Shinshikenuña Hesomu

‘Nadikwatishaña nankashi, nakukabila nami nakashiki kumufunda, akansomoni.’—AFWILIPI 3:14.

1. Indi kapostolu Pawulu wadiña nakutalila isomwinyi?

 KAPOSTOLU Pawulu, atenañawu cheñi nawu Sawulu wakuTarusa, wafumini kuchisaka chaya mpuhu. Amudizishili munsakililu yawankakulula jindi, kudi Gamaleli ntañishi waNshimbi watiyakana. (Yililu 22:3) Pawulu wazatileña mudimu wamweneñawu nawu wawuwahi; ilaña washili nsakililu yindi nakwikala mukwaKristu. Watalilileña isomu dawumi wahaya nyaka damwinkeluwu—kwikala mwanta wakafwaña nawa kapristu muWanta waNzambi wamwiwulu. Iwu Wanta wakayula paradisa hanu hamaseki.—Matewu 6:10; Chimwekeshu 7:4; 20:6.

2, 3. Indi Pawulu walemesheli ñahi isomu dawumi wamwiwulu?

² Hakumwekesha chalemesheliyi chikupu idi isomu, Pawulu wahosheli nindi: ‘Ilaña yumoyu yadiñi yakunhetesha, nayifuukuli nami yakujimbañesha hohu hadi Kristu. Mwamweni, nafuukulaña yuma yejima nami yakujimbañesha hohu, nanochu chasweja kuwaha kumwiluka Kristu Yesu, Mwanta wami. Hadi yena najimbañeshi yuma yejima, ninochu nayifuukulaña nami hiwuzondu hohu.’ (Afwilipi 3:7, 8) Antu amavulu alemesha yuma yidi neyi chifulu, maheta, mudimu, nimpuhu, ilaña Pawulu wamweni yumiyi neyi hiwuzondu hanyima yakudiza chalala hankeñelu yaYehova yikwetiyi hadi antu.

³ Kufuma tuhu hayina mpinji, Pawulu walemesheli chikupu chalala chelukiliyi hadi Yehova niKristu, nawa kutalisha hachalala chenichi Yesu wahosheli mukulomba kudi Nzambi nindi: “Wumi wahaya nyaka woweniwu, wakukwiluka eyi Nzambi walala wumu hohu, niYesu Kristu watemesheli.” (Yowanu 17:3) Mazu aPawulu asonekawu haAfwilipi 3:14, akwila nawu: “Nadikwatishaña nankashi, nakukabila nami nakashiki kumufunda, akansomoni kutambika kwaNzambi kwamudi Kristu Yesu kwamwiwulu,” amwekeshaña nawu wafwilileña kuheta wumi wahaya nyaka. Eña, washinshikileña hesomu dakutambwila wumi wahaya nyaka mwiwulu neyi nswana munfulumendi yaWanta waNzambi.

Kushakama Haya Nyaka haMaseki

4, 5. Indi antu amavulu anakwila nkeñelu yaNzambi makonu achiñejaña kutambwila isomwinyi?

⁴ Etu amavulu twafuukulahu kwila nkeñelu yaNzambi, twatela kuzata nañovu kulonda twakatambwili isomu dawumi wahaya nyaka mwituña daNzambi dadiha. (Masamu 37:11, 29) Yesu washimwini nindi iku kuchiñeja kwalala. Wahosheli nindi: “Ovwaha anakooleki, muloña akaswana mpata.” (Matewu 5:5) Yesu yomweni diyi wasambilili kuswana iseki, neyi chamwekesha Masamu 2:8, nawa wukekala nawa 144,000 akayulayi nawu mwiwulu. (Danyeli 7:13, 14, 22, 27) Anyikoku acheñi akashakama hamaseki ‘akaswana’ Wanta waheseki “wayiloñesheleluwu kufumisha haaliluwu chikuku champata yamunu mwishina.” (Matewu 25:34, 46) Nawa twakuhwelela chikupu netu ichi chikaninu chikashikijewa muloña Nzambi, watukana ‘hatwambañaku.’ (Titusa 1:2) Twatela kukuhwelela yikaninu yaNzambi netu yikashikijewa neyi chakuhweleleliyi Yoshuwa hampinji yayilejeliyi aIsarela nindi: “Hikunakañanyi chuma chachiwahi nichimu chayiteneniyi Yehova Nzambi yenuku, yejima munayimoni, kwosi nichuma chinakañanyuku.”—Yoshuwa 23:14.

⁵ Wumi mwituña daNzambi dadiha wukekala wawuwahi kubadika wamakonu. Wukekala wambukaku chikupu: hikwakekala njita, wubanji, wuzweñi, kuheñesha wuñanji, kukata, nikufwaku. Hayina mpinji antu hiyakakatañaku nawa akashakama heseki dakabalumunawu kwikala paradisa. Wumi weniwu wukekala wakuzañalesha kubadika chitwafwikijaña. Eña, mafuku  ejima twakatiyaña kuwaha nankashi. Idi hiisomu dabadika kuwaha chikupu!

6, 7. (a) Yumanyi yakoñeliyi Yesu yitwatela kukuhwelela netu yakamwekana mwituña daNzambi dadiha? (b) Indi afu akatachika cheñi ñahi chihandilu chachiha?

⁶ Hampinji yadiñayi Yesu hamaseki, Nzambi wamwinkeli ñovu kuhitila mudi spiritu yindi yajila kulonda kumwekesha yuma yayiwahi yakekala heseki dejima mwituña dadiha. Chakutalilahu, Yesu walejeli muntu wakatili kalepa hadi yaaka 38 kwenda. Bayibolu yashimunaña nawu muntu yeniwu watachikili kwenda. (Tañenu Yowanu 5:5-9.) Mpinji yikwawu, Yesu wawanini ‘muntu wadiñi mputamesu kufuma havwalikiliyi’ nawa wamukili. Chimwahitili mpinji ona wadiña mputamesu amwihwili nawu yashimuni Muntu wunamutoneshi mesu, wakwili nindi: “Kufumisha kushankulu kanda achitiyañahu dehi nawu, kudi muntu watoneshahu dehi mesu amukwawu wavwalikili mputamesu. Neyi iwu iyala hafumini kudi Nzambuku, hadi kutwesha kwila chumaku.” (Yowanu 9:1, 6, 7, 32, 33) Yesu welili yuma yejimiyi muloña Nzambi wamwinkeli ñovu. Yesu wadiña ‘nakuuka akeñeleña kuyuuka’ kwejima kwayileñayi.—Luka 9:11.

⁷ Yesu hadiña nakuuka akata niayifwayi hohuku, ilaña wasañwileña niafu. Chakutalilahu, mwana wamumbanda wayaaka 12 wafwili, chumichi chaletesheli anvwali jindi kuneña chikupu. Ilaña Yesu wahosheli nindi: “Eyi mwana, nakwili nami hindukaku.” Nawa wahindukili. Anvwali jindi niantu amakwawu adiñahu azañaleli chikupu. (Tañenu Maku 5:38-42.) Mwituña daNzambi dadiha, mwakekala ‘muzañalu nankashi’ hakasañulawu antu amavulu, muloña “kwamba kekala kusañuka kwawaloña nikwawabula kuloña.” (Yililu 24:15; Yowanu 5:28, 29) Akatachika chihandilu chachiha nachikuhwelelu chakwikala amomi kufuma tuhu hampinji yakayisañulawu, ndo-o nihaya nyaka.

8, 9. (a) HaKuyula kwaKristu Kwekombakaji daYaaka, chumanyi chikamwekena nshidi yitwaswana kudi Adama? (b) Indi afu akayisompesha kushindamena hachumanyi?

⁸ Antu akasañulawu akekala nakukooleka kwakuheta wumi. Bayi neyi antu akasañulawu akayisompesha kushindamena hanshidi yakoñeluwu henohu kanda afuku. (Aroma 6:7) Hampinji yaKuyula kwaKristu Kwekombakaji daYaaka, hakazatishawu mulambu wefutu danyiloña, antu ovwahila akekala muchiyulu chaWanta akawaninaña chovu-chovu, nkumininaku akayifumisha chikupu muwuduñu wayuma yafumaña munshidi yaAdama. (Aroma 8:21) Yehova ‘wakaminya kufwa chahaya nyaka; Yehova wakakombola madilu mumesu awantu ejima.’ (Isaya 25:8) Izu daNzambi dahosha cheñi nawu ‘akabakula nyikanda,’ ichi chinakumwekesha nawu antu akekalaku hayina mpinji akayinka nshimbi jajiha. (Chimwekeshu 20:12) Chakela iseki anadibalumuni dehi kwikala paradisa, “akwakushakama munu mwishina akadiza kuloña.”—Isaya 26:9.

⁹ Antu akasañulawu hiyakayisompeshela hanshidi yaswaninuwu kudi Adamaku, ilaña akayisompeshela hayuma yakatondawu kwila. HaChimwekeshu 20:12 hahosha nawu: “Hiyakusompesha afu nansañu jayuma yelilañawu yasonekeluwu dehi munyikandoyu,” dikwila nawu, yuma yakakoñawu hanyima yakuyisañula. Yehova wemika chakutalilahu chachiwahi chawuñaji, luwi, nikukeña. Kubombelahu, yuma yatama yamwenuwu muwumi wawu mukanu kaayi katama “hiyakayanuka nawaku, hiyakenza nikumuchimaku.” (Isaya 65:17) Hamuloña wansañu yayiha yakukolesha yakekalaku niyuma yayiwahi yakadiluñishawu muwumi, yuma yakunyima yatama hiyakayineñesha cheñuku. Hiyakanuka yuma yatama yamwenuwu kunyimaku. (Chimwekeshu 21:4) Yumiyi diyi yikamwekena “izaza deneni,” dakapuluka Amagedoni.—Chimwekeshu 7:9,10,14.

10. (a) Indi wumi mwituña daNzambi dadiha wukekala ñahi? (b) Chumanyi chikuyikwasha kushinshika hesomu dawumi?

¹⁰ Mwituña daNzambi dadiha, antu akashakamaña chakadi kukata hela kufwa. “Mwenimbu hakahosha nindi, Ami nakataku.” (Isaya 33:24) Nkumininaku, antu akashakamaña heseki dadiha akekala akola kumujimba mpinji yejima, nikuzañalala nakutalila ifuku dikwawu dadiwahi. Akatiya kuwaha kuzata mudimu wawuwahi, nikudikunda nawantu ayikeña. Chalala wumi wamuchidiwu hiisomu dadiwahi. Komana kwila  mubakula Bayibolu yenu kulonda mutañi wuprofwetu wekala haIsaya 33:24 ni 35:5-7 nehi? Fwikijenu neyi mudi mwituña dadiha. Ichi chikuyikwasha kushinshika hesomu.

Amakwawu Alekeli Kushinshika Hesomu

11. Lumbululenu ntachikilu yayiwahi yakuyula kwaSolomoni.

¹¹ Chitwadiza hanidi isomu, twatela kuzata nañovu kulonda tushinshikeñahu muloña tunateli kuleka kushinshika hanidi isomu. Chakutalilahu, hampinji yekaliliyi Solomoni mwanta muIsarela wakushankulu, walombeli kudi Nzambi mukudizoza kulonda yamwinka maana nikashinshi kakwiluka chakusompesha antu Jindi chachiwahi. (Tañenu 1 Anyanta 3:6-12.) Chuma chafuminumu, Bayibolu yahosha nawu: “Nzambi wamwinkeli Solomoni maana amavulu nankashi nikashinshi kabadika.” Chalala, “Maana aSolomoni abadikili maana awantu ejima akumusela, nimaana akuEjipitu ejima.”—1 Anyanta 4:29-32.

12. Kubabeshanyi kwababesheliyi Yehova antu ekalileña anyanta muIsarela?

¹² Hela chochu, Yehova wasambilili kusoñamisha nindi muntu wejima wukwikala mwanta “bayi akadivulishila tuwaluku,” hela “kuvulisha ambanda bayi akadivulishilawuku, akenza kamuteñulula muchima windi.” (Kuhituluka 17:14-17) Kuvulisha tuwalu kwadi kumwekesha nawu mwanta washindameneni muñovu yamashidika indi kulonda akiñi muza chatela kushindamena hadi Yehova, Mukwakukiña. Nawa kuvulisha ambanda kwadiña kwatama muloña ambanda amakwawu adi kufuma kunyuza yawasenji yadifukwileña kudi anzambi akutwamba, nawa ambanda wenawa adi kuteñulula muchima wamwanta kulonda yafutaleli kudifukula kwalala kwaYehova.

13. Indi Solomoni walekeli ñahi kushinshika hayuma yamwinkeluwu?

¹³ Solomoni hatiyilili iku kubabeshaku. Ilaña, walili chuma chakanishiliyi Yehova chikupu hatooka nindi anyanta bayi achilaku. Wapompesheli  tuwalu twatuvulu niakwakwendela hatuwalu amavulu. (1 Anyanta 4:26) Wadiña nawañodi jindi 700 niañodi jindi anduñu 300, amavulu afumini kunyuza yawasenji yadiña kwakwihi. Awa ambanda ‘amubalumwini muchima windi nakulondela ankishi; muchima windi kuya chikupu kudi Yehova nehi.’ Solomoni watachikili kwila yuma yayishimashima yakudifukula kwakutwamba kwanyuza yawasenji kwamudizishiluwu kudi añodi jindi. Chafuminimu, Yehova wamulejeli Solomoni nindi: “nakakutabula wanta bwe-chi.”—1 Anyanta 11:1-6, 11.

14. Yumanyi yafumini mukubula kwovwahila kwaSolomoni nimunza waIsarela?

¹⁴ Solomoni walekeli kushinshika hakukooleka kwakuwahi kwadiñayi naku kwakumwimenaku Nzambi walala. Mwanta wadiñijili chikupu mukudifukula kwakutwamba. Chimwahitili yaaka, antu amunyuza yejima ekalili akwakusekesha Nzambi, nkumininaku ajilumukili mu 607 B.C.E. Hela chakwila aYudeya atachikila cheñi kudifukula kwalala, chimwahitili yaaka yayivulu Yesu wahosheli nindi: ‘Nukuyileja nami, wanta waNzambi akayamukawu, akawinka munza wakasoñaña nyikabu yawu.’ Chumichi chamwekeni. Yesu wahosheli nindi: ‘Talenu itala denu anayishilidu dehi dineli dehi kwachihembi hohu.’ (Matewu 21:43; 23:37, 38) Hamuloña wakubula kashinshi, munza weniwu wajimbesheli kukooleka kweneni kwakumwimenaku Nzambi walala. Mu 70 C.E., mashidika akuRoma akisañeni Yerusalema kushilahu nitembeli, nawa aYudeya amavulu asheleluhu ekalili anduñu.

15. Shimunenu yakutalilahu yawantu alekeli kushinshika hayuma yalema nankashi.

¹⁵ Yudasi Isakaroti wadiña wahakachi kawapostolu aYesu 12. Yudasi watiyili ntañishilu yayiwahi yaYesu nikumona yihayamisha yakoñeliyi nawukwashu waspiritu yaNzambi yajila. Hela chochu, Yudasi hahembeli muchima winduku. Amwinkeli mudimu wakuhemba njeki yamali aYesu niawapostolu jindi 12. ‘Wadiñi ikombi, wadiñi wahemba njeki, wanonenañamu mali ashilañawu munjeki.’ (Yowanu 12:6) Waswejeli lwisu chakwila nkumininaku wakwatili kafuta kakumufukeja Yesu nawatupristu anfwikiji kulonda amwinki mali asiliva makumi asatu. (Matewu 26:14-16) Muntu mukwawu walekeli kushinshika hesomu wadiña Demasi, mulunda wakapostolu Pawulu. Demasi hahembeli muchima winduku. Pawulu wahosheli nindi: “Demasi nanshiyi dehi, nakeñi yamakonu.”—2 Timotewu 4:10; tañenu Yishimu 4:23.

Yuma Yitwatela Kudizilaku

16, 17. (a) Indi kukala kutwamonaña kukweti ñovu yishika hadihi? (b) Chumanyi chikutukwasha kudikaña nakukala kwejima kukutuletalayi Satana?

¹⁶ Ambuña aNzambi ejima atela kutoñojokahu chikupu hayakutalilahu yekala muBayibolu, muloña atuleja nawu: “Yumiyi dinu yayishikeneni wena kulonda etu tutaliluhu; ayisonekeli kulonda kutukonkomwena, etu tudi kunu kunsa yanyaka yamakonu.” (1 Akorinda 10:11) Makonu, tunakushakama mumafuku akukuminina akanu kaayi katama.—2 Timotewu 3:1, 13.

¹⁷ Satana Diyabolu, “nzambi yampata yamakonu,” neluki nindi kunashali dehi “mpinji yindi yantesha hohu.” (2 Akorinda 4:4; Chimwekeshu 12:12) Nakuzata hakumina ñovu jindi hakwila nawu yaluwañeshi ambuña aYehova kulonda afumpi nshimbi jawu jawakwaKristu. Satana diyi wayulaña kanu kaayi kushilahu niyozelu yazatishañayi hakutiyakesha nsañu yakutwamba. Hela chochu, antu jaYehova akweti chuma chasweja ñovu—“ñovu jabadika nankashi.” (2 Akorinda 4:7) Twatela kushindamena haniyi ñovu yaNzambi kulonda yitukwashi kuumika kukala kwejima kunateli kutuletelayi Satana. Dichi atuleja kutwalekahu kulomba, nakukuhwelela netu Yehova ‘wukuyinka antu akumulomba spiritu yajila.’—Luka 11:13.

18. Twatela kwikala nayililu yamuchidinyi kutalisha hakanu kaayi kamakonu?

 ¹⁸ Twakoleshewaña cheñi hakwiluka netu kaayi kaSatana kejima keña akijilumuni ilaña akwaKristu alala akapuluka. “Mpata yamunu mwishina yikuhita, nikufwila kwayu kwatama, hakwinza muntu welaña muchima waNzambi washakamaña haya nyaka.” (1 Yowanu 2:17) Kwesekeja nanawa mazu, hichikuwahaku neyi kambuña Nzambi yotoñojoka nindi mukanu kaayi kamakonu mudi yuma yasweja kulema kubadika wulunda windi naYehova. Aka kaayi kadi mumakasa aSatana kadi neyi watu wunakujiya. Ilaña, Yehova waloñesha chipompelu chawakwaKristu chidi neyi ‘watu wakupulwisha nachu wumi’ wawambuñindi ashinshika. Chineli anakuswila kwakwihi netuña dadiha, atela kukuhwelela ichi chikaninu chakwila nawu: “Antu elaña yuma yatama akayifumishamu; ilaña akumuchiñeja Yehova akaswana ituña.” (Masamu 37:9) Dichi dinu, shinshikenuña hanidi isomu dadiwahi.

Komana Munakwanuka?

• Indi Pawulu watiyili ñahi hesomu dadiña nakutalilayi?

• Indi antu akashakamaña hamaseki haya nyaka akayisompesha kushindamena hachumanyi?

• Chumanyi chachiwahi chimwatela kwila yinu mpinji?

[Malwihu aKuzatisha haKudiza]

[Mwevulu wudi hefu 13]

Komana mwafwikijaña neyi munatambwili isomu hampinji yimwatañaña nsañu yamuBayibolu?