Tutoki ang Ganti
Tutoki ang Ganti
“Ako nagapangagpas sa tumong alang sa ganti.”—FILIP. 3:14.
1. Unsang ganti ang gitanyag ngadto kang apostol Pablo?
SI APOSTOL Pablo, nga nailhan usab ingong Saulo sa Tarso, naggikan sa usa ka inila nga pamilya. Siya nakakat-on bahin sa relihiyon sa iyang katigulangan gikan sa bantogang magtutudlo sa Balaod nga si Gamaliel. (Buh. 22:3) Si Pablo nakabaton sa giisip sa kadaghanan nga usa ka maayong karera; apan siya mibiya sa iyang relihiyon ug nahimong Kristohanon. Dayon siya nagpaabot sa ganti nga kinabuhing dayon nga gitanyag kaniya—ang pagkahimong imortal nga hari ug saserdote sa langitnong Gingharian sa Diyos. Ang maong Gingharian magmando ibabaw sa usa ka paraisong yuta.—Mat. 6:10; Pin. 7:4; 20:6.
2, 3. Unsa ka dako ang pagpabili ni Pablo sa ganti nga langitnong kinabuhi?
2 Sa pagpakita kon unsa ka dako ang pagpabili ni Pablo sa maong ganti, siya miingon: “Ang mga butang nga kaniadto maoy ganansiya alang kanako, kini giisip ko nga kapildihan tungod kang Kristo. Ngani, bahin niana, sa pagkatinuod giisip ko usab ang tanang butang nga kapildihan tungod sa pagkalabaw ug bili sa kahibalo ni Kristo Jesus nga akong Ginoo. Tungod kaniya nadawat ko ang kapildihan sa tanang butang ug giisip kini nga mga basura.” (Filip. 3:7, 8) Ang mga butang nga giisip sa kadaghanan nga hinungdanon—posisyon, bahandi, karera, kadungganan—giisip ni Pablo nga basura human niya makat-oni ang kamatuoran bahin sa katuyoan ni Jehova alang sa katawhan.
3 Sukad niadto, ang labing hinungdanon para kang Pablo mao ang bililhong kahibalo bahin kang Jehova ug kang Kristo, nga mahitungod niana si Jesus miampo sa Diyos: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Ang tim-os nga tinguha ni Pablo nga makabatog kinabuhing dayon madayag diha sa iyang gisulti sa Filipos 3:14: “Ako nagapangagpas sa tumong alang sa ganti nga pagkatinawag sa Diyos ngadto sa itaas pinaagi ni Kristo Jesus.” Oo, iyang gitutokan ang ganti nga kinabuhing dayon didto sa langit ingong bahin sa Gingharian sa Diyos.
Pagkinabuhi sa Yuta sa Walay Kataposan
4, 5. Unsang ganti ang gitanyag ngadto sa milyonmilyon nga nagbuhat sa kabubut-on sa Diyos karon?
4 Alang sa kadaghanan niadtong mopili sa pagbuhat sa kabubut-on sa Diyos, ang ganti nga takos kab-oton mao ang kinabuhing dayon sa bag-ong kalibotan sa Diyos. (Sal. 37:11, 29) Gipamatud-an ni Jesus nga kini usa ka seguradong paglaom. Siya miingon: “Malipayon ang mga malumog-buot, sanglit sila magapanunod sa yuta.” (Mat. 5:5) Si Jesus mao ang pangunang manununod sa yuta, ingon sa gipakita sa Salmo 2:8, ug aduna siyay 144,000 ka kaubang magmamando sa langit. (Dan. 7:13, 14, 22, 27) Ang mga tawong karnerohon nga mopuyo sa yuta ‘makapanunod’ sa yutan-ong bahin sa Gingharian nga ‘giandam alang kanila sukad pa sa pagkatukod sa kalibotan.’ (Mat. 25:34, 46) Ug kita gipasaligan nga matuman gayod kana tungod kay ang Diyos, nga nagsaad niana, “dili makabakak.” (Tito 1:2) Mabatonan usab nato ang susamang pagsalig sa katumanan sa mga saad sa Diyos nga nabatonan ni Josue sa dihang siya miingon sa mga Israelinhon: “Walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas. Kining tanan natuman alang kaninyo. Walay usa ka pulong kanila nga napakyas.”—Jos. 23:14.
5 Ang kinabuhi sa bag-ong kalibotan sa Diyos dili makapahigawad sama karon. Kini lahi unya kaayo: walay gubat, krimen, kakabos, inhustisya, sakit, ug kamatayon. Nianang panahona ang mga tawo makabaton ug hingpit nga panglawas ug mabuhi sa usa ka paraisong yuta. Ang maong kinabuhi mas makapatagbaw pa kay sa atong gipangandoy. Oo, nianang panahona ang matag adlaw makalilipay kaayo. Pagkakahibulongang ganti kana!
6, 7. (a) Unsay gibuhat ni Jesus aron ipasundayag kon unsay atong madahom nga mahitabo sa bag-ong kalibotan sa Diyos? (b) Sa unsang paagi nga bisan ang mga patay mahatagag kahigayonan nga magsugod ug bag-ong kinabuhi?
6 Sa dinhi pa si Jesus sa yuta, siya gihatagan sa Diyos ug gahom pinaagi sa iyang balaang espiritu sa pagpasundayag sa kahibulongang mga butang nga mahitabo unya sa tibuok yuta sa bag-ong kalibotan. Pananglitan, gisultian ni Jesus ang usa ka tawo nga paralisado sulod sa 38 ka tuig sa paglakaw. Ang Bibliya nag-ingon nga nakalakaw gayod ang maong tawo. (Basaha ang Juan 5:5-9.) Sa laing higayon, si Jesus nakahibalag ug “tawo nga buta sukad sa pagkahimugso” ug iya kining giayo. Sa ulahi, ang maong tawo gipangutana bahin sa Usa nga nag-ayo kaniya, ug siya mitubag: “Sukad sa kakaraanan wala pay gidungog nga may nagpabuka sa mga mata sa usa nga natawo nga buta. Kon kining tawhana dili gikan sa Diyos, siya wala gayoy arang mahimo.” (Juan 9:1, 6, 7, 32, 33) Nahimo ni Jesus kining tanan tungod kay gihatagan siya sa Diyos ug gahom. Bisan asa moadto si Jesus, siya ‘nag-ayo niadtong kinahanglang ayohon.’—Luc. 9:11.
7 Si Jesus dili lamang makaayo sa mga masakiton ug baldado kondili makabanhaw usab sa mga patay. Ingong pananglitan, ang usa ka 12-anyos nga dalagita namatay, nga gikaguol pag-ayo sa iyang ginikanan. Apan si Jesus miingon: “Inday, magaingon ako kanimo, Bangon!” Ug mibangon siya! Mahanduraw ba nimo ang gibati sa ginikanan ug sa uban nga atua didto? (Basaha ang Marcos 5:38-42.) Sa bag-ong kalibotan sa Diyos, aduna unyay ‘dakong kalipay’ sa dihang bilyonbilyon ang banhawon, kay “aduna unyay pagkabanhaw sa mga matarong ug sa mga dili-matarong.” (Buh. 24:15; Juan 5:28, 29) Sila hatagag kahigayonan nga magsugod ug bag-ong kinabuhi uban ang paglaom nga mabuhi hangtod sa kahangtoran.
8, 9. (a) Sulod sa Usa ka Libo ka Tuig nga Pagmando ni Kristo, unsay mahitabo sa sala nga napanunod kang Adan? (b) Pinasukad sa unsa nga pagahukman ang mga patay?
8 Ang mga binanhaw adunay kahigayonan nga makabaton ug kinabuhi. Sila dili pagahukman pinasukad sa mga sala nga ilang nahimo sa wala pa sila mamatay. (Roma 6:7) Sulod sa Usa ka Libo ka Tuig nga Pagmando ni Kristo, sa dihang ipadapat na ang mga kaayohan sa halad lukat, ang masinugtanong mga sakop sa Gingharian inanay nga mahingpit, nga sa ngadtongadto bug-os nga mahigawas sa tanang epekto sa sala ni Adan. (Roma 8:21) “Lamyon gayod [ni Jehova] ang kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nawong.” (Isa. 25:8) Ang Pulong sa Diyos nag-ingon usab nga ‘pagabuksan ang mga linukot nga basahon,’ nga nagpaila nga kadtong nagkinabuhi nianang panahona hatagan ug bag-ong impormasyon. (Pin. 20:12) Samtang ang yuta mahimong paraiso, “ang pagkamatarong mao gayod ang makat-onan sa mga molupyo sa mabungahong yuta.”—Isa. 26:9.
9 Ang mga binanhaw pagahukman, dili pinasukad sa sala nga ilang napanunod kang Adan, kondili sa ilang gipili nga buhaton. Ang Pinadayag 20:12 nag-ingon: “Ang mga patay gihukman pinasukad sa mga butang nga nahisulat sa mga linukot nga basahon sumala sa ilang mga buhat,” sa ato pa, ang ilang mga buhat human sila mabanhaw. Kahibulongan gayod kini nga pasundayag sa hustisya, kaluoy, ug gugma ni Jehova! Dugang pa, ang ilang masakit nga mga kasinatian niining daang kalibotan “dili na pagahinumdoman, ni kini sila motungha pa sa kasingkasing.” (Isa. 65:17) Kay aduna nay makapalig-on nga bag-ong impormasyon ug ang kinabuhi tugob na sa maayong mga butang, sila dili na maguol tungod sa daotang mga butang sa nangagi. Makalimtan na ang maong daotang mga kasinatian. (Pin. 21:4) Mao usab kanay masinati sa “dakong panon,” nga makalabang-buhi sa Armagedon.—Pin. 7:9, 10, 14.
10. (a) Unsa unya ang kahimtang sa kinabuhi sa bag-ong kalibotan sa Diyos? (b) Unsay makatabang kanimo sa pagpadayon pagtutok sa ganti?
10 Sa bag-ong kalibotan sa Diyos, ang mga tawo dili na masakit o mamatay. “Walay pumoluyo nga moingon: ‘Ako masakiton.’” (Isa. 33:24) Sa ngadtongadto, ang mga pumoluyo sa bag-ong yuta momata kada buntag nga hingpit ang panglawas, nga naghinamhinam sa laing maanindot nga adlaw. Sila aduna unyay makapatagbaw nga buluhaton ug makapakig-uban sa mga tawo nga nagmahal kanila. Usa gayod ka kahibulongang ganti ang maong kinabuhi! Nganong dili nimo basahon ug palandongon ang mga tagna sa Isaias 33:24 ug 35:5-7? Handurawa nga atua ka didto. Makatabang kana kanimo sa pagpadayon pagtutok sa ganti.
Kadtong Wala Magpadayon Pagtutok sa Ganti
11. Batbata ang maayong sinugdanan sa pagmando ni Solomon.
11 Sa dihang ato nang masayran ang mahitungod sa ganti, kinahanglan kitang maningkamot sa pagpadayon pagtutok niana kay posibleng makalimtan nato kana. Pananglitan, sa dihang si Solomon nahimong hari sa karaang Israel, siya mapaubsanong nag-ampo sa Diyos alang sa pagsabot ug pag-ila aron makahukom siya sa Iyang katawhan sa hustong paagi. (Basaha ang 1 Hari 3:6-12.) Tungod niini, ang Bibliya nag-ingon, “ang Diyos nagpadayon paghatag kang Solomon sa kaalam ug pagsabot sa dako kaayong sukod.” Sa pagkatinuod, “ang kaalam ni Solomon mas dako pa gayod kay sa kaalam sa tanang taga-Sidlakan ug sa tanang kaalam sa Ehipto.”—1 Hari 4:29-32.
12. Unsang pasidaan ang gihatag ni Jehova alang niadtong mahimong hari sa Israel?
12 Apan, una pa niana si Jehova nagpasidaan nga si bisan kinsa nga mahimong hari ‘dili magpadaghan ug mga kabayo alang sa iyang kaugalingon’ ug ‘dili usab magpadaghan ug mga asawa alang sa iyang kaugalingon, aron ang iyang kasingkasing dili motipas.’ (Deut. 17:14-17) Ang pagpadaghan sa iyang mga kabayo magpakita nga ang hari nagsalig sa puwersa sa iyang kasundalohan aron sa pagpanalipod sa nasod imbes mosalig kang Jehova, ang Tigpanalipod. Ug ang pagpadaghan sa mga asawa peligroso tungod kay ang pipila kanila mahimong maggikan sa paganong mga nasod sa palibot nga nakigbahin sa bakak nga pagsimba, ug ang maong mga asawa makapatalikod sa hari gikan sa matuod nga pagsimba kang Jehova.
13. Sa unsang paagi nakalimtan ni Solomon ang gihatag kaniya?
13 Si Solomon wala mamati sa maong mga pasidaan. Hinunoa, iyang gibuhat ang mga butang nga klarong giingon ni Jehova nga dili buhaton sa mga hari. Nagtigom siya ug libolibo ka kabayo ug mga mangangabayo. (1 Hari 4:26) Nakabaton usab siyag 700 ka asawa ug 300 ka puyopuyo, nga daghan kanila naggikan sa paganong mga nasod sa palibot. Sila “nagpakiling sa iyang kasingkasing sa pagsunod sa ubang mga diyos; ug ang iyang kasingkasing wala mabug-os uban kang Jehova.” Si Solomon nakigbahin sa mahugaw nga bakak nga pagsimba sa paganong mga nasod nga maoy gisunod sa iyang langyawng mga asawa. Tungod niana, si Jehova miingon nga siya “sa walay pakyas maglangkat sa gingharian” gikan kang Solomon.—1 Hari 11:1-6, 11.
14. Unsay sangpotanan sa pagkadili-masinugtanon ni Solomon ug sa nasod sa Israel?
14 Si Solomon nalimot sa iyang bililhong pribilehiyo nga maghawas sa matuod nga Diyos. Nagumon siya sa bakak nga pagsimba. Sa ngadtongadto, ang tibuok nasod nahimong apostata, nga miresulta sa pagkalaglag niini niadtong 607 W.K.P. Bisan tuod gipasig-uli ra sa mga Hudiyo ang matuod nga pagsimba, kasiglohan sa ulahi si Jesus natukmod sa pag-ingon: “Ang gingharian sa Diyos pagakuhaon gikan kaninyo ug igahatag ngadto sa usa ka nasod nga magpatunghag mga bunga niini.” Mao gayod kana ang nahitabo. Si Jesus miingon: “Tan-awa! Ang inyong balay mabiniyaan kaninyo.” (Mat. 21:43; 23:37, 38) Tungod sa pagkadili-matinumanon, ang maong nasod nawad-an sa dakong pribilehiyo niini nga maghawas sa matuod nga Diyos. Pagka 70 K.P., ang Romanong kasundalohan naglaglag sa Jerusalem ug sa templo, ug daghan sa mga Hudiyo ang nahimong mga ulipon.
15. Paghatag ug pananglitan sa mga tawo nga nakalimot kon unsa gayoy hinungdanon.
15 Si Judas Iscariote maoy usa sa 12 ka apostoles ni Jesus. Nadungog ni Judas ang maanindot nga mga pagtulon-an ni Jesus ug nakita ang mga milagro nga iyang gihimo sa tabang sa balaang espiritu sa Diyos. Bisan pa niana, wala bantayi ni Judas ang iyang kasingkasing. Gipiyal kaniya ang kahon sa salapi nga iya ni Jesus ug sa 12 ka apostoles. Apan “siya kawatan ug naghupot sa kahon sa salapi ug tigkuha sa mga salapi nga gibutang niini.” (Juan 12:6) Hilabihan gayod ang iyang kadalo nga sa ngadtongadto siya nakigkunsabo sa salingkapaw nga hataas nga mga saserdote aron budhian si Jesus sa kantidad nga 30 ka pirasong plata. (Mat. 26:14-16) Ang lain pang nakalimot sa iyang pribilehiyo mao si Demas, nga kauban ni apostol Pablo. Wala bantayi ni Demas ang iyang kasingkasing. Si Pablo nag-ingon: “Si Demas mibiya kanako tungod kay iyang gihigugma kini nga sistema sa mga butang.”—2 Tim. 4:10; basaha ang Proverbio 4:23.
Usa ka Leksiyon Alang sa Matag Usa Kanato
16, 17. (a) Unsa ka kusganon ang paglutos nga atong giatubang? (b) Unsay makatabang kanato sa pagbarog nga malig-on batok sa bisan unsa nga buhaton ni Satanas kanato?
16 Ang tanang alagad sa Diyos angayng mamalandong sa mga panig-ingnan nga gihisgotan sa Bibliya, kay kita giingnan: “Karon kining mga butanga nahitabo kanila ingong mga panig-ingnan, ug kini gisulat ingong pasidaan kanato nga naabtan sa mga kataposan sa mga sistema sa mga butang.” (1 Cor. 10:11) Kita nagkinabuhi na karon sa kataposang mga adlaw niining daotang sistema sa mga butang.—2 Tim. 3:1, 13.
17 Si Satanas nga Yawa, “ang diyos niini nga sistema sa mga butang,” nahibalo nga “hamubo na lamang ang iyang panahon.” (2 Cor. 4:4; Pin. 12:12) Buhaton niya ang tanan aron mahaylo ang mga alagad ni Jehova sa pagbungkag sa ilang integridad ingong mga Kristohanon. Si Satanas nagkontrolar niining kalibotana, lakip na sa mga paagi niini sa pagpakaylap ug impormasyon. Apan, ang nabatonan sa katawhan ni Jehova mas gamhanan pa—“ang gahom nga labaw sa kasarangan.” (2 Cor. 4:7) Makasalig kita niining gahom nga gikan sa Diyos sa pagtabang kanato sa pagbarog nga malig-on batok sa bisan unsa nga buhaton ni Satanas kanato. Busa, giawhag kita sa pag-ampo kanunay, nga masaligong si Jehova “mohatag ug balaang espiritu niadtong nagapangayo kaniya.”—Luc. 11:13.
18. Unsay angay natong tinamdan niining presenteng kalibotan?
18 Gipalig-on usab kita sa kahibalo nga ang tibuok sistema ni Satanas malaglag sa dili madugay apan ang matuod nga mga Kristohanon maluwas. “Ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.” (1 Juan 2:17) Tungod niini, dili gayod maalamon nga ang usa ka alagad sa Diyos maghunahuna nga adunay usa ka butang niining presenteng sistema sa mga butang nga mas bililhon kay sa iyang relasyon kang Jehova! Kining kalibotan nga nailalom sa pagmando ni Satanas nahisama sa usa ka barko nga kalunoron. Gitagana ni Jehova ang Kristohanong kongregasyon ingong “bote” nga kadangpan sa iyang matinumanong mga alagad. Samtang sila magpadulong sa bag-ong kalibotan, sila makasalig niini nga saad: “Ang mga mamumuhat ug daotan pagaputlon, apan ang mga nagalaom kang Jehova mao ang magapanag-iya sa yuta.” (Sal. 37:9) Busa, tutoki kining kahibulongang ganti!
Nahinumdom Ka Ba?
• Unsay pagbati ni Pablo sa ganti nga gitanyag kaniya?
• Pinasukad sa unsa nga pagahukman kadtong mabuhi sa walay kataposan sa yuta?
• Unsang dalan ang maalamon nimong subayon karon?
[Mga Pangutana sa Pagtuon]
[Hulagway sa panid 12, 13]
Sa dihang magbasa ka sa mga asoy sa Bibliya, mahanduraw ba nimo ang imong kaugalingon nga nakadawat sa ganti?