Bikeni Imitima Yenu Pa Cilambu

“Ndekonkelela ubuyo bwa cilambu.”—Fil. 3:14.

1. Cilambu nshi umutumwa Paulo bamulaile?

UMUTUMWA Paulo, uwaishibikwa no kuti Sauli wa ku Tarsi, afyalilwe mu lupwa ulusambashi. Bamusambilishe ifya mu mipepele ya fikolwe fyakwe kuli Gamaliele, kasambilisha wa Mafunde uwalumbwike sana. (Imil. 22:3) Ku ntanshi, Paulo nga aishileba umusambashi; lelo alishiile ifi fyonse no kusanguka Umwina Kristu. Lyena abikile umutima pa cilambu ico bamulaile, e kutila ukuba imfumu iishingafwa kabili shimapepo mu Bufumu bwa kwa Lesa ubwa ku muulu. Ubo Bufumu bukateka isonde ilikaba paradaise.—Mat. 6:10; Ukus. 7:4; 20:6.

2, 3. Bushe Paulo akatamike shani icilambu ca bumi bwa ku muulu?

² Pa kulanga ifyo akatamike nga nshi ico cilambu, Paulo atile: “Ifintu ifyali ubunonshi kuli ine, mfimona ukuti fya fye pa mulandu wa kwa Kristu. Awe, pali ico cena, nalisumina ukulufya fyonse pa mulandu wa cuma capulamo ica kwishiba Kristu Yesu Shikulu. Ni pa mulandu wakwe nashiliile fyonse kabili mfimona ukuti fisooso fye.” (Fil. 3:7, 8) Ifintu ifyo abengi bamona ukuti e fyacindama, pamo nga ukulumbuka, ifyuma, incito, ubusambashi, e fyo Paulo amwene ukuti fisooso pa numa ya kusambilila icine pa bufwayo Yehova akwatila abantu.

³ Ukufuma pali yo nshita, icacindeme sana kuli Paulo kwishiba Yehova na Kristu, uko Yesu alandilepo mwi pepo kuli Lesa ati: “Nomba pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.” (Yoh. 17:3) Icilangilila ukuti Paulo alefwaisha nga nshi ukukwata umweo wa muyayaya ni aya mashiwi alandile pa Abena Filipi 3:14 aya kuti: “Ndekonkelela ubuyo bwa cilambu ca bwite bwa ku muulu ubwafuma kuli Lesa ukupitila muli Kristu Yesu.” Abikile umutima wakwe pa cilambu ca mweo wa muyayaya mu muulu mu Bufumu bwa kwa Lesa.

Ukwikala Umuyayaya pe Sonde

4, 5. Cilambu nshi abantu abengi abacita ukufwaya kwa kwa Lesa pali ino nshita bakapokelela?

⁴ Abengi abasalapo ukucita ukufwaya kwa kwa Lesa, icilambu calinga ukupibilapo ilibe ca mweo wa muyayaya mu calo cipya ica kwa Lesa. (Amalu. 37:11, 29) Yesu alilandilepo ukuti ili subilo lya cine cine. Atile: “Balipaalwa abafuuka, pantu bakapyana isonde.” (Mat. 5:5) Yesu e mpyani nkalamba iye sonde, nga filya ilembo lya Amalumbo 2:8 lisosa kabili akaba na bakateka banankwe ababa 144,000 ku muulu. (Dan. 7:13, 14, 22, 27) Balya abapala impaanga abakekala pe sonde bakapyana isonde ilikalatekwa no Bufumu ‘ubo babateyanishishe ukufuma pa kutendeka kwa calo.’ (Mat. 25:34, 46) Kabili twalishininkisha ukuti ici cikacitika pantu Lesa “uushingabepa” e watulaya. (Tito 1:2) Kuti twacetekela ukuti ifyo Lesa alaya fikacitika nga filya fine na Yoshua acetekele ilyo aebele abena Israele ati: “Tapali amashiwi nangu yamo pa mashiwi yonse ayasuma ayo Yehova amwebele ayashacitika. Fyonse fyalicitika. Tapali nangu cimo icishacitika.”—Yosh. 23:14.

⁵ Imikalile mu calo cipya ica kwa Lesa tayakabe kwati ni yi iya lelo iyabula insansa shine shine. Ifintu fikapusana sana: takwakabe inkondo, ulukaakala, insala, ulufyengo, ukulwala, ne mfwa. Abantu bakaba no bumi ubutuntulu sana kabili isonde bakekalamo likaba paradaise. Iyo ikaba mikalile ya nsansa shine shine isho teti twelenganye no kwelenganya. Cila bushiku kukaba fye ukusekelela. We cilambu nobe ulawama!

6, 7. (a) Finshi Yesu acitile ifilanga ifyo ali no kwisacita mu calo cipya ica kwa Lesa? (b) Cikaba shani pa kuti abafwa bakabe no mweo na kabili?

 ⁶ Ilyo Yesu ali pe sonde, Lesa alimupeele umupashi wa mushilo pa kuti acite ifisuma ifyo ali no kwisacita mu calo cipya. Ku ca kumwenako, Yesu aebele umuntu uwalwele ubulebe pa myaka 38 ukuti eme no kwenda. Baibolo ilondolola ukuti uyo muntu alimine no kwenda. (Belengeni Yohane 5:5-9.) Pa nshita imbi, Yesu amwene “umuntu uwafyelwe impofu” kabili alimundepe. Ilyo atampile ukumona, ulya mwaume wali impofu balimwipwishe pa wamundepe, na o ayaswike ati: “Ukufuma ku kale tacabalile acumfwika ukuti umuntu ashibwile amenso ya wafyelwe impofu. Uyu muntu nga ca kuti tafumine kuli Lesa, te kuti acite nangu cimo.” (Yoh. 9:1, 6, 7, 32, 33) Icalelenga Yesu ukucita fyonse ifi ni co Lesa alimupeele amaka. Konse uko Yesu aleya, “[aleposha] abalekabila ukuundapwa.”—Luka 9:11.

⁷ Yesu taleundapa fye abalwele na balemana lelo alebuusha na bafwa. Ku ca kumwenako, kwali umukashana uwa myaka 12 uwafwile, ne ci caleteele abafyashi bakwe ubulanda icine cine. Lelo Yesu asosele fye ati: “We mukashana, ndekweba nati, Ima!” Na o alimine! Taleni tontonkanyeni pa fyo abafyashi na bambi abalipo baumfwile. (Belengeni Marko 5:38-42.) Mu calo cipya ica kwa Lesa kukaba “ukusekelela nga nshi” ilyo imintapendwa ya bantu bakabuuka, pantu kukaba “ukubuuka kwa balungama na bashalungama.” (Imil. 24:15; Yoh. 5:28, 29) Aba bakapeelwa ubumi na kabili, e lyo bakaba ne subilo lya kuba no mweo ukufuma pali ilya nshita no kuya umuyayaya.

8, 9. (a) Cinshi cikacitika ku lubembu lwafuma kuli Adamu mu kuteka kwa kwa Kristu ukwa myaka 1,000? (b) Ni pali finshi abakabuushiwa bakabapingwila?

⁸ Abakabuuka bakaba ne shuko lya kuba no mweo. Abakabuuka tabakabapingwile pa membu bacitile ilyo bashilafwa iyo. (Rom. 6:7) Mu kuteka kwa kwa Kristu ukwa myaka 1,000 abantu bakanonkelamo mwi lambo lya cilubula pantu abantu ba cumfwila abakalatekwa mu Bufumu bakasuka bakabe abapwililika, na kwi pele pele tabakakwate ulubembu ulo bapyene kuli Adamu. (Rom. 8:21) Yehova “akamina imfwa umuyayaya, kabili Shikulu Mulopwe Yehova akafuuta ifilamba ku menso yonse.” (Esa. 25:8) Icebo ca kwa Lesa cisosa no kuti ‘amabuuku yapombwa yakafungululwa.’ Ico cilangilila ukuti abakabako ilya nshita bakapokelela ifyebo fimbi ifyo bakalakonka. (Ukus. 20:12) Ilyo isonde likaba paradaise, “abekashi ba pa calo bakasambilila ubulungami.”—Esa. 26:9.

⁹ Abakabuushiwa, tabakabapingwile pa lubembu bapyene kuli Adamu, lelo bakabapingwila pa fyo abene bakasalapo ukulacita. Ilembo lya Ukusokolola 20:12 litila: “Abafwa babapingwilile ku fyalembelwe mwi buuku ukulingana ne fyo balecita,” e kutila, ukulingana ne fyo balecita pa numa ya kubuushiwa. Mwandini Yehova wa mulinganya, wa luse, kabili wa kutemwa! E lyo ifintu fya kukalifya ifyo balepitamo muli cino calo “fikalabwa, kabili tafyakese na mu mutima.” (Esa. 65:17) Apo kukaba ifyebo ifisuma ifya kubakoselesha e lyo ne mikalile iisuma, tabakalekalifiwa na kabili ku fyabipa ifyapita. Ifyo fyonse ifyabipa bakafilabako. (Ukus. 21:4) E fyo cikaba na ku ba mwi “bumba ilikalamba,” abakapusuka Armagedone.—Ukus. 7:9, 10, 14.

10. (a) Bushe ubumi mu calo cipya ica kwa Lesa bukaba shani? (b) Cinshi mufwile ukucita pa kuti mutwalilile ukubika umutima pa cilambu?

¹⁰ Mu calo cipya ica kwa Lesa, abantu bakalaikala fye ukwabula ukulwala nangu ukufwa. “Takuli umwikashi uukatila: ‘Nindwala.’” (Esa. 33:24) Mu kuya kwa nshita, abekashi ba mu calo bakalati bashibuka cila lucelo, bali no bumi bwapwililika, ukwabula amasakamika. Kabili bakalafwaisha ukubomba imilimo ya kubaletela insansa no kuba pamo na bantu ababatemwa icine cine. Ubumi bwa musango yo cilambu icawama nga nshi! Kupukuleni Baibolo yenu pa kusesema kwaba pali Esaya 33:24 na 35:5-7. Elenganyeni ukuti na imwe e ko muli. Ico cili no kumwafwa ukubika umutima pa cilambu.

 Bamo Abalekele Ukubika Umutima pa Cilambu

11. Londololeni ifyo ukuteka kwa kwa Solomone kwatendeke bwino.

¹¹ Ilyo twaishiba ukuti kwaliba ici cilambu, tufwile ukubombesha epali twaleka ukubikapo umutima. Ku ca kumwenako, ilyo Solomone atendeke ukuteka Israele, ali-icefeshe no kupepa kuli Lesa ukuti amupeele umucetekanya no kwiluka pa kuti alepingula bwino abantu ba kwa Lesa. (Belengeni 1 Ishamfumu 3:6-12.) Baibolo itila pali fi alombele, “Lesa atwalilile ukupeela sana Solomone amano no mucetekanya.” Na kuba, “amano ya kwa Solomone yacilile amano ya bena Kabanga bonse na mano ya bena Egupti bonse.”—1 Isha. 4:29-32.

12. Ni pali finshi Yehova asokele abali no kuba ishamfumu mu Israele?

¹² Lelo, Yehova alisokele limo ukuti onse uwaba imfumu ‘ekaifushisha bakabalwe’ kabili ‘ekaifushisha abakashi, ukuti umutima wakwe wikafuma kuli Lesa.’ (Amala. 17:14-17) Ukufusha bakabalwe kwali no kulangilila ukuti imfumu yacetekele amaka ya bashilika ba iko ukucila ukucetekela ukuti Yehova e wa kubacingilila. Ukufusha abakashi na ko kwali no kuleta ubwafya pantu abakashi bamo bali no kufuma mu nko sha basenshi ishali mupepi umwali ukupepa kwa bufi, kabili abo bakashi kuti ba-alula umutima wa mfumu ukufuma ku kupepa kwa cine, e kutila ukufuma ku kupepa Yehova.

13. Cinshi calengele Solomone aleke ukubika umutima pa fyo bamupeele?

¹³ Solomone taumfwilile uko kusoka. Lelo, acitile filya fine Yehova atile ishamfumu tashifwile ukucita. Aishilekwata bakabalwe na ba pali bakabalwe amakana na makana. (1 Isha. 4:26) Kabili aishilekwata abakashi 700 na bakanakashi 300, kabili abengi abafumishe mu nko sha basenshi ishali mupepi. Aba banakashi “[ba-alwile] umutima wakwe ukulakonka balesa bambi; no mutima wakwe tawalolele onse  kuli Yehova.” Solomone atampile ukuipoosa mu kupepa kwa kuselausha ukwa nko sha basenshi uko abakashi bakwe bamulangile. Ici calengele Yehova ukusosa ukuti ali no ‘kupoka Solomone ubufumu.’—1 Isha. 11:1-6, 11.

14. Cinshi caishilecitika pa mulandu wa kuti Solomone no luko lwa bena Israele balifililwe ukulaumfwila Lesa?

¹⁴ Solomone alilekele ukubika umutima pe shuko lishaiwamina ilyo akwete ilya kwimininako Lesa wa cine. Aishileipoosa fye umupwilapo mu kupepa kwa bufi. Mu kuya kwa nshita, uluko lonse lwaishilesangukila Lesa, ne ci calengele icalo conaulwe mu 607 B.C.E. Nangu ca kuti abaYuda balibweseshe ukupepa kwa cine mu kuya kwa nshita, pa numa ya myaka iingi, Yesu asosele ati: “Bakamupoka ubufumu bwa kwa Lesa no kubupeela ku luko ulutwala ifisabo fya buko.” Kabili ici cine e cacitike. Yesu atile: “Moneni! Ing’anda yenu yalekeleshiwa kabili yamushalila icibolya.” (Mat. 21:43; 23:37, 38) Pa mulandu wa kuti ulu luko talwali ne cishinka, balilupokele ishuko lishaiwamina ilya kwimininako Lesa wa cine. Mu 70 C.E., abashilika abena Roma balyonawile Yerusalemu ne tempele, kabili abengi pa baYuda abasheleko baishileba abasha.

15. Landenipo abantu bamo abalekele ukubika imitima pa fyacindama.

¹⁵ Yuda Iskariote ali pa batumwa ba kwa Yesu 12. Alyumfwile amasambilisho ya kwa Yesu ayawamisha kabili alimwene ne fipesha amano ifyo Yesu alecitila mu mupashi wa mushilo uwa kwa Lesa. Na lyo line, Yuda tasungile umutima wakwe. Bamupeele umulimo wa kusunga akabokoshi ka ndalama umo Yesu na batumwa 12 balepoosa indalama. Lelo “ali mupuupu, kabili e wakwete akabokoshi ka ndalama, kabili alebuulamo indalama ishalepooswamo.” (Yoh. 12:6) Pa mulandu wa kufwaisha ifingi, asukile apangana na bashimapepo bakalamba aba bumbimunda ukuti ashitishe Yesu pa ndalama sha silfere 30. (Mat. 26:14-16) Umbi na o uwalekele ukubika umutima pe shuko lishaiwamina akwete ni Dema, uwalebomba no mutumwa Paulo. Dema alifililwe ukusunga umutima wakwe. Paulo atile: “Dema alinsha pa mulandu wa kutemwa ifya muli cino calo.”—2 Tim. 4:10; belengeni Amapinda 4:23.

Ifyo Bonse Twingasambililako

16, 17. (a) Bushe ukukaanya tulolenkana na ko kwakosa shani? (b) Cinshi cingatwafwa ukuba abashangila te mulandu ne fyo Satana engaleta pali ifwe?

¹⁶ Ababomfi ba kwa Lesa bonse bafwile ukutontonkanyapo sana pali aba bantu balandwapo mu Baibolo, pantu batweba ati: “Ifi fintu fyaleponena balya pa kuti tusambilileko, kabili fyalembeelwe ku kutusoka fwe baleikala mu nshiku sha kulekelesha.” (1 Kor. 10:11) Ilelo, tuleikala mu nshiku sha kulekelesha isha cino calo.—2 Tim. 3:1, 13.

¹⁷ Satana Kaseebanya “lesa wa bwikashi buno,” alishiba ukuti “ali fye ne nshita inono.” (2 Kor. 4:4; Ukus. 12:12) Kuti acita icili conse pa kuti fye asembeleke ababomfi ba kwa Yehova ukuti baleke ukulakonka amafunde ayo Abena Kristu balingile ukulakonka. Satana e utungulula cino calo, pamo na fyonse ifibomfiwa ku kusabakanishishamo amalyashi. Lelo, abantu ba kwa Yehova balikwata icibaafwa sana, e kutila “amaka yacila aya bantunse.” (2 Kor. 4:7) Kuti twashintilila pali aya maka yafuma kuli Lesa ukuti yatwafwe ukuba abakosa te mulandu ne fyo Satana engaleta pali ifwe. E mulandu wine batukoselesesha ukulapepa lyonse, no kucetekela ukuti Yehova “[akapeela] umupashi wa mushilo ku bamulomba!”—Luka 11:13.

18. Bushe tufwile ukulamona shani cino calo?

¹⁸ Na cimbi icitukosha kwishiba ukuti nomba line fye icalo ca kwa Satana conse cili no  konaulwa, lelo Abena Kristu ba cine bakapusuka. “Ici cine calo cileya pamo no lunkumbwa lwa ciko, lelo uucita ukufwaya kwa kwa Lesa akekalilila umuyayaya.” (1 Yoh. 2:17) Pali uyu mulandu, teti cibemo amano ku mubomfi wa kwa Lesa ukutontonkanya ukuti muli cino calo kuti mwaba fimo ifingamunonsha umuyayaya ukucila pa kuba na bucibusa na Yehova! Ici calo citungululwa na Satana caba kwati cibwato icikalamba icilebunda. Yehova alitupeela ifilonganino fya Bwina Kristu ifyaba ngo tumaato umo ababomfi bakwe aba busumino bengatolokela no kupusuka. Ilyo balelungama ku calo cipya, kuti bacetekela ubulayo bwakwe ubwa kuti: “Incitatubi shikaloba, lelo abalolela Yehova e bakekala mu calo.” (Amalu. 37:9) Kanshi, twalilileni ukubika imitima yenu pali ci cilambu cawamisha!

Bushe Muleibukisha?

• Bushe Paulo alemona shani icilambu bamulaile?

• Ni pali finshi abakekala pe sonde bakabapingwila?

• Cinshi ica mano ico mufwile ukucita nomba?

[Amepusho]

[Icikope pe bula 12, 13]

Bushe nga mulebelenga Baibolo mulelenganyapo ukuti na imwe e ko muli ilyo kukaba ukupokelela icilambu?