Swivangelo Swa Ntlhanu Swa Ku Va Hi Chava Xikwembu Ematshan’weni Ya Vanhu

JAHA rin’wana a ri tsakile ni ku hlamala. A ri nga swi langutelanga nikatsongo leswi humeleleke. Bulo leri ri veke na rona ni Timbhoni timbirhi ta Yehovha ri ri pfule mahlo. Se a ku hundze malembe ri karhatiwa hi xivutiso xa leswaku ha yini Xikwembu xi pfumelela ku xaniseka, kambe se ri kume nhlamulo leyi twisisekaka leyi humaka eBibeleni ya xivutiso lexi. A ri nga swi tivi leswaku Bibele yi ni rungula ro tala ra nkoka ni leri tsakisaka.

Endzhaku ka timinete ti nga ri tingani vaendzi va rona va fambile, wansati loyi a ri qache emutini wakwe u nghene hi xibububu ekamareni ra rona kutani a huwelela hi ku hlundzuka a ku, “I vamani vanhu lava hetaka ku huma laha?”

Jaha rero a ri n’wi hlamulanga hileswi a ra ha hlamarile.

Wansati yoloye u huwelele a ku, “Ndza va tiva leswaku i vamani naswona loko vo tlhela va vuya, ndzi ta ku hlongola, kutani u ta ya tilavela ndhawu yin’wana yo tshama eka yona!”

Hiloko a pfala nyangwa hi matimba kutani a famba.

Valandzeri Va Kreste Va Ntiyiso Va Ta Kanetiwa

Leswi humeleleke jaha leri swi tolovelekile. Rito ra Xikwembu ku nga Bibele ri ri: “Hinkwavo lava navelaka ku hanya hi ku tinyiketela loku nga ni vukwembu hi ku fambisana na Kreste Yesu na vona va ta xanisiwa.” (2 Timotiya 3:12) Hi ntolovelo, Vakreste va ntiyiso a va rhandziwi naswona a va si tshama va rhandziwa. Ha yini? Muapostola Yohane u byele Vakreste-kulobye  a ku: “Ha swi tiva leswaku hi huma eka Xikwembu, kambe misava hinkwayo yi le hansi ka matimba ya lowo homboloka.” Nakambe Sathana Diyavulosi u fanisiwa ni “nghala leyi vombaka, yi lava wa ku n’wi dya.” (1 Yohane 5:19; 1 Petro 5:8) Kutani ku chava vanhu i yin’wana ya mintlhamu leyi Sathana a yi tirhisaka swinene.

Hambi ku ri Yesu Kreste loyi a endleke swilo swo tala leswinene naswona a a nga ri na xidyoho, u hlekuriwile a tlhela a xanisiwa. U te: “Va ndzi vengile ku nga ri na xivangelo.” (Yohane 15:25) Hi vusiku bya le mahlweni ka rifu rakwe, u lemukise vadyondzisiwa vakwe a ku: “Loko misava yi mi venga, ma swi tiva leswaku yi ndzi vengile yi nga si mi venga. Tsundzukani rito leri ndzi mi byeleke rona, Hlonga a ri n’wi tluli n’wini wa rona hi vukulu. Loko va ndzi xanisile, na n’wina va ta mi xanisa.”—Yohane 15:18, 20.

Hikwalaho ka xilemukiso lexi, vanhu vo tala va tshike ku yimela vugandzeri bya ntiyiso. Loko Bibele yi vulavula hi vanhu van’wana lava tshameke va lava Yesu, yi ri: “A ku nga ri na munhu loyi a a vulavula ha yena erivaleni hikwalaho ka ku chava Vayuda.” (Yohane 7:13; 12:42) Vafundhisi va le nkarhini wolowo va chavise vanhu hi ku vula leswaku va ta hlongola vanhu hinkwavo lava kombisaka ripfumelo eka Kreste. Xisweswo, ku chava vanhu swi sivele vo tala leswaku va nga vi Vakreste.—Mintirho 5:13.

Endzhaku ka loko vandlha ra Vukreste ri simekiwile, hi hlaya hi ta “nxaniso lowukulu” lowu weleke vandlha ra le Yerusalema. (Mintirho 8:1) Entiyisweni, Vakreste va tiyiselele nxaniso ematikweni hinkwawo lawa a ma ri ehansi ka Mfumo wa Rhoma. Vanhu van’wana lava a va tiveka swinene eRhoma va byele muapostola Pawulo va ku: “Malunghana ni mpambukwa lowu ha swi tiva leswaku kun’wana ni kun’wana wa kanetiwa.” (Mintirho 28:22) Hakunene Vakreste va ntiyiso a va kanetiwa ematikweni yo tala.

Ninamuntlha, Sathana wa ha sivela vanhu ku va valandzeri va Kreste va ntiyiso hi ku tirhisa ntlhamu wolowo wa ku chava vanhu. Vanhu va timbilu letinene lava dyondzaka Bibele ni Timbhoni ta Yehovha va kanetiwa kumbe ku hlekuriwa exikolweni, entirhweni, emigangeni leyi va tshamaka eka yona ni hi vanghana va vona. Van’wana va nga ha chava ku chichiwa xindzhuti, ku tshikiwa hi vanghana kumbe va nga pfuniwi hi timali. Etindhawini tin’wana ta le makaya, varimi va chava leswaku vaakelani va nga ala ku va pfuna ku tshovela kumbe ku sirhelela swifuwo swa vona. Hambiswiritano, vanhu va timiliyoni va tiyimisele ku tshemba Xikwembu ni ku hanya hi milawu ya Rito ra xona, va tekelela Yesu Kreste. Yehovha u va katekisile hikwalaho ka sweswo.

Leswi Endlaka Hi Chava Xikwembu Ematshan’weni Ya Vanhu

Bibele yi hi khutaza leswaku hi chava Xikwembu ematshan’weni ya vanhu. Yi ri: “Ku chava Yehovha i masungulo ya vutlhari.” (Pisalema 111:10) Ku chava loku ku hi susumetela leswaku hi nga endli swilo leswi nga hlundzukisaka Munyiki wa hina wa Vutomi. Ku fambisana ni rirhandzu. Kutani, ha yini hi fanele hi chava Xikwembu ematshan’weni ya vanhu? A hi kambisiseni swivangelo swa ntlhanu.

1 Yehovha U Tlakukile Swinene. Yehovha u tlakuke swinene ku tlula vanhu hinkwavo. Loko hi n’wi chava, hi kombisa leswaku hi yima na yena tanihi leswi a nga Xikwembu xa Matimba Hinkwawo, lexi eka xona “matiko ma [fanaka] ni thonsi leri humaka ekhuwaneni.” (Esaya 40:15) Hikwalaho ka sweswo, xi ni matimba yo hlula “tlhari rihi ni rihi leri nga ta endleriwa ku . . . hlasela” vanhu lava tshembekaka eka xona. (Esaya 54:17) Naswona leswi xi nga ta hlawula leswaku i mani loyi a faneriwaka hi ku kuma vutomi lebyi nga heriki, hi ta va hi endla hi vutlhari loko hi nga pfumeleli nchumu wu hi sivela ku dyondza hi xona ni ku endla ku rhandza ka xona.—Nhlavutelo 14:6, 7.

2 Xikwembu xi ta hi pfuna xi tlhela xi hi sirhelela. Swivuriso 29:25 yi ri: “Ku chava vanhu swi veka ntlhamu, kambe loyi a tshembaka Yehovha u ta sirheleriwa.” Ku chava vanhu i ntlhamu hikuva swi nga hi sivela ku vulavula ni vanhu hi ripfumelo ra hina hi ntshunxekile. Xikwembu xa hi tiyisekisa leswaku xi ni matimba yo hi ponisa. Xi ri: “U nga chavi, hikuva ndzi na wena. U nga languti ematlhelweni, hikuva mina ndzi Xikwembu xa wena. Ndzi ta ku nyika matimba. Kunene ndzi ta ku pfuna. Kunene ndzi ta ku khoma swi tiya hi voko ra mina ra xinene ra ku lulama.”—Esaya 41:10.

3 Xikwembu xi rhandza vanhu lava tshinelaka eka xona. Muapostola Pawulo u vule marito lawa lama khutazaka swinene a ku: “Ndza kholwa leswaku rifu ni vutomi ni tintsumi ni tihulumendhe ni swilo leswi nga laha sweswi ni swilo leswi taka ni vaungameri ni vutlakuki ni vuenti ni xivumbiwa xihi ni xihi xin’wana a swi nge  swi koti ku hi hambanisa ni rirhandzu ra Xikwembu leri nga eka Kreste Yesu Hosi ya hina.” (Varhoma 8:37-39) Loko hi tshemba Xikwembu hi tlhela hi xi yingisa, hi ta swi xiya leswi swi vulaka swona ku rhandziwa hi Hosi ya Vuako Hinkwabyo. Hakunene leri i lunghelo!

4 Ha swi tlangela hinkwaswo leswi Xikwembu xi hi endleleke swona. Yehovha i Muvumbi wa hina, hi yena loyi a hi nyikaka vutomi. Ku engetela kwalaho, a nga hi nyikanga swilaveko swa vutomi ntsena kambe u tlhela a hi nyika swilo leswi endlaka leswaku vutomi byi tsakisa. Hakunene hi yena Xihlovo xa nyiko yin’wana ni yin’wana leyinene. (Yakobo 1:17) Davhida, wanuna wo tshembeka loyi a a wu tlangela swinene musa wa Yehovha u tsale a ku: “U endle swilo swo tala, Oho Yehovha Xikwembu xanga, ni mintirho ya wena yo hlamarisa ni miehleketo ya wena eka hina . . . Yi tele swinene lerova a ndzi nge yi runguli.”—Pisalema 40:5.

5 Vanhu van’wana lava hi kanetaka va nga ha hundzuka. U nga pfuna vanhu lava ku kanetaka hi ku nga endli leswi va swi lavaka, kambe u tiyimisela ku xixima Xikwembu ni ku xi rhandza. Xiya maxaka ya Yesu. Eku sunguleni a ma nga pfumeli eka yena kambe ma te: “Wa hlanya.” (Marka 3:21; Yohane 7:5) Kambe endzhaku ka loko Yesu a file a tlhela a pfuxiwa, yo tala ya wona ma ve vapfumeri. Yakobo na Yudha, vamakwavo vakwe hi tatana, va kale va tsala tibuku tin’wana ta Bibele. Nakambe Sawulo loyi a a hisekela vukhongeri bya Xiyuda tlhelo muxanisi wa Vakreste, u ve muapostola Pawulo. Van’wana lava sweswi va hi xanisaka va nga ha swi xiya leswaku hi vulavula ntiyiso lowu humaka eBibeleni loko hi tiyimisela ku tshama hi tshembekile.—1 Timotiya 1:13.

Hi xikombiso, wansati un’wana wa le Afrika loyi a vuriwaka Aberash a a tshamela ku khongelela leswaku a kuma ntiyiso malunghana ni Xikwembu. Endzhaku ka loko a sungule ku dyondza Bibele ni Timbhoni ta Yehovha, swirho swa ndyangu wa ka vona ni vafundhisi va sungule ku n’wi kaneta swinene. Maxaka man’wana yakwe lawa na wona a ma sungule ku dyondza, ma swi tshikile hikwalaho ko chava vanhu. Kambe Aberash u kombele Xikwembu leswaku xi n’wi nyika matimba ni xivindzi naswona u khuvuriwile a va Mbhoni ya Yehovha. Vuyelo bya kona byi ve byihi? Maxaka yakwe ya nhungu ma khutaziwe hi xikombiso xakwe kutani ma tlhela ma sungula ku dyondza Bibele ni Timbhoni naswona sweswi ma endla nhluvuko eka dyondzo ya wona.

U Nga Ku Hlula Ku Chava Vanhu

Leswaku u nga hluriwi hi ku chava vanhu, endla hinkwaswo leswi u nga swi kotaka leswaku u tiyisa ndlela leyi u xi rhandzaka ha yona Xikwembu. Leswi u nga swi endla hi ku dyondza Bibele ni ku anakanyisisa hi tindzimana to tanihi Vaheveru 13:6 leyi nge: “Yehovha i mupfuni wa mina; ndzi nga ka ndzi nga chavi. Xana munhu a nga ndzi endla yini?” U nga swi rivali leswaku ha yini swi ri swa nkoka naswona ku ri vutlhari ku chava Xikwembu ematshan’weni ya vanhu.

Nakambe tshamela ku anakanyisisa hi mikateko yo tala leyi u yi kumaka hi ku hanya hi leswi u swi dyondzaka eBibeleni. U nga kuma tinhlamulo leti enerisaka ta swivutiso swa nkoka evuton’wini. U nga va ni vutlhari byo langutana ni swiyimo leswi nonon’hwaka swa misava leyi. U nga va ni ntshembo lowu tsakisaka ku nga khathariseki swiyimo leswi tikaka leswi hi langutanaka na swona. Naswona u nga kota ku khongela eka Xikwembu xa matimba hinkwawo nkarhi wun’wana ni wun’wana.

Muapostola Yohane u tsale a ku: “Misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.” (1 Yohane 2:17) Sweswi i nkarhi wa leswaku hi yima hi tiya naswona hi hanya hi milawu ya Xikwembu. Ematshan’weni yo chava vanhu, u nga hlawula ku endla leswi Xikwembu xi ku khutazaka swona: “N’wananga, tlhariha u tsakisa mbilu yanga, leswaku ndzi ta angula loyi a ndzi tlhontlhaka.” (Swivuriso 27:11) Hakunene ku yingisa xikhutazo xolexo i lunghelo lerikulu!

Tsundzuka, ku hava munhu loyi a nga ku nyikaka leswi Xikwembu xi nga ta swi nyika vanhu lava xi chavaka. Bibele yi ri: “Ku titsongahata ni ku chava Yehovha swi tisa rifuwo, ku vangama ni vutomi.”—Swivuriso 22:4.

[Xifaniso lexi nga eka tluka 14]

Hikwalaho ka leswi Aberash a veke ni xivindzi, maxaka yakwe ya nhungu ma hambete ma dyondza Bibele