Ñañehaʼãkena jahupyty pe jopói Ñandejára omeʼẽtava

‘Aguata ahávo ag̃uahẽségui huʼãme ahupyty hag̃ua pe jopói.’ (FILI. 3:​14, ÑÑB.)

1. Mbaʼépa oñehaʼãvaʼekue ohupyty apóstol Pablo?

 APÓSTOL Pablo, ojekuaáva avei Saulo de Társoramo, ou peteĩ família oĩ porãvagui. Ohekomboʼe chupe Gamaliel, peteĩ mboʼehára ikatupyrýva hudiokuéra rrelihiónpe (Hech. 22:3). Pablo ijestúdio porã ha ikatuvaʼekue ohupyty heta mbaʼe. Péro haʼe ohejapaite umi mbaʼe oaprendevaʼekue ojapo hag̃ua Ñandejára rembipota, ha oiko chugui Jesucristo rembiguái. Upe guive oñehaʼã ohupyty Ñandejára oikuaveʼẽva chupe: tekove opaʼỹva ha ogoverna hag̃ua Ñandejára Rréinope rréi ha saserdóteramo. Ko rréino oisãmbyhýta yvága guive yvyporakuérape peteĩ múndo pyahúpe (Mat. 6:10; Rev. 7:4; 20:6).

2, 3. Mbaʼéichapa Pablo ohechavaʼekue Ñandejára oikuaveʼẽva chupe?

² Pablo omombaʼetereivaʼekue Ñandejára oikuaveʼẽva chupe, upévare heʼi: ‘Opáichavo, opa koʼã mbaʼe ambotuichavaʼekue koʼág̃a ndajapói mbaʼevérõ Cristo rehehápe. Umi mbaʼe ikatuvaʼekue areko ndahaʼéi mbaʼeve ambojojátarõ Cristo Jesús rehe. Cristo rayhupápe ahejavaʼekue opa mbaʼe, ha ahecha umíva ytýramo’ (Fili. 3:​7, 8). Pablo oikuaa rire mbaʼépa Ñandejára ojapóta yvyporakuérare, ontende umi mbaʼe ko múndope ojepotaitéva ndovaleiha mbaʼeverã, ytynteha.

³ Upe guive oñehaʼã oikuaa porãve Jehová ha Itaʼýrape, oñehaʼã ojapo Jesús heʼivaʼekue iñemboʼépe: “Ha upe jeikove opaʼỹva niko kóva: ‘Tandekuaa ndéve [Ñandejára] añete ha peteĩetépe, ha Jesucrístope, upe nde rembouvaʼekue’” (Juan 17:3). Pablo ohupytysetereivaʼekue pe jeikove opaʼỹva, upévare heʼi Filipenses 3:​14-pe: ‘Aguata ahávo ag̃uahẽségui huʼãme ahupyty hag̃ua pe jopói, Ñandejára omeʼẽtava opavave umi Haʼe ohenoivaʼekuépe Jesucristo rupi’. Haʼe oñehaʼãvaʼekue ohupyty pe jopói Ñandejára oprometéva. Ikatu hag̃ua oikove opa árare yvágape ha ogoverna hag̃ua Ñandejára Rréinope.

Tekove opaveʼỹva ko yvy ape ári

4, 5. Mbaʼeichaguápa pe jopói ohupytýtava heta oservíva Jehovápe?

⁴ Hetave oĩ oservíva Jehovápe ikatútava oikove opa ára g̃uarã ko yvy ape ári. Upéva ningo peteĩ jopói iporãitereíva omeʼẽva Ñandejára ha ñañehaʼãvaʼerã jahupyty (Sal. 37:​11, 29). Jesús heʼíva ohechauka ikatuha jajerovia ko promésare: ‘Ovyʼaite umi ipyʼaporãva hapichakuéra ndive, oñemeʼẽvaʼerã chupekuéra ko yvy imbaʼe teerã’ (Mat. 5:​5, ÑÑB). Jehová ningo omeʼẽmbaitéta ko yvy Jesucrístope, heʼiháicha Salmos 2:8. Ha 144.000 ojeporavóva ko yvy ape árigui oisãmbyhýta hendive yvágape (Dan. 7:​13, 14, 22, 27). Oĩ avei ambue ovecha oikótava ko yvy ape ári. ‘Ñandejára ojapovaʼekue voi ko yvy iñepyrũmbýpe chupekuéra g̃uarã.’ (Mat. 25:​34, 46.) Ñandejára “ijapuʼỹva” opromete koʼã mbaʼe, upévare oikomantevaʼerã (Tito 1:2). Jajeroviavaʼerã Josué ojerovia haguéicha, haʼe omokyreʼỹvaʼekue umi israelguápe heʼívo: ‘Peikuaa porã pende  pyʼaite guive Ñandejára omeʼẽ hague peẽme opa umi mbaʼe porã oprometevaʼekue. Ndaipóri peteĩ mbaʼe ohejavaʼekue ojapoʼỹ rehe’ (Jos. 23:14).

⁵ Ñandejára múndo pyahúpe entéro mbaʼe okambiáta, ndahaʼemoʼãvéima koʼag̃aguáicha, provléma memetéva. Opáta umi ñorairõ ha jejuka ha oĩta tekojoja. Opáta mboriahu, mbaʼasy ha ndaiporimoʼãvéima omanóva. Opavavénte hesãijoáta ha ko yvýgui katu oikóta peteĩ lugár neporãmba jepéva. Káda día ñanekoʼẽ porãvéta ha javyʼaitereíta. Ajépa iporãite ko jopói Ñandejára omeʼẽtava ñandéve!

6, 7. a) Mbaʼéichapa Jesús ohechaukavaʼekue umi mbaʼe porã ojapótava Ñandejára múndo pyahúpe? b) Mbaʼépa ikatúta ohupyty umi oikove jeýtava?

⁶ Jehová omeʼẽvaʼekue Jesúspe ijespíritu sánto oĩrõ guare ko yvy ape ári. Upéicha rupi Jesús ojapo heta mbaʼe porã ohechaukáva ñandéve mbaʼépa ojapóta ág̃a Ñandejára Rréino oisãmbyhy vove ko yvy tuichakuére. Pór ehémplo, la Biblia heʼi Jesús omonguera hague peteĩ kuimbaʼépe ojapómava treinta y ocho áño ndoguatavéi hague (jaleemína Juan 5:​5-9). Avei omonguera peteĩ ‘ohechaʼỹvape onase guive’. Ko kuimbaʼépe upe rire oñeporandu mbaʼéichapa okuera, ha haʼe heʼi: “Arakaʼeve noñehendúiva oĩha omongueráva ohechaʼỹvape onase guive. Ko kuimbaʼe ndoúirire [Ñandejáragui], ndaikatuivaʼerãmoʼã ojapo mbaʼeve” (Juan 9:​1, 6, 7, 32, 33). Jahechaháicha Ñandejára espíritu sánto rupive Jesús ojapo umi milágro. Upéicha rupínte ohohápe “omonguera umi hasývape” (Luc. 9:​11, ÑÑB).

⁷ Jesús ndahaʼéi omonguerantevaʼekue hasývape, omanóvape jepe omoingove jey vaʼekue. Peteĩ jey, omano peteĩ mitãkuña orekóva doce áño, ituvakuéra anga opyta vaieterei. Og̃uahẽvo Jesús pe mitãkuña rendápe heʼi chupe: “Mitãkuña, [...] Epuʼã”. Ha upepete pe mitãkuña oikove jey. Ñapensamíntena mbaʼeichaitépa oñeñandúneraʼe ituvakuéra ha ambue oĩva upépe! (Jaleemína Marcos 5:​38-42.) Ñandejára múndo pyahúpe mayma yvypóra ohecharamoitereíta mbaʼéichapa oikove jey umi omanovaʼekue. La Biblia heʼi “omanóva oikove jey vaʼerãha, imarangatúva ha imarangatuʼỹva upéichante avei” (Hech. 24:​15, BNP; Juan 5:​28, 29). Opavave koʼã oikove jeýtava ikatúta ohupyty pe jeikove tapia g̃uarãva.

8, 9. a) Mbaʼépa jahupytýta Mil Áño Jesucristo ogoverna aja? b) Mbaʼéichapa ojehusgáta umi oikove jeýtavape?

⁸ Ág̃a ojehusga vove umi oikove jeýtavape ndojehechamoʼãi mbaʼépa ojaporakaʼe omano mboyve, upéva ojehecháramo ningo omano jeýta hikuái (Rom. 6:7). Mil Áño pukukuére yvyporakuéra ohupytýta heta mbaʼe porã Jesucristo sakrifísio rupive. Mbeguekatúpe opáta ohóvo pekádo ha ojehupytýta perfeksión (Rom. 8:21). Jehová ‘oipeʼaitéta ñemano’ ha “omokãta tesay” (Isa. 25:8). Ñandejára Ñeʼẽ heʼi oñemeʼẽtaha ñandéve kuatiañeʼẽ pyahu, upépe heʼíta mbaʼéichapa ojeikovaʼerã (Rev. 20:12). Ko yvýgui oikóta peteĩ lugár iporaĩtereíva, ha upépe ae “yvypóra oikuaáta mbaʼépa heʼise tekojoja” (Isa. 26:9).

⁹ Umi oikove jeýtavape ojehusgáta umi mbaʼe ojapóvare oikove jey rire. Revelación 20:12 (ÑÑB) heʼi umi omanomavaʼekue oñemboʼyha “oñembojovake hag̃ua hembiapokuéra rehe, ojehaiháicha umi kuatiañeʼẽme”. Ko téysto heʼívo “hembiapokuéra rehe”, heʼise ojehusgataha chupekuéra umi mbaʼe ojapóvare oikove jey rire. Ñandejára ojapóvo péicha ohechauka hekojoja, ñandeporiahuvereko ha ñanderayhuha. Aje piko iporãite iñehémplo! Umi oikove jeýtava naimanduʼamoʼãvéima umi mbaʼe vai ohasavaʼekuére ko múndo añáme,  heʼiháicha la Biblia opa umíva “opytáta tesaráipe, avave naimanduʼamoʼãvéima hese” (Isa. 65:17). Heta mbaʼe ipyahúva jaikuaáta, heta javyʼáta ha ñanderesaráita opa umi mbaʼe vai jahasavaʼekuégui. Ha umi jepyʼapy koʼag̃agua katu opa reíta (Rev. 21:4). Koʼã mbaʼe ohupytýta pe “aty guasu” nomanomoʼãiva Armagedónpe (Rev. 7:​9, 10, 14, BNP).

10. a) Mbaʼéichapa jaikóta Ñandejára múndo pyahúpe? b) Mbaʼépa nepytyvõta rehupyty hag̃ua pe jopói Ñandejára omeʼẽtava?

¹⁰ Ñandejára múndo pyahúpe “avave ndeʼimoʼãi: ‘Cherasyʼaína’”. Upépe noñemanomoʼãvémai (Isa. 33:24). Mbeguekatúpe enterove ñaneresãivéta ha káda koʼẽ javyʼave reíta. Ñaiméta ñane amigokuérandi ojepyʼapýva ñanderehe ha ñambaʼapóta umi mbaʼe ñandegustávape. Ajépa iporãite upéva! Eleemína Isaías 33:24 ha 35:​5-7 ha eñehaʼã ehecha ku reimérõguáicha upépe. Péva nepytyvõta rehupyty hag̃ua pe jopói Ñandejára omeʼẽtava.

Ndojesarekói hikuái Ñandejára jopóire

11. Mbaʼépa heʼi la Biblia Salomón rehe?

¹¹ Jaikuaa rire mbaʼeichaguápa pe jopói Ñandejára omeʼẽtava, jajesareko porã vaʼerã hese. Ani oiko ñanderehe ótrore oiko haguéicha. Pór ehémplo, Salomóngui oikórõ guare rréi, ojerure Jehovápe omoarandumi hag̃ua chupe oisãmbyhy porã hag̃ua hetã (jaleemína 1 Reyes 3:​6-12). La Biblia heʼi Ñandejára omeʼẽ hague Salomónpe tuicha “arandu, akãguapy ha akãporã”. Ha upéicha rupi ‘Salomón iñarandueteve opaite kuarahyresẽ gotyo oĩvagui, ha opaite Egiptoygua arandúgui’ (1 Rey. 4:​29-32, ÑÑB).

12. Mbaʼépa heʼi porã vaʼekue Jehová umi Israelgua rréipe?

¹² Jehová heʼi porã vaʼekue umi Israelgua rréi ndoguerekoivaʼerãha “hetaiterei  kavaju” ha nahembirekoretaivaʼerãha, ‘cháke umíva onohẽne chupekuéra Ñandejára rapégui’ (Deu. 17:​14-17). Orekóvo heta kavaju pe rréi ohechaukáta ojeroviaveha peteĩ ehérsitore odefende hag̃ua ipuévlope, ojerovia rangue Jehováre. Ha hembireko retáramo katu ipeligróso, ikatúgui umíva ou ambue tetãgui ojeadorahápe ñandejára guaʼúpe ha ogueraha vai upe rréipe.

13. Mbaʼéicha rupípa Salomóngui ojepeʼa irréino?

¹³ Salomón nopenái Jehová heʼivaʼekuére ha ou ojapopaite umi mbaʼe ndovaléiva ojapo. Ombyaty hetaiterei kavaju (1 Rey. 4:26). Avei 1.000 hembireko, ijapytepekuéra oĩ heta tetã ambueguáva. Koʼã kuña omboyke Salomónpe Ñandejára rapégui. La Biblia heʼi hese: ‘haʼe niko noñemeʼẽmbaivaʼekue Ñandejárape’. Upéicha rupi oadora ñandejára guaʼúpe hembirekokuéra ojapoháicha. Upévare Jehová heʼi chupe: ‘Aipeʼáta ndehegui ne rréino’ (1 Rey. 11:​1-6, 11).

14. Mbaʼépa oiko Salomón ha umi Israelgua rehe naiñeʼẽrendúi rupi?

¹⁴ Salomón ningo orrepresentavaʼekue Ñandejárape ko yvy ape ári, péro haʼe noñatendeporãi upévare ha ou oadora umi ñandejára guaʼúpe. Tiémpo rire, opavave umi Israelgua omboyke avei Ñandejárape. Upévare áño 607-pe Jesucristo ou mboyve, upe tetã oñehundi. Jepe umi hudío oservi jey Jehovápe, Jesús oĩrõ guare ko yvy ape ári heʼivaʼekue chupekuéra: ‘Ñandejára sãmbyhy ojepeʼáta pendehegui ha oñemeʼẽta peteĩ tetãme, omeʼẽtava hiʼa hekoitépe’. Avei heʼi chupekuéra: “Pemaʼẽke, opytáko pende róga taperéicha” (Mat. 21:43; 23:​37, 38, BNP). Naiñeʼẽrendúi rupi upe tetã norrepresentavéi Ñandejárape ko yvy ape ári. Áño 70-pe, Romaygua ehérsito ohundi Jerusalén ha itémplo, ha heta hudío nomanoivaʼekuégui oiko tembiguái.

15. Emombeʼu umi ehémplo ohechaukáva mbaʼépepa opa nañañangarekóiramo ñande pyʼapýre.

¹⁵ Ñanemanduʼamína avei Judas Iscariote rehe. Haʼe ningo Jesucristo apóstol vaʼekue ha ohendúmi umi mbaʼe porãite Jesús omboʼevaʼekue, ha ohecha avei umi milágro ojapóva Ñandejára espíritu sánto rupive. Péro noñangarekoporãi ipyʼapýre. Pór ehémplo, la Biblia heʼi Júdaspe ‘oñemeʼẽ hague pe viru ryru oñangareko hag̃ua hese, ha upégui haʼe omondáva jepi’ (Juan 12:6). Itaryryieterei rupi ovende Jesúspe treinta monéda de plátare, umi rrelihión omoakãva rovamokõi atýrape (Mat. 26:​14-16). Oĩ avei ótro ehémplo ohechaukáva ivaiha nañañangarekóiramo ñande pyʼapýre. Pablo heʼivaʼekue Demas rehe, peteĩ omoirũvaʼekue chupe: ‘Demas niko chereja rei vaʼekue ohayhuvégui umi mbaʼe ko yvy arigua’ (2 Tim. 4:​10, BNP; jaleemína Proverbios 4:23).

Mbaʼépa ñanemboʼe

16, 17. a) Mbaʼépa Satanás ojapo ñandereity hag̃ua? b) Mbaʼépa ñanepytyvõ ñambohovái hag̃ua Satanás omoĩva ñande raperãme?

¹⁶ Opavave oservíva Jehovápe ojepyʼamongeta porã vaʼerã umi ehémplo oĩvare la Bíbliape. Upépe ningo heʼi: ‘Umi mbaʼe ojehúva chupekuéra techapyrã ñandéve g̃uarã, ha ojehai ñanemboʼe ha ñaneatõi hag̃ua hiʼag̃uímagui umi ára paha’ (1 Cor. 10:​11, ÑÑB; 2 Tim. 3:​1, 13).

¹⁷ Satanás, “ko múndo ruvicha” oikuaa porã “hiʼára mbykymaha” (2 Cor. 4:​4, BNP;  Rev. 12:​12, BNP). Upévare ojapóta opa ikatúva ñanemoñuhã ha ñandereity hag̃ua. Haʼe ogoverna ko múndo ha oipota umi hénte iñaña haʼéicha. Péro ñandéve ñanepytyvõ peteĩ árma imbaretetereíva: ‘pe puʼaka guasuete oúva Ñandejáragui’ (2 Cor. 4:​7, BNP). Upéva ñanepytyvõta ñambohovái hag̃ua oimeraẽ mbaʼe Satanás omoĩva ñande raperãme. Jaikuaa ningo Jehová omeʼẽha “espíritu sánto umi chupe ojerurévape”, upévare akóintekena jajerure chupe (Luc. 11:13).

18. Mbaʼéichapa jahechavaʼerã ko múndo?

¹⁸ Tuicha ñanemokyreʼỹ jaikuaávo koʼẽrõitéma ñanesãsotaha Satanás ha imúndo añágui. La Biblia heʼi: ‘Ko múndo niko opavaʼerã, ha opa umi mbaʼe ojehayhúva oĩva ipype, péro ojapóva Ñandejára rembipota katu opytavaʼerã tapia g̃uarã’ (1 Juan 2:​17, BNP). Jahechakuaavaʼerã ko múndo oñehundipotaitemaha ha upévare ñañemoĩvaʼerã Ñandejára ykére. Aníkena ñandevýro ha ñapensa ovaleveha umi mbaʼe Satanás omeʼẽva, hiʼarieténgo jaikuaa porã umíva opa reiha. Ñambojojakuaa ko múndo peteĩ várko oñapymipotaitévare, ha Ñandejára omeʼẽ kanóa oipytyvõ hag̃ua isiervokuéra iñeʼẽrendúvape. Upéva hína ikongregasión. Koʼẽrõitéma oñekumplíta ko promésa: ‘Umi iñañáva oñehundipáta, ha umi ojeroviávape Ñandejárare oñemeʼẽta ko yvy imbaʼe teerã’ (Sal. 37:​9, ÑÑB). Ñandejára múndo pyahu ningo koʼapetéma oĩ, upévare ñañehaʼãkena jahupyty pe jopói Ñandejára omeʼẽtava.

Nemanduʼápa?

• Mbaʼéichapa Pablo ohechavaʼekue Ñandejára oikuaveʼẽva chupe?

• Mbaʼéichapa ojehusgáta umi oikove jeýtavape?

• Mbaʼéichapa iporãve jaiko koʼã tiémpope?

[Porandu ñahesaʼỹijóva]

[Nóta oĩva taʼanga ndive páhina 13]

Releévo umi párte oñeʼẽva Ñandejára múndo pyahúre, reñeñandúpa ku reimerõguáicha upépe?