¿Mi ta van xikʼ batel ta vinajel ololetik sventa tspas ta yaj-anjeltak li Diose?
Li jkʼel vunetike tskʼan snaʼik
¿Mi ta van xikʼ batel ta vinajel ololetik sventa tspas ta yaj-anjeltak li Diose?
Kʼalal chcham yol xnichʼon jun totil-meʼile, bateltike xi chpatbat yoʼonton yuʼun li yamigotakike: «Li Diose laj yikʼ batel ta vinajel yuʼun chtun yuʼun yan uni anjel», xi chalik. Pe ¿mi oy van srasonal xa naʼ taje?
Ti oyuk jun Dios ti toj tsots yoʼontone xchiʼuk ti toj chopole, jech unbi, tsmil jun olol kʼalal chtun yuʼun yan anjele. Pe li Vivliae muʼyuk bu chal mi jech stalelal li Jeova Diose (Job 34:10). Moʼoj, yuʼun chal ti smukʼta talelale jaʼ li kʼanelale (1 Juan 4:8). Ta melel mi junuk krixchano manchuk mi jutuk tajek slekil yoʼonton xchiʼuk xkʼuxul yoʼonton mu spojbe yalab xnichʼnab yan krixchano sventa x-epaj yutsʼ yalal, mas to oy srasonal ti mu jechuk tspas li Jeovae. Ta sventa ti ep tajek skʼanoj li krixchanoetike mu spas jech taje.
Pe nopo avaʼi jlikeluk, ¿mi melel van ti chtun yuʼun yan anjeletik li Diose? Li Vivliae chal ti kʼusitik tspas li Diose toj lekik xchiʼuk toj tukʼik (Deuteronomio 32:4). Jech oxal chaʼa, kʼalal la spas li epal miyon anjeletike lek tsʼakal la spas (Daniel 7:10). Pe ¿mi yuʼun van muʼyuk la snop jayib chtun yuʼun li Diose? Ta melel moʼoj. Tana un, ¿mi mu jechuk chal Vivlia ti oy stʼujoj krixchanoetik ti chkʼatajik ta kuxlejal ti mu xvinaj ta kʼelel kʼalal mi chamike xchiʼuk ti ch-ochik li ta Ajvalilal yuʼune? Jech, pe chal xtok ti krixchanoetik taje, maʼuk uni bikʼtal ololetik kʼalal chchamike (Apocalipsis 5:9, 10).
Yan srasonal ti mu jechuk tspas li Diose jaʼ ti mu xkʼot-o xchiʼuk li kʼusi oy ta yoʼonton ta sventa li ololetike. Li ta nichimaltik Edene li Diose xi laj yalbe li Adán xchiʼuk Evae: «Bolanic; epajanic. Nojesic li banamile; ventainic o» (Génesis 1:28). Li ololetike toj tsots skʼoplalik sventa xkʼot ta pasel ti tskʼan yoʼonton Dios ti akʼo xnoj ta jchʼun mantal krixchanoetik li Balumile. Mi jutuk muʼyuk bu tsnop tsmil ololetik sventa tspasanan ta yaj-anjeltak. Li Vivliae chal ti «col jnichʼontic chijyacʼbutic Mucul Diose jaʼ jcʼulejaltic», jaʼ xkaltik, ti jaʼ jun matanal yuʼun Diose (Salmo 127:3). Li Dios ti toj ep chkʼanvane, ¿mi tspojbe van smoton ti toj ep sbalil li totil-meʼiletike? Moʼoj ta melel.
Ta melel onoʼox, kʼalal chcham junuk uni olole toj ep chakʼ at-oʼonton xchiʼuk toj kʼux chaʼiik li totil-meʼiletike. Jech un chaʼa, ¿mi oy van kʼusi tspat-o yoʼontonik ti xuʼ chchaʼilik yan veltae? Li Vivliae chal ti Diose chchaʼkuxes epal miyon krixchanoetik ta jun paraiso liʼ ta Balumile. Nopo noʼox avaʼi kʼu to yelan yutsil ti chchaʼkuxiik talel li uni bikʼtal ololetike, ti mi jutuk xa bu ipike, xchiʼuk ti tsta sbaik xchiʼuk li yutsʼ yalalike (Juan 5:28, 29). Jech kʼuchaʼal laj xa kiltike, jun ti kʼusi oy ta yoʼonton Dios ta sventa li ololetike jaʼ ti akʼo xchʼiike, ti akʼo skʼupinik li kuxlejale xchiʼuk ti xojtikinik li Jeovae. Jech un chaʼa, li ololetik ti chamemike muʼyuk te oyik ta vinajel kʼuchaʼal anjeletik, moʼoj, li ta tsʼakale chichʼik chaʼkuxesel ta jun paraiso Balumil. Kʼalal mi kʼot li kʼakʼal taje xchiʼuk ti jaʼ xa noʼox chi xchabiutik li Jpasvanej kuʼuntike, ta bikʼit ta mukʼ ta jkʼupintik yichʼel ta mukʼ ta sbatel osil li Jeova Diose.