapitapis tsapämantsikmi. Proverbios 29:25 textom kënö nin: “Nunakunata mantsëqa shawashqa cuenta këmi, pero Jehoväman yärakoqqa [markäkoqqa] imëkapitapis tsapashqam kanqa”. ¿Imanirtaq nunakunata mantsëqa shawashqa cuenta këmi o toqllaman heqashqa cuenta këmi nintsik? Nunata mantsarnenqa itsa Jehoväta servïtapis haqirishwan. Diosqa tsapämänapaqmi kënö nimantsik: “Qamwanmi noqaqa këkä, ama imatapis mantsëtsu. Piraq yanapëkamanqa nitsu, noqam Diosniki kä. Noqam kallpata qoshqëki. Noqam yanapashqëki. Awmi, noqam justiciata ruraq makïwan alli tsarashqëki” (Isaías 41:10).

3 Pëpaq kaqkunataqa Dios kuyanmi. Shonquntsikmanmi chärin apóstol Pablu kënö qellqanqan: “Noqa seguru[m] kä, manam waniy, ni kawey ni angelkuna ni apukuna ni pwedeqkuna ni kanankaq ni shamoqkaq, ni rara kaq ni rurikaq, ni meyqan kamashqakunapis manam  pwedintsu Dyospa kuyakiyninpita rakimeynintsikta Señornintsik Kristu Jesuschow” (Romanos 8:37-39, QKW). Ciëlochö y Patsachö Autoridadman markäkushqa y pëta wiyakushqaqa, alläpa kushikïpaqmi imëyaqpis kuyamäshun.

4 Noqantsikpaqrëkur Dios ruranqantam agradecikuntsik. Jehovämi kawëta qomashqantsik. Y manam tsëllapistsu, kushishqa y alli kawakunapaqmi llapan wananqantsikkunata qomarqontsik. Tsëmi, Kamamaqnintsikpitam “llapan imecapis” shamun nin Bibliachö (Santiagu 1:17). Llakipäkoq y kuyakoq Jehová kaptinmi, Diosta sirveq Davidpis kushikur kënö nerqan: “Kikikim imëkakunatapis rurarqonki, Jehová Diosllä, alläpa shumaqmi ruranqëkiqa y noqakunapaq pensanqëkiqa [...] alläpa atska kaptinmi willakïta ushätsu” (Salmo 40:5).

5 Rikämarnintsikqa wakinkunapis yachakuyanmanmi. Diosta kuyarnin y mantsarnin alli tsarakushqaqa, itsa chikimaqnintsikkunapis rikämarnintsik yachakuriyanman. Jesuspa kastankunaman yarpärishun. Mëqampis puntataqa manam pëman creiyarqantsu, y “manam fisyunchowtsu keykan” niyarqanraqmi (Marcos 3:21, QKW; Juan 7:5). Tsënö karpis, Jesus kawarimushqanchöqa wawqinkunaqa cristiano këmanmi tikrariyarqan. Manam tsëllatsu, Bibliapa libronkunatapis qellqayarqanmi Jesuspa wawqinkuna Jüdaswan Santiagu. Y Saulo shutiyoq nunanäqa cristianokunata alläpa chikïkarmi, apóstol Pabluman tikrarqan. ¿Imatataq kë pasanqankunapita yachakuntsik? Alli tsarakushqaqa, itsa chikimaqnintsikkuna musyariyanman rasumpa kaqchö këkanqantsikta (1 Timoteu 1:13).

Y kanan witsan tsënö pasanqanta rikärishun. Africapita Aberash shutiyoq shipashshi, rasumpa kaqta musyëta munar unëpitana Diosman mañakur kanaq. Pero Jehoväpa testïgonkunawan Bibliapita yachakur qallëkuptinshi, kastankuna y täränqan markachö religiösokuna paqwë chikikurkuyänaq. Tsënash wakin kaq Bibliapita yachakïkaq kastankunapis mantsakar yachakuyänaqnatsu. Tsënö karpis, Aberashqa Diosmanshi kallpata qonampaq mañakunaq y tsënöpash kananqa bautizakushqana. Tsënö alli tsarakonqanta rikëkurshi, puwaq kastankuna yapë estudiar qallëkuyänaq y kananqa allina yachakïkäyan.

Imatataq rurashwan nunata mana mantsanapaq

Nunakunata mana mantsanapaqqa Diostam alli kuyanantsik. ¿Imataraq rurashwan Diosta alli kuyanapaq? Bibliapitam alli yachakunantsik, y Hebreus 13:6 textokunamannömi yarpänantsik, tsëchöqa kënömi nin: “Diosmi yanapaman y manam mantsacushaqtsu. Tseno quecaptin ¡manam nuna ni imata ruramanqatsu!”. Diosllata mantsanapaq pitsqa yachakonqantsikta ama imëpis qonqashuntsu.

Hina yarpänantsikmi, Diospa Palabranchö këkaq yachatsikïkunata wiyakï alläpa alli kanqanta. ¿Imanirtaq alläpa alli? Puntataqa, kawënintsikpaq precisaq tapukïkunapa respuestantam tarintsik. Hina, llapan hunaqkunapaqmi tukïläya consëjokunata tarintsik. Hinamampis, shamoq tiempochö alli kawë kananman yärakunqantsikmi yanapamantsik ima kaptimpis alli tsarakunapaq. Y munanqantsik höram llapan kallpayoq Diosman mañakïta puëdentsik.

Apóstol Juanmi kënö qellqarqan: “Que mundoqa llapan mana alli munenincunawan ushacäreqllam; peru Diospa muneninta ruraq nunaqa wiñepam cawanqa” (1 Juan 2:17). Tsë tiempo këllachöna kaptinmi nunataqa mantsanantsiktsu, tsëpa rantenqa alleqmi tsarakunantsik y Diostam más kuyanantsik. Dios kënö nimanqantsikta wiyakïqa alläpa kushikïpaqmi: “Yachaq kë wambrallä y shonqüta kushitsimï, qallapämar burlakëkämaqnïta contestanäpaq” (Proverbios 27:11).

Kuyaqninkunata Diosnintsik awninqankunata ama imëpis qonqashuntsu, pëqa kënömi nimantsik: “Humilde kë y Jehoväta mantsëqa, rico këman, honrashqa këman y kawëmanmi apakun” (Proverbios 22:4). Manam nï pï nunapis këtaqa qomashwantsu.

[9 kaq päginachö fötu]

Aberash alli tsarakonqanta rikarshi, puwaq kastankuna Bibliapita mana haqishpa yachakïkäyan