E Rima Tumu kia Mataku i te Atua e Kare i te Tangata

KUA poitirere mareka tikai tetai tane mapu. Ko tei tupu ua akenei kare rava i tapapaia atu ana. Kua riro tana uriurianga ki tetai nga Kite o Iehova ei apiianga kiaia i tetai apinga ou. Ko te uianga e eaa te Atua i akatika ai i te mamae, kua tamanamanata ana iaia no tetai au mataiti, inara i teianei kua pau taka meitakiia mai te reira mei te Pipiria. Kare rava aia i kite ana e te vai ra te au akakiteanga puapinga e te pumaana i roto i te Pipiria.

I nga miniti i muri ua ake i te akaruke anga te nga manuiri, kua tomo viviki mai te vaine nona te kainga ki roto i tona rumu e kua ui riri mai e, “Koai tera nga tangata?”

Ma te poitirere, kare e rauka i te mapu tane i te pau atu.

“Kua kite au e koai raua,” i tuatua maata mai ei aia, “me ariki akaou koe ia raua, e aere koe e kimi atu i tetai ngai ke noou!”

Kua reru maata mai aia i te pa e kua aere atu.

Tapapa Atura te Au Pipi Mou a te Karaiti i te Patoianga

Ko tei tupu ki teia mapu tane kare i te mea tuke rai. Te akamarama maira te Tuatua a te Atua, te Pipiria e: ‘Te aronga katoa e akono ra i te Atua, tei roto i te Mesia ia Iesu, ka takinga-kino katoaia rai.’ (2 Timoteo 3:12) Kare te au Kerititiano mou e rekaia ana e kare rava rai e rekaia. No teaa ra? Kua akakite te apotetoro ko Ioane ki tona au taeake Kerititiano e: “Kua kite oki tatou e no te Atua tatou, e te vai ua nei rai to te ao ravarai i raro ake i taua vaerua kino ra.” Kua akatutu katoaia a Satani te Tiaporo “mei te liona ngunguru ra, i te kimi anga i te tangata e pou iaia.” (1 Ioane 5:19; 1 Petero 5:8) Ko te mataku i te tangata tetai apinga tamaki puapinga rava atu a Satani.

Kua aviriia e kua takinokinoia a Iesu Karaiti, tei rave maata i te mea meitaki e kare i ara ana. Kua karanga aia e: “I riri ua mai ratou iaku kare e ara.” (Ioane 15:25) I te po i mua ake i tona mate anga, kua akapapa aia i tana au pipi ma teia au tuatua e: “Kia riri mai to te ao ia kotou ra, kua kite kotou e, ko au ta ratou i mainaina mai ana, ou to ratou riri ia kotou. Ka akamanako i taku i karanga atu kia kotou na, Kare te tavini i maata i tona pu. I takinga-kino ana ratou iaku ra, e takinga-kino katoa ratou ia kotou.”—Ioane 15:18, 20.

No teia akamatakiteanga, e manganui tei emiemi i te turu i te akamorianga mou. Ko te aronga te kimi ra ia Iesu i tetai atianga, te karanga ra te Pipiria e: “Kare ra e tangata i tuatua akakite ua kiaia, i te mataku i te ngati Iuda.” (Ioane 7:13; 12:42) Kua tamataku te au arataki o te akonoanga o te reira tuatau i te akaatea i tetai ua atu tei tuku i te akarongo ki roto i te Karaiti. No reira, kua riro te mataku i te tangata ei arai i te manganui kia kore ratou e riro mai ei au Kerititiano.—Angaanga 5:13.

 I muri mai, i te akanoo angaia te Akonoanga Kerititiano i muri ake, kua tatau ana tatou no runga i te “takinga-kino maata” tei tupu ki te putuputuanga i Ierusalema. (Angaanga 8:1) Ko te tika, i roto katoa i te Patireia Roma, kua akakoromaki te au Kerititiano i te takinokino anga. Kua akakite te au tangata rongonui i Roma ki te apotetoro ko Paulo e: “I tenana pupu, kua akakinoia ïa e kare e ngai toe, kua kite matou.” (Angaanga 28:22) Ae, kua patoi maataia te au Kerititiano tika tikai.

I teia tuatau, te taangaanga nei rai a Satani i te mataku i te tangata ei apinga tamaki i te arai i te manganui kia kore e riro mai ei au pipi tika tikai na te Karaiti. Ko te au tangata ngakau tika te apii nei i te Pipiria ma te Au Kite o Iehova, te aro atura i te patoianga me kore te avirianga i te apii, i te angaanga, i to ratou ngai nooanga, me kore to ratou au oa. Penei te mataku ra ratou i te ngere anga i te tu ngateitei, te akarukeia anga e to ratou au oa, me kore te ngere anga i te au turuanga apinga materia. I roto i tetai au ngai i vao, e mataku ana te aronga tanutanu penei ka patoi to ratou au tangata tupu i te tauturu ia ratou i te tuatau kokoti anga me kore i te paruru i ta ratou au manu angai. Inara, noatu taua au matakuanga ra, e mirioni ua atu tei iki i te irinaki i te Atua e te akono rotai anga i te Tuatua a te Atua, i te aruanga ia Iesu Karaiti. Kua akameitaki a Iehova ia ratou i te rave anga i te reira.

Kia Mataku i te Atua, Kare i te Tangata

Te raurau maira te Pipiria ia tatou kia mataku i te Atua, kare i te tangata. Te karanga ra te reira e: “Ko te akamataanga o te pakari ra, koia te mataku ia Iehova ra.” (Salamo 111:10) Ko teia mataku, kare i te mataku rikarika, inara e manako meitaki no te akamareka kore anga i Tei Oronga mai i te Ora no tatou. E tuatua te piri vaitata atura ki te aroa. Eaa i reira tatou ka mataku ei i te Atua e kare i te tangata? Ka akara ana tatou e rima tumu.

1 Ko Iehova Tei Teitei Rava Atu. E ririnui maata atu a Iehova i tetai ua atu tangata. Na te mataku anga i te Atua, te iki ra tatou i te tua o te Mana Katoatoa, te riro ra “te pa enua nei mei te topata okotai no roto i te bakete” kiaia. (Isaia 40:15) No te mea e mana katoatoa te Atua, tei iaia te mana i te akakore atu i ‘te taoonga i angaiaʼi ra’ te patoi ra i te aronga e tiratiratu ra kiaia. (Isaia 54:17) E i te mea e nana e iki i te aronga ka tau no te ora mutu kore, e mea meitaki tikai no tatou kia kore e akatika i tetai apinga kia tapu ia tatou i te apiianga no runga iaia e te rave anga i tona anoano.—Apokalupo 14:6, 7.

2 Ka tauturu e ka paruru te Atua ia tatou. “E rokoia e te ii tei mataku i te tangata ra: ko tei irinaki ia Iehova ra, e ora ïa,” i karanga ai te Pipiria i roto ia Maseli 29:25. E ereere te mataku i te tangata no te mea ka akatupu te reira ia tatou kia unui ki muri i te akakite anga i to tatou akarongo i te Atua. Te akapapu maira te Atua kia tatou i tona mana akaora e: “Auraka e mataku, te vaitata katoao au ia koe: auraka e taitaia, ko au oki toou Atua: e akamaroiroi au ia koe; koia ïa, e tauturu au ia koe; koia ïa, e mou au ia koe i toku rima katau tuatua tika ra.”—Isaia 41:10.

3 Te aroa ra te Atua i te aronga e akavaitata maira kiaia. Kua tata te apotetoro ko Paulo i teia au tuatua pumaana e: “Kua kite tikai oki au e, kare te mate, kare oki te ora, kare oki te au angela, kare oki te ui ariki, kare oki te au mea mana, kare oki te au mea e vai nei, kare oki te au mea e ka tupu a muri atu, Kare oki te teitei, kare oki te akaaka, e kare katoa te au mea i angaia nei, e tika kia akataka ke ia tatou i te aroa o te Atua i roto i to tatou Atu ia Iesu Mesia ra.” (Roma 8:37-39) Me apii tatou i te irinaki e te akarongo i te Atua, ka mataora tatou i te aroa ngaueue kore o Tei Ngateitei i te Ao Katoa e Pini ua Ake. E akameitakianga ngateitei tikai teia!

4 Te akaperepere nei tatou i te au mea ravarai ta te Atua i rave ana no tatou. Ko Iehova Tei Anga ia tatou, tei oronga anake mai i te ora. Pera katoa, kare e ko te au mea anoano ua o te oraanga tana i oronga mai, mari katoa ra, ko te au mea kia  mataora e kia mareka te oraanga. E tika rai, koia te Tumu o te au mea memeitaki ravarai. (Iakobo 1:17) Kua tata a Davida, e tangata akarongo mou tei ariki rekareka i te aroa takinga meitaki o te Atua e: “E manganui, e taku Atua, e Iehova, te au angaanga taka ke i raveia e koe ra, e toou ra manako ia matou nei . . . kare ra e tika kia tatau atu i te maata.”—Salamo 40:5.

5 Penei ka taui tetai tei patoi mai ia tatou. Ka rauka ia koe i te tauturu i te aronga tei patoi mai ia koe na te kore anga e tuku ua i te au, mari ra na te mou pirianga i te akangateitei i te Atua e te inangaro iaia. E akamanako ana i te kopu tangata o Iesu. I te akamataanga, kare ratou e akarongo ana kiaia, inara kua tuatua ratou e: “Kua auouoia aia.” (Mareko 3:21; Ioane 7:5) I muri mai, i to Iesu mate anga e te akatuakaouia anga mai i muri ake, e manganui o ratou tei riro mai ei aronga irinaki. Kua tata katoa te nga teina o Iesu ko Iakobo raua ko Iuda i tetai tuanga o te au Tuatua Tapu. Te vai katoa ra te tangata takinokino maata ko Saula, tei riro mai e ko te apotetoro ko Paulo. Ko tetai pae te akatupu pekapeka ra kia tatou i teianei, penei ka kite mai e tei ia tatou te tuatua mou mei te Pipiria no to tatou tu mataku kore.—1 Timoteo 1:13.

Ei akaraanga, e pure ua ana a Aberash, e vaine i Aperika, i te kimi i te tuatua mou. I muri ake i tona akamataanga i te apii i te Pipiria ma te Au Kite o Iehova, kua aro atu aia i te patoianga pakari a tona mema ngutuare e te au arataki o te akonoanga. Ko tetai au kopu tangata ona, tei akamata i te apii katoa, kua akamutu no te mataku i te tangata. Inara kua pati akatenga aia ki te Atua no te maroiroi e te mataku kore e kua papetitoia ei Kite no Iehova. Eaa tei tupu? E varu o tona kopu tangata tei akamaroiroiia kia akamata akaou i ta ratou apii Pipiria, e te tere meitaki nei ki mua i te pae vaerua.

Ka Rauka ia Koe i te Autu i te Mataku i te Tangata

Kia kopae i te ereere no te mataku i te tangata, e rave ua atu rai koe i taau ka rauka i te akaketaketa i toou inangaro i te Atua. Ka rauka ia koe i te rave i teia na te apiianga i te Pipiria e te akamanako oonu anga i taua au irava ra i roto ia Ebera 13:6, e tuatua nei e: “Ko Iehova toku tauturu, kare au e mataku; eaa ta te tangata kia rave mai iaku?” Auraka rava e ngaropoina i te au tumu e eaa ka mataku ei i te Atua kare i te tangata, ko te mea tika ia e ko te mea meitaki ia i te rave.

Kia akamanako katoa rai e, ka rauka mai te au akameitakianga e manganui na te taangaanga anga i taau i kite mai mei te Pipiria. Ka rauka ia koe te au pauanga mareka tikai no te au uianga puapinga maata o te oraanga. Ka rauka ia koe te pakari tau i te akono anga i te au akaaoanga o te oraanga. Ka mataora koe i te manakonakoanga umere noatu te au turanga ngata tikai o teia tuatau. E ka rauka ia koe i te pure atu ki te Atua mana katoatoa i te au taime ravarai.

Kua tata te apotetoro ko Ioane e: “Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.” (1 Ioane 2:17) Ko te taime tikai teia kia tu ngaueue kore e kia aaere ma te mataku i te Atua. Kare e tuku ua atu ki te mataku i te tangata, ka rauka ia koe i te iki i te rave i ta te Atua i akaue mai e: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.” (Maseli 27:11) E akameitakianga ngateitei tikai te reira!

Kia akamaara e, kare e rauka i tetai tangata i te oronga mai kia koe i ta te Atua ka rauka i te oronga ki te aronga te mataku ra iaia: “Te tutaki o te taakaaka e te mataku ia Iehova, ko te apinga nui ïa, ko te ngateitei ïa, ko te ora ïa.”—Maseli 22:4.

[Tutu i te kapi 14]

No tona mataku kore, e varu kopu tangata o Aberash te mataora ra rai i ta ratou apii Pipiria